『共生ê福音』

創世記7:6-16; 8:1-5,15-19

陳柏壽 牧師

金句：上帝講：『我kap恁，kap恁各樣活物，所立永世代ê 約，是有記號ê。虹(khēng)欲出現佇雲裡，hō͘我看見，就欲記念我kap地上各樣有血肉ê活物，所立永遠ê約。』（創世記9:12,16)

熱天ê蓮花池，有圓閣大葉ê蓮葉，浮佇水面真súi ，真安靜。閣開蓮花，出佇污泥不染，是宗教思想內面，真súi真清氣ê代表。

有一日，佛祖佇蓮花池邊散步。伊對蓮花中看落去，一直看著地獄中眾生悽慘ê景相，閣看著彼位大歹人Kandata嘛是佇hia teh喝艱苦。

這位Kandata是一位大賊鼓，在世無惡不做，thâi人放火。

但是有一回，伊佇山裡teh行，看著一隻蜘蛛佇土腳teh sô，伊ê腳自然就giâ–起-來，準備欲kā jôe hō͘死。但是，忽然間，伊煞想講：『放伊去–啦！』腳kiu 倒–轉-來，無kā蜘蛛jôe死。

佛祖心內想：Kandata雖然是大歹人，但是伊在生ê時，至少有做過一項公德，就是彼日佇山內，kā蜘蛛放生ê彼項代誌。

佛祖看著蓮花頂有一隻蜘蛛teh歇睏，就用手kā伊掠–起-來，蜘蛛就放一條蜘蛛絲，向著地獄ê苦海伸–落-去。

Kandata看著這條銀色ê蜘蛛絲落（la̍k）落來佇伊面前，歡喜到未顧–佇，就緊緊用手kā  giú–tiâu-tiâu ，一直向頂面爬–去-去。

伊一直爬，一直爬…。這條蜘蛛絲，雖然看著真脆弱，但是Kandata直直爬，直直爬，蜘蛛絲嘛無–斷-去。

Taⁿ，閣二步tō欲到地面–啦。Kandata心內想講：『真佳哉，我閣一屑仔tō欲脫離地獄ê苦海–啦！』

就是佇hìn時陣，Kandata ê頭殼向下面看落去。噯–喲-òe ！Bē直–啦！地獄內所有受苦ê人，男男女女，以及所有ê精牲，一個一個攏擒（khîm）tiâu 佇這條蜘蛛絲ê頂面，有千千萬萬，tòe佇Kandata ê後面，攏欲爬–起-來。In嘛攏真愛脫離地獄ê苦海。

Kandata看一下大驚。伊心內想講：我只有剩幾步就到頂面，chiah濟人teh giú這條絲，若是斷–去，我就一切攏烏有–去-啦！

Kandata就開嘴向下面，大聲喝講：『恁chiah-ê人啊，kā我落–落-去！這條絲是我ê neh！恁攏kā我落–落-去！落–落-去！』

但是Kandata ê嘴講猶未合 ，這條絲煞 “phiak!!”一–下，斷–去。Kandata ê身軀，親像一粒干樂，直直閣chai落去地獄ê萬底深坑內面。

佇地獄黑暗ê天空中，無星ê光，嘛無月娘ê光，只有剩彼條幼幼ê銀色ê蜘蛛絲，吊佇半空中，hàiⁿ-kòng-hàiⁿ

hàiⁿ-kòng-hàiⁿ…

極樂世界蓮花池ê蓮花，並無因為按呢停步

伊繼續開花

開出親像玉仔ê芳花

佇lok-ko͘-môai ê頂面…。

人類本來應該是共生ê動物，但是因為人內面ê罪性，hō͘伊無法度kap人共生，時時為著家己自私ê生存，來相殺，同時嘛無法度kap培養伊ê大自然共生，一直teh破壞伊家己生存ê環境，chím-má地球氣溫一直升高，海水一直chhèng高，就是按呢。

