『我彼領舊外衫』

提摩太後書4:1-22

陳柏壽 牧師

我真久以來就真愛唱文夏這條『港邊惜別』，kā心愛ê小姑娘講：行船男兒bōe變心，明日船若beh離開，你亦免掛意。

台灣人不但有『港邊惜別』，嘛有『流浪的行船人』、『惜別夜港邊』、『無情的火車站』、『行船人的吉他』、『港邊夜雨』、『離別的月台票』、『流浪天涯三兄妹』、『黃昏的故鄉』、『媽媽請你亦保重』…攏是佇廟仔口時常聽人teh唱懷念ê歌曲，帶有哀愁、流浪ê海洋ê氣味。這幾禮拜我攏teh講海洋kap行船人ê故事，因為 咱ê主耶穌嘛是海洋ê上帝，主耶穌是海洋文化ê起源。

可能有人想：牧師人豈thang唱這種歌？但是chiah-ê melodies攏是古早以來積聚佇我心內，我ê神學ê一部分。Beh叫我kā in放栜(sak)，tō親像beh剝我ê皮，實在真困難。

海洋ê行船人時常teh做夢，真正是romantic / madorosu ê水手人間。

頂禮拜咱有講著咱ê牧師保羅先生是一位做夢大師，逐(ta̍k)日攏欲行佇m̄-bat行過ê新ê街路，逐日攏欲去尋新ê世界，逐日teh探險。伊欲將一個完全無ê境界，創造一個實存ê世界；伊欲將看bōe著摸bōe著ê上帝，hō͘咱真正看–著摸–著，就是伊所建立ê基督教ê道理kap伊ê教會。

這位保羅chím-má行來到伊人生ê最後，來到羅馬，去hō͘人關佇監獄內面，時間是kap chím-má差不多，就是天氣欲進入冬天ê時，寒天欲到以前。

伊寫三張批hō͘伊ê教會：一張是提多書；另外二張就是寫hō͘提摩太，伊佇靈界所生ê kiáⁿ。這三張叫做『教會書信』。伊佇批內面，kap頂禮拜ê加拉太書仝款，提醒咱作基督徒，m̄-thang陷（hām）入去猶太人ê律法主義，tio̍h追求主耶穌ê自由，日日行新ê路。

仝款，佇批內面伊嘛提醒信徒m̄-thang陷入去家譜、血統、法統、道統等等理論ê內面，因為咱ê主耶穌並無受猶太人ê血統、道統、教條ê束縛，伊是全人類ê上帝。咱ê上帝是脫離猶太人ê束縛ê上帝。

同時保羅嘛苦勸兄弟姊妹佇教會內外tio̍h ài正派、守規矩、好款待人、m̄-thang貪財。

保羅ê人生行來到chia ，已經bat hō͘人關真濟遍，伊ê人生拄著（tú-tio̍h）ê慘境真濟。歌林多後書11章只有寫一部份：hō͘人鞭拍重傷；hō͘人用棍仔kòng；hō͘人用石頭khian ；船沉三擺，佇深海頂面飄流；有旅行ê風險，去hō͘人搶；閣有家己人來相害，家己人害家己；有時無飯好食，有時睏bōe去；有時寒天赤身露體，無衫thang穿。

來到羅馬，che是第二次hō͘人掠來關。這位犯人，三年前，第一次hō͘ 人掠入來關ê時，伊有提出申訴，佇16節所在寫講，伊所有佇羅馬ê朋友，無一個人出面來為伊講話。

佳哉，伊講：上帝家己將伊對獅嘴內面搶–出-來，hō͘伊無死。

Chím-á第二擺。保羅寫批hō͘提摩太，求伊ê朋友，來獄中看伊。

保羅這位囚犯 (chhiû-hoân)所經過ê人生，kap咱家己所經驗過ê人生仝款仝款：你teh好額，有頭有面ê時，親成五十、朋友七十，攏會來你ê身邊，kā你圍到bat-bat-bat，你無必要人幫忙ê時，相爭來欲kā你幫忙。

但是你若拄著逆風（ge̍k-hong），生利失敗，破病痛苦，甚至親像保羅按呢，去hō͘人掠去監獄關ê時，你最需要人幫忙ê時，人人攏走到離褲腳，無人行腳到！

世間第一難忍ê代誌，m̄是無錢，m̄是破病，m̄是散赤，是孤單無伴。

佇這個入秋ê時，冬天欲來–啦，樹仔頂ê葉仔已經起lian起黃，有個已經落到剩一支骨。我teh艱苦，無人來看。

你若去看病人，m̄免講甚麼大道理，m̄免講上帝一定會hō͘你好，只要你來坐佇伊身邊，伊tō真歡喜。

但是保羅佇伊ê批內底寫講：伊第一信賴ê朋友底馬 (Demas)，佇這個孤單ê時刻，放伊去。底馬一人走轉去帖撒羅尼加 (v.14)，無欲chhap伊。

保羅講，伊以前寫批hō͘哥羅西人(4:14)，以及寫hō͘腓利門ê批內面，攏真看重底馬，嘛真kā伊讚美。無想到第一需要人來扶持ê時，我ê生命第一危險ê時，伊做伊離開去。

