原諒、友情、安息、復活

April 8, 2007
kap 朋友分享

『原諒、友情、安息、復活』

2007年復活節講道 (一) New York衛鄉教會

約翰福音21:15-23

陳柏壽 牧師

 

我第三子ê子已經三歲啦。舊年去看伊ê時,帶牧師娘買ê omiyage去。伊一下開,toh kā lu去桌邊,講:這m̄是 omiyage。伊心目中ê omiyage是『無敵鐵金剛』,『無敵鐵金剛』才是伊ê omiyage。過暝日我tō chhōa伊 去買『無敵鐵金剛』。

年尾聖誕節,換牧師娘轉去日本看伊,聽著in老爸kā伊講:『Oriko sinai to, Santa Clause san ko nai yo!』,意思是講:你若m̄乖,Santa Clause未來io !伊kā伊應講:Santa Clause iranai,我呣免Santa Clause  san,我有A-kòng!彼呢細漢囡仔,toh知欲有送omiyage ê阿公。佳哉伊無叫我A-khong,亦是A-gōng!

陳義仁牧師ê漫畫:教會門口ê看板本來是寫『信耶穌得永生』,但是古早ê油漆真lám,無外久,彼字『永生』ê『永』頂面彼二點toh去互雨chhiâng去,剩一字『水』tì hia,後來彼字『永生』ê『生』下面彼橫嘛去互雨chhiâng,剩一字『牛』tì hia。莊腳人行過教會門口,攏看著教會掛一個看板:『信耶穌得水牛』。大家緊入來教會,看有水牛通牽無?!歸教會攏是人,無半隻水牛。

咱攏知影古早美援ê時代,佇教會有teh分麵粉及butter, 所以台灣人攏叫信教ê人『麵粉教、死了無人哭!』ê。我m̄-bat分過麵粉,但是佇街路tiàⁿ看著囡仔in老母用麵粉袋改製ê內褲,佇街仔路cháu來cháu去:二塊kha-chhng-phé印真大字『中美合作』,二雙手ãt作伙,下面寫『淨重20公斤』。

即滿ê時代無人愛水牛啦。聽講佇天堂,人攏駛Cadillac。不過最近聽講天堂ê汽油嘛起價,真濟人攏改駛Lexus。

信教及人生分未開,天堂及人間分未開。將基督教物質化,將天堂人間化,是人性ê必然。

物質及精神ê互相對立及辯證,對有人類ê歷史開始,tō已經佇hia kô-kô纏,分未清。聖經內面嘛是攏teh講這個問題。

最近東京大學一個數學教授Fujiwara Masahiko (藤原正彥)寫一本冊叫做『國家ê品格』,隨出版就賣220萬本,是全日本今年ê best-seller,全日本攏teh討論這個問題。伊分析戰後60年日本社會,前40年全部日本人集中精神來發展經濟,製造真濟好ê產品,thàn真濟錢。但是最近20年日本經濟陷入去bōe進bōe退ê境界,叫做豐富中ê蕭條(stagnation)。日本人開始teh反省in ê人生觀及in ê社會。

1868年明治天皇廢止武士階級ê制度,主要ê原因就是欲引進外來ê文化來對抗外來ê勢力,引進西方文明,來對付西方各國。這嘛是戰後60冬日本政府ê做法:引進美國物質生產ê方法來對付美國;引進民主代議制度來管理國家;引進市場主義來管理經濟。

日本人欲尋in家己ê物件,就是這60冬來in看著民主代議制度,結果嘛是散赤人teh受苦,全國一億三千萬人攏講是中產階級,實在是一億三千萬人物質生產ê奴隸。60年來日本政府教人民ê就是:為著錢、經濟,為著國家ê尊嚴及世界ê地位,全國攏來拍拚。結果今仔日,日本人發現,in及世界逐個國家攏共款,無及人無共款。

最近基督教ê神學思想嘛是向這個方向teh行,福音就是keep a simple life. To live lightly.單純ê生活、單純ê美麗。物質愈濟,生命愈淡。所以Fujiwara san看著人用大大ê mug (美國杯仔) teh飲日本綠茶,看著真bōe慣習。逐項代誌攏著轉來作一位單純ê武士ê心境:單純、忠誠、勇氣、公義。

飲茶著用小杯ê茶杯,插花有花道,寫字有書道,另外猶有柔道、劍道,一切攏著有生活ê美感。厝呣免大間,子呣免生多。最近阮佇New York生ê彼ê細漢查某子Kyoka去著美國西北區Seattle, Vancouver, Oregon劍道比賽第一等,我嘛真驚我老ê時,伊用劍道來對付我,我toh cháu頭無路啦!

