「歹竹出好筍的上帝」

聖經：創世記16：4-12

陳柏壽 牧師

「上帝的使者對天裡叫夏甲講：『夏甲，你為何按呢呢？毋免驚！上帝已經聽見囡仔的聲啦，起來！給囡仔抱起來，我欲互伊成做大國。』」（創世記21：17,18）

這擺第二囝娶孫仔轉來，tuh轉來彼日，非常歡喜；一禮拜後因欲轉去彼日，心內閣卡歡喜。這禮拜，厝內變戰場；我對世界逐所在，千辛萬苦mo̍h轉來的omiyage，伊提來看看咧，著對土腳給sia̍k落去。Hit隻熊的腳及耳仔攏斷斷去。

佇飛機場檢查行李，一項一項tháu-khùi檢查。這個大漢查某孫問講是按怎著按呢檢查，因老母講驚有terrorist會欲thâi-lâng。伊toh正面給檢查的人講：”We are not trying to kill you !”.  世間代誌真複雜，不如囡仔講的話卡清楚。

9月去參加世台會，旅行團有去10 幾個南歐國家。逐个國家攏真複雜，宗教、人種、民族、文化、語言攏濫濫做伙。幾百年來攏平安無事，但是若是外來強權介入，就產生怨恨，刣到家己毋知是為著甚麼來teh sio-thâi。人人攏用上帝的名來teh sio-thâi，人人攏講是為著疼你，為著愛你，才來刣你。

旅行中最大的困難就是揣無便所，一擺排就是歸半點鐘，一擺著付1箍歐元。我算算咧，一日放8擺，干單去便所著準備10箍美金。有一擺我當boē-tiâu，走去加油站後壁去放，有10幾個查埔的攏toè佇我後壁，總共省十幾箍。

放了佇路邊有回教的ojisan排佇路邊賣無花果，我提一粒問伊：這一粒偌濟？

伊給我看看一下，看我是散赤人面的款，煞給我講：te̍h-khì食，te̍h-khì食boâ-kin！我提 1 箍互伊。轉去給 bus 的人講，真濟人走去給伊買，我看有人提 1 粒付伊 1 箍，嘛有人提 10 粒嘛付 1 箍。這個老人只有笑笑，因為袂曉講英文。

我及Hawaii來的好朋友淑媛姊去一個Flea Market。淑媛姊看一個手工藝品，問看偌濟，看看咧無愛買。阮二人行開已經差不多20 公尺遠，彼個戴碗公帽仔的回教徒的ojisan對後壁jiok來，手提彼項omiyage，給淑媛姊講：I give you free! Please take to Hawaii!

咱受美國的社會媒体，以及猶太人的影響，攏有一種偏見，認為回教徒一般攏是烏面niau牙，處處欲及人相拍。這次的旅行，互我看著佇散赤國家的回教徒嘛是真有人性，真好客、真純良。及咱完全仝款。因嘛是人，大部份攏是好人。

“Jihad”佇美國粗俗的媒體攏寫做「聖戰」「敢死隊」「暴力團體」。Jihad阿拉伯文意思是「上帝的羊羔」。是按怎行洗禮約翰介紹主耶穌：「看啊！這就是上帝的羊羔！帶互世間和平的」，對回教徒，同彼字，咱toh寫完全無同的意思？這叫做帝國主義的政治。George Bush發兵拍Iraq的時嘛是講伊teh發動「聖戰」，英文叫做Crusade，就是jihad同一字意思。

聖經中記載亞伯拉罕有二個某，大母叫撒拉，細姨叫夏甲。大母撒拉未生囝，就放亞伯拉罕去及細姨夏甲同房。夏甲有身以後，目睭看主母就無hiah-nī尊敬。撒拉就惡毒對待夏甲，給in翁亞伯拉罕講，叫伊著將這個有身的查某趕出去。

這個頭家亞伯拉罕嘛不止無情，就將這個夏甲趕出門。夏甲這二字意思是：「另外彼個查某人」的意思。這個夫人人佇厝內無地位，肚腹內moh一粒冬瓜，互人趕出曠野。上帝的天使閣假毋知，出現問夏甲：「夏甲，你對佗位來，欲對叼位去？」對一個走頭無路，毋知欲去佗位的人，問這款問題，真正是加問的啦！

