金句：

「上帝對一本造出萬族，tòa佇全地，並且定准因的年限甲疆界，是欲互因追求上帝。其實上帝離開咱無外遠，咱無論是生活、動作，一切攏在佇伊。」

（使徒行傳17：28）

一本造出萬族

陳柏壽牧師

17/01/2023

Tòa加州柑仔縣有一個台灣人叫阿土伯仔，定定佇網路中教人按怎種花種果子插柑仔，真濟人攏知。有一擺佇節目中伊家己透露，講伊佇台北做兵的時去天母後山給人偷挽柑仔，去互柑仔園的主人掠著，去互主人掠來做因查某囝的家庭教師，後來煞變做柑仔園的囝婿。這項代誌真正是種匏仔生菜瓜。人去因柑仔縣學種水果，定叫因某出來展，講是伊去偷挽柑仔的最大的成績。親像舊約聖經內底雅各為著欲（chhōa）拉結閣kā因丈人拉班加做6年苦工共款。久來咱才知影，艱苦來的某，較知疼惜。

人生無定定是好天。我以前的頭家kā我講：去到佗位，落雨水攏是冷的。阮老爸去日本讀冊，轉來台灣，阮阿公去予人375，本來對古坑一直到西螺北港攏有土地，但是一聲對大好額摔落去變做散赤人。

我是斗六庄腳出身，阮老爸飼六個囝，我猶會記佇老牛拖甘蔗對庄頭過，阮這群囡仔就去偷giú甘蔗，甘蔗縛真ân，giú袂出來，阮親像狗蟻去粘tioh含仔糖，甘蔗giú袂出來，阮閣毋甘放，顧牛車的原料仔大聲咧喝：「夭壽猴囡仔恁閣來偷giú甘蔗！」。這個偷giú甘蔗的故事是我一生攏袂忘記佇的英雄歷史。

細漢時代甚物歹事攏做：偷挽荔枝，偷a̍t龍眼，招群結黨、相拍，考試偷看，無所不誌。我對少年時期就是甲這括囡仔做伙，甲因交結真深。就是因為按呢，我對外口世間的人bat真濟，有瞭解，嘛真同情。一直到我入教會，讀神學院，做牧師，我攏毋敢看因做外口人，毋敢叫因世俗人。我一直感覺因就是我的好兄弟。

阮老爸去日本讀冊，轉來故鄉，煞揣無頭路。姑不將6個囝，對斗六搬起來台北。我猶會記佇全家坐8點鐘的慢車，tòa入去民生路雙連車頭火車路邊的一間用亞鉛鉼（註：a-iân-phiáⁿ)薄鐵鉼）釘的違章建築。

有一擺我甲阮老爸騎鐵馬，載藥箱仔，去到石碇仔，欲佇遐做密醫，去互警察趕出來。我猶會記佇阮老母坐佇門口咧哭。

佳哉天公疼戇人，經過彼邊keystone教會的昭煇兄的阿姑劉老師的介紹，阮老爸才會當去石牌國校做教員。按呢一個做做45冬。

Christmas的時阮查某囝京薇講欲慶祝阮結婚50周年，載阮去Vancouver東旁的一個小所在叫做 Harrison講彼就是咱遮唯一的溫泉，實在講甲日本比起來，毋是溫泉，不過是lâ-lûn燒的燒水（註：斗六人講的半燒冷），洗著真未爽。但是咱予人招待，毋敢嫌，干單講一直講：真好真好！這世間，燒水無成燒水，咱嘛毋敢嫌！

轉來的路邊經過Mt Vernon山區，彎彎曲曲，Alger 路邊有看一粒大石，頂面油漆到花紅柳綠，畫到歪哥chhì-chhoah，石頭腳有人插花佇佇遐。後來才知有爸母佇遐記念交通事故的gín-á所設的記念石，看了互人心情真鬱卒。

毋知啥物原因，最近時常夢著細漢大漢的彼條溪水彼爿山，New York 的台灣人若做伙就會唱彼條故鄉的歌：「叫著我，叫著我，黃昏的故鄉不時咧叫我，叫我這個苦命的身軀，流浪的人，無厝的渡鳥。」「彼邊山，彼條溪水，永遠抱著咱的夢。」「白雲啊，你若欲去，請你帶著我心情，送去互伊我的阿母。」「O͘ii…毋通來袂記—i eh ！」漸漸彼條歌soa̍h親像變做咱的國歌lah！

