福音的純全

9/14/14世台會Budapest, Hungary

馬太福音6：28,29

陳柏壽牧師

今年的父親節我一個美國教會的80 歲的老obasan 叫Marlene講一項伊懷念因老爸的故事。細漢的時住佇Washington州北旁一個真偏僻的莊腳，厝內閣真散。有一日伊入去因庄內的kam-á店，店內人真濟，伊看無人注意，冰箱開開，就提一枝枝仔冰soan出去。佇外口食枝仔冰的時，遠遠看著因爸爸對因厝的山坡行過來，伊的手猶giâ著hit支枝仔冰，但是心內有非常重的罪惡感，煞忽然間哇一聲哭出來。因爸爸隨時知影這個查某囝發生的代誌，抑無生氣，就提出25 sén khǹg 佇因查某囝手內，叫伊緊提去還kam-á店的頭家。這項代誌佇伊心內一世人咧懷念因爸爸。

我佇雲林縣古坑鄉旗盤厝莊旗山國民學校畢業。阮老爸佇hit間國民學校教冊。我會記佇5年hit年我做福利股長，歇睏的時著去福利社賣文具。有一擺人買2枝鉛筆，買鉛筆的錢我chū-án-ni té入去家己的橐袋仔（lak-tē-á）內就出去。這2枝鉛筆的錢，佇我的心內重ìⁿ-ìⁿ，一直無法度解決。

我佇東京食頭路的時，我bat寄一寡錢去旗山國民學校，我猶會記佇彼時的校長叫高銘林老師有寫一張批來kā我感謝，講伊替我買一個大的掛鐘，掛佇校門的正面。全學校學生攏想講咱學校有一個遮爾好的校友，奉獻一個鐘互因。但是無人知影這項真實的故事，一直到今仔日，我攏無給任何人講這項事，嘛毋敢給人講這項事。今仔日我世界台灣人大會中，給大家講，給上帝會失禮，求上帝赦免，因為這個陳柏壽牧師，bat給母校偷提過2枝鉛筆的錢。彼個時鐘猶佇遐咧振動，咧振動的時，攏咧講：陳柏壽你欠我2枝鉛筆的錢!

牧師做愈久，才知牧師毋是在gâu講話，牧師在-tī伊心內所追求的心靈的純情。50外冬啦，雲林縣古坑鄉棋盤村的學生及父老，猶咧想講：這個陳柏壽是一個好人，真有功德。毋知彼個時鐘是我咧贖罪的記號。

其實這2枝鉛筆的錢，互我的靈魂去一角，親像菜葉仔去互虫仔咬一角，真歹看，提去市仔賣袂出去。我知影我的靈魂內面，我毋是一個媠噹噹、金爍爍的人。但是啥人會知？

這款外口看袂著，法律無法度制裁，無人掠你會著，干單你家己知影，留佇靈魂深深的所在的罪，就是耶穌教咱著祈禱講：「赦免阮的罪，親像我抑赦免別人的罪」。伊咧講的罪就是這款罪。

40幾冬以來，對東京娶一個某4個囝，渡過太平洋去美國。一世人phaiⁿ這koāⁿ肉粽捾，經過社會生存競爭的風湧。Chím-má囡仔攏大漢結婚啦，厝內chhun  阮2 個人，才有法度娶牧師娘出來這個遠遠的匈牙利 (Hungary) )參加世台會。

我愈來愈無成牧師，因為愈毋敢講話，愈毋敢講大聲話。古早上帝派宣教師來台灣，嘛攏毋是gâu講話的人，毋是靠官勢軍隊咧宣教。親像基督教佇南美、非洲留的歹記錄。

來台灣的宣教師若毋是佇田哩互人潑屎，伊干單會曉給做田人應講：「遮的肥用來沃菜毋知欲goā-hó 咧！」佇北部的馬偕醫生一世人共人挽嘴齒，年老的時寫講：「我所疼的台灣啊，佇siⁿ-siⁿ soaiⁿ-soaiⁿ的竹bô͘仔腳，佇清氣溜溜溪水邊，我將我的青春攏總獻互你！」因一世人疼台灣，為台灣拖老命，娶台灣某，死嘛埋佇台灣。因恬恬仔來，嘛恬恬轉去。

講—著老馬偕醫生的青春佇台灣，佇hia，嘛留真濟浪漫的青春：咱佇hia：  iam-kok-ke，拍干樂、灌土猴、掠烏龍仔相咬、偷挽荔枝、偷at龍眼、偷挽木瓜、偷抽甘蔗，真正刺激的猴囝仔時代的青春。細漢的時風颱來，出去外口看樹仔椏（oe），互風掃到東倒西歪，看著有夠爽。我毋是講馬偕醫生有去kā人偷挽檨仔的青春，是講咱遐的青春的回憶，是咱大家共同的精神資產。

