一個父親的形像
希伯來人書11:8-16
6-2-2010
陳柏壽 牧師

金句：chiah-ê人是存信心而死的，死時並無得著所應允的；卻對遠遠看見，而且歡喜迎接，又承認家己在世上是客旅，是寄居的。（希伯來人書11:13）

祈禱：
『天父上帝，你是阮眾人天頂的老父。今仔日是父親節，阮懷念阮自己的父親，無論in是已經轉去天國，或是活佇地面上，暗時及阮看仝款的星辰，日時看仝款的日頭的老父。
主啊，阮對心內欲kā in講：爸爸，阮疼你！阮感謝你！
感謝主，hō͘阮逐人有一個老父。阿們。』

母親節jiat-phut-phut,人人胸前掛花，做禮拜了樓腳閣有好頓。
若無教會teh chhiàng，差不多真濟人m̄知今仔日是父親節。聽講今仔日樓腳的菜，攏愛作老父去煮。

講一項恁toh知牧師娘佇父親節怎樣關心我。你豈知我收著父親節禮物是甚物？是一雙粗勇的做工手套。一世人做工，做到bē出頭天。

最近佇美國，老父的價數真bái，老父的市價一直落。有時看著查甫人無成查甫人，心內m̄知是欲笑卡好抑是欲哭卡好。

我想咱教會除了有『婦人會』以外，嘛著設『父親會』，卡有公平。

二、三禮拜前阮轉去日本，去日本教會作禮拜，對後壁看過去，10個有8個是長頭毛的。教會人口差不多只有20%查甫人。查甫人佇教會是endangered species。

戰前及戰後的日本男人可能受德國神學，尤其是德國哲學家尼采的理論影響，認為基督教是『奴隸的宗教』，因為基督教強調服從，服從就是奴隸。

我及日本男人談，真濟認為基督教過去到現在，是世間所有奴隸制度的發源及執行者，基督教是各種奴隸制度的兇手，所以著反抗基教。In認為查甫人無應該屈服佇上帝的下面，嘛不應該屈服佇人的下面。

日本的牧師10個有9個是查埔人。In真少講『女性神學』。美國牧師真時行講女性神學，講到氣-phut-phut，講到am-a-kin真大條。佇日本講著女性神學，無論查甫人查某人，人人心平氣和。

其實咱的上帝佇主耶穌福音內面是真公平的上帝，伊無大細心。伊講順服無m̄- tio̍h，但是伊認為查埔人除了順服上帝以外，嘛著順服查某人；查某人除了順服上帝以外，嘛著順服查甫人。但是基督教內面確實查埔人及查某人有不同的角色，有不同的使命。

阮對成田機場坐巴士二點半鐘才到牧師娘阿兄tòa的大宮鎮。一路攏無看著田園，一路攏是鐵根khòng-kū-lí。大東京擴展giōng-beh到大海彼旁去啦。

後來阮去日本海四個縣觀光：石川縣、富山縣、福井縣及岐戶縣。阮本來認為日本海叫做『裏日本』，應該是最無開發的地區，無想到山嶺海邊亦攏是鐵根khòng-kū-lí，清氣溜溜，無一塊野草。全國攏親像去hō͘剃頭lu過，齊齊齊，平平平。日本全國攏開發到無法度開發啦。閣開發toh落落去太平洋啦。

有幾支野草野花就寶-tang-tang。即滿才知影阮頭前大賣店的四周圍發的野草，以及皇宮公園頭前的野草，無欲整理，實在toh是欲hō͘觀光客看的：你看！阮日本猶有野草啦！

日本海莊腳農村剩三種人：ojii-sang, obaa-sang, okaa-sang。老夫婦及新婦。莊腳攏是老弱婦儒。查甫人攏去東京趁食。

世界大戰後日本全國去hông炸到平平。60年後的今仔日，一億外萬的人口，國家總生產力是美國的一半，是13億人口的中國的總生產力的2倍半。日本人，尤其是日本的查甫人，出生以來就是一個運命：工作、工作、工作，趁錢、趁錢、趁錢。趁錢了後欲chhòng啥?就是開錢、開錢、開錢，抑無就是打golufu、 golufu、 golufu。錢m̄知欲按怎開，所以去到叨位，物件攏貴-som-som。

牧師娘的阿兄講：日本有憲法第九條，限制再軍備。雖然有這個第九條的限制，伊的經濟及軍力嘛chhèng到giōng-beh上天。若是將第九條取消，日本人一定會比戰前閣卡歹，人檔伊bē-tiâu 。

Che in叫做日本男人的宿命：有一日in一定會提石頭來kòng in家己的腳。

今仔日是父親節，咱用日本男人來看台灣男子。仝款仝款。仝款唱hit條流浪的行船人、漂撇的男子漢、港都的夜雨、港邊的情歌、快樂我欲出帆、離別的渡船頭、請你著等待、黃昏的故鄉、我欲來去台北人講甚物好康的攏佇hia、媽媽請你亦保重。台灣男兒的心聲及日本男兒的khih-moh-chih，台灣男兒的運命，嘛是仝款仝款。