底馬是一位食好做輕可ê人，愛享受。我kā伊講我欲來去羅馬傳道理，伊tùi開始tō反對，伊講羅馬是毒蛇猛獸ê所在，無欲tòe伊來羅馬。對一位干單（ka-taⁿ）愛享受、愛爽快ê底馬，去羅馬傳道是無可能ê代誌。

但是我若無來羅馬傳道理，無來這個世界ê首都，這個世界ê商業、軍事、政治ê中心傳道理，世間人欲按怎知影主耶穌ê福音？

佳哉，猶有一位路加佇我身邊。這位少年醫生就是後來寫路加福音以及使徒行傳ê作者。伊並無佇我落難ê時來離開我。

保羅kā提摩太講：你若來，tio̍h chhōa馬可作伙來。這位少年人，就是耶路撒冷橄欖山邊，彼間二層樓仔ê厝頭家馬利亞ê kiáⁿ。古早保羅kap巴拿巴有意見ê時，馬可時常khiā佇in二人ê中央，造成這二人ê衝突愈來愈大。Che叫做中間路線。

但是這時陣，馬可已經回心轉意，欲轉（tńg）來我這旁。見若回心轉意欲轉（tńg）來ê人，我會將過去虧欠我ê一切，攏kā伊bōe記了了！

另外hiah-ê羊皮ê卷（kòan），tō是我以前寫ê所有ê批，攏寫佇面頂ê hiah-ê羊皮，請你chah來。

另外就是我hiah-ê舊冊。你會記得，我kap你逐（ta̍k）暗佇蠟燭光下面，一字一字作伙讀ê hiah-ê冊，咱二人坐船過愛琴海，欲去雅典ê船頂，佇大海湧ê中間，kap你一字一字作伙讀ê hiah-ê冊，請你chah來。

你若接著批，tio̍h替我向Pek-ki-lah kap A-ku-lah請安。這二位尪仔某靠in二支手編布帆趁錢，閣熱心為上帝ê教會作工，我嘛bat用in ê厝作佈道所。In ê厝攏開放hō͘我作教會。In二人純全ê愛心kap敬虔ê生活，hō͘我非常懷念。

你m̄知會拄著彼位青年叫做以拉都(Eratus)無？伊m̄知猶tòa佇哥林多無？你若有閑（êng），請多多kap伊連絡。

你m̄知會記得佇耶路撒冷差一屑仔tō去hō͘猶太人用石頭tìm死ê彼位土耳奇人特羅腓摩(Trophimus)無？伊是咱教會ê天使，是咱教會ê榮耀。

彼位拍銅師父亞力山大(Alexander)對待我真刻薄。你m̄免照伊做ê來報應伊。主會照伊做ê歹來報應伊。但是你tio̍h提防伊。

閣來，這位老囚犯交待伊屬靈ê kiáⁿ提摩太講：你tio̍h趁寒天未到以前來。你欲來ê時，m̄-thang bōe記得將我彼領破裘 (kiû) 仔ê外衫chah來。

保羅心內知影，彼領舊ê外衫陪著伊經過gôa-nì-chē寒冷ê冬天，佇Pamphylia落雪ê山頂，佇風飛沙phong-phong-eng ê小亞西亞ê莊腳，佇石頭lok-khok無人行腳到ê山路，我攏穿彼領外衫。

彼領雖然是舊衫，但是我佇路司得，就是提摩太你ê故鄉，你m̄知會記得我去hō͘人tìm石頭，頭殼流血，我ê血嘛khîⁿ佇彼領外衫頂面。

提摩太啊，你m̄-thang想講彼領舊外衫無效–啦，m̄-thang提去糞埽桶phiaⁿ掉–啦！

M̄-thang，我心內真懷念彼領舊衫，我真意愛彼領衫。

有人欲來美國ê時，li-li-khok-khok ê物件真濟，實在是無甚麼價值ê物件。親像講阮爸爸留hō͘我彼支用60年ê舊剪刀；親像阮阿母送我彼支舊萬年筆；彼ê舊閣臭phú ê相簿；彼領褲頭已經lû去ê舊褲；彼ê煮著真順手ê鍋仔kap鼎（tiáⁿ）仔。攏總款款規大包，重iⁿ-iⁿ。按呢飛過千里萬里ê太平洋，攏chah來美國。對別人來講是攏無價值ê物件，對我來講是我ê生命、我ê寶貝。彼領外衫，對保羅來講是伊最愛ê生命。

