『跳落去！潦落去！』

馬太福音14:22-33

陳柏壽 牧師

金句：『學生看見伊佇海面行，就喉（âu）叫，生驚，講是鬼。耶穌連鞭（liân-piⁿ）kā in講：放心，是我，呣免驚！』

陳教授對New Orleans來，咱拜託伊講一寡這次大水災ê情形，伊對尋（chhōe）無hotel開始講，講到最後，就是in沿著後尾路、堤防頂，千辛萬苦，駛轉來到老厝ê門口。Tùi外口看，老厝猶佇hia，但是對面彼欉百外年ê oak tree倒佇in門口ê另外彼欉百外年ê oak tree ê頂面。

佇我ê想像中，hō͘我想著彼條古早ê舊歌：Hays ê曲叫做My Dear Old Sunny Home：

久見ê故鄉

轉來ê時，花猶teh開

風嘛微微仔teh吹

門前小小ê溪

猶是幼幼ê水聲

啊！我親愛ê舊厝

雖然久已經無人tòa

玫瑰花已經謝了

但是古早ê故事

一篇一篇佇心內出現

古早ê溪水

流出仝款ê水聲

古早手牽手ê同伴

Chím-má佇叨(tó)位–啦？

Goodbye孤單ê我、Goodbye孤單ê舊厝

嘛hō͘我想起舊年我欲離開台灣ê時，有去斗六看舊厝最後一面

正身已經khi一半

厝前彼欉大欉老檨仔樹（soāiⁿ-á-chhiū）

M̄知叨位去–啦！

舊厝頂soan真濟青藤

青藤頂面鋪一片粉紅色ê小蕊花

親像新娘ê頭殼頂ê花

我bat佇hia過過我一生永遠

Bōe bē記得ê

黃金ê童年

大水teh過，親像時間teh過

大水會將故鄉ê舊厝變作廢家

時間嘛將記念中ê美麗ê田園，變作廢家

時間kap大水攏仝款，咱攏擋伊bōe tiâu

咱人生每一時間攏teh hō͘時間ê大水sak teh行

無進前嘛bē使

但是欲進前嘛是真殘忍：將美麗ê夢、多年起造ê老厝，一點一滴kā 伊毀去

毀到只有剩（chhun）一點仔懷念。

現實ê人生實在無情

但是咱活佇這個時間ê大海內面，咱tio̍h潦–落-去

M̄愛潦–落-去，嘛tio̍h潦–落-去

明明看著伊ê身軀，一直老–落-去

看著伊ê身軀，一直虛–落-去

彼間老厝，一直崩（pang）–落-去

厝瓦，一塊一塊一直落（la̍k）–落-去

嘛tio̍h按呢kā潦–落-去 – 每一分鐘，攏teh kap這個時間ê惡魔相搶

搶看有一屑仔時間留佇手內

看有法度加留一刻久無

看有法度hō͘時間變作咱私有ê財產無？

但是看著時間親像水，捧(phang)佇手中，伊對chńg頭仔縫soan出去，漏了了。

有人ê人生，跳落去時間ê大海，就一直沉–落-去：烏天暗地，心情去hō͘烏雲罩(tà)–著，心肝去hō͘鬼仔掠–著。你若去看嘴齒，欲照X光ê時，醫生佇你ê胸坎頂罩一領重iⁿ-iⁿ ê鐵衫，強beh bōe喘氣，爬to爬bōe出來，彼種感覺。

有人沉入去I.C. 產業，感覺是我會死–啦 (I死），自按呢沉–落-去；但是有人感覺是我會贏–啦 (I Can)，我有法度變天–啦 (I Change)，自按呢浮–起-來。親像彼得按呢，有法度行水面，看風景，一切順利，萬事OK。｡

有人講，人生一切靠上帝tō好–啦，tùi頭開始tō按呢kā潦–落-去。伊感覺人生不過是poah一場kiáu（賭），殘殘tō kā伊poah–落-去。上帝若有佇hia，tùi大樓頂跳–落-去，上帝會派天使去kā你ê腳扶teh，呣免驚。你看，馬可16章敢無按呢講：你手掠毒蛇，嘛bōe去hō͘毒蛇咬死；飲毒藥仔嘛bōe死–啦！