有一位少年人名叫林強，伊有唱一首歌，歌名叫：「向前行，啥物攏毋驚！」『基隆港邊的鐵枝路腳，有一個賣黑輪的老阿伯，問伊今年有幾歲，囝孫阿有偌濟？」「伊講：馬馬虎虎會得過，大漢細漢攏佇市內做頭家！」這句話可能是講台灣人勤儉，毋甘願閒閒店厝無做代誌；但是mā有可能另外一個卡深的所在，伊講袂出喙，致使到這個年老的老爸猶佇北風sǹg–sǹg-叫的鐵枝路腳咧袂黑輪！咱每人攏可能有這種心酸的故事，但是講袂出喙，驚人知影。但是真濟這種實際人生，咱攏囥佇家己心內上深的所在，可能最後欲去上帝遐的時，才chah去上帝，互上帝去處理。林強坐計程忽然叫：「司機啊，請你小停一下，我若準有看著街仔角遐，有彼個賣黑輪的老阿伯！」這世間真濟角頭，猶時常看著可憐的賣黑輪的老阿伯…這是真正的世界。

上帝創造咱做一個台灣人，我相信有特別的意義，就是咱做一個台灣人不但是上帝用智慧創造的作品，特別是因為咱台灣人是經過艱苦出身的人較濟。

天地萬物未有世界穹蒼田野以前，就是有智慧，上帝用智慧來做人，做出世間所有的人。一切的人，是上帝用智慧創造出來上蓋尊貴、上蓋寶貝的寶貝。上帝是創造人的師傅頭，上帝創造咱人以後，就預備所在互咱tòa，咱tòa的所在，是上帝為咱準備第一好的所在。這是箴言第八章22-36互咱第一珍惜的聖經節。這是世間人的根本。菲律濱馬尼拉的幾萬人生活佇糞埽山頂大漢的人，若是互因有基本的生活甲教育，因一定甲咱共款有知識甲尊嚴。

我看新聞12月11前金的馬利亞廟將馬利亞的相giâ出來街仔路踅街，11月初台南的馬利亞廟嘛出來台南的街仔路踅街，由因的主教頭，拄好五角媽祖嘛出來街仔路踅街出巡，這邊二千外人，這邊成千，玲瓏叫，真鬧熱，仙拚仙，沖沖滾。但是真有禮貌，這邊的主教進前，去共彼邊的媽祖的廟公請安、行禮，大家非常和諧有禮。這是真正台灣人真特殊的宗教文化，嘛會當看著台灣人通融合一的真特殊的一面。咱長老會的會友暫時可能猶無法度接受甲瞭解，但是咱漸漸對這會看著台灣人思想甲行為的包容性。

詩篇第八篇嘛是咧講共款的基本道理：詩人講：「人」算做是啥物，上帝創造人互伊比天使粒仔卡輸，互天頂的鳥、海呢的魚、甲其他上帝創造的世間萬物、牛羊、走獸攏伏佇人的手下，所以人變做何等尊貴的動物。人變做上帝的榮耀甲尊貴的冕旒。聖經講這所在就是講甚物款的人：無分男女、種族、皮膚、財產、地位，一切在上帝看來攏是平等。上帝看世間人就是按呢。

我想聖經中第一簡單第一實在第一好記的一句話，嘛是我相意愛的一句，就是使徒行傳保羅所講的彼句話（使徒行傳17：28）：伊講上帝離開咱無外遠，因為咱攏佇上帝內底來活，來振動，來行路，來講話，來來去去，食飯，歇息，做上帝的囝兒，活落去。意思是講咱台灣人彼句話：頭殼頂3吋有神明。咱普通時無咧注意，其實咱台灣人講話甲聖經內底講的話，真濟是差不多。咱攏著會記佇，對方甲咱攏是共款的人，無論伊拜甚物神明，無論伊是查埔查某，無論伊是大漢細漢，有錢無錢，因甲咱攏共款，因頭殼頂3吋有神明，攏有因的保護者，有因的天使。

聖經講上帝做人，上帝所創造的人，是一個不過比天使粒仔卡輸但是比世間所有萬物較大的生物，所以咱做一個人是真可貴、真尊貴的存在。咱不過比天使粒仔卡輸，比上帝所創造所有靈界的世界以外，咱比世間所有萬物攏較尊貴、閣較偉大，咱是上帝心目中一粒寶石珍珠。咱無論是黑、白、黃、紅，無論查埔查某，無論好額散赤，無論身軀健康破相，無論是咱人人抑是外口人，佇上帝的面前攏是對一本創造出來的寶貝，佇上帝面前咱攏平大。

將近80年前出世佇阿里山玉山邊仔的我，經過世間各地的流浪，chím-má 來到佇Seattle，兩個人牽手佇這個異鄉，想起長長的過去，我嘛袂當為上帝做甚物工。生的囝因攏結婚生囝，因的代誌阮嘛管因袂過。Chím-má 著掛慮的代誌是今後，只有祈禱上帝來互世間較平等，祈禱上帝有目睭，有目睭看較遠，看較清的世界。