頂世代母親个讚歌

(日本原曲：若かりし母の歌)

台語歌詞：王政友

羅馬字：賴柏年

(一）

看窗外 探頭門邊 老母等老爸轉來

Khòaⁿ thang gōa thàm-thâu mn̂g-piⁿ lāu-bú tán lāu-pē tńg-lâi

鳥隻叫聲 空中畫過 飛向何方誰人知

Chiáu-chiah kiò-siaⁿ khong-tiong ōe kòe poe hiòng hô-hong siáⁿ-lâng chai

天色烏 人佇半途(路) 燈火微微靜等待

Thiⁿ-sek o͘ lâng tī pòaⁿ-lō͘ teng-hóe bî-bî chēng tán-thāi

老爸手提五仙錢空感慨

lāu-pē chhiú the̍h gō͘-sián-chîⁿ khang kám-khài

老母靠這安家內

lāu-bó khò che an ke-lāi

無奈桌頂冷冷清清

Bô-nāi toh-téng léng-léng chheng-chheng

配飯蔭豉佮鹼菜

Phòe-pn̄g ìm-kó͘ kah kiâm-chhài

（二)

夜深靜 蟲聲稀微 半圓月影漸斜西

Iā-chhim-chēng thâng-siaⁿ hi-bî pòaⁿ-îⁿ goe̍h-iáⁿ chiām siâ sai

老母一人 油燈火邊 針針線線舊衫改

Lāu-bó chi̍t-lâng iû-teng hóe-piⁿ chiam-chiam sóaⁿ-sóaⁿ kū-saⁿ kái

肥料袋 三種品牌 囝仔衫褲家己裁

Pûi-liāu-tē saⁿ-chióng phín-pâi gín-á saⁿ-khò͘ ka-kī chhâi

教示序細凡事家己主宰

Kà-sī sī-sè hoân-sū ka-kī chú-chài

這世打拼望後代

Chit-sè phah-piàⁿ bāng āu-tāi

老母沓定是這句話 (沓定：經常)

Lāu-bú ta̍p-tiāⁿ sī chit-kú-ōe

耐心等看明仔載 (明仔載：明天)

Nāi-sim tán-khòaⁿ mîn-á-chài

（三)

霜風透 菅芒葉凋 厝後梅樹花滿開

Sng-hong-thàu koaⁿ-bang-hio̍h tiau chhù-āu mûi-chhiū-hoe boán-khai

鷄三啼後 冷月西殘 老母斜影掃前階

Ke saⁿ-thê āu léng-goe̍h se-chhân lāu-bú siâ-iáⁿ sàu chêng-kai

露猶寒 庭前影孤 早頓泔穈早安排（ 泔糜：稀飯)

Lō͘ iáu kôaⁿ têng-chêng iáⁿ ko͘ chá-tǹg ám-bê chá an-pâi

看老爸穿破草鞋上山崖

Khòaⁿ lāu-pē chhēng phòa chháu-ê chiūⁿ soaⁿ-gâi

老母心疼暗掛礙

Lāu-bú sim-thiàⁿ àm khòa-gāi

東爿山頭天色漸白

Tang-pêng soaⁿ-thâu thiⁿ-sek chiām pe̍h

又擱頭犁登舞台 (頭犁：低著頭)

Iū-koh thâu-lê teng bú-tâi