虎頭蜂

陳柏壽牧師

05/15/2026

阮阿姊是”虎尾”女中畢業, 但是阮雲林, 我一直揣無”虎頭”的所在。阮阿公的園仔有一款”虎頭蜂”,會jio̍k人, 真毒, 人若是去互逐著, 聽講無死嘛是半條命。虎頭蜂無真大隻, 伊會jio̍k佇人後壁, jio̍k著以後, 袂放你soa̍h。

阿公的園仔有時仔會chông出虎頭蜂, 閃toh閃袂離, 差一屑仔頭殼toh釘到toa-phok se-phok。 阿公m̄知知影in孫仔去互虎頭蜂逐kah走無路的代誌, 顛倒想講伊有一群護衛軍咧顧伊的園仔。

照阿公的觀點看, 虎頭蜂是咧照顧伊園仔的天使, 伊會除去不止多的虫thōaⁿ, 所以阿公容允伊的存在。想來想去, 咱應該瞭解阿公的苦心, 雖然對細漢囝來講無真公平, 世間代往往是按呢有一好無二好。

虎頭蜂厲害的所在, 在佇伊有毒閣有刺, 因為按呢, 真濟歹蟲擋伊袂條。世間若是無毒, toh無法度對付毒, 叫做以毒攻毒。世間的惡毒真厲害, 閣有千萬款, 若毋是用毒去攻毒, 絕對無法度對付對方的毒勢。

上帝互咱的園內有虎頭蜂, 來佇園內代替咱來攻毒, 為咱行頭陣, 這是上帝代先為咱準備好勢好勢。咱著利用虎蜂為咱做工, 為咱用力取力。咱真濟做袂到的所在, 上帝代先為咱備辦好勢。這叫做上帝為咱奇妙的作為, 上帝佇園仔內備辦, 避免代誌發生, 代誌發生的時, 已經有先頭部隊佇頭前為咱奮戰。

咱四圍的虎頭蜂，看真兇惡, 其實是徛佇咱身邊咧護衛咱。真濟代誌, 看真兇惡, 看若準對咱是䆀,但是上帝自然有伊的攝理, 暗中為咱做好代誌, 四圍咧保護咱, 做真濟好代誌。