上帝豈真正有hiah濟閒工，逐日teh煩惱你欲去跳樓，sńg蛇，食毒藥仔？

Chím-má ê時代，叫做理性ê時代，咱ê上帝變作理性ê上帝。這個理性kap信心並無衝突。咱攏知信心第一重要，有信心就會tàng kā這粒山，tùi chia移去hia ，意思是講一種理性ê信心。主耶穌嘛bat講著kap中國『愚公移山』完全仝款ê故事，但是主耶穌m̄是叫這款人『愚公』，伊叫伊作聰明人，因為彼個人有理性ê信心。

起厝tio̍h照地勢起，才會合配，才會通風。

無 têng-tî跳落海，跳落山khàm ，幻想講天使會來kā你扶。破病無欲去看醫生，干單（ka-taⁿ）祈禱。Chiah-ê 想法已經無合時代–啦。

咱若只有無理性ê信心，結果是信心愈高愈強，咱會摔著愈thiám。咱ê信心ê標準愈高，咱家己心內ê壓力會愈大，咱ê期待kap掛慮會愈大，生命ê負擔會愈重，真容意想講上帝豈真正有teh聽我ê祈禱，上帝豈有同情我？

阮查kiáⁿ Kyoka 2/3歲ê時我chhōa伊去小學校ê溜滑梯thit-thô，我叫伊tùi頂面溜–落-來。開始驚驚，m̄敢落來，我講：爸爸手kā你hōaⁿ–leh。漸漸伊tō敢慢慢仔lu–落-來。後來伊煞愈lu愈緊，緊到我bōe赴去接，就摔到大孔細孔。伊想講：不管時，爸爸ê手一定會佇hia扶teh 。

我有一位猶太人朋友叫做Kleine，有一擺阮二家伙去箱根阮公司一間別墅thit-thô。In kiáⁿ對盪鞦韆真高ê所在摔–落-來，疼到哀哀叫，倒佇hia，bōe tín動。但是in翁某遠遠khia佇hia看，無欲走去kā扶。

阮佇邊teh看，看猶太人按怎教育kiáⁿ。

In心內可能嘛真緊張、真tio̍h驚。但是面色真安靜。知影這時陣，青狂白狂走去嘛無路用。

In無tín動。欲hō͘ in kiáⁿ家己khiā–起-來。欲hō͘伊佇甚麼所在跋倒、按怎跋倒，tio̍h愛佇仝所在閣khiā–起-來，用仝款ê方法，家己khiā–起-來。

這叫做理性ê訓練。

有一擺主耶穌叫學生船駛去加利利海ê另外彼旁。到位，伊一人上山祈禱。學生佇船頂，到暗暝真深，差不多早時四點，看著一個人佇海面teh行。實在是一個真恐怖ê一景。學生幾偌（jōa）點鐘，目睭金金teh看，看hia有一個鬼仔佇水面teh行。

Kàu耶穌去hō͘人掠去釘十字架以後，學生真孤單，規群匿（bih）佇厝內。忽然間有人來lòng門仝款。雖然是主轉（tńg）來teh lòng門，但是學生驚到破膽，想講是鬼仔來，仝款。

人愈拄（tú）著逆（ge̍k）風，chhòan chhòan鬼仔會到。明明厝頂teh漏，風颱才欲閣來。明明leh無頭路，煞（soah）去hō͘車撞–著。明明家庭teh破碎，才去tio̍h著癌。鬼仔時常tòe佇人ê悲慘ê後面，作伙來。

是m̄是鬼，tio̍h由對方家己來證明。若對方真正是鬼，人ê驚就bē煞。若m̄是，人心內ê驚惶，自然會消無去。

主耶穌先開嘴，講：是我，呣免驚！

若講：是『我』。這個我m̄是干單講是主耶穌本身彼ê『我』。凡若有『我』ê所在，就有安心。干單我上知我，別人無人知甚麼是我。

所以古早上帝有講：我就是我。

台語講：我就是自然而然ê上帝。

英語講：I am who I am.

