一個散形的人

陳柏壽牧師

01/03/2021

阮教會內底各色人攏有，親像kap張__ê講話二句話未煞，話題隨轉去台中一中，一中是伊永遠的驕傲，親像全世界只有有台中一中的款；人若kap黃__ê講話，話題一定轉去台大，講著伊按怎解剖屍體的英雄事蹟，目睭toh起大粒，聲嗽toh起大聲；美惠姊每一擺potluck一定煮伊彼盤鹹菜豬肚，但是我毋知有幾個人去géⁿ彼盤菜；阿美仔已經幾仔年攏捧一盤青菜沙拉；班長最愛講的是按怎刣蛇，蛇膽配燒酒吞落去，伊講按呢人才會有膽；劉sàn講著因竹山的筍仔就講未煞，kap璨哥講著因關廟的鳳梨的時仝款；林先生開嘴合嘴就是愛講台獨，tiàⁿ tiàⁿ kap 人對沖，會使講咱教會內生龍活虎攏有，大家攏表現因家己的面形，真散形，無掩歁 （am-khám），歸盤魚脯仔攏是頭，但是這就是阮教會的特色，kap別人無仝。但是每擺若有代誌發生，大家toh攏結結做伙，同心合一一致對外，無人敢來咱教會聳鬚（chhàng-chhiu）。這是一群活跳跳的人、活跳跳的教會。

我牧師做久，變做一位真「有形」、注重外表，注重穿插、裝飾、外貌、規矩，講話嘛著細膩，袂使尚大聲、倉磅，這種牧師的形像漸漸變做會友對牧師的要求，嘛漸漸變做牧師塑造家己的動機。若無，會去予人笑。

家己回想這世人家己塑造的標準「牧師形」，才感覺是我一世人的失敗，因為我攏毋捌佇眾人頭前跳出來用單純的面形顯出真正的我。宗教真正塑造一個人的面殼，無論甚麼宗教，攏會要求人人用因的教條kap教義來互相接接（chih-chiap）kap交通，才有法度發揮因宗教的特色。

有人講我佇意識上想欲破害這個既成的牧師的形像，就是破格，是社會上無四配、無四正的想法。這我有同意，因為人既然生活佇人的社會內面，著服從這個社會的規範，叫做「功能社會」（functional society），人人攏扮演一個「功能」，社會才有法度運行。

但是自從開始牧會以來，佇我心內深的所在，不斷有一個聲咧給我講，著去破壞去，去除這種社會功能kap限制，因為遮的社會規範實在有真濟部分，咧遮崁真正的人性。人會當破壞遮的束縛kap限制，就漸漸較會揣著卡純全的道理。主耶穌講：你著認捌真理，因為真理欲互你得自由（約8：32），對我來講，嘛會使講：真理互我變做一個「自由的人」。自由人有時會予人看做怪人。

主耶穌賞賜咱的自由，並毋是無條件的白白的賞賜，嘛著經過咱家己的努力追求，經過咱家己肉體kap精神的苦鍊，才有法度得著的。主耶穌賞賜世間的攝理是「自由」，這個「自由」是做一個人，特別是做一個基督徒，一生最大、最後的功課，是咱生命的目標：這個目標是欲解脫咱所有的束縛kap纏絆，互咱會當進入較高的世界。咱若保持用散形的目睭看世間，並毋是表示咱卡愚戇，顛倒是表示咱較有生活的智慧，表示咱頭前的路會真開朗，天氣會真清，阻擋的代誌會真減少。主耶穌來世間的時，只有kap散赤人、破相、外邦人、罪人，kap 人看無起的人、怪人做伙。最重要的，伊毋捌kap大官貴人，穿到真漂撇的人，講話真有勢頭的人做伙。主耶穌的全人生攏kap hia-ê 無四配、人想講是破格的人做伙生活。主耶穌佇伊的時代予人當作怪人，若是生活佇今仔日，我想伊嘛會予人當作怪人。歷史上咧支持教會行正路的人，較濟攏嘛是遮的怪人：亞伯拉罕、拉合、以利亞、耶利米、末代拉的馬利亞等等。遮的人的一生較濟毋是掛慮別人按怎看因，是因全神全意掛慮上帝按怎看因。

我想主耶穌所講：伊來世間欲予人得著更「豐盛」的生命（約10：10）我想伊的意思就是叫人毋通掛慮傷濟，今仔日日頭出來欲行去to̍h位去，看風吹向to̍h一邊，向彼邊行就對lah！毋免想傷濟。我想起過去的一生的路，較濟毋是我teh做主，較濟是順著上帝的風咧行，順上帝的安排，去行我的路。我想這就是自由人的人生觀。

主耶穌若是咱信仰的典型，kap咱chiah-ē宗教人，咱所自認是信仰的典型的人，著去想著主耶穌，咱就會得著完全顛倒反的覺悟。今，佇我有限的chhun的人生，唯一的使命kap工程，就是來去褪去我的宗教人的外衫kap假面，恢復做一位普通、自然閣健康的人。雖然有時會予人看做一個散形的人。