佇樹頭後壁偷看

陳柏壽牧師

05/06/2026

主耶穌在世的最後的時間, kap學生做伙食飯, 忽然間聽著兵仔beh來, 學生逐人攏走閃了了, 偆耶穌一人, 無倚無靠, 其中一個伊相信賴的彼位, bi̍h佇樹仔頭偷看。等到兵仔出現大家才走出來, 有人認tioh講, 你就是耶穌hit黨的人, 伊講毋是毋是, 人講你講話的腔口明明就是耶穌彼庄人講話的腔口, 伊應講毋是毋是, 若無我來咒誓互你看…

咱佇世間做人, 較濟時陣是bi̍h代先bi̍h樹仔後壁, 偷看, 看情勢按怎變遷, 才來決定koh落去欲按怎採取第二步。彼個學生死toh 毋認伊是耶穌的學生, 甚至講伊欲咒誓予人看。咱的人生, 佇緊急的時, 牽連到家己生命安全的時, 會講我會咒誓互你看。咱差不多攏kap耶穌的學生仝款, chím-má的台灣人, 甚物話攏敢講, 咒天, 咒地, 咒鱟瓠（hāu-hia）佮飯籬, 咒誓到十八天公祖, 甚物話攏敢出喙。現在的台灣人幾乎佮猶太人仝款, 天地萬物, 甚物攏毋驚, 相驚的就是伊彼粒肚腹。

當初欲揣查某朋友代先攏bi̍h佇後面偷竊（thau-chhiap）chhiap看人的家庭生做甚物款, 是毋是有財有產, 是毋是有相配, 看有甚物歹風聲, 是毋是人已經有人咧逐（jiok）。這個偷chhiap是第一步, 閣來才來想家己有四配抑無，家己的四兩秧仔無先量, toh先去量別人, 這是人的本性, 量到差不多會好勢, 別人已經先搶去lah。真濟好kha-siàu去互別人搶去就是這個原因。其實家己反省起來, 毋是我先去揀別人, 較濟是別人揀咱, 先共咱拍出籠外, 這我真知, 是因為我比人比袂過, 這點這我比別人較知。講遮爾多不過是講, 過去我曾經bat想beh去kah人比評, 不過kah人比評未過nā-tiāⁿ。去予人探聽風聲, 我攏知, 不jî-kò͘有一項代誌佇我心內我若準已經知影, 知影結果差不多我的輸勢是卡大面。這是對我交女朋友的失策開始講起。

我想我的過去,可能有一項事會當誇口的就是對初中三年以來, 大大細細考試, 我攏無給人偷看, 無論我隔壁同學用紙條仔、字寫佇手中, 猶是其他甚物方法做僻, 考試的時, 到今維持, 我毋捌做僻偷看, 一直到今仔日, 是我的人生。我雖然無法度進入建國、成功、台大, 濟少中學開始到今,毋捌讀私立學校, 為老爸省一屑仔學費，這是我卡對起老爸的所在。對考牢（tiâu）學校來講, 若準我是輸人, 但是對阮老爸來講, 我感覺猶真安心。對入學校來看, 若準我猶輸人, 但是佇上帝的頭前, 我猶是一個真正直的人。

到今為止, 無論考試或是某（chhōa-bó͘）的代誌, 在人生的戰場, 外口人來看, 我若準毋是真成功, 但是我佇上帝頭前, 我是一個成功的人。意思是講人生的戰場中, 我感覺我猶是一位成功的戰士。佇這個戰場我毋捌撤退, 雖然予人拍到流血流滴, 我猶感覺真安心。

雖然是按呢講, 人生的戰場, 猶毋是上帝的戰場, 一切猶是人的社會咧做決定, 無法度一切攏是上帝咧做主, 我猶認為一切攏著家己做主較濟, 偆的才交代上帝。佇考試的戰場, 我已經儘全力, 雖然無互阮老爸滿意。我的一生就是欲追求一個老老實實的我, 一個老老實實的國家。

最近賴清德總統為著欲去訪問非洲的國家史瓦帝南國家, iⁿ-iⁿ iap-iap出門，毋敢用家己國家飛機出門, 毋敢飛正式的航道, 毋敢用家己總統的飛龍機, 我看是真無風格。台灣應該是鞅鞅大國, 毋免受其他國家打擾干涉, 講東講西。台灣是咱的國家, 袂使親像挹（ip）尾仔狗, 由在別人指示。

賴總統的行為就是繼承魯遜所形容的阿Q精神, 毋敢公開做代誌, 偷偷摸摸, 無光明正大, 毋敢講台灣就是台灣, 你是bi̍h佇樹頭邊的總統。台灣若是hiah歹聽, 你toh毋免代表做台灣總統。台灣就是毋通親像你按呢, 毋敢光明正大。咱著講出台灣的名, 用台灣的記號, 對內對外,咱攏著一致, 任何情形, 任何代價, 就是著講出台灣的名才著。