無人佇身邊
馬太25：14-29;；26：51-56 26:56
陳柏壽牧師
05/01/2026
我出身在旗山國民學校, 是雲林古坑的山內, 我會記得畢業典禮是佇紅kóng-kóng的鳳凰樹腳舉行, 鳳凰樹邊有一列開大蕊的斑芝花, 就是chím-má拄好當咧開花,（中國話叫木棉花）。斑芝花若開了, 會結一粒烏烏親像炸彈的子, 爆開內底的棉花, 阮攏包包轉去, 互阿母做枕頭。大家攏佇鳳凰花的下跤唱畢業的離歌, 大家攏唱到目屎流目屎滴。
畢業典禮的時, 我會記得我得著縣長賞。我猶記得縣長的名叫吳景煇。我嘛記得是一支parker的萬年筆。我給伊插佇胸前的橐袋仔。典禮結束後, 規群人攏圍來到我身邊, 親像 一群草蜢, 掰（póe）toh掰未開。結果是轉去厝的時, 萬年筆已經揣無lah。我發現著台灣人是一個真作弄真絞滾的民族, 佇絞滾的時會揣機會偷提家己的利益。我是台灣人, 所以我知台灣人的厲害。
後來阮老爸予人調去閣較深的內山, 是靠近玉山附近, 叫做大湖底。阮老爸是袂曉做人的人, 人若看伊袂kà意, 就給伊調去無人欲去的所在。阮爸母牽6的囝, 老母對廈門初到台灣, 毋捌人毋捌銅, 唯一會當靠的就是彼個去日本讀冊, 袂曉做人, 袂ou-se的老爸。只有按呢拖6的囝,拖一隻鐵馬, 向tioh台灣最高最深的山頂尾溜,一直行…
人咧艱苦的時, 毋知艱苦, 只有chím-má想著過去, 才會感覺hiàng-tang-sî是按怎經過, hiàng-tang-sî是按怎猶久會走相迮（cháu-
chím-má想起來才知老爸是真有眼見, 真有勇氣的人。伊看出gín-á佇深山受教育無前途, 就決定全家坐慢車搬起來台北。阮帶一間人厝壁拖出來的違章建築。有一日風颱欲來, 我kap阿姊peh去厝頂, 2人giú厝頂的壓鉛鉼（iân-phiáⁿ）, giú條條, 若無厝瓦會去互風吹去, 按呢一家6口, 就是咧giú彼塊壓鉛鉼…
起來台北阮爸爸揣無頭路。有一日我kap阮爸爸騎鐵馬去到木柵koh入去叫石碇的所在。阮爸爸會曉做密醫。佇南部的山內, 伊會曉開藥仔予人食, 有時嘛會kā人注射。阮2人咧釘窗仔門, 欲做藥局的時, 警察tò來kā阮趕出去。阮2人沿鐵枝路轉來, 我看著阿母khiā佇門口咧哭, kha-chia-phiaⁿ猶偝著阮細漢小弟。我第一擺聽著阮爸爸按呢講：我若像你遐nńg-chiáⁿ, 狗銅仔磅空內我toh去互火車chông死好lah！第一擺我聽著爸爸講遐爾脆心的話。
主耶穌佇馬太福音內底講一項道理：伊講主人欲出門的時, 將財產交代3的僕人；一個予伊5千,一個互伊2千, 一個互伊1千。主人轉來, 欲甲因算數。彼個領5千的, 擱去趁另外5千, 主人心內非常歡喜, 伊chím-má煞變做有1萬。彼个領2千, 嘛另外閣去趁2千, 伊嘛得著主人真大的呵咾。干焦彼個領1千的不但無去趁錢, 煞將伊的1千, 去埋佇土腳, 主人來的時, 才對土腳, 將彼1千箍挖出來, 原封不動送還主人, 主人非常受氣, 叫人將彼1千搶轉來, 將彼1千箍交互彼個有1萬的。這個譬喻無表示主耶穌毋是注重平等或是公平, 顛倒講耶穌真無公平, 耶穌講的道理若準chit世間的道理是有的欲互伊閣較有, 無的欲互伊閣較無。