這禮拜有一位80歲ê老人叫做Hatashita sang,mo̍͘h著伊老某ê骨灰，全財產去買一隻tàu mó͘-tah ê帆船，kā伊號做『Miya』，就是in某ê名，一個人對San Francisco出港，經過七個月，這禮拜入到靜岡市ê清水港。這包骨灰對伊來講是伊ê寶貝，無論海中拄著gōa大ê風颱，去hō͘ 別隻船chông著，受傷真久，有一擺伊家己昏佇船頂無人知。伊思思唸唸就是欲將這個最大ê無價之寶，用伊人生最後剩ê氣力，kā伊送轉來伊ê故鄉，kā伊埋（tâi）佇in太太ê老父ê身邊。

保羅一生用伊雙手家己pîⁿ布帆，家己趁食飼家己。若是有剩甚麼錢，就是去振濟散赤人，伊ê人生行來到這個最後ê時刻，無teh講甚麼偉大ê精神，無講甚麼偉大ê神學理論，無講『革命尚未成功，同志仍需努力！』，攏無大聲話，干單會記得伊彼領舊ê外衫。

伊只有將伊心內所會記得–ê、所tú–過ê人，一個一個khǹg入去伊ê思想kap懷念ê內面。In無論是好、是bái、是健康、是破病，攏佇保羅ê心思意念內面，kā in記tiâu-tiâu 。

伊行來到人生最後ê階段，身邊無不動產，無厝契，無金手指 （chím-má ê主教kap有名ê牧師，手指真大粒，閣有kheng鑽石佇頂面。你看電視內teh佈道ê牧師，真濟攏是這種腳數（kha-siàu）。伊身邊只有彼幾張羊皮卷、幾本舊冊、kap彼領舊ê外衫。

咱若欲用一句話來看保羅ê一生，就是照伊家己講ê話上清楚：我已經有戰爭過，我已經有行愛行ê路，我已經有守所信ê道。

閣–落-去，我佇這世間ê路，已經剩無外hn̄g–啦，我不過是一位平凡ê人，一位平凡但是有信心ê人，用平凡ê手編布帆，寫字，做工，用平凡ê信心來到世間，用平凡ê心肝來瞭解人生，來疼世間人，來過一世人。

提摩太啊！你tio̍h緊來！佇寒天未到以前緊來！寒天若到，海湧真高，tō bōe赴–啦！你tō看我未著–啦！

趁chím-má猶有機會，khah緊轉來chhōe上帝，認耶穌作救主，m̄-thang等到冬天到tō bōe赴–啦！

Chiah-ê冊，chiah-ê舊批，這領破裘仔，對我講是我心靈至大ê安慰，我若看著in，摸著in，穿佇我身上，我就真平安。

我應該講ê話攏講了–啦！人講我是一位偉大ê傳道師，我攏無kā khǹg佇腦內。Chheng-chai，我只有愛彼領舊ê外衫，穿佇我身上。

希望你kap我有一日會tàng按呢講：人講我是轟轟烈烈，功名富貴，登鋒造極，博士登基、光宗耀祖、子孫滿堂、萬事興旺。但是chiah-ê對我攏無甚麼意義。我只有拜託你將彼領舊衫chah來hō͘我，佇冬天欲來以前。

祈禱：
『主啊，北風開始teh thàu–啦，樹葉仔開始變黃、變紅–啦、有ê lian閣乾–去，一葉一葉一直落落來（lãk-lõh-lâi）土腳。

主啊，阮ê人生是何等孤單、何等ê脆弱！

阮欲去ê所在，無人知影，嘛無人有法度tòe阮作伙去。阮佇世間ê一切，嘛攏總chah bōe去。

阮大包小包tin-tin-tong-tong，khin-khin-khaiⁿ-khaiⁿ，li-li-lak-lak chah真大phäi° ，tùi台灣phäi° 來美國，chím-má tùi美國m̄知欲閣phäi°去叨位？

主啊，實在講–起-來，阮只有愛親像保羅先生按呢，亦親像主耶穌你按呢，空手來，嘛欲空手轉–去。阮佇這世間，實在無意愛甚麼，阮真愛欲轉去ê時，會tàng輕輕鬆鬆、清氣溜溜、súi tang-tang，安安心心轉–去就好。

希望有一日，阮嘛會tàng佇你面前講：阮佇這世間，應該戰爭ê戰爭，阮有戰過–啦，應該行ê路，有行過–啦，應該守ê道理有守tiâu–啦。按呢，阮就會tàng平安轉去你hia–啦！

阮按呢kā你懇求，是奉阮ê救主耶穌基督ê聖名。A-men。』