查甫人是一種真奇怪的動物，天生就是欲拍拚欲出頭天，一世人作牛作馬，才來怨嘆無人kā伊尊重，無人kā伊知道。

趁錢飼家實在真重要，但是趁錢飼家豈是人生的全部？！Che是日本的查甫人生命的盲點，亦是台灣的查甫人生命的盲點。

我佇New York作牧師的時，Long Island有一位許長老，作自動車零件生利，真拍拍拚做工，真顧家，趁真濟錢。伊過身的時我去kā伊作告別式。我問伊二位查某囝，恁最懷念爸爸的代誌是甚物？

大查某囝講伊印象最深的是彼日爸爸載伊去Chicago大學註冊，路中拄著大風雪，車輪漏風。伊心內猶會tàng看著爸爸佇大風雪內面teh換輪胎的情景。

細漢查某囝講，伊上懷念的代誌就是及爸爸作伙打乒乓的情景。

佇gín-á心目中的你，及你按怎拍拚趁錢，若準無甚物關係。

聖經內面有一位典型的查甫人叫做Abraham。我講伊是典型的查甫人，m̄是講伊是一位聖人，是講伊的人生的實際有真濟所在會tàng作咱真好參考。

Abraham可能是一位hō͘人創造出來的人物，hō͘猶太人恭奉作in的祖先，伊講有生12個孫，叫做12支派。我個人是無相信台灣人是12派中的一派。

但是Abraham真正有伊作老父及作一個查甫人的條件。

傳說是講大約紀元前二千年的有一日，原來叫做阿伯蘭Abram(意思是高高在上的父親）tòa佇即滿Iraque Bagdad附近Haran的莊腳吾耳的所在。

上帝叫講：Abram！Abram！你坐佇遮teh chhòng啥? 你某囝chhoā chhoā leh出去！

欲出去叨位？Abram家己嘛m̄知。

你先出去，我會指示你欲去叨位！

對Abram離開故鄉彼日開始，一世人m̄-bat閣踏入故鄉的土地一步。Che就是移民生涯的第一步。

你今仔日究竟按怎會來tòa Seattle ?我相信嘛真濟人講bē出來。

人講美國的月娘卡圓，kiám有影？
日本人講美國就是米，去到叨位攏有米，所以叫做米國，kiám有影？
台灣的老鼠仔父母坐船出發去美國以前，kā in囝講：佇美國hia攏無貓仔，kiám有影？

Abram chhoā這phāiⁿ某仔囝出去，kiám有影一路攏好天？
Kiám有影Abram攏m̄免流目屎？

我m̄信。Abram及台灣老父仝款，thoa這phāiⁿ某囝，一路thoa到giōng欲khiau-ku去，一定tiāⁿ流目屎。干單聖經內面無寫niâ。聖經的後面有寫。

上帝kā Abram改名作Abraham，意思是講：多民族的父親的意思。意思是講天下父親就是按呢：流浪他鄉是故鄉，故鄉是永遠的天邊海角。

去到叨位就停落去，hō͘牛食草，飼某飼囝。Abraham真gâu作生利，去到叨位攏大趁錢。伊真gâu講話，雖然生利嘴胡lùi-lùi，講生利話，但是生利囝，狀元才。

去到大庄小庄攏及人作好朋友，及大官小官有交陪，及in作伙坐桌，gâu及貴人作朋友。有貴人亞比米勒甚至送伊牛羊，亦欲送土地hō͘伊。

Abraham一世人干單買一塊土地，就是亞比米勒欲送伊彼塊，佇耶路撒冷附近以弗侖的曼利彼塊，後來in某死的時，伊kā in某埋佇hia。伊死以後，伊的囝孫嘛kā伊埋佇hia。我bat去hia參觀彼個墓，m̄知是真的墓抑是假的。

遊牧民族一個特點就是無愛不動產，無愛買土地。In的財產，到今仔日嘛是仝款，注重佇動產：牛、羊、駱駝、奴隸、金、銀、財寶、股票、貸款、銀行（24章）。

Abraham有一項歹-底-luh，就是為著欲趁錢，為著欲及人交易作生利，或是為著顧生命，會講白賊話：將in某騙人講作是伊的小妹。In某去hō͘人掠去作某。

這款代誌不但Abraham按呢作，連in囝以撒嘛bat將伊的某利伯加，kā人講是in小妹，giōng欲hō͘人將利伯加掠去作某。

有彼種蛇，生彼種卵。

我是講Abraham按呢做m̄-tio̍h。聖經真老實，講Abraham m̄是聖人。聖經講Abraham是人，人會犯錯。大衛是人，大衛會去佔人的某。Abraham的某苦毒細姨仔囝嘛寫到清清楚楚。聖經及中國文化不同的所在，就是tuì咱細漢開始tò hō͘人教：聖人、國父、蔣總統是好人、偉人、完人，無一項缺點。In若是有缺點，m̄敢講，m̄敢教。聖經將Abraham這個人的缺點，實實在在傳落去，hō͘人m̄-thang犯仝款的錯誤。

