歹竹出好筍ê上帝 (台湾教會公報)

陳柏壽 牧師

舊年9月去參加世台會，旅行團有去10幾個南歐國家。逐個國家攏真複雜，宗教、人種、民族、文化、語言攏濫濫做伙。幾百年來攏平安無事，但是若外來強權介入，就產生怨恨，thâi 到家己 m̄ 知是為著啥物 teh sio-thâi：人人攏用上帝ê 名teh sio-thâi，人人攏講是為著疼你，為著愛你，才 thâi 你。

• Jihad：上帝ê 羊羔

咱受美國ê社會媒體，以及猶太人ê 影響，攏有一種偏見，認為一般穆斯林（回教徒）攏是烏面 niau 牙，四界beh kah 人相拍。這擺ê 旅行，hō͘-góa 看著tī 散赤國家ê 穆斯林嘛是真有人性，真好客、真純良。Kah 咱完全仝款。In mā 是人，大部分攏是好人。

「Jihad」tī 美國粗俗ê 媒體攏寫做「聖戰」「敢死隊」「暴力團體」。Jihad 阿拉伯文意思是「上帝ê 羊羔」。Sī-án-choáⁿ 行洗禮約翰介紹主耶穌：「看啊！這就是上帝ê 羊羔！帶hō͘ 世間和平ê。」對穆斯林，仝彼字，咱 toh 寫完全無同ê 意思？這叫做帝國主義ê 政治。George Bush 發兵拍伊拉克 ê 時 mā 是講伊 beh 發動 Crusade，就是 jihad 仝一個意思。

• 夏甲：另外彼個查某人

聖經中記載亞伯拉罕有二個某，大某名叫「撒拉」，細姨名叫「夏甲」。大某撒拉 bē 生囝，就放亞伯拉罕去 kap 細姨夏甲同房。夏甲有身以後，目睭看主母就無 hiah-nih 尊敬。撒拉就惡毒對待夏甲，kā in 翁亞伯拉罕講，叫亞伯拉罕著將這個有身ê 查某趕出去（創世記16章4～12 節）。

這個頭家亞伯拉罕 mā 不止無情，就將這個夏甲趕出門。夏甲 ê 意思是：「另外彼個查某人」。這個婦仁人 tī 厝內無地位，肚腹內moh 一粒冬瓜，hō͘ 人趕出去曠野。上帝ê 天使 koh 假 m̄ 知，出現問夏甲講：「夏甲，夏甲，妳 tùi 佗位來，beh tùi 叼位去？」Tùi 一個走投無路，m̄ 知 beh 去佗位 ê 人，問這款問題，真正是加問 ê 啦！

上帝ê 意思是 beh 強迫這個流浪 tī 野外 ê 查某人轉去伊主人ê 厝，繼續接受主人ê 管轄。一個新芛猶 bē 長大 ê 時陣，必須繼續 tī 體制內存在。

但是上帝第一擺 kā 夏甲宣布：「妳ê 囝著號名做以實瑪利，伊 beh 形成大族，人數濟到算 bē 了。」上帝tī 亞伯拉罕 beh 生以撒ê 時ê 祝福，mā 是用仝款ê字眼。

• 耶和華以勒：上帝 beh 家己備辦

猶太人聖經中描寫夏甲這個人無啥物好ê 形容，描寫夏甲kap亞伯拉罕ê 關係mā 無真密切。主日學教材攏講夏甲怨妒伊ê 主母，講撒拉生ê 囝以撒真古錐、真可愛，講以實瑪利真野蠻，粗魯。

但是撒拉叫亞伯拉罕著kā 這二個母仔囝趕出去，因為以實瑪利bē 使繼承in 家族ê 財產。

過暝日，亞伯拉罕，這個無情ê 老爸，就準備一包餅、一袋水khǹg tī 夏甲ê 肩胛頭，叫伊牽這個囡仔出去。老母夏甲牽著這個細漢囡仔以實瑪利出門，tī 茫茫ê 沙漠曠野，迷路tī 山頭，m̄ 知beh 去佗位。彼包餅食了啦，水mā lim 乾啦。老母夏甲tī 曠野chông 來chông 去，對這山頭chông 到彼個山頭，koh 對彼個山頭chông 到這個山頭，總共來回chông 7 liàn，beh 揣水，揣無水。最後將囡仔khǹg tī 樹仔腳，家己行到100 公尺外，目睭看著心愛ê 囝，放聲大哭。聖經內面第一擺記載人teh 哭ê 一幕：目睭金金，無飯無水，準備beh iau 死ê 夏甲kap 以實瑪利母仔囝。