這禮拜ê報紙大家m̄知有看–無？Florida一尾十三呎蟒蛇 (python)，欲吞一隻比伊家己ê身軀閣khah大隻ê一隻九呎ê鱷魚(alligator)，二隻攏m̄放對方soah ，結果二隻互相相吞，結果攏吞一半，二隻攏死佇hia。這叫做惡性ê共生。

人類ê初代家族，亞當生二個kiáⁿ，一個叫該隱，一個叫亞伯。這二位兄弟，嘛是因為自私kap怨妒，阿兄kā小弟thâi死，無欲放伊soah 。

雖然是按呢，雖然人類ê本性是自私、怨妒、殘忍、戰爭，但是創世以來，聖經teh描寫上帝ê本性一直是愛咱人類，亦愛咱人類學習互相相愛，互相尊重，同時亦尊重世間其他ê生命。

大水欲來以前，上帝叫挪亞將世間ê動物

無論好ê動物

Bái ê動物

無論雄ê動物

馴ê動物

無論有毒ê動物

抑是無毒ê動物

逐（ta̍k）種攏一對一對：一隻公ê，一隻母ê，攏入去船頂。

不但挪亞一家tòa佇船頂，所有ê動物嘛攏平安無事，歸隻船安安靜靜，和平共存，大家相疼，無人相拚。

落大雨ê日，日到冥chhop-chhop-tih，有時sì-sà–叫，青狂白狂ê西北雨，親像Seattle ê十二月天。

但是佇挪亞ê大船內，平安無事。外口雨愈大，內底愈平安，愈溫暖。

上帝命令人kap人、人kap自然、人kap動物，攏是命運共同體，攏tio̍h活作伙，作伙才會活。

挪亞造船了後，叫大家上船，大家tio̍h緊上船，m̄-thang延chhiân，

M̄-thang 看東看西

M̄-thang 等東等西

M̄-thang 想東想西

七日內你tio̍h搬厝、七日內你tio̍h換頭路

七日內tio̍h改變你ê整個人生

整個意念

整個家庭

整個財產

整個生存ê基礎。無時間hō͘你去考慮。

上船ê時間若到，雨tō欲開始落–啦，會落到四界tâm-kô͘-kô͘，風會開始thàu，水會淹入來到客廳、淹到眠床頭

厝前ê 檨仔（soai-á）及蓮霧攏chháiⁿ-chháiⁿ–落-來

上帝閣hō͘雨繼續落

水淹到腰

淹到胸前

淹到腳脊phiaⁿ

等淹到鼻孔tō已經bōe赴–啦

所以咱著照上帝ê指示：應該上船ê時，tio̍h緊上船，

上上帝ê船

上天國ê船

上生命ê船

船ê雷聲若響，請你一定m̄-thang khiā teh看，tio̍h愛上船。

挪亞十日前八日後就teh準備，算閣量，寸尺掠真準，揀（kéng）上好ê松柏、扁柏、hinoki，來作船板，彼陣m̄知有用鐵釘亦無，若有，tio̍h用stainless ê釘，khah bōe生銹（sian）。船頂閣有窗仔門，船艙分作三層。嘛有大門，親像海中央ê一間厝。

為著留這家伙仔ê活命，為著留世間chiah-ê精牲走獸ê活命，老挪亞真早tō開始準備。『好天tio̍h積雨來糧』。

老挪亞雖然已經600歲，但是伊無認老。伊無kā上帝講，上帝啊！我已經老khok-khok–啦，無法度閣去造甚麼船–啦！

閣講，我嘛m̄-bat造過船，我tō m̄是海洋學院造船系畢業ê。

但是上帝講：世間無甚麼專家–啦，上帝無承認專家。上帝叫咱愛『有心』，有心就萬事OK–啦！

所以咱m̄-thang講我已經50歲、60歲、 70歲–啦！可能今仔日開始，上帝才欲叫你去起大船，做大代誌嘛無一定–neh！

閣講，你佇好天好日佇土頂teh造船，人人攏會kā你笑，笑你這個戇人。中國話講你是teh 『異想天開』！

但是挪亞無按呢想。若是有上帝ê聲佇伊ê心內，就tio̍h一發進前。上帝ê代誌，m̄是用咱人ê感官kap理智可以瞭解ê。挪亞真清楚伊tio̍h著做甚麼代誌，無teh驚人ê批評，無必要hō͘人人歡喜。

