撒旦kah上帝博輸贏

陳柏壽牧師

03/08/2022

約伯記作者安排上帝kah撒旦佇天堂博輸贏。撒旦挑戰上帝的根本點是：「約伯因為有錢有財產，所以伊會對你虔誠服事」。照撒旦的理論，你若是「好額」，閣加上「虔誠」，就是罪惡。當初毛澤東的共產黨起家的時用的口號嘛是按呢，欲「打倒有產階級，打倒走資派」。人類社會的鬥爭，到今仔日差不多嘛是按呢。

撒旦講：約伯「呵咾感謝你敢是無因端呢？」「你將伊的四周圍的籬笆圍到好勢好勢，互伊安心趁錢，無人會當侵害伊，財產當然一直增加，當然伊會安心敬拜你！」撒旦認為上帝偏心，上帝只有照顧好額人。

上帝到遮猶感覺約伯是一個「完全」的人，是純全的人，是一位無通嫌的人。伊感覺有錢人嘛會當虔誠敬拜上帝。

但是到這時陣，勞苦勤儉一世人的約伯，上帝只有用一句話：上帝將約伯所有的家產子女kah一切，攏總「交代互撒旦去處理」。約伯就予人拍倒佇塗跤，佇廟仔口做乞食討趁。

國民黨佇台灣強制執行「耕者有其田」kah「三七伍減租」，以及共產黨佇中國強迫「拍倒地主階級」，實行「文化大革命」，地主kah知識階級幾忽完全互人掃倒佇塗跤，二邊國攏做伙剪除文化的根kah幼苗。所以這二國家，無留文化的大樹。日本毋捌實行這種恐怖的階級鬥爭，所以世界逐國攏會當看著日本文化的大樹，繼續咧生長kah發展。

約伯內底的上帝若準是一位心神不定，毋是做代誌有原則的人。講約伯記是一個悲劇就是對遮開始，因為好人無好報。上帝「無因無端」，就將約伯交互撒旦。撒旦「無因無端」來挑戰上帝。約伯就按呢一個完全的人，「無因無端」就陷入去痛苦的深淵，一切攏無了了lah！一切攏免講lah！（2：6）咱看今仔日的疫症共款，細菌遍滿空中，甚物時陣細菌欲入來咱身軀，咱完全無法度控制，一切會使講攏是「無因無端」的運命，無tîng無tî中間，好人歹人共款，上帝嘛有可能會放棄咱。

專卷loh-loh-tn̂g的約伯記攏是約伯kah伊的朋友的辯解。遮的辯解豈有效？世間的代誌，第一紐紐毋著，接落去歸領衫攏會走chōa，閣講落去嘛毋是道理lah，卡講tō無彩工lah！

世間代誌本來就是佇無道理內底欲講道理。牧師佇講台頂，愈揣無道理來講的時，伊會愈講愈長，愈講愈久，原因佇遮。

有人講約伯記是喜劇，若是用錢kah財產的眼光看，上帝最後有賜約伯閣較濟財產kah子女（42：12）。對這種人來講，約伯記是一種喜劇。因講這嘛是一種道理，約伯有得著伊的幸福。世間人看代誌三不等，道理會愈講愈花，原因在佇遮。

上帝kah魔鬼會當簽合約，這個合約會互人的人生陷入無限的苦難，所以上帝欲予人有苦難或有幸福，完全在佇上帝的意思，世間一切嘛會使講是上帝kah魔鬼合作的一棚戲。世間人何必虔誠來敬拜服事上帝呢，服事上帝kah服事撒旦毋是共款呢？

用物質的幸福來做人生一切努力的目標豈毋就是人生的一切呢？共產主義所講的口號豈毋就是改變世界一切的動機呢？

佳哉這本冊是一本戲劇，一本虛構的故事，伊本毋是一本悲劇，嘛毋是喜劇。經過這本loh-loh-tn̂g的戲劇，所欲kā咱講的可能就是：人生不過是一陣清風，來的時看無，去嘛是無蹤。人來世間不過像喘一個大氣，一夢躡（nih）久就欲轉去上帝遐，毋免siūnn計較。

宗教世界本來就是真濟咧講虛無的代誌，若無，宗教就無法度存在。咱佇遮咧嘻笑約伯，嘛會使講是咧嘻笑上帝。上帝不但佇天頂，伊來到凡間本來就是欲做予人嘻笑的對象，就是按呢，咱才發現著上帝的一面。這是一本真好的冊，值得咱認真去讀，但是讀的時毋免想過頭注重伊的細節。

我想欲講的是：雖然約伯留真濟予人嘻笑人生的所在，其中有一項重點在佇約伯的「受苦」。約伯就是受著遮爾濟苦難，才會chhōa咱入去人生的本質。約伯的苦難，實在是上帝的苦難。上帝用一面鏡來照約伯，其實是咧照上帝的面互咱看。人只有佇苦難中才有法度看著真正的上帝。上帝本來就是經過約伯的苦難這項代誌，來欲精煉人的精神kah靈魂，來精煉人對上帝的認識。

人佇苦難中會親像約伯按呢，詈罵（lé-mā）上帝、怨嘆上帝、悖逆（pōe-ge̍k）上帝，但是遮的代誌我想上帝攏知，上帝攏看在眼內。咱活佇這世間毋通因為苦難來驚上帝，來離開上帝，來對上帝絕望，因為上帝是永遠疼咱的爸母。