100 公尺表示囡仔beh iau 死ê 時，老母看khah bē 清楚，囡仔悽慘ê 嚎叫ê 哭聲，老母mā 聽 khah bē 清楚。上帝聽著囡仔teh 哭ê 聲，第二擺出現，上帝叫夏甲kā 囡仔抱起來，m̄ 通哭，「妳看妳目睭前豈m̄ 是一口水泉？」可蘭經寫講這口水泉叫做Zamzam水泉。就是穆斯林每年tī Mecca 朝聖ê 這個所在。穆斯林朝聖著se̍h 7擺，就是記念in ê 先祖夏甲這個老母，流目屎tī 山頭chông 7 liàn，揣無水ê 情況。全世界所有穆斯林一生濟少一擺著來Mecca ê 聖殿朝拜，這個聖殿，聽講就是亞伯拉罕kap 伊ê 囝以實瑪利做伙起ê 聖殿。

上帝忽然間hō͘ 夏甲看著水泉，同時上帝應允夏甲伊ê 囝以實瑪利，beh 變做世間ê 大國、大族。這句話完全kap 上帝hō͘ 亞伯拉罕ê 應允仝款。亞伯拉罕beh 獻以撒ê 摩利亞山ê 時，上帝hō͘ 一隻山羊牨ê 角kê tī 刺phè 中，走bē 出來。二個劇情仝款，文字mā 仝款，叫「耶和華以勒」，上帝beh 家己備辦ê 意思。

咱家己想看覓，咱人生中間有真濟時陣拄著艱苦、走投無路，親像咱ê 生命去刺仔樹kê-tiâu-tiâu ê 時陣，叫天天bē 應，叫地地bē 應。忽然間上帝開路hō͘ 咱行，忽然間tī 咱身邊看著一口水泉，忽然間「耶和華以勒」出現，kā 咱開路。

上帝是看顧流浪tī 世間無位通去ê 人ê 上帝。所以夏甲tī hia kā 上帝叫做：「祢就是看透人心

ê 上帝」。這個是聖經中第一擺出現上帝去hō͘ 人號ê 名。Tī 天涯海角流浪ê 人ê 上帝，關懷世間艱苦人ê 上帝，就是看透人心ê 上帝。

• 亞伯拉罕：老竹puh 新芛

伊斯蘭教ê 開始就是去hō͘ 老爸放拺ê 一個孤兒ê 故事；伊斯蘭教ê 開始就是去hō͘ 大某苦毒 ê 一個細姨仔ê 故事。伊斯蘭教是對一個悽慘ê 家庭，一個無天倫之樂ê 悲慘世界ê 家庭開始。伊斯蘭教開始ê 頭前700 年，就是kap 猶太教鬥爭ê 歷史；接落去ê 1000 年，就是kap 猶太教、基督教鬥爭ê 歷史，一直到今仔日。In 認為in ê 歷史就是不斷hō͘ 人欺負kap 窘逐ê 歷史。可蘭經內面ê 上帝，是一位悲情ê 上帝。In ê 上帝m̄ 是十字軍東征ê 大尾、強勢ê 上帝。

伊斯蘭教經典有記載，亞伯拉罕m̄ -sī hiah-nī 無情ê 老爸，伊定定轉去夏甲kap以實瑪利ê 厝去看伊家己ê 囝。咱台灣話講是：「一兼二顧，摸蜊仔兼洗褲。」後來甚至記載撒拉死了後，亞伯拉罕koh 娶「基土拉」做某，猶太kap 阿拉伯ê 古典，認為基土拉就是夏甲ê 原名。「另外彼個查某」soa̍h 變做「正某」。

