水kah火合一的生命
陳柏壽牧師
22/07/2022

細漢讀國校的時tiāⁿ tòe老爸經過梅山、阿里山、草嶺、樟湖，佇遐遠遠會看著玉山，老爸會kā阮講彼粒就是咱台灣上高的山，山尖猶有崁雪，有時猶會chhèng煙。到今，年紀雖大，心目中猶有彼粒帶著我對故鄉的懷念，kap彼粒光榮的山，伊親像一葩火佇遐咧chhōa台灣人的進路。

細漢以來人就教咱：「人著向高，水向下流」，「人著逆水行舟，不進者退」，向下流的叫做「下流」，無甚物好意思。人一生著一直向頂面peh，peh起高著閣再peh，毋通落蓑，毋通落第。這個向上peh的道理變做咱人生的通則，變做咱的哲理。

但是tòa 西仔圖(Seattle)二十年以來才發現一個現象：遮的人落雨的時無論大人囡仔，尤其是學生，常常佇雨中行路，無giâ雨傘，無穿雨衣，雨水對頭殼流到褲腳，伊嘛真自然，親像佇雨內洗禮，真自然。因為遮是雨城，雨對因來看是一種歡喜kah祝福的象徵。

咱的運命有時就是親像水咧流，順順仔流，流入去土腳，深入去池仔kah大湖，進入大海，一直到遠遠遠，水連天，天連水的水平線。佇hia就是kah上帝接近的所在。

主耶穌出來傳道理的第一話有講：「人著對『水』kah『聖神』來得著重頭生」（約翰3：5）。我想「聖神」的意思應該是「火」。

日本的職人鍊劍毋是干單靠火，嘛著靠水，有火kah有水才有法度將鐵鍊純變做鋼，純鋼才有法度變做利劍。

主耶穌意思是講人的靈魂欲精煉著用火kah水去精煉才有法度清氣，人的靈魂若會清氣才會當重頭生，才會當入上帝國。主耶穌講伊講遮的代誌毋是咧講地面上的代誌，是咧講天頂的代誌。意思是講天頂的代誌是用水kah火結連才有法度達成。

我想咱的人生就是欲探討人生「水」kah「 火」的關係：如何將這二項看是對立的因素合一配合，就是如何將「服從」kah「反抗」囥入去家己的理念kah行動，來做一個完整的人。

人生無法度無服從運命的支配，有真濟時陣運命會支配咱的人生，真像最近發生佇前任日本總理大臣安倍晉三忽然受著暗殺，完全毋是伊家己會當支配。咱的運命有時就是親像水咧流，順順仔流，流入去上帝遐，親像安倍先生按呢。

另外一面：人的生命就是著照主耶穌的吩咐，愛親像一扑火向頂面，一直，毋通hoa，親像古早摩西看著佇刺phè內面永遠的火共款，引咱進前。有一葩火咱的路，人活咧才有意義。

古早人講「水」「火」不相容，但是我想生命內面水kah火是一体共存的，咱的靈魂內面的水kah火是辯證的二面，ná親像觀仔嶺公園kah美國黃石公園內面水火同源的現象共款，欠一項就袂使。上帝安排咱的生命內面有水kah火共存，就是愛咱知咱生命內面本來就是應該有這兩項元素。咱信上帝的人著愛有信心，甚物時陣上帝愛咱行「水」的路或是行「火」的路，毋免躊躇，嘛毋免勉強，知影上帝疼惜伊的囝兒，伊一定留一條相好的路互咱，咱著愛有信心。