世情 kap 福音

April 8, 2007
kap 朋友分享

『世情kap福音』

2007年復活節講道(二)

New York衛鄉台灣教會

馬可福音10:35-40; 羅馬人書13:11-14

陳柏壽 牧師

 

新正年頭beh來啦。中國人講『一年』,咱台灣人講『一冬』。咱台灣人若無過冬天,tō無算做過年。過了冬天,開新正,來迎春,是一年ê 開始。

過冬ê蟳仔(chîm-á),tēng殼,肉才會甜;未過冬ê蟳仔,殼lńg,phò͘-phò͘無味。

花khah súi tō未過冬。你豈bat看過開幾若冬ê花?我tòa Hawaii ê時,開上久ê蘭花,極加mā是二個月,冬天khǹg tī外面mā會lian去。

Seattle tòa久ê人攏知,今年ê冬天過著第一淒慘,大風、大雨兼落雪,樹仔倒了了,無電無燒水無computer,差一點仔tio̍h去山頂chhò柴轉來煮飯。

但是聽老輩ê人講:今年ê lingo一定紅kòng-kòng,梨仔一定白phao-phao, 因為雪水有肥。

寒天愈寒,春天到感覺愈歡喜;寒天愈寒,日頭出來感覺愈可愛。

我tòa Hawaii 3冬,會使講Hawaii逐項攏好,干單一項hō͘我擋未tiâu:寒天無成寒天;熱天無成熱天。寒天熱天溫度攏差不多。 真正tòa久會起憨。

連阮厝門口彼欉柑仔樹mā teh起憨。向東彼旁teh開柑仔花;向南彼旁有青青細粒ê柑仔;向西ê柑仔已經黃黃黃;向南是一寡葉仔lian-lian。

平平一欉柑仔樹,有粒柑仔是甜-but-but; 有粒是酸-kiù-kiù。實在真奇怪。

Hawaii ê龍眼mā會起憨。雖然緯度比屏東khah南一sut仔niâ,但是生龍眼鬼仔,無肉koh bē甜。阮教會賴長老(伊是Dole ê農業專家)kā我解說:龍眼結子ê時,咱台灣暗時會寒,龍眼會甜;Hawaii暗時kap日時溫度差不多,龍眼結bē甜。

道理真簡單:日夜tio̍h有溫差,冬夏tio̍h有溫差,才會健康。

咱逐家人生攏已經過了幾偌十冬啦!我mā經過六十外冬啦。我最初ê二十冬是teh讀冊、長大,koh來ê二十冬是日到冥作工、飼子、顧家,koh來二十冬是teh作基督教ê和尚,人攏叫我牧師。我若讀著我二十年前ê講道文,有時仔會感覺hiàng當時我太會hiah敢講話,講話太會彼呢大聲?!我真懷疑,彼位真正是我。我m̄知猶有第四ê二十冬無,我m̄知。

有一擺一群人掠一個犯姦淫ê婦人人來到耶穌ê面前,beh用石頭kā伊tìm死。主耶穌恬恬無講話,只有用手佇土腳寫字,寫甚麼字無人知。最後,對老人開始,一直到少年人,一個一個溜soan去。一般牧師說教,攏講因為老人知影in過去犯ê罪mā真chē,所以先離開。我ê看法m̄是,我感覺因為老人,年紀愈大,對世間愈會寬容,所以in愈代先離開。

結婚以後,前三、四冬tiāⁿ會kap牧師娘sio-tak 。雖然會sio-tak ,但是生kiáⁿ bē比人生khah少:我生四個。‹是啦,我是講『阮』生四個啦。這幾年,年紀khah大了後,伊ê缺點攏去hō͘我知啦,阮tō bē sio-tak啦。當然我ê缺點mā攏去hō͘伊知了了啦。

阮若teh sio-tak ê時,牧師娘攏會kā我講:你一日到暗tō是beh kā人『說教』(日本話,講道叫做說教)(阮爸爸猶未死以前,mā定定坐佇下面,去hō͘我kā伊說教)。Chńg頭仔攏teh指對方:

『你tio̍h按怎、按怎,

『你tio̍h信上帝…』

『你豈知,你一支chńg頭仔teh 指別人 時,同時陣有3支chńg頭仔teh指你家己?

