平實的人生

詩篇24：1-6

陳柏壽 牧師

金句：主耶穌講：「所羅門極行伍的時，伊所穿的，毋值著這號花的一蕊！」（馬太6： 29）

聽講有一個姓林的食酒駛車，去互警察仔截落來。伊的駕照用久，名霧霧，干單第一字「林」看有。警察仔問伊：「你是林（lim）啥物？」「無lah，警察大人，我才lim二杯幌頭仔niâ啦！」「我是講你叫啥物？」「無lah！我才叫一盤土豆及一粒滷卵niâ啦！」

這个lim到醉濛濛的林san，伊已經及現實世界脫節啦！伊的世界及警察問伊的世界，是兩個世界。

最近牧師娘給我complain講伊聽我講道將近四十冬，日本話「講道」叫做「說教」，伊講我「說教」四十冬，聽無啥物，攏差不多！伊講我真濟是及這世間脫節啦！伊講：「阮查某人看代誌真緊、真簡單、真清楚，阮有第六感，代誌目睭尾gió一下，著差不多知影意思，毋免像恁查埔人，講到lò-lò-tn̂g，彎來彎去，到尾仔阮毋免想嘛知恁欲講sehⁿ！世間的代誌毋免講到hiah複雜啦！上帝的道理，明明一看toh知，你toh tī-hia講歸點鐘，講到大家leh啄龜！」

我是給伊講，說教親像阿里山的鐵路，若無彎來彎去，無法度pe̍h到山頂，講道若無講歸牛車，人毋知你做牧師hiah有學問。這款代誌你是日本的神學院畢業的，你豈毋捌？

但是有時仔想起來嘛是有影，主耶穌真正真少講啥物大道理。伊beh講互hiah-ê kan-tāⁿ 會曉掠魚的學生聽有的道理，攏是真簡單的話。親像伊講：試看野地的百合花，伊無紡che，無勞苦，但是我kà恁講，所羅門王上行伍的時，就是最興旺的時，伊所穿的衫，嘛無值得這蕊花hiah媠！

這款簡單的道理，人聽袂入去。人卡愛聽彼種豪華的演講，卡愛聽有名的人的演講。人卡愛一句話，用十句去講的演講。世間的博士論文攏嘛是按呢寫出來的。

主耶穌若準是將世間的代誌分做二旁：一旁是空中的飛鳥及山內的百合；另外一旁是所羅門王hit領繡金的外衫。

人對hit領金光閃閃的外衫看卡kà目；看孤單的山內的百合、看厝鳥仔，無值二銑錢。

人卡愛gâu講話、gâu滑溜的說教；卡無欲聽簡單的話。

人不但愛聽lò-lò-tn̂g的說教，閣真愛聽刺激的說教。有的gâu講道的牧師，真gâu講彼種心酸的故事，講五分鐘toh互你目屎流目屎滴。講道講到甜but-but，鹹tok-tok，酸giu-giu，苦tah-tah，烏ma-ma。人生豈有影hiah-nī刺激？講道豈袂當用平常心來講？

世間真刺激的宣傳家、真gâu poa̍h-péng的政治家，親像台灣一個行政院的祕書長，貪污真濟錢，但是佇電視機的頭前，伊會罵別人貪污罵真大聲，會將烏講做白、白講做烏。

真濟靠上帝食飯的神棍，嘛是按呢，本來是真淺白的道理，講kah親像神仙的故事，講kah互阿婆阿媽哭歸堆。講若無按呢，講道著袂爽快，toh袂當做大佈道家。世間的道理豈真正按呢？

有的牧師khiā台頂，叫會眾出來，排做一排，伊用指頭仔給伊tok一下，一個一個互伊tok著攏會倒佇土腳phih-phih-chun，親像表演魔術。彼日吳長老kà-goá講，伊看來看去聖經內面，主耶穌只有叫人起來行，毋捌予人倒落去neh！

主耶穌講放蕩子的故事，伊的背景並毋是表示放蕩子是世間的常態，是講放蕩子是這世間的異態，是社會生活中特殊的個案。主耶穌絕對毋是叫咱大家攏來做放蕩子，給老爸的家伙攏給匪類了了， khai互乾。若是世間攏來做放蕩子，就天下大亂。基督教若是只有經過按呢才有法度傳福音，這个基督教應該是邪教。