日本人古早聽chhân /siân (蟬)、tō͘-kâu 、鳥仔teh叫,風佇樹仔尾teh吹,攏當作音樂teh享受。呣免Lincoln Center ê orchestra來演奏。聽著tō͘-kâu teh叫,toh知春天欲到;

chhân teh叫ê時,就是夏天ê音樂;烏龍仔(si-sut-a) teh háu,聽著心情會孤單,感覺秋天已經到啦,冬天已經佇目睭前,想著咱短暫ê生命。

Fujiwara san講愛看薄薄、幼幼、粉紅仔ê櫻花。櫻花及西洋ê大片大片、紅pha –pha ê bara(玫瑰)無仝。櫻花講出咱生命ê脆弱ê本質。

伊kā英國人ê記者講:恁Great Britain已經對世界舞臺沉落去地平線ê下面,但是恁ê英國紳士an–ni m̄-bat怨嘆英國沉落去地平線ê下面,日本人共款,著學英國紳士,呣免怨嘆in嘛欲沉落去世界舞臺ê水平線下面。我想這就是日本人真愛讀這本冊,受這本冊影響真大ê原因。

60年ê經濟動物,及美國人生活佇豐富ê物質世界。即滿欲倒轉去尋新ê作人ê價值,去尋過去單純ê日本 。

咱來看今仔日彼得及主耶穌ê對話。共款是teh講出咱人ê問題。

主耶穌問彼得問三擺:彼得啊,你有疼我無?

彼得連線應二擺,講:主啊,我疼你!

第三擺彼得toh giōng-beh tòng-bōe-tiâu,主啊,你仝一個問題,連線問三擺,我toh kā你講我疼你啦!

希臘文ê『愛』有三種agape, philia, eros。中國語只有一字『愛』,上帝ê愛,及男女佇眠床頂ê愛,攏仝一字『愛』。

主耶穌前二擺問彼得:彼得啊,你有用無限、無條件、完全放栜家己、犧牲家己ê疼來疼我無?(agape)

彼得應耶穌是用『友情』(philia) ê愛來回應耶穌。友情ê愛雖然真高貴、真偉大,照哥林多前書13章ê說法,為著朋友,嘛有可能將家己ê身軀互火燒。但是及agape ê愛比,猶差真遠。

但是彼得真老實,真坦白,伊真正是一位真正ê人。伊知影伊無法度用上帝疼世間人ê愛ê方法來疼上帝,伊極加只有會當用一個人ê方法、作一個人ê程度,來疼上帝。

上帝第三擺問彼得ê時,就改用朋友ê友情ê愛來問彼得:彼得啊,你會當用疼一個朋友ê最高、最高貴ê方法來疼我無?

上帝真正會當體諒作人ê艱苦及有限。上帝bōe迫人行到絕境,上帝m̄愛咱作上帝,上帝只有愛咱作伊ê朋友。

西洋文化ê作人ê精神,叫做自由精神。自由精神ê第一步就是叫咱m̄通傷過有信心,m̄通傷過講大聲話。

上帝知影彼得ê作人:伊對家己真有信心。最少佇伊teh講話ê瞬間,伊對家己真有信心,一點仔嘛無懷疑。彼得講大聲話ê時,因為大聲,互伊壯膽,伊壯膽以後,伊講話會閣卡大聲。

主耶穌講:今暗恁大家攏會離開我!

這句話佇彼得ê耳孔來是聽作:in大家攏會離開耶穌,但是我彼得m̄是按呢,我是例外,我比別人卡勇!我及in本來toh是無共款,我來這世間,本來就是有特別ê才情,特別ê角色,我就是及in無共款!