『恁牧師人真gâu,m̄是用第二人稱講『你』,toh是用第3人稱講『伊』啦:

『伊tio̍h按怎…

『伊上m̄ tio̍h …』

『抑無tō是用第四人稱講『上帝』。恁牧師人上gâu講上帝,真gâu引用聖經,真gâu講十誡、講真理。

『我請問你:真理是甚麼?』

真理m̄是gâu講話啦,真理m̄是gâu辯論啦!

真理就是主耶穌啦!

『你豈m̄知:彼拉多問耶穌『甚麼是真理?』』ê時,主耶穌恬恬,無回答。(約翰18:38)

『若是有一日,主耶穌kap真理排佇我面前,hō͘我來揀。恁牧師人可能攏beh揀真理。我寧可揀主耶穌,無愛真理啦!』

『一生涯ê表現,才是真理啦。』

『恁佇台仔頂說教,鎗子m̄是拍著『你』,tō是拍著『伊』,抑無就是拍著『上帝』。豈有人接著牧師ê鎗子,koh kā伊tōaⁿ轉去hō͘你?無啦!』

『所以恁牧師人beh kā咱說教真簡單,鎗子攏tōaⁿ別人,無tōaⁿ家己。牧師人作久,會變作說教ê機器。有ê退休牧師,提幾篇講道文,全世界賣透透,逐日kā人說教,日子真好過。這種心理叫做teaching complex啦。』

『其實,說教ê時,鎗子先tōaⁿ家己,道理khah會準,人聽khah有啦。』

『人人一日活teh,有一日ê風湧,一日ê車拚。人人仝款攏一日只有24點鐘。一年ê人生ê經驗,只有365日。平信徒ê人生,仝款為著工作、生活、家庭、身軀teh過著風波ê人生。有ê人人生ê風波,比恁牧師人加真chē,in流ê目屎比恁牧師人加真chē。干單看著in ê面,聽著in teh講話,tō知影in ê生命ê智慧、in ê生活ê經驗,比牧師khah深,心比牧師khah闊。因為in經過ê風湧真大,in有過冬ê經驗。』

我去hō͘牧師娘罵到無一塊好。

莫怪最近這期ê Christian Century (Jan 2007)雜誌發表ê Harris Interactive調查,hō͘我知影佇美國人心目中ê牧師,in ê社會地位真低:

牧師比拍火車ê消防隊員地位khah低;

牧師比醫生ê地位khah低;

牧師比護士ê地位khah低;

牧師比科學家ê地位khha低;

牧師比老師ê地位khah低;

牧師比做兵ê人ê地位khah低;

牧師社會地位mā排佇警察ê後面。

Che是甚麼原因呢?

我想是因為阮chiah-ê說教ê人,khah chē是空嘴pó͘舌,真gâu講話,二支手攏無做工,有人講:阮規身軀若攏死了了,彼支嘴mā猶teh 講話。我佇New York作牧師ê是,mā看著真chē牧師逐日駛飛行機teh上班,生活非常討債。牧師人gâu 佇伊講話,kap伊ê實際生活無一致。

我作牧師人,來批評牧師,是有資格,因為我bat牧師真深,我個人mā有作牧師ê毛病。我有kap每一個人仝款ê本性,我有kap世間仝款ê本性,叫做『世情』。

世情就是驚去拄著風颱落雨。世情就是雖然知影人生有春夏秋冬、人生有生老病死,但是心內就是無beh接受這個現實。

我m̄知影甚麼時陣beh開花、

M̄知甚麼時陣beh結子;

甚麼時陣beh排攤仔、

M̄知甚麼時陣tio̍h收攤;

甚麼時陣日出、

M̄知甚麼時陣日頭一定會落山。

我初中ê畢業紀念冊內面,有一位英文老師kā我簽這句話,是主耶穌講ê話:『恁勞苦擔重擔ê人,tio̍h來我chia,我beh hō͘恁得著安息!』彼陣開始,這句話就深深留佇我ê心內。

我佇New York作牧師ê時,有一擺hō͘人邀請去Fairlawn參加設立長老ê禮拜。我kā 彼位長老按手祈禱了後,看著伊ê面,就知影,彼位就是我初中ê英文老師。我問伊:“你敢m̄是曾淑蓮老師?”

離開三十外冬,koh 佇地球ê另外這旁見面,伊驚一tiô,我mā驚一tiô!