你若欲hō͘人人攏歡喜，你tō甚麼代誌攏免做–啦。阿扁仔就任總統以來，tō是想欲hō͘人人攏歡喜，才變到今仔日，創造一個世間獨一無二ê國家，叫做『在野執政』ê國家，無一項事成功。

我初–來作咱大家ê牧師，當然有真濟想法有無仝ê所在。逐人攏有伊家己心內上帝ê聲，chiah-ê聲欲按怎來整合，互咱確實看著是上帝hō͘咱ê指示，hō͘咱會tàng共同協力來起造這隻上帝ê大船，就是咱大家努力ê目標。

挪亞不但佇『好天好時』teh造船，人造船是佇海邊，伊是佇『土面』teh造船，伊閣khah是佇『高山頂面』teh造船。咱講這個人真正是怪人。所有有靈性ê人，kap普通人一定無仝。

實在嘛m̄是甚麼奇怪。挪亞知影，伊彼隻船若m̄是造佇山頂，大水來ê時，人會尋無船。

你ê旗仔著真明。

旗仔無明，做代誌無力。

咱佇chia做禮拜，咱ê旗仔是甚麼？

咱ê旗仔，第一是『基督』，『耶穌基督』；第二是『台灣』：咱ê文化是台灣，咱ê族群是台灣，咱ê語言是台灣，咱ê會友認同台灣。這是咱這支旗仔ê特色。

這隻船另外一個特色是駛著真慢。船頂無煤碳、無石油thang用，無馬達thang pháng ，只有靠上帝ê風teh吹，靠上帝ê風teh sak。坐起去挪亞彼隻船頂，明仔再欲駛去叨位，無人知。這個世間hiah小，人生hiah短，咱chhih-chhih-chòaⁿ是欲chòaⁿ去叨位？豈有影著駛彼呢緊？

我tòa東京ê時，日本警察叫人駛車m̄-thang超速，就設一個標頭，叫人kā 掛tiàm車尾，寫講：『狹狹ê日本，你chhih-chhih-chòaⁿ是欲chòaⁿ去叨位？』（semai Nihon, soun-na-ni ha-si-ru to, do-ko e iku ka?)

你台灣tòa bōe爽，搬來Seattle, chím-má猶閣chhih-chhih-chòaⁿ想欲閣搬去甚麼所在？

這世間，愈gâu算時間ê人，愈gâu計較時間ê人，做出來ê物件，比–去-來，品質攏有khah差。咱台灣話嘛有講：『緊pháng無好紗，緊作無好ta-ke 』。緊事緩辦，tio̍h講ê時，慢慢仔講，tio̍h kông ê時，慢慢仔kông 。有人性地khah急，『性地一下起，通街糶（thiàu）無米』，你kap我大家作伙來訓練家己，將家己ê性地，努力kā收入去理性ê內面。大家攏來學Seattle ê文化，用開明、和平來作人。

這隻船chìn靠ê動力只是靠上帝ê風。坐佇船頂ê人，呣免靠家己ê gâu

家己ê才情

家己ê本頂

咱大家佇船頂拍拳、練工夫、oan-ke 、sio-jiáng攏無效。

坐來到這隻船，tio̍h將一切粗重ê擔，攏總交hō͘上帝。

古早佇莊腳真少有to-ra-ku，有一個toraku ê ùn-chiàng看著路邊一個擔–擔，擔kah重iⁿ-iⁿ ê老阿伯仔。伊就叫伊去車後面坐。駛十外分，ùn-chiàng越頭看後面ê老阿伯仔，噯–喲，老阿伯仔ê肩胛頭猶擔著彼擔重iⁿ-iⁿê擔，khiā佇車頂hia hàiⁿ-kòng-hàiⁿ, hàiⁿ-kòng-hàiⁿ。伊叫阿伯仔：阿伯仔！擔放–落-來-啦！擔khǹg tiàm車頂to好–啦！