『別人離開你,我絕對無離開你!』

『無,你嘛一定會離開我!』

『無啦,未啦,我bat我家己比你bat我卡深啦!我絕對未離開你啦,你去死,我一定絕對tòe你去死!永遠無欲離開你!』

彼得連線講二擺 『絕對!』但是自由精神ê最高境界,是叫咱儘量mài講 『絕對』及『永遠』。

這個『絕對』是一種鬼仔。世間有二種鬼:一種是匿佇陰濕ê角頭,無人看著,叫陰鬼;一種是khiā佇頭前,真iang,講話真大聲,叫熱鬼。

Khiā佇台仔頂ê牧師人,嘛真愛講『絕對』及『永遠』。我想chiah-ê 『食教ê』攏是用這二字『絕對』及『永遠』,作in趁食ê飯碗。

我可能是因為胡醫師已經佇十外年前,kā我ê膽提掉啦,所以我soah變作『無膽無膽』,即滿卡m̄敢講『絕對』及『永遠』啦。世間靠熱情teh作人ê人真濟,靠熱情teh講道ê人真濟。20年前我佇衛鄉ê講道,真濟攏是按呢。即滿聽起來,家己嘛聽著會起雞母皮。

彼得kā耶穌講『永遠』ê時,主耶穌kā伊講:呣免永遠啦!閣一點鐘你toh知啦!

Hiàng-tang-sî結婚ê時,佇牧師及眾人面前ê誓約:無論好天落雨、有錢無錢,我欲tòe你一世人。家庭ê風颱一下吹,彼陣 ê誓約一下仔toh soah 了了啦。

Hiàng-tang-sî朋友二人講到好勢好勢,咱來合資做生利,無外久二人就互相懷疑東懷疑西,就拆作二邊。

Hiàng-tang-sî kā上帝講,我若這phit生利會成,我若學位提著,我若按怎按怎,一定欲按怎按怎,結果無影無一隻。

閣另外一句,咱講話ê時,特別是牧師人真愛講,這句是『真重要ô͘!』:這句聖經節真重要ô͘ !這篇講道是欲講上帝ê話ô͘ !自由精神ê人無愛人教你講:這真重要!

這句『重要』實在是做戲ê劇本,是王錄仔仙ê話。我佇Columbia讀冊ê時,hiah-ê真有深度,真偉大ê老師,真少kā阮講伊講叨位一句是『真重要ê ô͘ !』因為伊知影伊ê學生家己會當決定對伊甚麼是重要,甚麼無重要。講話平平啊講著好。重要無重要m̄是講ê人決定,是聽ê人決定啦!即滿是消費者ê時代,m̄是生產者ê時代啦。

自由精神作人bē使過分熱情。干若熱情bē凍解決問題。基督教所teh講ê自由就是平凡ê純情,呣免過分包裝、過分熱情、重複表現。

中國人佇飛機場teh歡迎日本首相,雖然後面一支刀對腳脊背欲kā伊chhak落去,台頂嘛用大塊紅布寫:『熱烈歡迎阿部首相!』。中國人『多謝』會講『謝謝!謝謝!』,講『再見』會講『再見!再見!』,講『I am sorry』ê時,會講『I am really sorry! very very sorry!』這就是產生副作用ê熱情。日本社會nā 講:Gomennasai! Gomennasai !就是你欲及對方絕交ê時啦。

西方文化最可貴、最深沈ê自由精神就是留空間互聽眾、互消費者,留空間互信徒,互伊會當家己去想伊及上帝ê關係。話bē使講siuⁿ過頭ngē,講siuⁿ死,講到無路。美國人真gâu用humor來解決問題,表示in看人生看真會開。

其實基督教所留互咱ê自由精神,就是講連咱ê上帝嘛有行無路ê時陣,除了十字架無別條路ê時陣。咱只有將這項最深、最奧密ê道理留互上帝,咱無必要逐項攏替上帝尋答案,講壇頂無必要攏愛有答案。咱嘛著留乎上帝一寡上帝ê空間。十字架是一個神祕ê空間。

佇這項代誌以前,彼得看著主耶穌佇水面teh行,伊隨時嘛喝講伊嘛欲佇水面行。主耶穌叫伊,行過來!彼得toh chông落去。但是行無二步,看著海湧真猛,海風真thàu ,心內toh起驚,一下起驚,身軀toh起沉。『主啊,救我!』

彼得代表人ê行動派,無經過大腦ê行動派,chhong-chhong pōng-pōng。欲行動以前,無去想甚麼信心啦、精神啦、勇氣啦。先做才講啦,先下手先贏啦。人就是按呢。我想上帝一手kā彼得扶起來ê時,一定一面teh笑這個人ê chhong-pōng。

閣來,彼得問耶穌:伊著赦免別人幾擺才算有道理?伊心內想講:我若赦免伊7擺,已經真jio-to啦。但是主耶穌教伊一個不可能ê數字:70個7擺 (18:21-22)。彼得心內已經設定一個人ê倫理標準,但是佇上帝內面,這個標準bōe通。上帝真知影彼得ê界限,因為彼得是一位真正ê人。