你若問阮彼個日本仔牧師娘，「牧師娘，koh 生一個！」伊會曉用台灣話kā你應講：「無法度啦！」亞伯拉罕100 歲beh 生囝，保羅tī 希伯來書寫講伊已經「老kah 親像死人啦」（希伯來書11 章12 節），但是上帝hō͘ 伊回春。撒拉聽著上帝beh hō͘ 伊生囝ê 話，bi̍h tī 門縫偷笑，所以伊ê 名叫做「撒拉」，撒拉ê 意思就是「偷笑」。人講：「阿婆仔生囝，成拚咧啦！」仝款阿公仔beh 生囝，mā 是成拚咧啦！真正是不可能ê 代誌。

亞伯拉罕ê 某撒拉死ê時，亞伯拉罕差不多137歲。但是亞伯拉罕koh 娶基土拉做某以後，一直到伊175 歲死為止，kap 夏甲koh 生6個囝，聖經攏有寫in 囝ê 名。你想有夠譀古（hàm-kó͘）無？在人bē 會，在上帝，萬事攏會。

上帝互亞伯拉罕86 歲生大囝以實瑪利，以實瑪利kap 伊hō͘ 人趕出去ê 老母夏甲，變做新 ê 族群以及新ê 宗教ê 教主。穆罕默德（Muhammad）就是in ê 子孫。以撒以及撒拉變做另外族群kap宗教ê 教主。這二個源流，二枝筍仔，攏是對亞伯拉罕這個老竹puh 出來ê。

• 上帝hō͘伊出一枝大筍

上帝kā 亞伯拉罕宣布：「你以撒所生ê，才是我ê 百姓，是受祝福ê，其他攏是叫外口人。」以撒才是正統。但是話猶teh 講ê 時，以實瑪利已經長大成人，變做另外一個大族。伊是真偉大ê 弓箭手，伊ê 名叫做「野驢」，野驢ê 意思就是「自由」，無人有法度管伊會tiâu ê 意思。

聖經中描寫2 款人生：一款人一日到暗tī 野外pha-pha 走，釣魚拍獵，kah 大自然做伙生活；另外一款人一日到暗，關tī 厝內，看股票，想孔想縫o͘-se 上司看會當升級無！拄開始tī 雅各 kap 以掃就是這2 款人；chit 以撒kap 以實瑪利也是這2 款無仝性格ê 人。你想這2 款人啥物人khah 贏？

上帝不止公平，伊hō͘ 野外pha-pha 走ê 民族，土腳下面攏是石油；咱ê 土腳，下面攏是石頭。

伊ê 老母第二擺hō͘ 人趕出門，就一去不回，死mā m̄ 甘願koh 轉去啦，親像挪亞大水ê 時，第二隻放出去外口看世界ê hit 隻烏鴉，有出去就無koh 轉來啦！

台灣人ê 運命mā 就是按呢。400 年前，咱ê 祖先坐帆船仔過烏水溝，in 知影這聲出帆，10 個死8 個，若會當chhun 半條命來到台灣ê 海岸tio̍h 是真佳哉，彼陣就是決心無beh koh 轉去彼個hō͘ 人怨chheh ê 故鄉。死mā 無準備beh 轉去。

我teh 看，咱ê 上帝真正是一個「歹竹出好筍」ê 上帝。咱teh 看，以實瑪利這個細姨仔囝，無勢頭，無老爸ê 祝福，無財無產，無人扶持，但是tī 現實世界內面，上帝hō͘ 伊出一枝大筍。

宗教教條是一回事，但是上帝tī 現實世間ê 運作，koh 是另外一回事。

咱看美國粗俗ê 媒體，一直將基督教及伊斯蘭教畫清界線。Kám 有影hiah-nih簡單就分會清？

• In攏出tī仝一個老樹頭

當初亞伯拉罕kap 以撒tī 迦南地飢荒，mā 是去埃及糴米（tia̍h-bí），救in 一命。雅各ê 10個囝kā 小弟約瑟賣hō͘ 阿拉伯ê 隊商，後來約瑟煞變做埃及ê 宰相。雅各一家拄著飢荒，mā 是來kā 埃及ê 所在糴米。算來算去，mā 是伊斯蘭教世界ê 埃及人救猶太人ê 祖先一命。

咱ê 救主耶穌出世ê 時，暴君希律王命令所有2 歲以下ê 查埔囡仔攏著掠去thâi。耶穌ê 爸母約瑟kap 馬利亞坐驢仔透暝走去埃及bi̍h。伊斯蘭教世界ê 埃及mā是救咱ê 主耶穌一命ê 所在。

