Pha網去另外彼邊!

April 4, 2022
kap 朋友分享

Pha網去另外彼邊!

陳柏壽牧師

30/03/2022

Kah其他福音書比,路加描寫主耶穌來招掠漁人做學生的故事上活跳有情(路加5:1-11)。伊招的學生是佇加利利海邊,學生大部份是討魚人,一世人靠討魚過日。耶穌來到位,看因攏咧討魚,叫因kā網pha去另外彼邊看覓。Hia-ê掠魚人kā伊講,特別是彼位chhōa頭的彼得,講:「耶穌!阮已經舞規日規瞑舞無半尾,阮一世人佇遮掠魚討食,一世人是靠這個漁網過日,你豈有影比阮卡ba̍t?」「好lah!照你的意思,阮tò來pha網去另外彼邊看覓?!」

真正想未到,歸網攏是魚,tîⁿ–tīⁿ-tīⁿ,魚濟到船giōng-giōng 欲沉–落-去。

彼得仆佇耶穌的腳前,共耶穌講:「主啊!請離開我,因為我是罪人!」

咱台灣人佇這款情形下,第一項心內會想、嘴會講的代誌,毋是去想著「我是罪人」這款代誌?!「罪人」這個觀念,對咱來講可能是十八天地外lah。

湖面佇這個深秋的季節,無論pha有魚pha無魚,一次pha落去,網pha入水,湖面的水一擺閣一擺回復平靜。掠魚人知影人生本成就是按呢,一次閣一次,一網閣一網,giú起來閣pha落去,規暗規日按呢繼續,翻翻覆覆,有魚無魚,嘛著認份。上帝互因的人生,kah咱共款,本來就是按呢,翻覆繼續落去。今仔日過了等 mîn-á-chài,等待閣再等待。因人生的一切就是靠這個漁網,漁網就是因人生的一切。

一直等到主耶穌開嘴講:「Pha落去另外彼邊看覓咧!」因雖然心猶存疑,但是嘛無法度,這只有是最後一步,無其他步lah!

Chím-má,真平靜的水面忽然起大波,魚仔忽然濟到跳起來水面,頭前的路起狂,想嘛想袂到,世間的代誌khài會變遐緊,光景khài會變遐快。掠魚的學生目睭起金,心肝起花,毋知欲按怎才好…

我回想著過去,人生行來到遮,有時嘛有真濟時陣進無步,退無路。但是嘛有有真濟時陣,我kā家己講:「Chhân-chhân-á網給pha過彼邊看覓咧!」

講湊拄坎(chhàu-tú-khám)實在真歹勢,實在真正是上帝咧開路。

Hiàng-tang-sî上帝叫我將網pha去日本,我全家伙攏搬搬去,佇遐,酸鹹苦chiáⁿ的日子卡濟,只有櫻花開的時陣,心情有卡開,一個人佇地下鐵的火車內流目屎。按呢閣過15年,上帝閣開嘴叫我將網pha去美國,佇hia,海閣較闊,水閣較深。全家初次去Manhattan,為著欲省錢,叫一份hamburger,分做3周,3人分做伙食,來到美國嘛是儉腸neh肚,生活毋敢討債。今囡仔攏大漢,隨人去lah。二个老歲仔,加拿大北爿吹來的冷風真利,棉被giú互ân,無法度期待囡仔來有孝,一人一家代,阮攏看會開,萬事交代天父上帝。

咱就是親像一位職業的討魚人,手內這個漁網毋知已經pha過幾千幾萬擺。總是佇咱這個人生的大海,咱bat躊躇過:閣落去欲按怎?欲pha正邊抑是pha倒邊,欲pha近水抑是深水?這網完全佇你手內,你完全家己決定閣落去彼步欲按怎行。我的人生欲繼續靠這個網欲kiâⁿ外久,pha外遠,閣落去叼位?

主耶穌講:「我欲互恁得著生命,而且得著閣較豐盛!(親像滿滿網的魚仔)」(約翰10:10)你豈敢接受?你豈真正敢pha網,pha離開你逐日習慣的環境,去到另外彼邊?

主耶穌並無要求咱傷濟,伊只有叫勇敢離開咱既成的環境kah習慣,Chhun的只有攏交代互伊,伊會為咱設法,魚仔家己會入網。

做一個基督徒有一項人生的特權,就是佇進無路退無步的時陣,猶有chhun最後一步,就是求叫上帝,求上帝不一定互我滿網到tīⁿ-tīⁿ的魚,濟少,上帝啊,互我有位通去,互我的某囝有溫飽,互我會當順順仔行–落-去就好。

kap 朋友分享

No Comments

Leave a Reply

Your email address will not be published. Required fields are marked *

Translate »
Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致