綠色的永恆

陳柏壽牧師

12/06/2021

Chím-má六月初西北部西雅圖才開始感覺著春風來到。今仔日已經看著二擺蜂鳥飛來阮兜吸花蜜。第一擺聽著四秀仔佇土腳吱吱叫，吱真大聲，kah杜猴、烏龍仔合奏自然合音的交響樂，南洋鯽仔佇魚池仔面吸空氣，互我這個南國出身的台灣囡仔，kimochi一直giang起來，阿公佇溪邊厝庄的厝頭前the-仔頭（園仔），chím-má應該是柑仔、檸檬、暹邏文旦咧開花，sabojira（人參果）開始咧結子的時陣。因攏喚醒我靈魂內面上深的所在永遠的故鄉的形影。

Tòa美國久了嘛tùi著美國的大自然心情變化。2004年佇New York時陣發現公園內攏是蟬（siân）的聲。今年美國東部又是發現所有的蟬又閣轉來lah，原來蟬的幼虫藏入去土腳，17年是一個週期，伊會閣轉來，今年是2021年是因閣轉來土頂的時陣，所以chím-má美國東部公園內面，攏是蟬的世界，真鬧熱。上帝互蟬的kiáⁿ鑽入土腳約3公尺，親像花藏佇土腳瓣準備欲開，但是著經過17年，伊才欲起來看太陽，起來地面開花，下擺因欲閣轉來就是2038年！生物界有因生命的週期，非常奇妙，互咱知影世間萬物攏有伊的定時。我連咧睏toh有聽著蟬teh 叫的聲，互人加真好睏。

咱台灣人猶無真注意地球溫暖化的問題，西方的智識界已經真普遍注意閣行動。瑞典的一位十幾歲查某囝仔Greta Thunberg佇聯合國全體代表面前演講，伊講：「恁遮–的大人實在毋知死活！一日到暗kan-na講經濟，kan-na欲趁錢，恁偷提阮的青春kah希望，用恁空洞的話語，將阮細漢時陣的幻夢消滅，漸漸將咱這粒地球欲chhōa近絕滅的邊緣。」 遐–的坐佇chia聽的大人，因的心內攏聽有，攏知影伊講的真有道理；但是因一踏出門，心肝就去互錢淹過。濟少若是有講，就會去想，有想，就會有行動。

向當時高一，一個人用探險的心，茫茫來到教會門口，揀一個靠近大門的椅仔，坐佇hia聽人講道。後來有一個大姊頭送我一個白金色的十字架，我mo̍͘h佇手心，心內非常歡喜，按呢經過幾仔年，深信我這隻老鼠入去教會毋免驚，因為教會無貓仔。這個十字架真正支持我天真瀾漫青春生涯。後來結婚了後，我的十字架煞變做黑色，因為日kah瞑攏佇世間趁錢的機器絞輾轉，世間實在無比趁錢卡重要。按呢經過十外冬。後來去神學院做牧師40冬，我的十字架煞變紅色，因為主耶穌的救恩是紅色的血，紅色的十字架變做我人生指標。但是自從退休轉來西雅圖十外年，我煞發現我的主耶穌的十字架變做是綠色，親像我的故鄉的蕃薯園kah甘蔗園，一遍綠海，風若吹來，一湧一湧，親像海水。

我發現綠色是世間生物的共通色，是人類生存的倚靠，世間見若是人攏只有靠綠來生存。當初上帝佇伊甸樂園，就交代咱人類著好好「保存照顧」這個土地（創世記2：15），但是人一直踳踏、加毒、破壞咱跤底的這塊土地。真濟宗教人極加是強調「社會正義」，講按呢表示因有遵照上帝的教示；但是上帝的教示猶有另外一邊叫做「自然正義」，咱若是無疼惜跤底這塊土地，若是想講趁錢會當彌補對自然的破壞，就是犯罪，是犯真重的罪，有一日上帝一定會給咱刑罰，因為自然袂閣轉來。有錢人責任罪愈重，因為愈有錢，愈無行動。

一年四季的巔峰是夏天，夏天是地上所有生命活動的中心，所有綠色的生命攏活佇夏天。但是夏天並無永遠佇咧，真緊就會消失。夏天「永遠咧變遷」，「永恆」在佇「暫時」，這就是世間的逆理。咱的生命嘛是按呢。真濟中國教科書攏教咱講咱人著追求「留芳萬世」。顛倒反，我想咱人著學習夏天的精神，就是綠色的世界的精神：當綠來世間的時，緊緊來，烘烘烈烈、熱滾滾做伙來。但是咱毋通期待綠留佇世間外久，伊緊緊來，嘛會緊緊轉。生命的意義我想就是親像一陣夏天的清風，予人想著就心滿意足，給人非常清爽的懷念。啊，綠的世界，請你緊轉來！嘛請你毋通遐爾緊去！請你帶綠色的十字架來到新天新地的世界。