聖經是一面鏡，teh照別人，嘛teh照咱家己；teh講別人，嘛是teh講咱家己。

第二項。Abraham除了gâu做生利以外，伊真有正義感。伊的小弟的囝（台灣話叫孫仔）去hō͘人欺負，伊派318人家己的兵去救。伊嘛真有慈悲心，為著所多瑪、娥摩拉的百姓向上帝求情，求上帝m̄-thang滅城。

最重要的是Abraham時時及上帝有直接的交通。有人無愛將家己的手機仔號碼hō͘人，但是上帝將直通的電話號碼hō͘ Abraham，in二人，隨卡隨通，m̄免經過祭司頭或牧師。聖經講Abraham是上帝的朋友，主耶穌嘛講咱是伊的朋友。好朋友不管時嘛會使通，半冥三更嘛會使通。上帝有時化作天使，直接來到Abraham in厝，及in食飯、過暝。

猶太人的選民主義就是對Abraham來的。選民就是講：你是我的人，你是特別的人，你是我特別意愛、特別賜福的人。

這種選民主義有好有bái。bái就是講你將別人畫佇圈外，hō͘別人及你無仝。但是今仔日猶太人會hiah呢強，就是心目中in是上帝的選民，上帝特別恩待in，上帝是in的靠山。有這種選民主義的信心會卡贏別人。精神若勇，行為就勇。Che是咱作父親的人特別著思考的所在：上帝是m̄是常常khiä佇我的後壁作我的靠山？我是m̄是上帝的選民？

信基督教其實就是相信一位認我作伊的選民的上帝的意思。咱來尋一位靠山的上帝。卡強的人，雖然m̄免靠人，但是著靠作咱的靠山的上帝及神明。

有一暗上帝叫Abraham tuì厝出來，講：Abraham,你看天頂，天頂有外濟星？！liap-liap-sih，liap-liap-sih，攏是星。你的囝孫有一日會親像天頂的星、海邊的砂hiah呢濟！

上帝hō͘ Abraham的應允，就是這種無限的期待、無限的向望、無限的力量。

今後這個世界可能有第二次日本人的選民主義，嘛真有可能有第二次的德國人的選民主義。咱台灣人嘛應該有咱台灣人的選民主義。咱台灣人的建國獨立出頭天，嘛需要咱的上帝hō͘咱的選民主義。台灣人是一個有前途有希望的民族。台灣人是上帝的選民。

一方面流浪，phāiⁿ一phiāⁿ母仔囝，四海為家；一方面閣認為家己是選民，是天下一流的民族。Abraham的人生是一種矛盾，及現實及現在矛盾。

一直到今仔日猶太人嘛無看著『天頂的星、海邊的砂』彼種氣勢。猶太人嘛無上帝kā Abraham講的：『你看頭前這片迦南地，攏是你的！』彼種氣勢。In猶teh及Palestinians爭彼塊鼻屎大的土地。

這kiám m̄是矛盾嗎？

但是真正偉大的民族，就是生活佇矛盾的中間teh拍拚。咱台灣人嘛應該有這種認識及覺悟。

最後咱來講著Abraham的死。175歲死的時，埋佇曼利的棕樹腳，伊家己種的彼叢沙漠中的棕樹的下面。Abraham去到叨位，就種樹仔，有棕樹、柳樹、橄欖、無花果樹。伊是真尊重大自然的人。伊出世佇大自然，長大作社會人，死，轉去大自然。咱若死，咱種的樹仔猶欲繼續活幾百年，有個是幾仔千年。彼叢棕樹就是Abraham轉去上帝的記號。這叢最後的棕樹m̄是種佇伊的故鄉，是種佇離開故鄉千里萬里、遙遠的天涯海角、無人知影、匿佇大沙漠的角頭的小莊頭仔的所在。

Abraham這個老父chhōa全家某囝，向著朦朦眇眇的頭前，經過沙漠的大自然天候的風暴，經過人間社會的弱肉強食無法無天的世界，經過人間社會作生利人的奸巧欺騙的世界，最後伊轉來伊家己種的棕樹腳歇睏。所有一生的抱負、理想、怨嘆、笑聲，到chia，攏總Stop。一切攏Stop。到chia為止。