日本ê童話作家Hamata Hirosuke, 佇這本冊,就是松原泰道先生所寫ê 『Waga Kokoro no Hatkian』內面ê一首詩,叫做『路邊ê彼粒大粒石頭』:

彼粒平平、低低、人ê腳bē踢著、

頭殼lê lê、無氣派ê彼粒路邊ê大粒石頭,

無論風颱落雨,

無論好天歹天,

無論日時暗時,

伊攏恬恬ah

路邊ê人看著伊,tō真歡喜,

Tō kā重- iⁿ-iⁿ ê身軀、

重- iⁿ-iⁿ ê腳倉、

大力tō kā tn̄g–落-去!

啊!實在真爽快!

這粒路邊ê大石,人經過伊ê身邊,攏聽著伊teh叫:『人客啊!來坐!』

伊講主耶穌hō͘人得著安息,用這粒石頭來說明,人聽khah有。

日本ê天主教作家遠滕周作 (Endo Shusaku)有寫一本冊『沉默』(chin-moku),描寫日本封建領主禁止基督徒,將莊裡ê人攏掠出來,叫in ê腳踏khǹg 佇土腳ê耶穌 ê相。敢踏過ê就放in去,m̄敢踏過ê就一個一個掠去斬頭。莊裡ê人一個一個hō͘人掠去斬頭。上帝佇天頂攏無出聲,mā無伸一支手來救in。

Taⁿ,輪著年輕ê神父Rodrigues。神父ê腳phí-phí-chhoah。伊看著土腳耶穌ê十字架kap伊ê相,m̄知beh按怎才好,干單會曉流目屎。但是,忽然間,神父看著土腳ê耶穌ê相出聲teh kā伊講話:『Rodrigues,踏落去!因為我生來世間tō是beh hō͘恁踏ê啦!』

無論路邊ê彼粒大粒石頭,抑是Rodrigues神父腳所踏ê相,攏是beh hō͘人坐、hō͘人踏ê耶穌。

這位耶穌佇石頭內、佇畫ê相內,外口看雖然是無teh活,親像是死ê物件,但是實在是活ê物件,會講話ê物件。

咱ê靈魂ê antenna若chhiâu hō͘準,咱tō會聽著石頭會講話,花蕾會唱歌。

平平生一對耳仔,有人干單聽著人teh講話,狗仔teh吠,叫做小耳仔,親像木耳hiah大niâ。

有人會聽著真súi ê詩歌kap音樂。Newton聽著lingo對樹仔頂留落來ê聲,soah發現真偉大ê地球物理;巴蕉 (Basho) 聽著水雞『thôm–』一下跳落去池仔內,soah寫出真súi ê俳句(haiku),真純真ê自然ê境界,kap杜甫ê 『採菊東籬下』ê境界無仝。這種人有中大ê耳仔。

Koh有人ê耳仔會聽著天使佇空中teh唱歌,聽著上帝佇雲頂teh講話,聽著地獄內底有人teh haiⁿ-chhan。這種人有大ê耳仔。

平平生一對目睭,有人干單看著人生三寸遠。日本人講:人生三寸頭前是黑暗。『目睭chhuh-chhuh便所看作ho-te-lu,齒膏看作ku-rin-mu』,『大目新娘無khòai灶』。看代誌干單看表面,叫做小目神。

有人見面三分,就bat伊七分。看代誌看前三步。行路比人早二步。看著吊燈仔花會想著故鄉台灣ê莊腳。這種人目睭有khah大蕊,叫中目。

Koh有一種人,伊看世間人來來去去ê街仔路,會看著天使佇彼內面;看雲ê頂面有上帝佇 hia;看著日頭beh落山,想著人生mā tio̍h歇睏;佇悲傷破病ê時,會看著彼旁真súi、日頭真光、真幸福ê世界。這種人ê目睭真大粒,叫大目。

干單用小目睭、小耳仔來過日,會使;但是一世人to親像bùn-鼠,一世人匿佇土下。咱人人若攏有大耳仔、大目睭m̄知beh外好咧!

有一日,主耶穌kap伊二位真hō͘伊疼ê學生約翰kap雅各佇路仔行路。二位學生忽然來kā耶穌講:主啊,你hō͘阮二人,一個坐你ê正旁,一個坐你ê倒旁!