你知阿伯仔按怎kā應無？

伊講：『噯–喲，你hō͘我坐tō真好–啦，我thài甘連這擔嘛hō͘你載！歹勢–啦！』

實在是家己giâ枷（kê），家己放bōe開。明明上帝欲kā咱擔，你家己欲擔，結果是二個人teh擔，你teh擔，上帝嘛teh擔。上帝teh擔二人分。

上帝hō͘咱ê船浮–起-來，閣用伊ê風kā咱sak出去。咱ê人生hō͘風去處理tō好–啦。

風今仔日吹這旁，咱行這條路；明仔再，風換吹彼旁，若是是上帝teh chhōa咱，咱行彼條路嘛是好。

挪亞ê船去hō͘風吹到hia，船tō佇hia pha-錠。船pha-錠ê所在，就是咱欲佇hia

重新起造咱ê新ê田園ê所在，

就是咱第二人生開始ê所在，

你tio̍h tùi hia，重頭開始

上帝若是hō͘你佇Seattle pha-錠，咱tio̍h決心kā活佇chia，死嘛欲死佇chia，按呢kā 想。

古早阮阿祖，伊一世人m̄-bat看著甚麼福建穎川，講甚麼穎川是in祖家。一世人干單一擺伊kap潁川發生關係：就是伊死以後，人佇伊ê墓牌刻『福建穎川』佇頂面，按呢niā-niā 。我想che對kā咱成大漢，飼大漢ê台灣老母，實在無公平。

我佇Hawaii埋三位老大人，一個是廣東ê老華僑，chhōa台灣某，但是墓牌攏寫Hawaii，另外二位攏寫in是台灣人。

我teh 想，咱定根ê所在，就是咱ê故鄉。

今仔日咱佇chia討趁、生活、定根，咱tio̍h認同這塊土地。佇Seattle，咱tio̍h認真活作Seattlites.｡

咱佇chia有年紀大ê人，時常tio̍h互相作伙

中年人嘛tio̍h作伙

大家有心靈ê共性

有精神上互相ê依賴ê共性

互相倚靠

互相期待

互相勉勵

才會tàng建立咱ê台灣教會

挪亞翁某，in kiáⁿ新婦翁某，精牲一對一對，入去船內。出船嘛是一對一對。

若無一對一對，拄著危險ê時欲按怎？有二個人，拄著敵人ê時，猶有另外一對目睭teh鬥看。

家庭一對一對

教會一對一對

傳福音ê時，最好二個二個出去，訪問會友最好嘛是二個二個。

挪亞ê故事最特別ê所在，我想是欲kā咱講：基督教是teh講一個共生ê福音

上帝kap世間人作伙行

世間人kap世間人作伙行

人類kap動物大自然作伙行

咱ê上帝經過人類歷史ê變遷

Tùi創世來到挪亞ê三個kiáⁿ，人講是人類三大種族，三大文明開化

經過黑暗ê中世紀

經過世界大戰

經過現代化

經過超現代

經過伊拉克戰爭

經過美國ê Liberal kap Conservative ê對立

上帝永遠佇hia 、上帝永遠無改變

伊叫咱造船

入船

起帆

互相協力、駛–出-去

Siuⁿ 緊bē使

Siuⁿ lēng bē使

發條ká siuⁿ ân bē使

逐項攏做到拄拄好

靠上帝ê風來行

這隻挪亞ê大船，繼續向前行

有人講：Life is a performance.  It is not a rehersal.｡每日咱攏著給

活到súi當當

活hō͘清氣溜溜

活hō͘漂撇美麗、歡歡喜喜

祈禱：

『主啊，願你hō͘阮ê家庭順風

Hō͘阮ê教會順風

Hō͘阮ê國家順風

Hō͘阮徛起ê世間順風

Hō͘阮ê人生，坐佇這隻挪亞ê大船

向著無限ê光明ê上帝ê國度前進

歡歡喜喜過日子

祈禱靠主耶穌聖名。阿們。』