台文生涯

陳柏壽
July 2022

前言：
良光兄平安!
30週年特刊有收著。感謝。
第一頁內你有寫發行人：聰美記念基金會。
我是現任主席，但是我寫互你的短文並無篇入冊內。
我寄互你的文章如下：

我的人生是真簡單，無甚麼理論，只有向一個理想kap目標，一發進前，對別人的評價kap批評卡無囥佇心內。古早阮老爸，包括高俊明牧師在內，攏無贊成我放棄事業去讀神學院。今四、五十年經過，我嘛做人的牧師四十外年了退休，猶閣佇這世間「流浪」。講流浪的意思是講萬事一切靠上帝路（chhōa-lō͘），逐日「時到時擔當無米食番薯湯」，過一個真平凡的人生。

A-Tong兄叫我寫一寡「台文通訊」30週年感言，我想這是較大的任務，因為我只有是一個平凡的人做一項平凡的代誌。雖然是按呢講，台語文這代誌，佇我人生的中間實在佔我，除了傳道理飼某囝顧家以外，人生的絕大部分。到今為止每日咧無閒的代誌，嘛只有是台語文，連眠夢嘛是。

彼年神學院畢業我佇New York的Westchester台灣教會做牧師，歸教會攏是有台灣心的人才會來做禮拜，會使講「歸盤魚脯仔專專頭」，因為人若聽講是陳某人彼個台獨牧師，人toh袂癮（bē-giàn）來，抑是毋敢來。我真知這是我的宿命，但是嘛可能是上帝安排我的好命，予我行路卡順嘛卡坎坷。佇長榮大學教冊時，我攏用台語教，學生的報告嘛著用台語，起初抵抗真大，但是學期過了，學生有人寫批互我，感謝我互因揣著母語的母胎kap靈魂，實在互我真安慰。

鄭良光兄佇1991年7月初一創刊並發行第一期「台文通訊」，到第25期才交互我繼續負責發行的工作。我設立「聰美姊紀念基金會」來負責這項工作一直到第142期，總共12年的歲月。Westchester名叫「衛鄉教會」是一個真細間的教會，親像一個紅嬰仔，欲承擔這項重大的代誌，實在心內膽膽，毋知欲按怎才好。佳哉上帝有安排一位黃聲宏醫師，黃醫師的令尊黃鯉吾醫師是咱台灣人無教會主義信徒，因對台灣人運動非常熱心，黃醫師有一個阿姊叫黃聰美嫁日本人醫師伊藤邦幸，二人結婚後去印度北邊Nepal做日本海外醫療傳道十幾年。佇彼個Himalaya山國，聰美姊思思念念的代誌猶是故鄉台灣，伊講我雖然嫁你做日本人，但是我的心內猶是台灣人。聰美雖然一世人無出名，但是我看是一位真偉大的台灣女性。聰美基金會就是欲繼承伊的意志kap理想來設立。

未來的世界毋是George Orwell佇「1984」冊內所描寫的Big Brother統治的世界，嘛毋是中國人歷來執政kap權利者所提倡的「世界大同」的世界，親像今仔日中國人按呢宣傳。我的信仰是未來的上帝國是「世界大不同」的世界。當初上帝就是交代世間人毋通留戀，著「出出去！到世界逐角落生湠濟濟」(創世9：1）。未來的世界，上帝互世間「各族、各民、各方」來的人攏用因家己的腔口，唱家己的歌，來頌讚慈悲的主宰上帝的「永遠的福音」（啟示錄7：9；14：6）。彼就是新天新地的世界。covit-19已經欲2年lah，魔鬼親像烏雲遮蓋全球，毋知同時欲結束。但是天愈黑，咱著愈需要用耐心來等待，等待新天地到來，尤其是咱做母語運動的人，更加著按呢。

牧師做愈久，愈感覺咱的母語語言運動，愈甲福音拆開，母語是做一個人心靈的根本部分，咱做一個人所有的「生活、行動、kap存在」，包括咱的語言，攏是上帝賞賜（使徒17：28），這叫做「天賦人權」。所以咱的母語運動也是咱揣上帝的運動，咱的心靈更新的運動，咱每日的生活的草根運動。咱著堅持到底，知影這條路咱愈行會愈闊，愈行會愈遠，愈有希望，會當得著生命樹的果子，因為佇咱頭殼瓦頂，攏有上帝賞賜的記號，就是「母語人」的記號（啟22：1-4）。