咱世間99%的人不但毋是放蕩子，其實咱大家攏是彼个放蕩子的阿兄。一日到暗，做到親像一隻牛，老老實實做，毋敢嫌艱苦。提人一斤，心內就袂得過，干單一直想欲還人16兩。

牧師佇台仔頂，卡講就是 hit隻摔落去山坑的狡怪亂傱的羊仔，講到為著chhoē hit隻，刺phè滿埔，千辛萬苦，講到全教會人流目屎，大家攏leh唱Amazing Grace。無人為著咱這群chhun 的 99隻羊仔，講半句話。耶穌基督的福音豈真正是按呢？

講著99隻羊，頂禮拜我看著今年美國統計局的數字，最頂面1%人口的人的收入，比因舊年的收入，增加275%。咱chhun的人大部份收入攏減少。台灣koh-khah是按呢，有錢人愈有錢，無錢人愈無錢。上帝豈真正只有顧hit隻羊仔，彼个1%，無咧顧chhun的99隻呢？

放蕩子因阿兄毋是完全攏好，我想伊濟少有二個問題：第一個問題就是在佇：伊毋知老爸疼彼个放蕩子的心情，毋知老爸竟然會疼放蕩子。

老爸講，恁小弟仔已經「反悔」閣轉來，所以咱應當著歡迎伊轉來。

有反悔，toh會得救。真濟人想講「反悔」就是「得救」的前提條件，開嘴合嘴就是反悔，全教會攏著反悔症。大家想講這个阿兄毋免反悔，所以無得人歡迎，無互人刣牛倒羊來請人客，一世人毋捌互老爸買一領卡成樣的好衫來穿。小弟仔放蕩了後，煞轉來反悔穿媠衫。

咱來怪大兄無反悔，實在真無道理。你叫一個無犯錯的人反悔，除非用景美看守所的酷刑來刑，無是無法度啦。你欲叫伊反啥物悔咧！？

基督徒豈真正是一切攏著反悔才會入天國？

教會內講「著反悔」；但是基督教mā有另外的一旁，就是著向前行，啥物攏毋驚，手giâ犁，面毋通看後旁，羅得啊，目睭毋通越頭，若無會變鹽柱。

人毋通干單活佇既成的教條及宗教語言內面；著活佇現實世界，現實世界一定有二邊的道理。

真濟人給我講：我一世人清清白白，一銑一分攏是用目屎及流汗thàn來的錢，一世人毋捌貪人、騙人，克虧人，我用這二隻手thàn三頓食，你叫我著代先反悔才會當信上帝，我想袂通。

用這个角度去看大兄，若是佇人生的考場來講，大兄應該每一擺攏得著甲頂，但是來到主耶穌的面前的考場，伊煞攷無及格。

主禱文內面所講：「願你赦免阮的辜負，親像阮赦免辜負阮的人。」照律法及規矩，這个放蕩小子應該有外面的律法及規矩給伊刑罰及制裁才著。放蕩子若是無受著老爸及阿兄的刑罰及制裁，最後chhun的只有是律法及規矩「制裁袂著」的部份，這部分只有內心及良心才有法度解決，就是咱家己給伊赦免，亦無就是上帝給伊赦免。

這个境界實在毋是大兄做會到的部份，嘛毋是大兄的責任。是上帝的代誌。叫大兄赦免卡無簡單，叫上帝赦免卡簡單。大兄應該將一切交互上帝。世間有真濟無理的代誌，外口看袂出的代誌，只好交互上帝。咱chiah的做大兄的人，親像啞口的tè死子，有話無地講，咱干單會當認份。

放蕩子的阿兄的第二的問題就是伊完全去互工作縛死佇hia。目睭pe̍h金to̍h是煩惱牛猶未食草、牛母猶未tēⁿ奶、豬寮猶未掃、田水猶未ak，透早做到暗，無一時閒。Tú-hó及馬大佇灶腳it-tì煩惱人會腹肚iau，毋甘人無飯好食，袂曉親像Maria按呢坐佇耶穌腳前聽道理仝款。