Beh若是你是我,mā會按呢想neh !因為che是人之常情,人ê本性。我mā真愛來作部長、縣長、總理、大官。Chím-má台灣為著beh選總統,有5、6個人攏跳跳出來啦。

主耶穌並無kā in講『No!』。主耶穌知影:In不過是一個人。若是人,就無法度超越作一個人ê界限。人ê一生ê界限就是beh追求幸福、名聲、地位、權勢、財產。

約翰kap雅各不但m̄是歹人,in koh khah是主耶穌深深意愛ê學生。我想主耶穌聽著in這種要求ê時,面形一定是笑瞇瞇 – -雖然伊心內想講:恁這二個戇gín-á leh !

這個故事ê頭前,有寫另外一個故事:有一個真有錢ê少年家來問耶穌:beh按怎才會得著永遠ê生命?

主講:你tio̍h遵趁上帝ê誡命kap道理!

少年家講:Chiah-ê我攏有遵守啦!

耶穌koh講:按呢你去變賣你一切財產來振濟散赤人!

這個有錢ê少年家聽一下,目頭結結。

聖經寫來到chia,寫講:主耶穌看這個少年家ê面,真愛伊!

這個有錢ê少年家亦好,雅各約翰mā好,攏是代表你kap我,代表人間ê世情,人間世界ê真實。

上帝並無怪in。上帝ê目睭注神看in,心內mā真愛in,因為上帝知影,in就是咱,咱就是in。代表真正ê人。上帝創造ê人,本來就是按呢啦!

主耶穌知影,伊叫咱去『變賣一切振濟散赤人』,或是叫咱來『犧牲咱ê生命,背起伊ê十字架,lim著死ê苦杯』,實在是非常困難ê代誌。實在是不可能ê代誌!

阮作牧師人,真少有『放棄一切來tòe耶穌ê人』– 雖然真chē人,嘴是按呢講。

歷史以來,人mā m̄-bat看過一個猶太人作六年ê土地,第七年放伊去荒;m̄-bat講,第七年到,tō將六年以來人欠伊ê錢,一筆鉤消;m̄-bat 佇第七年,將伊所有ê長工、奴僕放in去自由 – –  雖然in ê律法書有按呢寫到清清楚楚。

猶太人kap你kap我,攏是差不多啦!

我khiā佇chia,看著真chē年輩真大ê先輩來佇chia作禮拜敬拜上帝,心內非常感動。In陪咱行過過去ê人生,koh已經行比咱加真遠。到今仔日,in猶拖著年老ê身軀,來beh敬拜上帝。這就是真正ê人,真正成 (sêng) 人ê人。

保羅先生寄hō͘伊ê kiáⁿ提摩太ê第一張批5:1-2有按呢寫:『莫得責備老人,tio̍h勸伊親像(家己ê)老父;少年人親像(家己ê)兄弟;老婦仁人親像(家己ê)老母;少年婦女親像(家己ê)姊妹。』

雖然老人往往有伊ê固執、偏見、khha無愛洗身軀、有khah愛錢、khha無beh信用別人ê種種毛病kap缺點。但是你敢講我年老ê時bē變按呢?Beh若是我,我想我將來一定會kap in仝款仝款 !

你若看著gín-á 佇hia走來走去,人佇chia teh作禮拜,伊佇hia哭kah kaiⁿ-kaiⁿ叫,實在吵死。但是我想我細漢ê時,mā差不多是按呢:chiah-ê攏是台灣話 (有人講台灣話有話就有漢字來寫,若m̄是伊講白賊,就是伊無頭殼,因為咱台灣話內底本來就有真chē漢字寫bē出ê話。所以咱這禮拜beh過ê就是咱教會印ê賀年片HAPPY TAIWANESE NEW YEAR! m̄是Chinese New Year)

Sai-nai, la-sam, hàu-tai, la-cha, ùn-thùn, lám-nōaⁿ,

hau-siau, kha-sau, phok-kiat, giàn-thâu, pin-tōaⁿ, han-bān,

kok-pih, ko͘-ta̍k, pì-sù

過去ê我攏有chiah-ê毛病。是按怎咱若看著別人ê gín-á tō無法度kā in疼、kā in寬容?對外口人笑瞇瞇,對家己ê某kiáⁿ,要求真嚴。

咱是一個人,tio̍h愛bat咱ê本性,bat世情,m̄免講話講siuⁿ緊、講siuⁿ大聲。

Koh講這本我頂禮拜轉去日本ê時買ê這本松原泰道先生ê冊。伊講:

