無償的愛

陳柏壽牧師

05/02/2021

我自細漢到大漢生活佇阮阿公的溪邊厝莊（chím-á叫東和），離開斗六街仔約4公里，每日我攏騎鐵馬去斗中讀冊，每日攏經過半路阿公起的「五里亭」。每早阮阿媽就擔二壺滾水去囥（khǹg）佇遐。古坑附近各庄頭的人欲去斗六，攏會經過五里亭，佇hia歇睏、停步、lim茶。後來有人佇亭仔內chhāi一仙土地公，過路人經過嘛攏順續拜拜。這個所在就是親像基督教教會，欲互人停步、歇睏、lim茶，毋免講甚麼大道理。我想這就是最理想的教會，真正是神性kap人性合一的所在。

民視的「台灣演義」有報導百外年前已經有百外位台灣人冒險渡海離開台灣島，去130里外離台灣最近的琉球八重山列島的石垣島（Ishigakijima）去拓荒。因對台灣chah去水稻、鳳梨，閣較重要的就是將台灣水牛搬過去。水牛真(gâu)犁田，是人工的3、4倍成績。在地的日本人毋捌看過水牛，真尊敬水牛。水牛縛佇大樹腳，日本人就去水牛面前拜拜，因為因認為水牛非常偉大。佇這個真純情的小島，kap遮的純情的人民，水牛崇拜嘛是因心靈的滿足。宗教、自然kap生活結連做伙，是一款真自然的信仰形態。佇台灣這種現象嘛時時會看著。

回想過去青春少年時代佇台灣經過的悽慘的失戀的歷史，是我生命中3擺陷入深谷底。每一擺攏互我感覺生命已經結束，無想欲閣活落去。但是進入熟年以後，回想起來，彼時陣實在毋是「失戀」，實在是咧「單戀」「單相思」，因為根本人無欲chha̍p咱，人連看咱toh無欲看，人看著我就越頭，西洋講這叫做「伯拉圖」（Platonic）式的戀愛。Plato認為雖然對方無反應，雖然不過是單方面的愛，嘛是一種愛，嘛是一種真正常真可貴的愛情，是人生命的一部分。

但是過去這段愛情的故事，雖然每擺攏是失敗，但是攏發生佇我生長大漢的故鄉。佇外口流浪半世紀的我，失戀soa̍h變做我心靈資產的一部分。遐的離開我棄sa̍t我的「心所愛的人」，因心內可能已經無我的存在，但是因佇我的靈魂內面，猶佔我真大的部分，時常佇我夢中轉來、擴散，佇故鄉的山路，佇落西北雨的溪仔口，佇校園內的鳳凰花的樹仔腳，時時會出現因的形影。可能就是因的存在，上帝予我愈袂忘記我的故鄉。我甲大家仝款，有患著思鄉症：已經70外年lah，已經娶（chhōa）某結婚生囝lah，帶外口的日子已經比帶佇生我的故鄉較久，但是故鄉情結，愈來愈嚴重。甚麼人有法度醫我的失戀失鄉的病啊？

故鄉的夢不過親像白雲佇天頂咧飛，永遠giú袂著、掠袂著。日本電影「男人命苦」（男はつらいよ）男主角tora san （寅）一世人毋捌娶某，毋是伊毋敢去愛別人，是因為若是有人開始認真欲愛伊的時，伊就離開，因為伊一生就是欲追求一個「無償的愛」，一直追求一個無條件的愛，供給別人的愛。伊一生只有為別人想、為別人好，為別人祈禱。伊祈禱的本質毋是在佇伊的「結果」，是在佇伊祈禱的「過程」中，去想著對方的形影，會當產生甲對方自由共生的力量，是真實kap幸福的瞬間。對偝（phāiⁿ）著人生的重擔的人來講，是真正生命力量的來源。

伊一直毋敢勇敢接受別人的愛。別人供給伊的愛，親像天頂咧飛。伊認為真正的愛情應該是為著對方的圓滿甲幸福來祈禱，這種愛是超越一般男女通常的愛的意念，是堅持一種無賞的愛的心願。但是這種愛嘛是伊的運命中悲傷的源頭；也因為是這種的愛，互伊會當接受各種的人，嘛互各種的人會接受伊。伊的愛情甲生命結做伙。

伊的人生觀起源是受著因莊里廟公（御前樣gozensama）笠智眾的影響。廟公對全莊人的態度，不分男女老幼好額散，一視同仁，無分聖俗，日常生活甲宗教信仰完全結合，所以伊得著全莊的敬愛。全莊發生任何代誌，甚至雞仔狗仔相拍的代誌，伊攏知影，攏有法度解決。伊逐日用掃梳（sàu-se）掃廟口埕。這可能是日本式廟寺宗教的典型。

寅san的小妹sakura san佇小巷經營的粉圓仔店，是這個大兄各地流浪以後，se̍h到尾，一定會轉來的所在。這個小粉圓仔店不但供應肉體需要，更加是人間精神生活的泉源，不但寅，也是全莊散赤人自然依倚的精神中心。因為這個小妹的店的存在，寅去到佗位流浪，心內攏有一個會當轉來的所在。轉來這間厝，互伊心靈再生，再出發，繼續閣出去流浪。

Tora san故事全體大部份發生佇邊沿鄉村，毋是發生佇中心地區的東京。這是表示世情的演變不止只有發生在社會的心臟。邊沿地區的人民、文化、習慣、信仰形態，不但影響著中心地區，顛倒因已經發展出新的地方信仰甲文明，新的地方文明並無輸市中心的重要性。基督教是對人種混雜的加利利庄社發芽生長，毋是對「聖城」的耶路撒冷產生的。「上帝祝福你」甲「南無阿彌佗彿」結連做伙，在地的「山岳信仰」甲西方傳來的「西方淨土」（天國）結連做伙。邊沿地區的生活形態，已經變做日本文化的一部分，這是寅san的故事欲傳達的信息。咱來看地小的台灣，城鄉的結構甲牽連，閣較應該思考這個問題，互咱台灣會變做世間人人欣慕的所在。

京都同志社大學神學院有將寅san 40外集電影變做研究基督教倫理生活教材，因為因認為伊的人生態度有符合耶穌基督的教示，至少有符合日本人的人生觀的一部分。保羅形容「人」的定義真簡單，伊講「人就是會生活、會振動、閣有人格」的動物」（使徒17：28），這個「人格」包括男女兩性全體，有包括兩性愛情互相包容照顧的部分，才是人。

基督教是叫咱做完全的「人」。基督教叫咱去全世界，去生湠、生長、開發。基督教毋是叫咱講「世界大同」的高言，是叫咱去「世界大不同」的所在去奮鬥拍拚，佇hia咱欲揣著上帝創造真寶貝的，有共同人性的「愛」的所在，就是主耶穌所講的，全人類所追求的愛，就是無求回報無補償的愛（路6：32）。彼就是未來世界的上帝國。