生命若是簡單會當出去放蕩，不管三七二十一toh出去，出在去開錢討債，毋知欲goâ–ni爽快leh！亦無袂曉乖koaiⁿ佇有冷氣的冊房內準備道理，干單我的是道理，恁的攏毋是道理，猶無就是佇phang-phài的禮拜堂聽道理，毋免去外口透風落雨，日頭chhiah-iāⁿ-iāⁿ，田中央跪teh搓草，毋知欲goâ–ni爽快leh！

人間的宿命就是你無做袂使，但是siūⁿ過做嘛袂使。歸日chông來chông去親像一隻狗蟻，嘛袂使。做到無暝無日，做到攏無家己，做到無頭無腦、無三無四、無閒無工，頭殼內無上帝，嘛袂使。

你想按呢做才是人，其實過頭做嘛毋是人。因為做人除了用二隻手做工，嘛著用頭殼去想代誌才會使。

大兄的老爸講：子啊！你逐日及我做伙，我所有的攏是你的啦！意思是講，我互你的恩典已經有夠額啦。

啥物叫做「恩典」？恩典意思是講你無應該得著的代誌你去得著，按呢才叫做恩典。大兄拍拚流汗得著的成果，你講這是互伊恩典，實在嘛講袂通。小弟得著老爸特別恩待，是真正得著恩典，咱會同意，但是大兄每日平實做人，實在講起來，伊無必要「恩典」嘛是會當真光明正大，佇上帝面前做人。

有人會講，到彼日你才會知啦，無論你有偌濟錢，上帝欲召你轉去彼日，你toh會知上帝的恩典啦！

「恩典」這款話雖然真著，真有道理，但是毋是人話，毋是人應該講的話。 這句話是khiā佇比人koh-khah高的所在，就是上帝的地位，teh講的話，是khiā佇人生的「制高點」講的話。

上帝的恩典毋是你我會當強求，嘛毋是你我會當煩惱的代誌。人行無路、行到絕路的時，時間到的時，上帝的恩典才會到。所以佇基督徒人生內面，khah少講上帝的恩典較好。

按呢講起來咱遮的做放蕩子的阿兄的人欲按怎過日？

Miⁿ-á-chài鋤頭giâ咧beh-koh出門去做田的時第一項就是代先覺悟，知影今仔日上帝欲落雨不但落佇我的田，嘛落佇別人的田，不但落佇我這種好人的田，嘛落佇歹人的田，不但落佇好心的人的田，嘛落佇歹心的人的田。

牧師啊，小等一下！啥人給你講你是好人，因是歹人？決定好人歹人，是上帝的代誌，毋是咱的代誌。

第二咱代先愛知，上帝疼世間人，甚至將伊的獨生子耶穌基督賞賜互世間人。上帝賞賜耶穌互世間人，毋是干單賞賜互基督徒，嘛毋是賞賜互咱來教會的人。上帝為咱全世間人來的，所以咱毋通分因是教會外、咱是教會內；因是世俗人、咱是上帝的人。全世界的人，咱攏是上帝的人。

咱定定想講咱上gâu，上khiàng，上帝對咱特別好。無影啦！咱想講咱是世界的中心，太陽系是宇宙的中心，chím-má科學家才發現太陽毋是天頂的中心，太陽是佇軌道中咧se̍h別個星球，太陽系毋是中心，伊咧se̍h koh-khah 大輾（lèng）的其他的軌道。咱著知咱家己毋是中心。世間無中心啦！

今年6/11一個高中的老師佇Massachusetts 的 Wellesley High School 互人請去做畢業典禮演講，伊的題目是：You are not special，「恁chím-má欲畢業，全世界這時陣差不多有二千八百萬的高中生今仔日欲畢業。逐家人若是攏想講伊是special，世間的special著無啥物意義啦！」這篇演講孤狗(google) 講是今年全美國畢業典禮最好的演講，學生及家長攏認為真好。因為伊無講大聲話，伊講實在的話。伊叫學生著認份，毋免胖風，毋免誇口，著實實在在做人，著知影咱所捌的真有限。

你掛烏目鏡，家己一個佇街仔路行路，會感覺真iang；但是若是全街路幾百幾千人攏掛烏目鏡，你toh無啥物通泱啦！奇怪thài無人給我相借問！？因為你掛烏目鏡，人毋捌你是啥物烏狗兄抑是烏狗嫂仔啦！