富貴出佇慈悲 (有慈悲ê人,財產才khiⁿ會tiâu)

福德出佇善良

無病出佇信心

愛敬出佇忍辱

智慧出佇磨鍊

人格出佇禮拜上帝ê人

短命出佇無情

病身出佇不淨

貧赤出佇貪戀

放蕩出佇破戒

Chiah-ê攏是咱ê主耶穌所講ê道理差不多仝款,用ê字無仝niā-tiāⁿ。

上帝創造我作一個人,有我ê軟弱,亦有我ê堅強。

有人講:作基督徒就是『忘我』『bōe記得我』『無我』『放棄我』。

Che是無可能ê代誌。顛倒去注意看:真chē講伊『無我』ê人,愈自私、愈偏見、愈bē寬容、講話愈歹、愈有我。這種人不但m̄-bat伊家己,mā m̄-bat伊ê上帝。

真正佇基督教內面ê『無我』kap『有我』ê解說,是kap通常台灣人ê理解癲倒反。基督教ê『無我』產生佇暗時,暗時beh睏ê時,一定bē使有『有我』ê意識(英文叫consciousness),一定家己tio̍h『死』去上帝hia,才叫做『睏會去』。暗時bē使『有我』,暗時tio̍h『無我』;日時tio̍h一定tio̍h『有我』,bē使顛倒反。

我有bat一段時期,幾偌禮拜睏bē去。暗時beh睏以前,心內真緊張:盈暗m̄知影睏會去無?愈緊張,愈睏bē去,規暗攏『有我』,自我意識真強,無beh『死』轉去上帝hia。結果早起起來,這場戰爭失敗,因為家己無死。

這場戰爭我若是『成功』,意思就是:我昨暗有戰死啦,有死去上帝hia啦。

每日一定ài有一次去見上帝。Che就是人間ê宗教性永遠存在ê原因。

但是上帝創造咱『作人』,目的是叫咱ài有人ê『意識』,有這個意識,人才知我是人,人才知用思考來bat世間ê道理。所以『意識』對人或是對上帝來講攏是真寶貴ê物件、真有尊嚴ê物件。意識代表上帝hō͘世間人作人ê價值。每早起目睭金,就是上帝kā咱講:Chím-má是日時,你tio̍h用你天賦ê人ê意識去拍拚。所以講:『有我』mā是真好真重要ê代誌。

暗時去見上帝,日時轉來作人。人bē使暗時beh作人,日時beh作夢、beh去見上帝,這種人是無路用人,bē成功。

上帝愛咱會曉作人,作一位『有我』ê人。咱來教會,就是beh按怎來『作我』,按怎來『作人』。Tio̍h先會曉作我、會曉作人,才來學作基督徒mā bē慢。

保羅佇腓立比人書1:21有寫:『我活teh就是基督;死就有利益 』。這句話m̄是講:我就是基督。伊究竟是甚麼意思?

佛家認為一生修行,最後會tàng『成佛』。但是基督徒無法度變作基督,mā m̄免變作基督。

保羅是講:『我活teh』本身就是基督。『活teh』就是會曉作人,活落去、會曉作人,就是基督啦。

因為咱ê上帝是佇天頂,一位完全ê上帝。二千年前,伊來這世間,作一位完全ê人:會笑、會歡喜、會飫、會艱苦,koh會哭、會流目屎ê人。

最近橫濱ê蔣中山醫師寄來伊kā 佇東京十幾位醫師『說教』ê錄音帶。伊kā hiah-ê醫師講:恁m̄-thang信基督教,但是恁tio̍h信基督。

因為基督只有一位。我佇神學院ê時,必須修德國ê思想家尼采ê思想。雖然尼采最後hō͘人掠去精神病院,但是伊講ê話,有一部分真有道理。伊講:這世間只有一個基督,但是這個基督二千年前已經hō͘人釘死佇十字架頂啦!