對彼得ê全人生來看:伊並無比別人卡疼耶穌。伊不過比別人卡敢講話,比別人卡敢行動。若講出賣耶穌,否認耶穌,將耶穌送互人去死,彼得及猶大比起來,不過是五十步對一百步。

一直到今仔日,彼得可能猶想欲辯解:講伊三擺無欲認耶穌,是一時失言啦,是一時疏忽啦,是一時心神掠無定啦,親像宋販仔、馬仔按呢,無數不至, 理由真濟,攏是伊ê話。主要是講伊所做ê,m̄是甚麼大代誌啦!彼得家己m̄知伊,因為出賣耶穌,傷著耶穌真深。

比得bōe記佇伊是有過犯ê人。上帝bat彼得真深,但是彼得家己m̄知。彼得猶閣想伊是聖人。

有人講世間ê代誌,你若一切攏知,一切攏看到明明,一切攏清清楚楚。譬如講結婚前ê誓約到結婚後ê背叛、放蕩。Chiah-ê寫佇紙頂ê祕密及無寫佇紙頂ê祕密,攏hō͘你知影了了ê時,你欲按怎?

你只有二條路:第一條路就是kā伊記恨,恨伊到入棺材為止;第二條路,因為已經攏知影了了了啦,就攏總kā伊bōe記了了。攏kā放伊去啦。攏kā原諒。

主耶穌bat彼得hiah深,知影伊作人ê軟弱及惡質。但是到復活節彼日,上帝kā伊bōe記了了。上帝親像春天ê草根,閣鑽出土面看日頭。復活節就是代表上帝ê原諒 – 原諒彼得,嘛原諒你及我,原諒一切。Everything is all right啦!

上帝一個人行到十字架ê山頂,是一條淒慘孤單ê路途。即滿家己用舌chīⁿ家己ê傷嘴,tiām-tiām來復活以後,閣三擺,來kā彼得問『你有疼我無?』這種懇求ê話,理由佇叨位?這豈m̄是上帝道成肉身作人ê悲哀?上帝來懇求世間人ê悲哀?

上帝是一位受苦ê上帝。若是kā主耶穌畫作一位嘴鬚hô͘-hô͘,高 (kôan)閣大漢,手骨粗閣大箍ê上帝,是m̄-bat基督教。閣活ê上帝ê面,我想是親像菜脯乾,手親像厝鳥仔腳,按呢卡sêng耶穌啦。

我想上帝是欲強迫彼得回想伊ê過去,強迫伊著面對伊家己,強迫伊認份來作人,強迫伊知影伊m̄是聖人,嘛無彼別人卡好。同時我想上帝嘛強迫改變伊對待比得ê態度,承認比得是人。上帝用人ê態度來對待咱。

上帝並無遣責彼得。復活ê上帝用人ê態度、用朋友ê立場,及彼得講話,最後要求伊用高貴ê『人ê愛』及高貴ê『人ê友情』去疼人、去疼上帝。按呢就到額。

若講高貴ê友情,彼得作會到。彼得會chhóng-pōng、講大聲畫,會及朋友oan-ke 、kheng-hun,及主耶穌佇海面掠大魚,及主耶穌醫病趕鬼,看著耶穌ê面佇山頂發光,真歡喜ê日子;但是嘛有拄著風颱落雨,船giōng-beh péng過,兵仔來欲掠人ê恐怖ê日子。Chiah-ê一點一滴ê歷史,攏是累積著耶穌及彼得中間二人ê友情。

教會內面是培養友情ê所在。教會m̄是血統、親成ê結合,是友情ê結合。教會m̄是特殊ê個人及個人ê關係,是人人攏是好朋友ê關係。佇教會咱欲培養人及人ê友情,嘛欲培養人及上帝ê友情。

好朋友呣免一日到暗纏作伙。雖然真久無聯絡、無通批,離開千里萬里,但是心中知影,伊是我忠實ê好朋友。好朋友心內呣免定定熱phut-phut。真正ê好朋友會放咱去自由。真正ê好朋友ê上帝,嘛會放咱去自由。這是基督教真純人生ê境界。

講來到chia,上帝閣kā彼得講,其實咱ê人生實在是無自由lio̍h :你少年ê時,身軀勇健,腰帶hâ ân–ân,愛去叨位,tō去叨位,無人pak你會tiâu;但是你年老ê時,人會kā你pak leh,chhōa你去你無愛去ê所在。

