「一去不回」
陳柏壽牧師

21/02/2022

— 記念奉獻半世紀青春互關島的陳光明醫師 —

陳醫師的親友決定這個月（2月）欲將咱所敬疼的陳醫師的寶體，海葬佇伊所服事近半世紀的南太平洋的叢林小島關島的所在，伊的身魂kah藍色的海頂的飛鳥做伙唱歌，也kah海中的魚仔做伙游泳迌（chhit-thô），伊kah上帝創造的大自然合一，相信伊有得著安歇。

陳醫師老爸佇苑裡教會做牧師40年，家丁有5 ê囝，生活非常散赤。考入新竹中學的時，伊時常佇圖書館過瞑，經過非常艱難的學生生活。後來進入台大醫學院精神kap神經科。

1964年8月23伊chhōa某囝，對台灣出發欲去約只有台北市2倍大的關島做醫生，心內猶久澹澹，遐是一個生疏毋捌人的所在，但是心內想講暫時滯（tòa）3年看覓，滯袂落去才閣轉來，無想到一去就是一世人無閣轉來，kah史懷哲醫生欲去非洲的時，kah伊藤邦幸醫生欲去印度尼波彌的時的心情共款，kah上帝命令亞伯拉罕向南去的時心情共款，一去不回頭。

欲去關島經過菲律濱，海關欲將伊身上所留唯一伊所愛的彼台舊的相機沒收，後來才知影伊無夾美金10箍佇內底做互海關人員的o͘-se。這是伊旅程拄著的外口世界的烏暗。真濟菲律濱醫生來關島只有等綠卡，綠卡提了就離開去美國。

雖然是按呢，進入關島以後才漸漸知影關島的原住民查莫落（Chamorro人）實在是一群單純、親切、好客的人民，因對四面八方搬來的移民，攏展開胸坎共因歡迎接納，當作因家己的人。對陳醫師一家人來講真正是新閣意外的歡喜的經驗。漸漸因開始接納關島做因家己的家，漸漸因才知影上帝備辦因來關島，做因人生頭前徛起的所在。

關島的原住民真濟人攏患著「肌肉委縮」kah「老人遲呆」（Parkinson）症，因到關島的時患病比率是世界第一，患者腳手委縮無力，非常痛苦。佇久長歲月中，陳醫師每日，一家一戶去往診，真正得著在地人的尊敬kah感謝，在地人家有喜慶或是教會節日，攏會邀請因來參加。關島患者雖然病情嚴重，但是一般來講攏是樂觀熱情好客，信奉天主。陳醫師娘江榮女bat做過濟南教會司琴kah聖歌隊指揮，但是佇關島伊嘛攏tòe陳醫師身邊看顧患者，嘛照顧因兩位年老的老母，任勞任怨。一直到今仔日先生娘猶毋甘離開伊心愛的關島。Kah伊的先生共款可以講伊也是一位叢林醫生。先生娘老爸參加台獨運動。

佇陳醫師的自傳「叢林醫師回憶錄」內面有寫著伊老爸長老教會牧師陳阿本牧師留互囡仔的一句話：「咱來世間毋是欲趁錢，是欲服事別人.」伊講伊就是欲盡心盡力為未開發弱勢的島民服務。

陳醫師晚年的時，逐日起來就是佇伊tòa的附近，將伊所上意愛的大王椰的籽，一粒一粒tīm落去土腳。希望伊所種的大王椰緊大欉，緊開花，將大王椰的花香，tòe著南國的風，吹轉來故鄉台灣。