有真chē有信仰良心ê人,不但知影伊無法度變作基督,mā反對基督教、反對基督教會。因為『基督』若是變作一個『教』,就會產生真chē靠上帝食飯ê人,咱台灣話叫做『食教ê人』。有chiah-ê 『食教ê人』,就會產生『教階』,就會有宗教權威,就有宗教戰爭。

佳哉,日本真早一百年前tō克服這個問題。In有產生一個『無教會主義』。In ê牧師m̄免食教,牧師家己做工、趁食、生活,牧師kap會友攏平等。

上帝來這世間作人、作罪人、為人死,主要就是愛咱會曉去好好作人,m̄-thang去信『基督教』。

我想這聲又koh淒慘啦,一定有人去講:陳牧師佇教會台仔頂叫人m̄-thang信基督教!

我是講:tio̍h信基督,m̄-thang 信基督教。

今仔日講道講來到chia,beh按怎收尾?

我想代先ài先唸幾段聖經才來收尾。

以弗所人書6:10-17:『我猶有未了ê話:恁tio̍h倚靠主,倚靠伊ê大能大力,作剛強ê人。Tio̍h『穿』上帝全副ê軍裝,就會抵擋魔鬼ê詭計。因為咱m̄是kap屬血氣ê爭戰,乃是hiah-ê執政ê、掌權ê、管轄幽暗世界ê、以及天空屬靈氣ê惡魔爭戰。所以恁tio̍h『穿』上帝全副ê戰甲,hō͘恁佇風險ê日抵擋會tiâu,而且成就一切,猶會khiā在。所以tio̍h khiā在:用真理作腰帶,用義作護心鏡遮胸,用平安ê福音作鞋穿佇腳裡,koh tio̍h giâ信作盾牌,thang拍滅一切歹ê火箭,koh tio̍h戴救恩ê頭盔,提著聖靈ê寶劍、就是上帝ê道。』

以弗所人書4:20-24:『若是恁學習基督,m̄是按呢。恁若果然聽見伊ê道,領受伊ê教,學了伊ê真理,就tio̍h thǹg去恁以前舊ê人,這個舊ê人是因為私慾漸漸hō͘恁敗壞;koh恁tio̍h心志改換一新,『穿』上新ê人。這新ê人是照上帝ê形象造ê,有真理ê仁義kap聖潔。』

歌羅西人書3:9-12:『莫得講白賊相騙;因為恁已經褪 (thǹg) 去舊人kap舊人ê行為,『穿』上新人。這新人佇智識上漸漸更新,親像作伊ê主ê形象。』

警察穿警察衫,兵仔穿兵仔衫;咱基督徒mā穿基督衫。

阮細漢過年ê時,父母攏叫阮tio̍h穿新衫。我上無愛穿新衫。Khah穿tō是彼領舊khakhi ê長褲:出門穿彼領,轉來穿彼領;人客來穿彼領,人客轉去mā穿彼領;甚至倒佇眠床頂mā是彼領。

有ê人買新衫以後,先khǹg佇 thang-su內,等到beh chhàu-phú才提出來穿。

保羅ê教道內面,對我上有力ê所在,就是講:咱m̄免作基督,咱m̄免作上帝。咱干單穿基督ê衫就好啦!Che是真簡單ê方法:咱m̄免信基督教;穿基督ê衫就好。

保羅mā bat講:咱作基督徒ê一生,親像teh做戲。做戲hō͘天使看,做戲hō͘上帝看(哥前4:9)。

做戲tio̍h穿做戲仔衫。你無法度改變你作人ê命運,你甚至無法度改變你ê本性。但是最少你tio̍h會曉佇外口來穿彼領基督ê衫,來做戲hō͘世間人看、hō͘天使看、hō͘上帝看。

人生若講是做戲,講著siuⁿ輕啦。最少咱來講人生是teh穿衫。咱來穿彼領基督ê新衫:彼領

真理ê衫

公義ê衫

平安ê衫

信德、救恩、希望、愛心ê衫。

衫穿佇我ê身上,m̄是beh hō͘人看。是beh hō͘上帝看。

咱穿基督ê衫,mā m̄是beh hō͘人用目睭看,是beh hō͘人用心肝去『感覺』。我有穿基督ê衫iah無,m̄免我用目睭看、用嘴講,人自然感覺會著。我今仔日穿這領牧師服,豈tō會tàng講che就是基督ê衫。無,這m̄是基督ê衫,che是人ê衫。

