做爸母最無奈的時

陳柏壽牧師

26/08/2022

我毋知其他五位兄弟姊妹過去有悖逆（pōe-ge̍k）爸母甚物，濟少我在古早以來，我時常有悖逆爸母，或是無聽話的所在。Chím-má做人爸母，才知過去按怎無順從爸母的代誌。英文有一句話講：「囡仔無服從爸母是因做囝必然的天職」（To disobey the parents is what the children are born for)，真正有影。

聖經內有真濟所在攏記載爸母是囡仔一世人的倚靠：「你看老爸賜咱何等的慈愛，互咱通稱做上帝的囝兒。」（約翰一書3：1）；「婦人人豈會忘記佇伊食奶的囝，毋憐憫伊所生的囝？因kiám-chhái有忘記佇的，毋過，我無忘記佇你。」（以賽亞49：15）「閣親像鷹鳥擾動伊的巢，用二个翅接鷹仔囝，偝鷹仔囝佇因的翅的頂面，上帝按呢親自引伊。」（申命記32：11）「我真濟擺愛聚集你做囝兒，親像雞毋聚集伊的雞仔囝佇翼下，毋過恁無愛。」（路加13：34）「我大聲喉叫，親像難產的婦人人，hā-hā-喘，袂接氣。」（以賽亞42：14）「佇我的父的厝有真濟房間，我去遐是欲給恁準備所在。」（約翰14：2）

做爸母，尤其是老母，人生最大的關卡就是生囝。生有雞酒香, 生無四塊板。生囝的時是伊人生最極端的感情甲意志的總合，肉體極端的疼痛，加上欲將新生命生出來的最高的意志，就是攏集中佇這個瞬間。這是人類欲延續生命必需經過的關卡。經過生產的關卡，咱才知影生命的風險甲祝福，生命的韌性甲脆弱，也是做人爸母最大的無奈。

囝的出世毋是做爸母任務的完成，反轉是所有艱難的開始：一世人甲囝做伙拖磨，對老母給紅嬰仔飼奶開始，老爸佇外口趁錢飼家, 一直希望囡仔緊大漢，大漢以後閣希望伊會當自立成功趁錢成家立業，閣驚伊飛相遠，真正時時刻刻，捏驚死放驚飛，風吹線giú ân-ân，閣毋甘放。一直到囡仔大漢，希望伊會照你的意思行你的路，串串（chhoàn-chhoàn）伊欲行的伊家己的路，你toh邊仔喝，嘛無路用，你愈喝，伊行愈遠。你希望伊行正爿，伊串串欲行左邊。咱人人差不多攏有這個經驗，這就是咱做爸母人生的無奈。

上帝陪咱做伙過咱的人生，嘛是共款。本成咱看咱的上帝是永遠、全能、不變的上帝，甲咱古早咧想咱的爸母共款，chím-má才知影上帝欲陪咱過一世人，嘛甲咱chím-má做人的爸母共款，時時拄著困難、絕路、失望、反叛、抵抗。咱佇世間變做一個脆弱的爸母，上帝嘛時時變做一個脆弱的天頂的爸母，上帝嘛有講袂出的無奈。上帝對咱的愛就是按呢。上帝欲疼惜， 伊欲mo̍͘h咱的時，咱toh閃邊，上帝叫咱來身邊的時，咱走愈遠。可能就是上帝用按呢來訓練咱，互咱放膽勇敢向前行，因為上帝知，有一日咱一定會轉來厝。咱有一個脆弱的上帝，甲咱有脆弱的爸母共款，有無奈的存在，這才是咱真正的上帝。