Hiang-tang-si因為烏名單袂當轉去思思念念的故鄉，刁工對東京坐飛過台灣的飛龍機。飛機經過咱的故鄉，對窗仔門目睭金金看，一直流目屎。Hip-siang-ki theh–leh一直hip。Hia-ê飛龍機窗仔門下面hip的故鄉的相片，ti̍h真濟講袂了的目屎。這就是咱5,60 年7,80年以來思思念念的故鄉。

因為台灣留互咱真濟青春時代的夢，無論離開外遠，無論時間經過外久，咱古早青春時代的過去，時常佇夢中出現。也因為台灣這個故鄉，我才去信基督教，閣去做牧師。我想基督教啟發咱對故鄉的懷念。

上帝佇台灣留一個真純情的福音，就是留互台灣人一片精神生活的淨土，互台灣人離開彼個封建假好的中國文化，離開彼個外表叫做“溫良恭儉讓”的彼位中國人，其實伊是外口掛羊皮的狐狸，內心真惡毒、橫逆、殘忍的中國人。有時我會祈禱上帝互伊較緊去。祈禱是弱者最後的武器。

因遮的宣教師攏是真純情的牧師，做我一生的模範，指導我的人生。因佇這世間無甚麼大的慾望，因只有將愛心及平安留互台灣。30外冬以來，我想咱大家攏仝款，心內只有一個“祈禱”，只有一個“希望”，只有一個人生的“目的”，就是：「上帝啊，求你互我有一個單純清氣的靈魂。我的靈魂內面若是有khì角歹看的所在，求你赦免！」

佇日本嘛是仝款。日本基督徒人口嘛只有1%，但是日本錢頂面的相有真濟基督徒的相。這張5,000箍的日本銀票就是咧記念一位真偉大的日本基督徒叫做Niitobe Inazo (新渡戶稻造)，請大家傳落去看。這位Niitobe san對Johns Hopkin大學畢業了，bat做日本駐國際聯盟的代表，做大學校長。卡重要的是伊39歲的時，一位39歲的少年人，受命做台灣糖廠的廠長，接任以後 ,台灣糖對50萬頓增加300萬頓。李登輝總統講伊是台灣農業的恩人。

Niitobe san及台灣的關係不但在-tī台灣糖廠, 伊有寫一本冊叫做「武士道」,這本冊原文的附名是「日本的靈魂」。「武士的靈魂」就是叫做「日本精神」。咱台灣人對古早以來就是繼承這款的武士精神, 現在叫做「台灣精神」。我詳細研究台灣精神, 其實及武士道精神是仝款的。

不但按呢，我認真讀Niitobe Inazo的「武士道」這本冊才知影, 武士道的精神及基督教的耶穌所講的福音是完全一致的。我這個發現本來想欲去申請專利，但是人這本冊已經佇市場親裁買toh買有，你去kā人展寶, 不過加去互人笑nā-tiāⁿ，不如兄姊家己去買來看。這本冊嘛請大家傳落去看。

武士道簡單講就是一個「純情的福音」。

武士講「人情義理」，咱台灣人嘛講人情義理，耶穌基督的福音嘛是講人情義理；

武士講「忠誠勇敢」，咱台灣人嘛講忠誠勇敢，耶穌基督的福音嘛是講忠誠勇敢；

武士講「尊重生命保護弱者」，咱台灣人嘛尊重生命保護弱者，耶穌基督的福音嘛是講尊重生命保護弱者；

武士「尊重女性」，咱台灣人嘛尊重女性，耶穌基督的福音嘛真尊重女性；

武士注重「精神及肉體的一致」，咱台灣人嘛真注重精神及肉體的一致，耶穌基督的福音嘛是講著注重精神及肉體的一致；

武士的生命觀是「毋驚死」，咱台灣人的生命觀嘛是毋驚死，主耶穌嘛是叫咱毋通驚死。

武士的精神可以對宮本武藏（Miyamoto Musashi）的武士記錄知影，武士毋是愛戰鬥，武士道毋是愛相刣，武士是被迫著的時才pùi刀出來。台灣人嘛是仝款，絕對毋是無因無端揣人冤家。但是人生有真濟時陣，為著義理的緣故，必須戰鬥。武士平常用禮貌相款待，但是一直到最後關頭，才會pūi刀出來，及敵人對決。

主耶穌嘛真濟擺吩咐咱著為著「義」來死。咱台灣人，尤其咱有台灣心的台灣人，時時著有這款的覺悟。佇戰鬥中，武士是愛和平，武士為著和平戰鬥，甚至武士會同情對方，知影對方嘛是人。但是「疼人」及「疼義理」，你欲揀佗位一旁？這是上帝互人，無法度逃閃的宿命。

