昻

陳柏壽牧師

10/10/2022

Subaru本來是太陽系內一粒小小的無人注目的行星，但是自從谷村新司（Tanimura）寫這首subaru「昻」，用伊淒涼的歌聲，唱出「再會啦！咱做伙離開這個艱難困苦寂寞的世界，向著彼個遙遠的快樂的天星subaru進前！」伊的歌聲引起真濟世間孤單失望無助的人心內的共鳴！

路加19章描寫有一日耶穌欲對莊過，全莊大細攏來大路邊欲看耶穌。矮仔撒該爭佇人的尻川後，看袂著，伊煞khiat去佇路邊彼叢桑叢樹頂，佇山頂看馬相tak，一清二楚，實在有夠爽，閣無人看著，安心啊等耶穌。無想到耶穌一影就看著樹仔尾溜的撒該，煞出聲叫講：「撒該撒該！緊落來！我 eng-àm欲去恁厝食飯！」

聖經雖然寫講撒該是一個稅吏是一個罪人，其實伊是一位真單純的人，kà你我攏共款。耶穌叫伊的名的時，無論伊khiat起去樹仔尾溜，或是對樹仔頂pê落來，可能伊心內第一的反應，豈是耶穌欲來chhōe伊的麻煩？因為伊毋知耶穌真正的動機。但是伊出佇單純的心，無第二句話，就來接納耶穌。按呢做就是出佇伊單純的意志甲衝動，伊接受的是上帝忽然來的恩典，因為上帝的恩典時常是人想袂到的時，忽然到位。

禮拜日咱去禮拜堂聽順耳的講道。美麗的音樂聲，實在是真安心甲快樂的代誌，這甲khiat起去樹仔頂，pê落來樹腳chhōe耶穌，toh一項卡困難？咱佇禮拜堂廳罵稅吏是卡簡單，但是欲叫咱khiat去樹仔尾溜看耶穌，就無幾個人做會到。

去互耶穌叫著的撒該緊對樹仔尾溜soan落來，心內歡喜到袂顧佇。世間人對這位抽餉的稅吏，一向攏無啥物好感，無想到耶穌竟然親自點名叫伊，閣講欲去因兜食飯。世間人看毋值的人，顛倒去互上帝特別注目，顛倒去互上帝特別關心。

去互上帝關心著的撒該另外一項互咱著驚的代誌是，伊soah給耶穌講：「主啊，我欲將我所有的財產的一半送互散赤人，我若是有欺負、勒索、搶奪別人，我欲四倍賠人！」這是伊佇律法上規定的伊應得的份額閣較多。當人領收上帝的恩典的時，當人佇靈性上醒起來的時，毋是干單反悔過去，是欲還，欲回報閣較濟的濟。耶穌就按呢宣佈撒該欲領受閣較濟的恩典甲拯救。上帝就是用按呢來款待咱世間所有有罪的人。

資本主義世界的中心，就是保護私人財產。共產主義的中心對待有錢人的方法是清算鬥爭。撒該這款有錢人無必要經過清算鬥爭，自願就將家己的錢吐吐出來。佇美國，歷史以來，遐的有錢人除了遺產稅以外，真濟攏佇死前將伊chhun的財產，奉獻互因家己的美國社會，美國錢自然留佇因的社會內面，因攏毋免經過清算鬥爭。撒該顯明的就是一種做人的良心的顯現，也是表明資本主義社會自然運作的方式。

另外一面咱會使看撒該親像天頂彼粒遙遠無人看重無人注目的天星subaru「昻」，雖然伊恬恬停佇hia，親像撒該按呢無人看重，無人認識，但是確實伊是一個真重要的存在。伊指示咱欲去彼個方向，咱著khoán–khoán 咧，向著彼個雖然遙遠但是美麗的所在，無得驚惶，做伙進前閣再進前！