主耶穌講我ê時，別人就無講話ê所在。所以這個我m̄是代表一個自私ê我。英文ê ego m̄是干單有負面ê意義。Ego代表著我ê尊嚴kap上帝ê地位。

彼得khah有靈眼。伊隨時知影：佇水面ê彼個人，就是teh講『我』ê彼個人，就是伊ê上帝。

伊煞kā上帝講：主啊，若是真正是你，請你hō͘我嘛會tàng佇水面行路！

彼得是一位勇敢ê人。

伊講伊欲跳–落-去。

伊講伊無欲只有用理性來過日：一日一日，親像機器按呢，作一位平凡ê人，一日一日干單過平凡ê日子。

佇彼刻，彼得ê腳就hōaⁿ過船邊，腳就踏去佇水面，心佇上帝，目睭看上帝，腳就浮—起–來，身軀就bōe沉–落-去。

但是隨時，彼得看著風彼呢強湧彼呢雄，風kap水沖著伊ê面ê時，伊煞起驚，目睭煞看下面，忽然間發現下面真深，腳踏bōe著底。

兒童故事內面teh講一隻狐狸teh jiok一隻山鹿仔。狐狸kā山鹿仔迫到山頭，想講：Jiok來到hia，你tō走無路–啦！無想到山鹿仔變一個勢，煞跳過另外彼ê山頭。

狐狸m̄甘願，嘛tòe伊跳，跳到真高，跳著真súi-khùi。但是跳來到半中央ê時，狐狸目睭一下向下面，才看著下面是萬丈深坑。狐狸ê二隻腳tùi下面煞開始冷–起-來。閣落去ê故事恁tō 攏知–啦。

阮kiáⁿ teh開始學騎鐵馬ê時，代先我攏佇伊ê後面，鐵馬kā伊扶到ún-ún-ún, tiâu-tiâu-tiâu。伊tō靠勢靠勢，腳踏仔tō一直踏–落-去，愈踏愈緊，真有信心。但是忽然間，伊越頭，看著我teh放手，放伊去–啦，伊看一下才知害，但是知害欲喝救人已經siūⁿ慢–啦。

彼得是一個人。伊知影人肉比水khah重，一定會沉–落-去。這叫做理性。

彼得敢kā跳–落-去，m̄是靠伊ê理性，是靠伊ê靈性。伊kā伊跳–落-去，是一種靈性ê表現。

不但跳–落-去是一款靈性，飛去嘛是。最近教會有人招待我kap牧師娘去Boeing Flight Museum，阮看一下晝，猶看未了。一百年前，tō是有一寡人，chhī-chhī-chhòaⁿ一直想欲飛去天頂。

