台灣个昨日今日

作者：王政友

（一）

若講起往過个日子

規本是鹹酸苦澀个文字

上無奈是散赤又擱是寒雨 冷–風–起

出身好親像是烟花女

鳥隻想欲歇睏揣無枝

忍耐咬嘴齒

無惜性命拍拼血汗滴

向望後代囝孫有志氣

揭頭行–出–去

（二）

真濟話想欲講予你

咱台灣个人原本有情義

逐家互相疼痛見面親像是 親–兄–弟

青年男女離鄉到都市

各行各業艱苦無推辭

一心佮一意

改變命運只有靠家己

真正創造台灣个傳奇

予人吐–嘴–舌

（三）

想袜到看看這當時

社會个演變予人心驚疑

人佮人个中間界成是失去 人–情–味

開喙合喙總是名佮利

你爭我鬥作為最堪悲

何必費心機

逐家攏是台灣好男兒

自由民主个光照萬里

譜寫一–首–詩

Tâi-oàn ê chō-ji̍t kin-jit

Chok-chiá：Ông Chèng-iú

Pe̍h-ōe-jī：Lōa Phek-liân

（一）

Nā kóng-khí óng-kè ê ji̍t-chí

Kui-pún sī kiâm-sng khó͘-siap ê bûn-jī

Siōng bô-nāi sī sàn-chhiah iū-koh-sī hân-hō͘ léng–hong–khí

Chhut-sin hó-chhin-chhiūⁿ sī ian-hoe-lú

Chiáu-chiah siūⁿ-beh hioh-khùn chhōe-bô ki

Jím-nāi kā chhúi-khí

Bô-sioh sèⁿ-miā phah-piàⁿ hoeh-kōaⁿ-tih

Ǹg-bāng āu-tāi kiáⁿ-sun ū chì-khì

Gia̍h-thâu kiâⁿ–chhut–khì

（二）

Chin-chē-ōe siūⁿ-beh kóng hō͘-lí

Lán Tâi-oân ê lâng goân-pún ū chêng-gī

Ta̍k-ke hō͘-siong thiàⁿ-thàng kìⁿ-bīn chhin-chhiūⁿ sī chhin–hiaⁿ–tī

Chheng-liân lâm-lú lî-hiong kàu to͘-chhī

Kok-hâng kok-gia̍p kan-khó͘ bô the-sì

It-sim kah it-ì

Kái-piàn miā-ūn chí-ū khò ka-kī

Chin-chiàⁿ chhòng-chō Tâi-oân ê thoân-kî

Hō͘-lâng thó͘–chhùi–chi̍h

（三）

Siūⁿ-beh kàu khoaⁿ-khoaⁿ chit-tong-sî

Siā-hōe ê ián-piàn hō͘-lâng sim kiaⁿ-gî

Lâng kap lâng ê tiong-kan kài-sêng sī sit-khì jîn–chêng–bī

Khui-chhùi ha̍p-chhùi chóng-sī miâ kap lī

Lí-cheng góa-tàu chok-ûi chòe kham-pi

Hô-pit hùi sim-ki

Ta̍k-ke lóng-sī Tâi-oân hó lâm-jî

Chū-iû bîn-chú ê kng chiò bān-lí

Phó͘-siá chi̍t–siú– si