咱對世界的天涯海角飛來此，及這群同思想、同心肝、同意志的台灣人做伙做朋友，佇這世間毋知猶閣有第二擺的機會？佛家講這是緣份，基督教講這是上帝安排的攝理。無論甚麼名詞攏好，咱真正著把握這個大家會當熟悉、講話談天的機會，做咱這世人的記念。

食愈濟歲，人生愈無祕密啦，甚麼心內話攏通講。

第一、咱毋免閣用頭腦啦，毋免閣想欲thàn大錢啦，毋免閣去讀博士學位啦，上帝自然會互咱的頭殼漸漸退化。有人煞袂記佇因某叫甚麼名，因為這幾年以來，干焦叫因某  ”Ooi!  捧茶來！”；

第二、毋免閣做過分的活動啦，年紀大自然四肢會退化，阮阿母講食100歲豈閣有法度擔100斤。咱的二枝腳若開始行路感覺腳真重，表示咱開始欲退化，就是叫咱著「收腳」的時啦。食飯著慢慢仔吞，毋通kéⁿ著，水著慢慢仔lim，毋通cha̍k著，行路著注意，毋通跋倒。

第三、毋通期待子孫仔來給咱有孝。咱這代可能就是最後一代：不但著有孝頂面，閣著有孝下面。但是咱毋通過頭期待因來給咱有孝，嘛毋通siū去chak-cho子孫仔，嘛盡量毋通chak-cho咱的親人朋友。若是會當，咱盡量著清清氣氣來，嘛家己清清氣氣轉去。

第四，錢著愛會曉開，若毋是破病到真無法度，絕對毋通分財產互子孫仔，留佇身邊khiam-khiam-a用，親像來參加世台會這款錢毋通儉。人生毋通舞到尾仔，「人佇天堂，錢佇銀行」。遮的佇銀行的錢，到尾若毋是去互政府充公，就是去互別人提了了，無彩你一世人儉腸咧肚。

最後一點：chím-má留佇咱的人生，只有是這粒「心肝」nā-tiāⁿ。基督教所講的三位一體：聖父、聖子、聖神，就是咧講咱這粒頭殼、咱這個心肝、及chhoā咱行路振動的四肢腳手，這叫做咱「人的三位一體」。

咱這世人最後所chhun的，只有這粒「心肝」啦，就是只有chhun主耶穌這粒心肝啦。這粒心肝就是武士所講的「人情義理」啦。咱毋通袂記別人的人情義理，爸母，親人，朋友的人情及義理；嘛毋通袂記晟咱大漢彼個台灣故鄉，彼塊土地的人情及義理，咱著愛報達。這就是基督教福音的純情。bat耶穌所講的人情義理，才是完全的人生。

咱這粒心肝，佇咱人生的最後，就是干單欲揣一個心靈的純情及平安的所在。kàu-chia來，一切攏毋免做互人看啦，一切只有做互天公上帝看就好啦。親像台灣山頂的百合花，恬恬佇遐開，無人探頭，無人問，但是開到真美麗，開-à-開，開到媠噹噹。

今仔日猶會振動，猶會行路，著繼續為台灣出聲，為台灣振動，毋通講：「今後只有靠恁遮的『太陽花』的少年仔啦！」毋通講我簽支票互「太陽花」就萬事OK啦。咱家己嘛著徛起來，家己嘛著行動。chím-má無欲行動，後擺就會怨嘆。老–的，少年的，查埔的，查某的，攏做伙來，逐日開花，逐日行動，逐日向前行，毋通停步，做互上帝看。

總講一句，咱頭殼愛清楚，心肝愛清氣。萬事做會到的，著出手去做；做未到的，著會曉交代互天公上帝。因為咱的上帝一定行佇咱的頭前，嘛徛佇咱的後旁，保護咱、照顧咱，一直到有一日咱去伊hia及伊見面，佇hia，及咱遮的老朋友閣見面的時，咱嘛會通做伙講：”Hiang-tang-si-a咱嘛bat為著台灣拍拚過啦！”

祈禱：

「主耶穌啊，你是上帝降世的人，也是阮世間眾人的上帝，阮無論生佇叼位，生做甚麼款的人，攏是上帝手中的寶貝。阮的人生不過親像一蕊花，真緊就謝，真緊就親像風飛去。但是阮愛開著親像台灣的百合，開的時認真開，將阮的生命攏總開，開到盡磅，開到上媠，開互上帝佇天頂看，毋免煩惱家己的名利，歡歡喜喜來過日，一直到阮轉去你hia的日子。阮按呢給你祈禱，攏是奉靠世間的救主耶穌基督的聖名。阿們。」