我會去讀神學院, 會欲去做牧師, 最初的出發點to̍h-sī欲揣一個公平, 會當照顧散赤人的上帝。我畢業了後認真teh傳的道理, 就是欲傳一個會曉疼惜人同情人的上帝, 所以對tù-chiá主耶穌講的話, 我攏kā跳過, 無愛講。但是看愈濟, 讀愈濟, 愈發現主耶穌teh講的道理, 實在就是咧講這世間真正的道理, 主耶穌無愛騙咱, 伊攏咧講實在的話, 咧講真正的世界, 真現實的世界。世界本來就是遐爾殘忍, 世界本來就是遐爾無情。
本成我一直認為主耶穌是咧傳一項欲改革社會, 欲互社會顛倒反, 欲改變社會的福音, 但是讀愈濟,看愈濟, 閣看這個社會的基本構造, 看整個教會的運作, 愈發現這個教會, 尤其是天主教會, 是這世間咧積聚所有權勢佮錢財的大本營, 教會是世間保守勢力的大本營。
咱拄才讀的主耶穌所咧傳的信息, 就會當看出耶穌是咧堅固這個世間保守勢力的大本營。古早以來我一直相信耶穌是欲改革社會的中心, 但是咱若看, 譬喻看今仔日的聖經節, 將彼個上無錢的人的錢, 搶來, 送互彼個上有錢的彼個, 按呢豈是社會公義？但是二千年以來, 教會攏認為耶穌講的話是著, 所以有錢人愈有錢才是著, 無錢人無錢是應該。
咱毋是欲講究竟耶穌講的話著毋著, 咱免佮主耶穌辯論伊講的話著毋著, 主耶穌不過是咧講這个社會的真正的現實, 主耶穌不過是將社會的現實講予清楚nā-tiāⁿ, 咱何必批評伊的話呢？耶穌毋是這個社會的改革者。耶穌是這個社會的現實主義者。
你欲承認耶穌所講的是著猶是毋著, 攏好, 耶穌所講的話, 毋免咱去kā批評, 毋免咱去講東講西。歷史佮時間的大輪, 會按呢繼續一直絞落去, 你欲接受猶是毋接受攏好, 世間的齒輪, 每一日攏會按呢繼續絞落去。咱按怎tòe佇後壁, 無論按怎喝, 按怎叫, 有錢人猶是繼續趁大錢, 無錢人繼續是按呢, 愈無錢。這叫做基督教的現實主義。
二千年以來基督教是咧維持這個社會最基本的力量。耶穌基督猶久是控制佮維持整個社會結構的最基本的力量。共產主義的理論最基本在推翻社會結構, 建立utopia的理想, 佮現實世界無甚物關係, in是無實際無基礎的力量, 是喝口號的力量, 蘇聯真緊就變做修正主義, 中國猶堅持in的路線。基督教社會就是徛佇現實世界的頭前, 無人會當kā振動, 教皇佮教會猶是控制世界物質佮政治的力量。二千年的主耶穌的福音, 就是承認這個社會的現實。
登山寶訓若準是一拋（pha）遠遠咧的火, 但是毋是叫咱用武力去完成, 上帝的攝理就是叫咱照步來, 一定會成功。佇咱的生命中, 人人著àiⁿ起家己的十字架。伊講：咱若是有信心, 就是叫一粒山搬過彼邊, mā有可能。所以著謹慎, 毋通互魔鬼亂來。主耶穌毋是欲教示咱做袂到, 做無可能的代誌。伊只有講萬事tau-tau-a-lâi, 一定會成功。
咱來世間是暫時, 所以毋免留傷濟錢佇世間, 銀仔有夠生活就好。主耶穌勸咱著積錢財佇天頂, 毋通儉錢佇銀行, 財主欲入天國, 比駱駝入針鼻較o̍h, 所以若是會當, 欲死以前, 錢kā開互了, 就是圓滿。伊講當伊閣來的時, 咱攏欲坐佇伊身邊，伊欲互咱百倍的財產, 閣欲得著永生。
阮gín-á-sńg唱的歌：「人插花, 你插草, 人phō͘嬰, 你phō͘狗, 人坐轎, 你坐chhia畚斗, 人lāng猴, 你倒咧土腳喘」。主耶穌有時講笑話, 講彼個主人倩工, 下午算錢的時, 彼個透早toh開始做的, 領一跣錢, 但是彼個下晝tú-lâi做無一點鐘, 嘛是領一跣錢。講這世間, 有時本來無照道理咧行。這世間, 有時是無照道理咧行, 後壁的, 有時欲行頭前, 行透前, 會變做佇後壁。你若是拄著這款代誌的時, 毋免想過頭怨嘆。主耶穌猶活咧的時, 就預言講伊會死, 擱會死到真淒慘。