以前我攏想講:我對大學畢業、去東京食頭路、chhōa某、生囝、去讀神學院、作牧師、去大學教冊,chiah-ê代誌攏是我ê意志,我家己ê決定。

少年時代行路有風、算盤會摸、目睭看天空、講話tin-tin-tong-tong,世間攏無別人。

即滿看倒轉去,感覺無一定是我teh主宰我ê人生,是後壁有一個力量teh kā我sak。這條路是後壁sak出來ê路。

尤其是咱年紀愈大,才愈知,咱人是愈無自由ê動物。以前m̄知影家己有胃,嘛m̄知甚麼叫胃疼,即滿有心臟、腳、腰子、血壓,毛病一項一項一直出現,這台機器性能一直bái去啦。

日本ê蔣中山醫師講,咱機器teh開始bái ê時,就是咱買單行ê車票(one way ticket),一直去,有去無欲轉來,即滿已經是欲落車ê時啦!對台北-新竹-苗栗-台中- 彰化-斗六-嘉義-民雄-台南,來到高雄、屏東,無落車bē使啦!

讀冊- 結婚-生囝-教育-食頭路-退休,閣落去toh是欲落車ê時啦!

時間一日一日過,過去ê一生無論是愛情、事業、成功、興旺,抑是風颱落雨、無頭路、乎人欺騙、乎好朋友出賣、互魔鬼贏去,互mô͘-sîn-á纏去,烏陰天落雨天卡濟,一個人匿佇房間仔內流目屎。Chiah-ê一切ê一切,攏親像火車窗仔門邊ê景色,一幕一幕一直飛過。一切ê問題攏無答案,一切攏無法度解決。這種情形就是基督教ê自由精神ê正常ê表現。

佇這個復活節ê時,咱來學主耶穌ê款式,將一切攏來kā伊bōe記了了!

自由過了,就是另外一種ê無自由,但是這種新ê無自由,是一種必然ê卡高ê自由。

Kā伊bōe記了了ê時,咱雖然已經變老人,但是咱會愈老愈自由,咱會愈老愈súi ,變作老súi仔老súi,面色ê卡清,目睭頭tō bē kat歸丸。咱ê生命就親像秋天樹仔頂ê lingo,會光iáⁿ-iáⁿ,甜閣有汁。

時間若到,著落車。時間若到,咱親像魚仔去互上帝tiò著,呣免閣liòng啦,呣免怨嘆,由在上帝欲煮、欲煎攏好啦。

Seattle一年干單落一擺雨,今年對九月開始一直落到四月,干單落一擺,落8個月。即滿tòa久,感覺落雨天會互人活卡成人,雨日及暝,對厝頂一直滴落來,暗時teh睏,嘛是按呢一直滴。出門bōe感覺街仔路,日頭赤炎炎,隨人顧生命。所以佇Seattle駛車,人攏會相讓。

以前我有失眠ê時陣,暗時欲睏以前真緊張,親像欲入戰場戰爭ê感覺。今暗m̄知睏會去無?

彼暗我若戰死,toh是我若死去上帝hia,過暝日我toh真有力;彼暗我若是歸暗攏活leh,歸暗頭殼真清楚,目睭金金,無欲死入去上帝hia ê時,親像我是戰贏,其實是戰輸。過暝日人giōng-beh死。

咱每一日見上帝一面。上帝用這個方法,每日teh訓練人,準備咱人生最後ê自由,就是死ê自由。睡眠就是死,就是充電,就是復活。親像主耶穌講ê:咱是一粒麥仔,麥仔著落土,死,就會結復活,結子百倍、千倍。

咱佇這個復活節ê時,嘛著知影:回歸上帝、死,就是復活ê原動力,就是復活ê開始。主耶穌kā彼得講,你年老欲去ê所在,就是咱逐個人攏欲去ê所在。佇hia就是安心及安息ê所在。

復活節真正ê意義就是:原諒、友情、死、復活。

 

祈禱::

『主啊,今仔日是復活節。世間人人會死,只有上帝bōe死。阮知影復活節代表上帝ê原諒,上帝ê同在,上帝ê友情,以及阮作人ê最後ê認命及安息。主啊,懇求你hō͘阮愈活愈sêng一個人,愈有人ê好ê模樣,愈及你作好朋友,行一條人生ê路。阮按呢祈禱,是靠著阮ê救主耶穌基督ê聖名求。amen。』

 

 

 

kap 朋友分享

No Comments

Leave a Reply

Your email address will not be published.

Translate »
Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致