上帝每擺設立一個「正統」ê 時，隨時產生一個非正統、反正統ê 勢力：這二個勢力koh 互相有牽連，互相牽制，互相對立；但是共同發展，因為in 攏出tī 仝一個老樹頭。

戇人認為這二個勢力是互相對立，其實m̄ 是！阿里山ê 老神木倒去，老樹頭隨時生出新ê 神木；咱台灣人種芎蕉攏知影，今年芎蕉割了，同時愛將母欉剉掉，因為明年芎蕉頭會koh 生一欉新芎蕉。In 攏出tī 仝一欉老樹。

60 外冬以來，國民黨tī 台灣教咱台灣囡仔，講咱是黃河ê 黃帝子孫，「中國」才是正統 kap 法統。馬偕病院ê 林媽利醫師深入研究卻發現，大部分台灣人ê DNA 攏是南島民族。南太平洋ê Polynesian 原住民，才是咱台灣人ê 主人，咱ê 血攏有in ê 血。

• 四界發出新芛

上帝hō͘ 妓女喇合ê 後代，對一個平凡ê 家族耶西，出一位猶太人ê 大衛王；對大衛王出一位世間ê 救主耶穌，破壞猶太教ê 正統。耶穌出生tī 伯利恆，長大tī 拿撒勒ê 所在，人講拿撒勒彼款àu 所在，會出啥物好貨咧？Tī 彼個hō͘ 人看無起ê 所在，出世一個世間ê 救主耶穌，變做世間ê 光燈。

上帝tī 猶太勢力中產生基督教。上帝tī 嚴格ê 什葉派（Shiaa）中產生遜尼派（Sunni），現在 koh 產生ISIS 新ê 國家。我想若是出tī 上帝ê 旨意，無人擋ISIS 會tiâu。上帝hō͘ 堅強ê 國民黨ê 社會，產生民進黨。500年前上帝hō͘ 路得馬丁破壞堅強ê 天主教ê 宗教勢力，pu̍h 出教會ê 新芛。世間四界攏teh 發出新芛。

上帝tī 無仝時代，無仝所在，tī 東方、tī 非洲、tī 北極，不斷hō͘ 世界發出無仝款人種kap

宗教ê 新芛。上帝tī 冥冥之中繼續破壞人所認定、所建立ê 人為教條，人為ê 正統kap 法統。

• 真正是活ê上帝

咱這個上帝有時做代誌真奇怪，一邊講疼kap 仁愛；但是有時bô-tiuⁿ-tî koh hō͘ 咱拄著大地動、風颱、tsunami，SARS，Ebola。上帝有時破壞咱所認定ê 世間ê 秩序，上帝創造光明，也創造烏暗（以賽亞書45章7節）；上帝創造善良，也創造魔鬼。

但是咱這個上帝猶koh 值得咱ê 信靠，因為咱ê 上帝m̄ 是活tī「教條」內面ê 上帝，m̄ 是活tī「文字」ê 內面，m̄ 是活tī「教會制度」ê 規矩內面， m̄ 是活tī「講壇」頂gâu 講話ê 人ê 嘴內。咱ê 上帝tiāⁿ-tiāⁿ 無按牌理出牌。咱kap 上帝行棋，伊照伊ê 棋步行棋，m̄ 是照咱ê 棋步行棋。有時咱bē 了解，咱時時怨嘆、受氣、反抗，上帝mā 是靜靜，無kā 咱辯解。但是tiāⁿ-tiāⁿ 咱想bē 到ê 中間，tī 真濟歹筍ê 中間，上帝出真濟好筍hō͘ 咱。上帝真正是活ê 上帝。

主耶穌bat kā 伊四周圍ê 猶太人講，恁m̄ 通靠勢講恁才是亞伯拉罕ê 子孫。伊講：「我 kā 恁講，上帝會當對遮ê 石頭縫，puh 出亞伯拉罕ê 子孫啦！」（路加福音3 章8 節）

咱活到今仔日，就知影基督教是不斷咧發新芛ê 宗教。咱ê 上帝就是要求咱，不斷tio̍h 發新芛，行新路，看著新理想，做新ê 夢。無論過去咱ê 家族、教育、背景是按怎困難、按怎歹看，咱ê 上帝就是beh hō͘ 歹竹出好筍ê 上帝。