咱做放蕩子的阿兄，毋是因為咱是special，毋是咱一世人攏想欲贏人，攏欲比人卡gâu卡才情，卡大尾。是因為咱知活佇上帝國的內面，人毋是干單用錢來評價，是在佇你會曉活佇上帝的內面，老老實實平平安安過日，親像山頂彼蕊百合花。

逐日起來，為著顧三頓，無論夯鋤頭，或是坐佇computer頭前，毋通頭殼lê–lê it-tì做落去，做到無天無地。

拜二的Wall Street Journal報導講：一日坐佇computer頭前超過三點鐘，歲壽減三年，一日坐佇hia看電視三點鐘，46%的人會短命；逐日看電視8 點鐘，80%的人會短命。坐愈久，歲壽愈短。著起來做其他的手工。

年紀開始欲老，就是腳會變bái。腳變bái，第一重要就是出去外口行路。出去行路，看路邊的野花，看空中的雲彩，聽雷公咧陳，雨咧滴，水雞咧叫，狗仔咧吠。

生活中遮的予人看做最世俗的代誌，實在就是上帝賞賜世間最神聖、最可愛、最有價值、最值得互咱懷念痛惜的物件。

咱用這種目睭來看世間，來及上帝講話，就世間的代誌無啥物叫做世俗、低路的代誌。世間萬事攏是神聖可愛的代誌，連你咧食飯、去便所、食藥仔、睏佇眠床，攏是最神聖的行為。毋是咱來教會做禮拜才是神聖的行為，咱生活每一日咧振動、每講一句話、每一個思想、每一個感情攏是神聖的行為，上帝攏活佇hìn內面。

逐日最少用五分鐘，給你khǹg去外口，親像你是第三者來看你家己，將今仔日的代誌，佇日記內老老實實寫起來，閣將你對代誌的看法及感想寫起來。二三十年以後，你閣掀起來看，看你真正有咧活，活到真活跳，活到真有意義。

平實的人生意思是講，逐日目睭thi̍h金著看著新的人生，一日一生，今仔日to̍h-sī欲給活做一世人。逐日攏用親像囡仔的目睭看世間，逐項事攏是新鮮，逐項代誌攏是大代誌，看細項代誌及細項物件真重要。Hit支鋤頭摸久著親像家己的血骨，hit台computer、hit支筆、hit台讀冊桌仔，摸久就變做家己的血肉。逐項看是不動，看是死去，看是物質的物件，攏是咧振動，攏是活的，攏會當給伊理想化，做咱精神的一部分。

你想一滴汗比一粒目屎，tó一旁卡重？目屎流過，過暝日就乾。放蕩子轉來，過暝日若無開始認真做工，隨時會去予人拚落去糞埽籠。但是咱的汗，滴佇土腳，會互種子發芽、開花、結子。當然咱流的汗，比一時得流出來的目屎khah重。

其實咱著安心，每次主耶穌講著放蕩子，彼位大兄的面就出現；每次主講著hit隻失落的羊，另外99隻的羊就隨時出現；每次伊講著馬利亞，隨時佇灶腳煮飯的馬大的聲音就會出現。主耶穌並無bē-kit-tì另外彼旁的主角，主耶穌並無忽略咱生命的本質，主耶穌關心世間平實生活的人。

人生一定有大風大湧，咱著去對付。但是著一步一步，實實在在去對付，袂走閃tih。日本和尚達磨講一句話：jinsei，nigeba ka nái。這个人生，無位好閃啦！平實做人是人生成功的絕對條件，平實的人生是人得救的必要條件，上帝會一步一步牽咱來行。

用聖經的話講，平實的人生就是：「是誰會上耶和華的山？是誰會豎佇伊聖的所在？就是手清氣，心清潔，存心無向虛假，無用奸詐咒誓的人。這號人欲得著耶和華賜福，閣對救伊的上帝得著義。」

「主啊，你知影阮做人的艱苦，著流汗流滴，才有法度過日。不但按呢，你嘛親自來這世間做人，你一生流汗做工，顧全家人的生活，chhiâⁿ小弟小妹大漢，做阮大家人生的模樣。懇求你互阮無胖風、無嘻譁、無奸巧、無白賊，每日實實在在做工，親像你佇世間認真做工的日子仝款，互阮的人生得著你的歡喜鑒納。靠救主耶穌的聖名祈禱。阿們。」