上帝出世來世間作人，佇大自然中作一個嬰仔，經過社會的政治、文化、宗教的複雜的環境，最後佇十字架死作一個人，轉去大自然。咱嘛是仝款，上帝陪咱出世佇大自然，一世人佇人的複雜的社會受政治、宗教、經濟的磨練、衝突、抵抗、爭扎，最後轉去平安的大自然。

我感覺Abraham這個人，人生的一周，正正是每一位作老父人的人生的寫照，伊有活到真成功的人生。因為伊行一條真標準、真有價值的路。

欲轉來美國以前阮有去東京的劇場看一齣叫做『Okuribito』（送人轉去的人），描寫一位小提琴家，幾仔年尋無頭路，最後看著廣告有人欲聘作『最後去安慰人的人』的職業。

去到位才知是殯儀館欲請kā死人洗身軀、換衫、化妝的頭路。工作叫做『納棺師』。送人入棺材的職業。

一位音樂家，真高貴的、真有藝師、真有思想的音樂家，去kā人mo͘h屍體，kā死人換衫。日本人kā死人款待到清氣清氣，連內衫、內褲、外衫、外褲嘛換洗到清氣清氣的。納棺師用白布kā身軀蓋leh，kā衫換到sù-sī-sù-sī，hō͘死人死到真清氣，hō͘伊的面形死到真安靜、真尊嚴。

小林樣本來m̄敢接受這種工作，但是受著伊的婦仁人及公司的老頭家的鼓勵，伊認為che及作音樂家仝款，是為著人間的尊嚴及幸福的真有價值的工作。伊及伊的婦仁人人每日不但為著in的生活，亦為著所有經過這所在的人，無論好額、散赤人，為著hō͘ in用尊嚴及平安，送in行這段人生的最後一段路，每日認真打拚。

Tuì彼時開始，in獨獨生一個查甫囝，佇學校就去hō͘同學恥笑、作弄，講in老父是teh kā人mo͘h死人的人。日本學校內，強勢的gín-á會成群結黨包圍弱勢的gín-á，kā伊欺負，叫做ijimeru。

佇飛機頂讀完這本山折哲雄的『Watashi ga si ni tsui te kataru nara』，嘛是寫一位四國愛知縣的中學生14歲的大河內君，去hō͘四位同學包圍，威脅伊著提出一百萬圓來hō͘ in開。大河內君就去kā爸爸媽媽的落袋仔偷提錢，一萬、二萬提去乎in開…

最後，大河內君忍受bē-tiâu，桌頂留一張hō͘爸爸、媽媽的遺事，走去自殺。

『Otoosan，Okaasan，14年久hō͘恁真大的辛苦，真感謝！我欲出發啦，去另外一程的旅程！希望咱閣見面的日子，會tàng幸福！以前我攏想講我kā阿母偷the̍h的二萬箍，有一日我若趁錢，會tàng提轉來還你！舊年lin chhōa去Australia thit-thô的代誌，實在是真快樂的旅行，真懷念。爸爸最近講無去一萬箍，m̄是我提去的。最後請恁原諒，我這個hō͘恁chiah-nih大的人生的負擔。Sayonara !』

大河內君向爸爸媽媽講著：『Hō͘我先一步去彼邊的世界。再會！』

真無彩的一位青年。真嚴重的日本學校的文化。

仝款，這位納棺師的囝嘛是去hō͘伊的同學欺負到死，一個人走去自殺。因為伊父母kā伊買的彼雙新的球鞋去hō͘同學搶來，phiaⁿ佇土腳，用腳kā新鞋chàm、閣chàm…

但是小林樣的信念是：每日著忍耐，原諒欺負你的人，原諒欺負lín囝的人！
每一日照顧弱者，hō͘人看無起嘛bôa緊！
作一位弱者嘛bô-iàu-kín (yowamusibito te mo ii des)。
死就是生命踏出第一步的開始，轉去上帝hia，有平凡，但是有尊嚴、有尊貴的結束。

這個戲劇hō͘真濟日本人排隊買票去看，主要就是hō͘人認定這位納棺師的小林是真正的英雄，是真平凡閣偉大的老父。

Abraham及小林樣仝款，是一位平凡、樸實、拍拚。但是in tuì出世第一日，一直到生命的結束，日日行in平凡的路，盡作老父的使命，日日行新的路，見新的人，看新的代誌，心內有新的希望。

聖經希伯來人書11:13寫講：『Chiah-ê人是存信心來死，死的時並無得著，但是in會曉對遠遠去看，看著伊全部的人生，知影in來世間是作人客、是寄居的。』

祈禱：『主啊、你作阮的天父，知阮佇地面作人的父親，有真濟艱苦困難、有真濟地面的生命的風湧及生命的有限。願你hō͘天下所有的父親攏會tàng勇敢徛起，giâ起生命的十字架，每日繼續向前行，甚物攏m̄驚。
祈禱靠主耶穌基督聖名。阿們。』