我真同意保羅先生對人性本身有不止多懷疑kap不信。咱台灣話mā有講:『江山易改,本性難移。』保羅mā時時講,伊有一個內底ê我佇 hia khiā-tiâu-tiâu,hō͘我應該做ê代誌無去做,我無應該做ê代誌偏偏仔去做(羅馬人書7:18)。這是作人悲哀ê一面。

但是作人有伊真樂觀ê一面,抑是真hō͘人歡喜ê一面,就是咱有法度來換衫,來穿新衫。我若日日穿這領新衫,雖然拄開始有bē四配ê所在,慢慢咱就來修改,改hō͘伊四配。Che是咱一世人ê工作:穿這領衫kap基督講話,穿這領kap人講話。這領衫穿久會變我ê,會kap我ê皮連作伙。

人ê生命kap福音ê本質本來就是有對立ê關係,世間ê代誌無一項無對立kap互相牽引ê關係,親像咱ê嘴齒生來就排bē齊仝款。上帝hō͘咱生來這世間,koh hō͘咱一個福音ê外衫,叫咱來穿,意思是講,che才是真正ê人生。

我真愛、真感謝上帝hō͘我生作人,若是講有後出世,我mā真希望轉來這個世界作人,轉來阮阿媽ê大灶頭邊,走來走去,鼻著飯phí ê芳味,準備beh食飯。我想hia就是我上意愛ê所在,我ê天堂。我有一日死,mā希望死去彼間灶腳,m̄免去死佇彼個『日頭赤iāⁿ-iāⁿ,無日時無暗時,逐個人攏穿白衫,日冥攏teh喝哈咧路亞』ê所在。彼款所在m̄是我ê天堂。

最近聽講有人做『民調』,講有95% ê查甫人,講後出世beh koh娶伊作某;但是若是問著查某人,有95% 講那有後出世,無beh koh嫁伊啦。

真感謝上帝hō͘我來作人,雖然我出胎ê時是用哭來這世間,雖然來到這世間有種生老病死ê風湧,雖然我一生中間風颱落雨比好天日出ê時間khah chē,但是每日我若醒,tō是感謝上帝,今仔日koh hō͘我有一日來作人,作kap咱ê上帝仝款,因為咱ê上帝二千年前,佇世間歷史ê最後、最適當ê時刻,伊mā轉來作人,做kap我仝款ê人。我活teh,就是上帝kap我活teh,就是基督。

二個月前我轉去日本,sô來sô去koh sô去我古早上班ê新橋 (Shimbashi)車頭。新橋是東京都第一個火車頭。我koh去古早仝彼間剃頭店剃頭。我bat 佇彼間剃頭頭店剃頭剃十五年。我m̄是剃頭師父,我是去hia hō͘人剃頭啦。

但是我這次有注意著,佇火車頭ê頭前,彼個老火車母ê陰影ê下面,有一寡老人,sô 來sô去,坐佇 hia teh歇睏。原來才知影,是一寡退休ê老人。

In 佇青春到壯年ê歲月,五、六十年ê中間,逐日攏佇這個新橋車頭上班下班出出入入,下班以後攏佇車頭邊仔ê小酒店sip二杯仔。

Taⁿ,人已經退休啦,但是每早起伊自然會koh轉來這個伊上熟悉ê所在,雖然已經無公司thang hō͘伊去上班,但是佇 hia  ê每一欉樹仔、每一塊磚仔、每一個椅仔、每一間小酒店,攏有in真親切kap溫暖ê氣味,親像路邊ê彼粒真親切ê石頭,日日teh叫伊:『轉來啦,來chia坐啦!』伊若來到新橋,伊ê心內tō真安心、真滿足。有人講che就是『otoko no namita』(作查甫人ê目屎』。新橋車頭,親像Schubert ê彼欉『菩提樹』,時時叫著彼個樹仔腳大漢ê gín-á:『轉來啦!轉來啦!』;亦無mā親像咱彼條『黃昏ê故鄉』,teh 『叫著我!叫著我!黃昏ê故鄉不時teh叫我!』

但是我感覺chiah-ê老人真有人性、真高貴、真可愛、真正成 (sêng)人。

我足驚有一日我會親像chiah-ê老大人,bô-têng-bô-tî走來新橋火車頭邊仔sô來sô 去。所以最近牧師娘叫我m̄-thang koh去新橋彼間剃頭店剃頭,mā m̄-thang koh去彼間麵店食miso lamen。