上帝的意思是強迫這個流浪佇野外的這個查某人轉去因主人的厝，繼續受因主人的管轄。一個新芛未長大的時陣，必須繼續佇體制內存在，雖然這個體制毋是好的體制。

但是上帝第一次給夏甲宣佈：「你的囝著號名做以實瑪利，伊欲形成大族，人數濟到算未了」。上帝給亞伯拉罕欲生以撒的時的祝福，嘛是用仝款的字眼。

猶太人聖經中描寫夏甲這個人無甚麼好的字眼，描寫夏甲及亞伯拉罕的關係嘛真無密切。主日學教材攏講夏甲怨妒伊的主母，講撒拉生的囝以撒真古錐真可愛，講以實瑪利真野蠻，真粗魯。

聖經雖然認定以撒是亞伯拉罕的大孫，實在講起來以實瑪利是亞伯拉罕所生的第一個孫，以實瑪利應該算做大孫才著。

但是撒拉叫亞伯拉罕著給這二個母仔囝趕出去，因為以實瑪利袂使繼承因家族的財產。

過暝日，亞伯拉罕這個無情的老爸就準備一包餅、一袋水khǹg佇老母夏甲的肩胛頭，叫伊牽這個囡仔出去。

老母牽著這個細漢囡仔出門，佇矇矇的沙漠的曠野，迷路佇山頭，毋知欲去佗位。彼包餅食了啦，水嘛lim乾啦。老母夏甲佇曠野chông來chông去，對這山頭chông到彼個山頭，閣對彼個山頭chông到這個山頭，總共來回chông 7 lèng，欲揣水，揣無水。

最後將囡仔khǹg佇樹仔腳，家己行100公尺外，目睭看著心愛的囝，放聲大哭。聖經內面第一擺記載人teh哭的一幕，目睭金金，無飯無水，準備欲餓死的母仔囝。

100公尺表示囡仔欲餓死的時，老母看卡袂清楚，囡仔悽慘的嚎叫的哭聲，老母嘛聽卡袂清楚。

上帝聽著囡仔teh哭的聲，第二擺出現，上帝叫夏甲給囡仔抱起來，毋通哭，你看你目睭前豈毋是一口水泉？

可蘭經寫講這口水泉叫做Zamzam水泉。就是回教徒每年佇Mecca朝聖的這個所在。回教徒朝聖著旋7 擺，就是記念因的先祖夏甲這個老母，流目屎佇山頭chông 7 lèng，揣無水的情況。全世界所有回教徒一生濟少一擺著來Mecca的聖典朝拜，這個聖典聖典。聽講就是亞伯拉罕及伊的囝以實瑪利做伙起的聖典。

上帝忽然間互夏甲看著水泉，同時上帝應允夏甲伊的囝以實瑪利，欲變做世間的大國、大族。這句話完全及上帝互亞伯拉罕的應允仝款。亞伯拉罕欲獻以撒佇Moriah山的時，上帝互一隻山羊港的角kê佇刺phoè中，走未出來，劇情仝款，文字嘛仝款，叫 ”耶和華以勒 ”（22：14），上帝欲家己備辦的意思。

咱家己想看覓，咱人生中間有真濟時陣拄著艱苦、走頭無路，親像咱的命運去kê佇，去刺仔樹 kê-tiâu-tiâu 的時陣，叫天天袂應，叫地地袂應。忽然間上帝開路互咱行，忽然間佇咱身邊看著一口水，忽然間 ”耶和華以勒 ”出現，給咱開路，救咱一命。

上帝是看顧流浪佇世間無位通去的人的上帝。所以夏甲佇hia給上帝叫做：「你就是看透人心的上帝」。這個是聖經中第一次出現上帝去予人號的名。佇天涯海角沙漠中流浪的人的上帝，關懷世間艱苦人的上帝，就是看透人心的上帝。

回教的開始就是去互老爸放撒的一個孤兒的故事，回教的開始就是去互大某苦毒的一個細姨仔的故事。對一個悽慘的家庭，一個無天倫之樂的悲慘世界的故事開始。回教的開始700年就是及猶太教鬥爭的歷史，接落去的1,000年就是及猶太教及基督教鬥爭的歷史，一直到今仔日。因認為因的歷史就是不斷予人欺負及窘逐的歷史。可蘭經內面的上帝是一位悲情的上帝，因的上帝毋是十字軍的大尾、強勢的上帝。

回教經典有記載，亞伯拉罕m̄-sī hiah-nī無情的老爸，伊定定轉去夏甲及以實瑪利的厝去看伊家己的囝。咱台灣話講是：一兼二顧，bong蜊仔兼洗褲。後來甚至記載撒拉死了後，亞伯拉罕閣娶Keturah做某，猶太及阿拉伯的古典，認為Keturah就是夏甲的原名。「另外彼個查某」soa̍h變做「正某」。