咱想看–覓，已經幾偌 (jōa)萬年，人類干單會tàng佇土頂sô。人ê肉hiah重欲按怎飛會去去！何況閣是欲kā鐵板hō͘伊飛佇天頂！

Tō是因為有chiah-ê想愛飛去去天頂ê人ê靈性，咱今仔日才會tàng十點鐘tùi台灣飛到美國。

我感覺，有時上帝叫咱先跳lòe才講，靈性愈高ê人，先跳。

我欲先理解上帝、先bat聖經，才欲洗禮。

股票先算好才來買。

先看別人按怎釣，咱才來落線。

這叫做理性。

我這次轉去台灣教冊ê時，有人kā我講：你chím-má才知死。當初kā你講過，去美國– ê，早去tō早死

慢去– ê慢死

無去的無死

你tō m̄ siàn ！

Chím-má你看，你佇美國無頭路ho͘ⁿh! 你tio̍h乖乖仔kā我轉 (tńg)來！

但是另外嘛有人按呢講：

早跳– ê，早贏

慢跳– ê，慢贏

M̄敢跳– ê，chu-pān-sí ! 一定死！包你死！

雖然按呢講，人hia嘛有二千三百萬人，逐日佇hia活到好勢好勢。駛車ê時，閣會唱歌。

講起來，上帝嘛真gâu 作弄人：一方面叫伊tio̍h跳–落-去；另外一方面閣kā伊講你不過是人，你會知水真深，腳踏bōe著底。

有個牧師真gâu講話。講：跳–lòe-lah! 跳–lòe-lah! 有信心khah重要–啦！疼上帝ê人，最後攏會得著利益–啦！

有個牧師講話親像耶穌，攏會kā人講：『你thài彼呢無信心呢？』

有時咱teh kā人講這句話ê時，bōe記得咱家己嘛是一個人。親像彼得按呢，是一個人。

咱作基督徒，一生ê信仰歷程

咱ê心路歷程

咱ê天路歷程

實在tō是按呢：beh跳落去亦bē使

M̄跳落去嘛bē使。

有人講跳落去會死

M̄跳落去嘛是死

有人講：m̄跳，你tō是無信心

欲跳，會沉，你tō是信心無夠。

攏是in ê話。

信心這種物件，m̄是親像去Chevron加油，付30 kho͘, 就灌10加倫。無彼呢干單，無彼呢好算。

Hiah-ê愈gâu講信心ê人，pōng著人生ê絕壁ê時，愈緊soan路。明明佇日記內面寫100遍ê信心，是按怎chím-má信心攏soan了了？

愈講m̄通來美國ê人，愈chhī-chhī-chhòaⁿ欲來美國。來到美國，才問家己，我是按怎欲來美國？你佇台灣豈m̄是好勢好勢？

我讀協和神學院ê時有一位教授Kennedy伊講伊欲去讀神學院作牧師，伊kā in老父講：錢無重要–啦，呣免為著趁錢來過人生–啦。Chím-má伊欲退休–啦，才忽然間發現著伊bē-tàng閣tòa神學院ê宿舍–啦，chím-má才m̄知欲搬去叨位才好？！噯–喲，上帝嘛有活佇錢內底–呢！

伊有一擺kā我講，in爸爸嘛是牧師，作人ê牧師50冬，日日攏khǹg人呣免驚死，死不過是欲轉去上帝hia niâ。但是伊親目看著in爸爸欲過身ê時，頭殼真清楚，kā伊講：伊真驚伊會死–去！

這豈m̄是真矛盾ê信仰ê歷程嘛？信心kap理性ê對立。

佇靈界ê信心內面，主耶穌迫彼得踏出第一步。

但是嘛佇靈界ê信心內面，彼得有法度tùi伊ê內心喝出伊心靈最大ê求叫ê聲：『主啊！救我！我欲沉–落-去-啦！』

信心內面包涵著理性。咱tō是拄著理性ê絕壁ê時陣，咱閣轉來信心，來尋主耶穌，叫伊：主啊，救我，我欲沉–落-去-啦！

佇風kap湧ê中間，上帝kā咱講咱tio̍h踏出第一步。Kap我ê猶太人ê朋友teh訓練kiáⁿ仝款，上帝攏khiā佇咱ê後壁。

咱ê人生，上帝hō͘咱去行頭前，有時hō͘咱摔到大孔小裂，叫咱先–出-去，去kap人車拚

去kap世間車拚

去kap惡魔車拚

伊家己留佇咱後面，佇hia khioh頭khioh尾。

但是伊ê目睭，金金teh看咱，

看咱閣落去欲去叨位

看咱摔外大孔

看咱會曉喝：主啊，救我！Iah無。

真正上帝ê疼

真正有理性ê信仰

真正有靈性ê信心

就是上帝叫咱：先跳–落-去

上帝hō͘咱跳–落-去

潦落去世間ê大海

時間ê大海

人生ê大海

感情ê大海

潦入去空虛、虛假、無實在、危險ê大海

你會kā主耶穌講：

『主啊！看啊！水水水…真深，我ê腳踏bōe著土–啦！』

但是主佇大海頂面teh行

伊佇海湧ê頂面teh行

向咱這旁行–過-來

伊m̄是鬼仔

伊講：『是我–啦！』

是主耶穌–啦，咱ê上帝–啦，呣免驚–啦！

祈禱：

『主啊，阮活佇這個世間ê大海、時間ê大海、生命ê大海ê內面，

阮著跳—落–去，潦—落–去–嘛？

主啊，阮這個生命真正是一個冒險，

一個探險

一個永遠ê旅行

逐日teh行新ê路

明仔再欲發生甚麼代誌，阮m̄知

阮只有將阮ê人生

阮所有ê生命、身體、掛念、悲哀、歡喜

用阮ê雙手

恭敬奉獻hō͘你

交待hō͘你

懇求你牽成、保守、帶領阮行這條人生ê路

靠救主耶穌基督ê聖名。阿們。