松原泰道先生ê這本冊內底koh講著一個故事。伊講:我37歲ê時,是去hō͘人請作市場ê管理員。有一日,伊看著一個少年人,藏佇人群內面,鑽來到水果擔邊,將一粒lingo(蘋果)iap落去伊ê落袋仔底,tō soan出去。

伊tòe 佇彼個少年gín-á ê後面,beh看伊是對叨位來ê gín-á。

彼個查甫gín-á看是差不多9歲10歲,國民學校2、3年ê款。

伊對街仔路出去,沿著廟仔頭前彼條路去,彼條路一直通去墓仔埔。

伊看著彼個gín-á 佇一個新開ê墓仔ê頭前停落來。伊用伊ê手,kā墓牌póe-póe-leh, koh用khǹg 佇墓仔邊ê掃帚,kā墓仔ê土腳掃清氣,koh去kōaⁿ一桶水,kā墓牌ak一下。

伊才對落袋仔輕輕仔提出彼粒偷the̍h來ê lingo,khǹg 佇阿母ê墓牌前,跪佇hia祈禱。

忽然間,松原桑聽著這個細漢gín-á 佇hia teh哭,『阿母!阿母!你thài m̄轉來!?』

本來是beh去掠偷提lingo ê查甫gín-á,松原桑遠遠看著這個光景,kap哭伊ê老母ê查甫gín-á仝款,伊匿佇樹仔腳,mā 佇hia teh哭。

這個墓牌,這個冷ki-ki ê墓牌,m̄是無生命ê物件。對這個孤單ê細漢gín-á來講,是代表伊ê老母,代表老母所有ê愛kap寄托。你敢講墓牌m̄是活跳跳ê物件嗎?

這粒紅-kòng-kòng ê lingo,m̄是無活命ê物件,是代表這位孤單ê青年,心內對老母所會tàng奉獻ê所有ê 懷念、感謝kap愛。

咱生活環境ê四周圍所有ê物件,攏是活ê物件,無一項是死ê。咱ê上帝攏活佇in ê內面。

所以咱作信耶穌ê人,m̄-thang hiah gâu講話,講話m̄免hiah強、hiah大聲。

上帝創造咱作人,一旁是叫咱作人,作一個真正ê、有血有骨有肉、會流目屎ê人,koh會tàng kap人kap動物講話、mā會tàng kap宇宙萬物ê星辰、山嶺、樹木、草花講話ê人;另外一旁,咱知影這種bat世情kap合人性ê人猶m̄是完全ê人,咱tio̍h有法度穿衫、穿新衫、穿基督ê衫來作一位khah高ê人,khah有價值ê人。

這二種代誌ê合一,是咱作信耶穌ê人,每日必須做ê功課。每日tio̍h學習咱來kap這世間合一,世間所有ê物件攏是上帝創造有感情,有活命ê物件,攏tio̍h謙卑去尊敬kap接受,講話m̄-thang彼呢大聲;第二項,逐日攏來穿基督ê衫。Che攏是咱必須經過ê人生ê經驗。

 

祈禱:

『主啊,懇求你hō͘我學習作人,作一位平凡但是koh偉大ê人,做一位bat世間ê人,雖然

會流目屎,但是mā會曉唱歌;

知影有春夏秋冬,知影生老病死ê人。

Hō͘阮知影阮ê人生,代表上帝佇這世間ê好意kap攝理,

阮kā伊勇敢歡喜活落去,就是基督活佇阮內面。

懇求你hō͘我m̄敢講大聲話,m̄敢beh作上帝;

Hō͘我知,雖然有真chē我有無法度改變ê宿命,

但是chiah-ê人ê宿命,mā有真寶貴kap尊嚴,

因為你mā承認阮、認同阮、支持阮,

因為按呢,你mā來世間作人。

請你借你彼領衫hō͘阮穿彼領上帝ê súi衫,

穿著親像beh過年ê kimochi ê彼領。

我知,若是按呢,就是主耶穌活佇阮ê內面,我就會活作真正ê我。

感謝主,你hō͘阮會tàng按呢來作人。

阮按呢感謝祈禱,奉靠主耶穌基督ê聖名來感謝。

a-men.』

kap 朋友分享

No Comments

Leave a Reply

Your email address will not be published.

Translate »
Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致