你若問阮彼個日本仔牧師娘，「牧師娘，閣生一個！」伊會曉用台灣話給你應講：「無法度啦！」

亞伯拉罕100歲欲生囝，保羅佇希伯來書寫講伊已經「老甲親像死人啦」（希伯來書11：12），但是上帝互伊回春，撒拉聽著上帝的話bi̍h佇門縫偷笑（18：2），所以伊的名叫做「撒拉」，撒拉的意思就是 ”偷笑 ”。人講阿婆仔生囝，成拚咧啦。仝款阿公仔生囝，嘛是成拚咧啦，真正是不可能的代誌。

亞伯拉罕因某撒拉死的時，伊差不多137 歲，但是聖經記載，亞伯拉罕閣娶基土拉做某（25：1），一直到伊175歲死為止，伊甲夏甲閣生 6 個囝，聖經攏有寫因囝的名。你想有到譀古（hàm-kó͘）無？在人未會，在上帝，萬事攏會。

上帝互亞伯拉罕86歲生大囝以實瑪利，伊及伊予人趕出去的老母夏甲，變做新的族群及新的宗教的教主。Muhammode就是因的子孫。以撒及撒拉變做另外族群及宗教的教主。這二個源流，二枝筍仔，攏是對亞伯拉罕這個老竹 puh 出來的。

上帝給亞伯拉罕宣佈：你以撒所生的，才是我的百姓，是受祝福的，其他攏是叫外口人（21：12）。以撒才是正統。

但是猶teh講的時，以實瑪利已經長大成人，變做另外一族的大族，伊是真偉大的弓箭手，伊的名叫做 ”野驢 ”，野驢的意思就是 ”自由 ”，無人管伊會牢（tiâu）的意思。

聖經中描寫 2 款人生：一款人一日到暗佇野外走 phah-phah，釣魚拍獵，及大自然做伙生活；另外一款人一日到暗，關佇厝內，看股票，想孔想縫 o͘-se 上司看會當升級無！拄開始的雅各及以掃就是這 2 款人； chím-má 以撒及以實瑪利也是這 2 款無同性格的人。你想這 2 款人甚麼人卡贏？

上帝不止公平，伊互野外走 phah-phah 的民族，土腳下面攏是石油；咱的土腳，下面攏是石頭。

伊的老母第二擺予人趕出門，就一去不回，甘願死嘛毋閣轉去啦。親像挪亞大水的時，第二隻放出去外口看世界的hit隻烏鴉，伊有出去就無閣轉來啦。

台灣人的運命就是按呢。400年前咱的祖先坐帆船仔過烏水溝，知影這聲出去，10個死8個，若會當chhun半條命來到台灣的海岸toh是真佳哉，彼陣就是決心無欲閣轉去彼個怨chhoè的故鄉。死嘛無準備欲轉去。

今仔日咱千里萬里來到這個生疏的加拿大，路頭生疏m̄-bat人，孤鳥藏人群。但是來就來啦，無閣轉去。雖然有真濟人佇加拿大美國，為著欲揣一口水飼某囝，揣真久，揣到真艱苦，揣無頭路。佳哉上帝互咱每一個口灶tì-chiá攏揣著因家己的一口水，這口水飼咱一家伙，互咱活落去。但是咱攏嘛 ”無欲 ”閣轉去啦，嘛 ”袂當 ”閣轉去啦。咱干干仔欲給toà落去。

有一個阿公來美國看孫，踏入門卡電話，5句鬥3句 ”恁父 ”：”恁父無欲 chhap-siâu 伊啦！ ”恁父袂 giàn 啦！ ””恁父 … 恁父 …”阿孫佇邊仔， toh 問阿公 , 「阿公，阿公， ”恁父 ” 是甚麼意思？」阿公聽一个煞愣— 去，毋知欲按怎應，最後給孫仔講：「 ”恁父 ”, 就是 ”我 ”的意思啦！」。美國孫仔頭殼真好，記 tiâu-tiâu ：「 ”恁父 ”to̍h-sī ”我 ”的意思。」

有一日孫仔去車頭等阿公轉來，等歸點鐘等無阿公，等到阿公出來，阿孫仔緊 chông 去，給阿公講：「阿公，阿公，恁父佇此等你足久呢！」

卡按怎講，咱干干仔欲店此給帶toà落去。toà到阿孫仔叫咱 ”恁父 ”，嘛欲給toà落去。咱佇加拿大美國的台灣人，攏無欲閣轉去啦！

我teh看，咱的上帝實在是一個“歹竹出好筍 ”的上帝。咱teh看，以實瑪利這個細姨仔囝，看是無甚麼勢頭，無老爸的祝福，無財無產，無人扶持，但是佇現實世界內面，上帝互伊出一枝大筍。

