台文翻譯專輯(一)

『今年（西元2008年）3月22日台灣的總統選舉，民進黨阿扁的政府大敗，超過大半數台灣人民的決定結 果，就是甘願beh koh互國民黨『政權輪替」再次執政。對原本猶有寄望的濟濟台灣人來講，he是一場大惡夢。連in『中國』國民黨嘛料想未到會贏kah有剩。台灣政府的 『變天』，一時互人無法度接受，半暝驚醒，歸暝未睏。台灣人的運命敢一定就是按呢嗎？台灣的歷史kap兩岸政治的起起落落就親像無情的海湧，一湧koh一湧，無終無止啦！

歷史以來的猶太人就是按呢去互上帝的湧拍kah大漢、拍kah成功。猶太人的天資絕對無比世間任何民族khah好。摩西引導60萬散民難民tui3埃及出來入去新天地，但是一路卻受著百姓的怨慼，沿路一直喝講beh轉去埃及。因為轉去埃及雖然是作人的奴隸，但是有肉thang食。摩西不得已ka7上帝的名請出來，koh發佈十誡來制限人民的行為。按呢經過40冬。進入迦南地以後，百姓繼續放蕩，boe7記得上帝，國家只有暫短的中興，隨時分裂作南北二國，無外久就互人掠去巴比倫。詩人講in佇巴比倫的河邊，想著故鄉就流目屎。這群人後來koh互波斯、希臘、羅馬人管轄，流浪到中央亞西亞，北蠻西遷到中歐、西歐、世界各地，喪失in家己的文化語言kap民族特性。幾千年以來民族的流浪，叫做Diaspora。經過二次大戰kap大屠殺，猶太人才覺醒，beh恢復in家己的文化、語言kap民族意識，起造in家己的國家kap民族。In的動力tui3叨位來？就是tui3永無停步的上帝的風湧，一波過一波硬拍出來、硬煉出來的結果。

咱今仔日的台灣人無論是渡烏水溝過來的，或是原來的原住民駛獨木舟出去的，攏是一波過一波的風湧的產物：對海賊、清朝惡官、台奸土匪，到荷蘭仔、西班牙、日本仔的殖民統治，一直到支那人國民黨的獨裁鴨霸的侮辱kap欺負的今仔日。咱的希望佇叨位？咱的希望只有看著pong7空的遠遠的所在，有一圈小小圓圓的光明。

台灣人beh獨立出頭天的意志kap台灣人民主、自由、民族意識的觀念，攏是天公上帝經過長年風湧的鞭拍、打擊、挫折、磨練，才漸漸形成的。咱對過去kap現在的種種風湧，不但m7-thang存有失志的念頭，更加將伊當作好的助力，因為對咱的將來kap咱的子孫後代有幫贊。

咱用12冬發行『台文通訊』的精神，接續來經營『台灣青年』新的事工，就是承接台灣人歷史中一波過一波的挑戰的過程。Che是真大的工程。今仔日、明仔再咱可能看be7出甚物成果，但是咱將chiah-e5資料排列佇咱hiah-e5受漢字教育的青年人的面前，in一定會感受著過去咱的前輩，佇草根的地面，如何拍拼，一字一字將當時的歷史事件，用純樸的文字記錄落來的過程。將chiah-e5『過程』留落來，就是咱的『目的』。咱teh拍拼的過程，就是咱生命的目的。

這本冊的出版，是阮計劃發行一系列的第一小冊，beh獻互咱的母親台灣。阮出版的數量有限，非賣品，你若beh愛，請寫批互阮。請大家繼續支持、協助、支援。

下面是台灣青年日文版精選台文翻譯專輯（一）ê PDF 檔案:

1. 第一部

2. 第二部

3. 第三部

4. 第四部