Giâⁿ媽祖

陳柏壽牧師

03/09/2022

媽祖生彼日，附近庄頭的人攏會óa來，廟口tīⁿ tīⁿ攏是人，阿公手牽孫仔，阿媽尻脊（ka-chiah）偝紅嬰，少年的頭殼縛紅巾準備欲扛轎。路邊徛家的人，真濟人攏排流水席予人食,挵挵滾，無論庄內人庄外人，嘛有阿本仔甲阿陸仔，嘛有黃頭毛的啄鼻仔，攏入來坐桌，食免錢，真正是鬧熱滾滾。對遮咱真正看著咱台灣人的純真、純情甲好客。有時這邊的媽祖婆會去造訪隔壁的媽祖婆，有時嘛會相爭甚人是分香正身，真正是分袂清。

阮兜離開北港大甲真遠，所以真少有機會去參拜。阮tòa佇雲林古坑，阮阿母一世人嘛毋捌講伊是佛教徒抑是甚物，但是日子若到，伊攏會排四果牲醴佇門口，嘛會叫我giâⁿ二支香做伙拜拜。阮有時嘛去阮溪邊厝庄的廟仔拜，我去廟仔鼻著香的味會感覺真溫暖甲親切，這可能是我細漢以來訓練出來的直感。

箴言第八章甲詩篇第八章是咱甲giâⁿ媽祖的鄉親互相對話的基礎。咱攏平平是人，箴言講上帝賞賜咱攏有共款人的「智慧」，咱著用平平是「人」的定點來互相款待。箴言講「愚戇的人啊，恁著曉悟，恁心內著明白…上帝佇造化的起頭，佇太初創造萬物代先就有「智慧」，對恆古，對太初，對未有世界以前，我就設立…對上帝猶無創造大地、田野、甲世上的土質以前，我已經佇hia..。上帝為滄海定伊的界限，互水袂盤過伊的命令。上帝設立大地的根基以前，我已經佇hia。」（箴言8章）「智慧」是上帝創造世界的基石，也是世間各族人類互相交流的基礎。「我看你指頭所造的天，甲你排設的月娘甲星承,人算做甚物，你竟然顧念伊…你互人比天使哩仔較輸，但是你賞賜人榮耀、尊貴做冕旒（bián-liû）。你派伊管理你手所造的，互萬物一切攏服佇伊腳下。（詩篇第八篇）上帝互人做伊創造的榮耀甲冠冕，上帝互全世界在佇伊的管理下，成做一個人類調和甲平安的所在。

咱台灣的民間信仰，歷史以來就是非常平和甲單純。基督教傳來台灣的時嘛真少發生甚物社會的對立。有記載的是有一擺宣教師去予人潑屎，彼位宣教師嘛只有笑笑仔講；「真無采，chiah-ē畚（pùn）若來a̍k菜毋知欲偌好咧！」來台灣的宣教師只有來做善事，做醫生，辦教育。所以甲台灣社會相當和諧。

當初保羅初次將基督教傳入歐洲的時，嘛甲當地的地方信仰無發生甚物衝突。佇歐洲有發生宗教衝突是以後的代誌，是基督徒家己刣基督徒，天主教徒甲新教徒相刣，刣袂煞，刣30年久。這項代誌甲地方傳統的地方宗教無甚物關係。

世間逐所在留存的各地的信仰，我想是上帝的好意甲攝理（liap-lí）。基督教會當佇台灣慢慢傳將近200冬，主要就是咱佇台灣傳教有照上帝教示咱的方法甲道理。

我想若是有一日阮北港媽祖去造訪咱台南的聖母馬利亞廟毋知欲外好咧！