我深心懷念的三兄

1940 Oct 4 – 2023 Mar 30

享年84歲

Hài-chiàng，三兄，我是阿年啦！當我叫出你的名時, 我強強欲哭出來！目屎情不住盡，流出來！chím-má 是已經半暝，但是想著你的往生，我無法度睏落去….

下晡， 我出去行路做運動，拄（tú）入門的時，看著手機突然有阿由傳來的簡訊，我想一定有代誌，因為仲由真少kap我連絡。伊通報你佇幾點鐘前已經往生….你佇親人陪在眠床邊的時，真安祥，佇無痛苦的情形下，慢慢仔目睭一下瞌，就睏落去，kap親人永別…..sayonana！

Hài-chiàng，三兄，自從作囡仔（gín-á）開始，你就真照顧我這個小弟。我嘛真愛跟前綴後（kūn-chêng tòe-āu）kap你做伙，因為你真樂觀、講話趣味，因此你的朋友嘛就是我的朋友。

你先天有無比的親和力，待人做事，人人呵咾，是序大人，尤其是阿爸、a-i 心目中的乖囡仔。

80年前是農業社會，家境貧窮，咱的家業就是種柑仔，做田。阿爸佇鄉公所上班。你國校畢業了，竟然放棄升學，決心務農，繼承家業。

彼當時，阿公、阿爸是庄內的威嚴人物，厝邊隔壁的囡仔若無乖，序大人攏用 “看！衡仔伯來啦！” “雲龍仔伯來啦！” 嚇驚。

獨獨你一人kap 阿公、阿爸非常親和。所以阿爸的特有功夫，特別是柑仔接支的技術、拋魚網，你攏一項一項繼承落來。

若是阿爸身軀破病，哀叫的聲音非常驚人，佳哉獨獨是你一人勇敢去親近看顧伊！阿爸嘛真相信你。

厝邊隔壁若有代誌，你嘛會放落手頭的工課（khang-khòe），熱心幫忙 ！ 人人呵咾。

因為你的務實，認份拍拚，認真做田，種柳丁、椪柑，是建立今仔日劍門農場基礎的拓荒人物，功不可沒 ！

Hài-chiàng，三兄，咱人攏會老。這幾年，一直有聽著你身體的欠安，入院。佳哉有阿嫂帶領所有囝兒的盡心照顧，你一定有感受著。

上天既然在你佇凡間生活84年後，引導你前往西方淨土歇睏，佇hia 你自由自在過清靜的日子，無煩無惱，不再有病疼，無任何攪擾。請你安心歇睏。有一日咱逐家攏會當佇遐再見面！！

你的小弟阿年  叩上

2023年三月31 日，加拿大多倫多