佇宗教教條是一回事，但是上帝佇現實世間的運作，閣是另外一回事。

咱看美國粗俗的媒體，一直將基督教及回教畫清界線。豈有影hiah-nī簡單就分會清？

當初亞伯拉罕及以撒佇迦南地飢荒，嘛是去埃及糶米（tia̍h-bí），救因一命。雅各的十個囝給小弟約瑟賣互阿拉伯的隊商，後來約瑟煞變做埃及的宰相。雅各一家拄著飢荒，嘛是來給回教的埃及的所在糶米。算來算去，嘛是回教徒的埃及人救猶太人的祖先的一命。

咱的救主耶穌出世的時，暴君希律王命令所有2歲以下的查埔囡仔攏著掠去刣。耶穌的爸母約瑟及馬利亞坐驢仔透暝走去埃及bi̍h。回教世界的埃及嘛是救咱的主耶穌一命的所在。

上帝每次設立一個「正統」的時隨時產生一個非正統、反正統的勢力，這二個勢力閣互相有牽連，互相牽制，互相對立，但是共同發展，因為因攏出佇同一個老樹頭。

戇人認為這二個勢力是互相對立，毋是！。阿里山的老神木倒去，佇老樹頭隨時生出新的神木；咱台灣人種芎蕉攏知影，今年芎蕉割了，同時抑將母樹剉掉，因為明年芎蕉頭會閣生一叢新芎蕉。攏出佇同一叢老樹。

考古學家佇山頂尾溜揣著魚仔的化石，認真細膩去研究才知，原來幾千萬年前，這個所在是佇海底。彼時代，魚仔真正活佇此。彼時代，魚仔才是是這粒山頭的主人。

60外冬以來國民黨佇台灣教咱台灣囡仔，講咱是黃河的黃帝子孫，「中國」才是正統及法統。馬偕病院的林媽利醫師才發現大部份台灣人的DNA攏是南島民族。南太平洋的 Polynesian 原住民，才是咱台灣人的主人，咱的血攏有因的血。

上帝互妓女拉合的後代，對一個平凡的家族耶西，出一位猶太人的大衛王；對大衛王出一位世間的救主耶穌，破壞猶太教的正統。耶穌出生佇伯利恆，長大佇拿撒勒的所在，人講拿撒勒彼款àu所在，會出甚麼好貨呢？佇彼個予人看無起的所在，出世一個世間的救主耶穌，變做世間的光燈。

上帝佇猶太勢力中產生基督教。上帝佇嚴格的shiaa派中產生sunni派，現在閣產生ISIS新的國家，我想若是出佇上帝的旨意，無人當ISIS會牢。上帝互堅強的國民黨的社會，產生民進黨。500 年前上帝互路得馬丁破壞堅強的天主教的宗教勢力，pu̍h出教會的新芛。世間到處攏teh發出新芽。

上帝佇不同時代，不同所在，佇東方、佇非洲、佇北極，上帝不斷互世界發出無仝款人種及宗教的新筍。上帝佇冥冥之中繼續破壞人所認定、所建立的人為的教條，人為的正統及法統。

咱這個上帝有時做代誌真奇怪，一邊講疼及仁愛；但是有時 bô-têng-tî 閣互咱拄著大地動、風颱、 tsunami, sars, ebola 。 上帝有時破壞咱所認定的世間的秩序，上帝創造光明，也創造烏暗（以 45 ： 7 ）；上帝創造善良，也創造魔鬼。

但是 咱這個上帝猶閣值得咱的信靠，因為咱的上帝毋是活佇「教條」內面的上帝，毋是活佇「文字」的內面，毋是活佇「教會制度」的規矩內面，上帝毋是活佇「講壇」頂 gâu 講話的人的嘴內。咱的上帝碇碇無按牌理出牌。及上帝行棋，伊是照伊的棋步行棋，毋是照咱的棋步teh行棋。有時咱袂了解，咱時時怨嘆、受氣、反抗上帝，上帝嘛是靜靜，無給咱辯解。但是碇碇咱想袂到的中間，佇真濟歹筍的中間，上帝 teh 出真濟好筍，上帝真正是活的上帝。

主耶穌bat給伊四周圍的猶太人講，恁毋通靠勢講恁才是亞伯拉罕的子孫。伊講：「我給恁講，上帝會當對遮的石頭縫，puh出亞伯拉罕的子孫啦！」（路 3 ： 8 ）

咱活到今仔日就是知影基督教是不斷咧生新芛的宗教，咱的上帝就是要求咱不斷著發新芛，行新路，看新的理想，做新的夢。無論過去咱的家族、教育、背景是按怎困難、按怎歹看，咱的上帝就是欲互歹竹出好筍的上帝。