主耶穌當悽慘的時, 就是當最需要有人來身邊做伴, 最需要人來相扶持照顧的時陣, 無一個來倚伊的身邊, 連伊最會當信賴, 會當倚靠的人, 一個一個攏離開伊遠遠, 攏閃到十八天地外。古早是咧靠主耶穌食穿用的人, chím-má攏講因毋捌這个人, 這個人kap我無甚物關係, 古早講主啊！你去到叼位, 我攏欲tòe你到佗位, 一直到死, 我嘛欲tòe你到死。講遮的話的人, chím-á攏bi̍h到裂褲腳, bi̍h佇樹頭後壁，這是世間的現實。咱家己想, 嘛袂想會到按呢。
我佇教會kā人證婚的時, 二邊的人, 佇聖典內地, 佇上帝面前, 攏咒誓講仝款話。無幾年, 情勢toh變, in二人就講無仝款話。這款情形咱的上帝上蓋知影。因為上帝當伊互人釘釘死佇十字架頂的時, 這項代誌, 伊上蓋知影。佇客始瑪呢園的風sng-sng的所在, 叫天叫袂應, 叫地地袂應的時, 就是聖經講, 逐家攏走了了的時陣, 人欲來掠伊去釘十字架的時, 這個時陣, 就是上帝對人性最深刻最慼心的時。就是上帝佇十字架頂, 呼叫上帝赦免咱遮的做惡做毒的世間人的時陣。
細漢以來我就知我是真狡怪的人, 定定愛佮人冤家, 愛佮人相打, 但是較濟攏打輸人, 較濟是予人拍倒佇土腳jôe。我會來信基督教真正是上帝憐憫, 若無我袂活到今仔日。後來為著欲逐一個查某gín-á禮拜日才去彼間教會, 一個人bi̍h佇彼間禮拜堂結束, 看伊一個人離開, 人攏無欲chhap咱。人無欲chhap咱的, 咱嘛逐擺, 乖乖啊離開。
上帝的好意, 經過我的大學學長李明清的介紹, 我會當進入日本公司, 雖然我仝款無緣投, 猶久佇這世間彼個人欲嫁互我, 互伊變做今仔日的婦人人。
佇日本的公司我真認真工作, 上帝予我佇日本生3个囝，後來佇美國閣互阮生第4的。遮的攏是阮的寶貝。佇日本最後1年台獨聯盟主席黃昭堂先生去阮佇東久留米的厝, 真熱心邀請我做台獨聯盟的主席, 但是我無kā伊接受, 因為彼時我心內已經決心去做牧師, 我已經決心欲入NewYork協和神學院，欲做牧師。我內心非常掙扎：做牧師較好, 服侍上帝較好, 或是做台獨聯盟主席服侍人較好。我這種選擇, 我想是上帝咧指示我。上帝愛我做牧師, 上帝無愛我變做台獨聯盟的主席, 是好是bài, 只有上帝知影。
我知影人生來這世間只有來一擺。我的一切, 除了上帝咧做主, 嘛是我家己的決定。萬事我只有靠上帝。到今為止, 已經年紀遐濟歲, 閣講嘛攏是加講的lah。耶穌佇客西馬尼園欲予人掠以前, 連伊至親, 最會當信賴的人攏走了了, 無人敢óa來身邊, 連上帝tō會拄著這款運命, 何況是咱呢？這是上帝佇十字架面前拄著的故事, 嘛是上帝愛咱會記得永遠khǹg心內的故事, 一個上悽慘, 上孤單，一個過去有發生，將來嘛有可能發生佇咱身邊的事。
基督教教示世間人的一个逆理，就是上帝欲轉來家己的所在，結果互人當作是外邦人。互外口人派來的總督判罪釘死，互世間人知影咱攏是外邦人，互外邦人統治死佇外邦人的命令，家己的人佇下面喝好！咱佇世間的命運，毋是咱家己做主，是在外口人的主宰。幾百年來台灣人的近代史，敢毋是記載這個事實。一直到今仔日台灣猶是佇外邦人的統治，猶是認為家己決定家己的命運。台灣人咧爭扎欲按怎出頭天。
No Comments