自由精神的攝理

介紹新書：『用人智學的觀點解釋啟示錄』

陳柏壽 牧師

『上帝只有佇遠遠招呼；上帝m̄-bat強制。』

『God beckons, never forces!』

這是我佇紐約哥大讀冊的時，恩師Douglas Sloan永遠留佇我心內的一句話。

最近對紐約來的現代鋼琴家坂本龍一 (Sakamoto Ryuichi) 的演奏，互我受著真大感動，伊用音樂的表現闡明人類及自然的共生、人類及人類的共生及互助，以及世間事物的多樣性及包容性。最近畢卡索 (Pablo Picasso) 佇西亞圖的畫展，互我最大的感觸亦是伊每幅圖包涵的多重意境，譬如講伊一幅圖叫『戴帽仔的女人』，將女性的面，區分真濟小區域，用不同色彩來表現，眼、鼻、嘴攏khǹg不同所在，有不同表情，互人感覺著女性心理的多面性、多樣性、複雜性及包容性。可能就是因為世間有這種女性的包容及深度的精神內涵，互人類這種動物會當繼續佇地球繁榮生存落來。

這二種人我想可以代表不論佇東方或西方，人類有人間的共通點，就是人間的精神，人作中心的精神。這種人間性，簡單講叫做人本主義或人文主義。東西文化攏有不同的人本主義的表現方式。基督教的人文主義佇歷史上，一直隱藏佇教會的教條、組織、教理的底層，一直無法度超越教會的封鎖；但是二千年以來，伊親像藏佇太平洋深海的黑潮伏流，對南海赤道，經過台灣黑水溝、日本海，侵入北極以及世界各角落；對保羅時代的斯多亞哲學、黑暗中世紀的修道主義，一直到文藝復興、理性主義，一直到唯智神祕主義 (gnosticism)、自由思想、民主制度，一直到現在思想的超現代主義、種族、文化、價值觀的平等，攏屬同一個傳統，攏及教會體制無一定有關係，甚至是一種抵抗教會、反對教會的伏流；但是伊的勢力真強，親像伏流佇深海，蘊藏佇人類的意識內面，教會無法度制止。人本意識甚至變作領導教會及社會的力量。莫怪主耶穌bat警告人，教會若無出聲，路邊的石頭嘛會出聲，就是這個道理。

人就是人，人m̄是上帝，所以人欲研究聖經，只有會當用人的立場出發，m̄是用上帝的立場出發，尤其是研究真濟謎點的啟示錄，更加著用科學的、人性的、理性的角度去探討。這種研究聖經的方法及態度，叫做『人智學』的態度，就是用人有限的智慧及認識，去追尋上帝的意思。

『人智學』特別是西方文明中真強的傳統，不但佇神學，也佇政治、經濟、社會、學術、教育各方面有決定性影響的力量。這個力量及東方社會的封建、固守、復古的傳統及宗教，更加是一種無法度妥協的對立。『人智學』就是人類自由精神的代表。人智學學者深信主耶穌所講：真理會予人得著自由，自由是真理的一部分。

佇西方，集人智學大成的學者首推德國神學家、教育家Rudolf Steiner (1861-1925)。我佇奧國Vienna台灣教會作牧師的時，時時會去公園內伊的墓地邊默思，也去郊外伊出世的舊厝參觀，主因是伊的神學思想及思考方法，真深進入我的靈魂內面，變作我的思考及思想的一部分。伊所創設的『人智學協會』 (Anthroposophic Society) 不但佇美國、日本受智識分子非常歡迎，各種演講會以及書藉出版，非常活躍。我的指導教授Douglas Sloan，亦是非常活躍的學者。最近佇咱台灣嘛有不止濟學者開始teh研究，書寫論文。

這本講是啟示錄註解，但是及一般聖經註解的冊不同，無做逐字註釋。伊是用人智學的觀點，指出未來世界的方向，互讀者家己去思考伊對未來世界的展望，建立伊家己信仰的指南。『啟示錄』存在佇聖經的最尖端，伊指導出一個『向前看』的基督教，陳述一個不斷活佇人的世界、及人作伙奮鬥拍拼、向前行的上帝，就是完全的上帝，以及完全的『人的子』的『人子』的上帝。

上帝對人類有信心，所以『道成肉體』親自來世間作人；上帝對人有信心，所以伊創造一個約伯，互伊經過肉體的創傷及心靈的火煉，會互伊的靈魂提昇到至高的所在；上帝對人有信心，所以容允魔鬼佇世間縱橫，目的是欲互天使長米迦勒，佇最後的戰鬥，制服魔鬼；上帝對人有信心，所以命令世間人著佇善惡對立的鬥爭中，知影辯證的道理，互人會擴大視野，深耕信仰，認識一個更偉大的，更通信靠的上帝。

上帝對人類有信心，所以伊指出咱一個真美麗的未來世界，就是在佇這本『新的創世記』的啟示錄內面。二千年前咱的主耶穌以及聖保羅所面對的『福音』及『律法』的鬥爭及辯證，一直到今仔日，一直到未來的世界，繼續teh進行。未來世界豈真正是一個嚴刑峻法，充滿『審判』的世界嗎？m̄是。這本屬靈的冊互咱知影，雖然現今所存的是信、望、愛，以及『愛的上帝』，未來的世界更加是真、善、美，及『自由』的世界。未來的世界是『永遠的福音』（14:6)的世界，就是飛翔佇各國、各族、各方、各民的頂面，不受文字、文化、習慣、神學、教條等等因素的限制的福音。未來世界佇『外院』的人，可能比『內院』的人卡濟。

真濟名詞佇這本冊內，有真清楚的解釋。未來的世界m̄是 『危機』的世界，是『轉機』的世界；上帝m̄是『憤怒』的上帝，是有無盡難言的溫暖及熱心的上帝；未來世界m̄是欲『毀滅』，是欲『改變』、『兌化』、『質變』的世界。世界的『更新』，產生新的天、新的地，絕對m̄是『重複』舊世界的力量。『更新』就是所有人的生活及生命的力量，『更新』就是所有『做人』的條件及目的 — 過去更新，今仔日更新，將來嘛更新；自己更新，全世界一切攏著、攏會更新。這就是人智學的終末論，完美的終末論。