看袂著月娘的另外彼邊
陳柏壽牧師
20/03/2021

阿公出山的時因為我是大孫，著扶佇棺材邊tòe行到庄外的墓仔地，天氣真清，棺材後面tòe一群庄頭庄尾來的婦人人（hàu-lâm），排一列，長長長，其中有一個班長喝開始「哭！」大家toh做伙出聲大聲哭，嘴攏oân-nā哭oân-nā唸，唸甚麼話我聽無啥有，若準是講「你thài會hia早去lah！」。入墓了，班長喝停，大家就攏停，無閣哭。我佇長榮大學教冊時，tòa佇學校宿舍，時時聽著歸仁庄裡有人過身的時，悲哀的鼓吹kah人的哭聲，通瞑攏無停。

我做牧師以前攏想講這款哭墓方式無真好，攏是有哭無目屎，無心。但是最近我的看法無啥仝款。古早以來各民族各宗教攏有哭墓隊的記載。中國的秦始王不但有真大群的哭墓隊，甚至將王妃女婢兵馬軍隊動物攏做伙埋埋（tâi）入去。猶太人嘛是仝款，耶利米9：17嘛有記載「著招歸群哭墓的婦人人」出來哭墓，是一種宗教祭典。人間的哭墓不但是對死者的悲傷，也是對世間的無情kah無常的反抗。

咱對月娘既成的印象kah日頭無仝，日形是一成不變，但是月娘常常予人詩人化、羅漫蒂克化，因為月娘每時咧變形，有新月、上弦月、滿月、下弦月、殘月等等，但是通常咱無注意的一點是月娘永遠向地球的一邊，每個月、每一年攏固定維持固定的一面，向地球咧se̍h。咱人所看著的月娘的一面永遠是同一面，就是月娘向地球彼面，月娘的另外彼面永遠藏佇後面，世間人無人知影另外彼邊烏暗的月娘究竟是生做甚麼款？

聖經中記載悲傷艱苦kah目屎較濟，歡喜kah笑面較少。主耶穌一世人kap破病人、艱苦人、死失、破相、著鬼、想氣、罪人、放蕩囝等等做伙。當伊醫好去互魔神仔khip著的囡仔的時，囡仔的老爸拜佇耶穌面前講：「主啊，我是罪人，願你赦免我！」（馬可9：24）。主耶穌將這世間所有的艱苦病疼死失、目屎，攏總給因khoàn-khoán 咧、清清咧、綣綣咧、包包咧，攏總囥落去月娘的另外彼邊安靜的所在，收留佇hia。

人欲瞭解上帝無簡單，印度Calcutta的聖女Mother Teresa嘛講：「我愈揣上帝，愈揣無上帝。我kah上帝中間有一個空白kah深的烏暗的空間。」實在上帝嘛是活佇烏暗的所在，佇月娘的另外彼邊。佇彼所在的上帝，最歹予人瞭解。上帝欲予人瞭解的部分，不過是上帝賜人的「恩典」。

有人講月娘kah上帝仝款有二個面，上帝有憐憫慈悲kah正義的二面。月娘嘛是：月娘向咱的彼面，就是光面、慈善、詩人歡喜唱歌的一面；月娘有另外彼面，嘛是上帝的創造，就是嚴肅、安靜、正義無妥協的彼面。咱人人生結束的時就是欲轉去彼個安靜、嚴肅的上帝的正義彼面。月娘烏暗的彼面，不但代表上帝正義的一面，嘛是代表上帝的悲情，代表上帝承擔世間一切的艱苦、上帝的疼kah受苦的一面，上帝將彼面藏佇烏暗的所在。

世間人較需要的就是上帝賞賜咱有一個烏暗的所在，因為he代表上帝的恩典。主耶穌講：「恁所有勞苦擔重擔的人著來我chia，我欲互恁得著安歇。」（馬太11：28），保羅嘛講咱著將一切勞苦、掛慮、重擔一盡交代互上帝，上帝會將chia的攏總囥入去彼個「永古隱藏不言的奧祕」的所在（羅馬16:5）來堅固咱的心，彼個所在就是咱看袂著的月娘後面的烏暗面，佇hia無日頭赤焱焱。彼所在應該就是咱的靈魂安歇kah平安的所在，是上帝為咱備辦的，上帝將世間所有死失、艱苦收留佇hia，佇hia咱嘛會當kah地球咱的親人接近。咱人看若準是世間否定不美的一部分，實在是完美的上帝的一部分。烏暗邊的月娘也是上帝創造的完美的一部分，咱也著感謝伊。

印度詩人泰戈爾有講：「死是生命的一部分」，「醜是不完全的美」，「惡是不完全的善」。伊的詩是按呢寫：

「這是一場夢，一切事物攏散漫佇hia咧緊壓著我。當我醒來，我將見著因攏已經聚集佇上帝你hia。按呢，我便得著自由lah！」（詩152）

「生命的黃昏親像一個窗仔，窗內有點著一pha燈，內面有一個人咧等待。」（詩#183）

「太陽向西方落去的時，伊早起的月娘已經靜靜佇東方，徛佇伊的面前。」（詩#205）