對一個浮佇尼羅河水的紅嬰仔講起

陳柏壽牧師

07/08/2020

咱來世間拄著風湧真齊，親像詩人按呢講，人生就是親像欲拄著「大湧若山蓋落來，大風猖狂若吼獅。」（台語聖詩251首）我bat去過埃及的尼羅河，看著河面真闊親像海。人講大河內不但有真濟菅芒野草，水內閣有兇惡的鯃魚（gô͘-hî海豚），隨時準備欲食人。

希伯來人的查某囝，就是摩西的老母，欲生囝的時陣，埃及王法老有命令講，若是看著紅嬰仔是查甫的，著給伊殺死。摩西的老母生囝了後，藏佇身邊已經三個月，無法度閣藏啦，因為法老的命令真嚴，最後孤不二將，就用尼羅河邊的蘆葦，澆石油佮瀝青（kamaka），做一個會當擋水的箱仔，將這個三個月的紅嬰仔，放落去尼羅河的大水。

這真正是一個斷腸的時陣，目睭金金看著家己生的囝，隨著兇惡的尼羅的大水浮去。佮hiàng-tang-sî唐山老母送囝坐竹排仔浮入黑水溝，一步三回頭，十去九不回，去到台灣生死不明的一景，完全仝款。

佇歷史上上帝咧救人，咧改換歷史，就是佇世間攏看無希望，攏無出路的時陣，人的生命微微罔罔，親像一氣絲仔就欲斷氣的時，上帝才出現，歷史才改變。這是基督教的攝理。上帝派法老的查某囝來到尼羅河邊洗浴，忽然間看著河頂面浮來一個紅嬰仔，紅嬰仔佇蘆葦做的箱仔內面，咧háu！上帝動著法老的查某囝的愛心，toh將紅嬰仔khio̍h轉來，閣叫一個希伯來的奶母，chhàu-tú-khám伊就是摩西的生母，來給伊育（io）。法老的查某囝認摩西做囝，給伊呼名「摩西」，意思是講「伊是對水中抾（khioh）轉來的囝」。台灣人嘛是仝款，是對烏水溝大海頂抾轉來的囡仔。

摩西有二個老母：一個是埃及人晟伊大漢的「養母」；另外一個是生伊到3個月為止，給囝放水流，一世人毋捌有印象的給伊飼奶的「生母」。彼個埃及人的養母，不但好好栽培、訓練、教養摩西，互伊變做全埃及的勇士，閣互伊有地位、權力kap自由。雖然是按呢，佇摩西心靈的深層，一直留著伊希伯來的「根性」，伊永遠無離開伊的老母的根，永遠會記佇伊是「外口人」。佇伊一生涯中，雖然有享受埃及養母的權勢，但是伊一直屬佇伊家己生母的民族，伊時時看著伊的民族哀哭的目屎。摩西的權勢kap地位的後面，就是偝著伊整個民族做奴隸的重擔。

有一擺摩西看著二個埃及人欺負希伯來人，伊看四邊無人的時，伊就起手pha̍h彼二位埃及人。聖經講摩西毋是一位真傑出的領袖，講伊是一位真平常的人，但是伊起性pha̍h死人嘛是會。上帝佇著火的刺帕中出現互伊看的時，摩西只有叫百姓著安靜、安心聽候上帝。但是伊本人嘛一直問上帝，我是甚麼人，太有法度承擔這項重任？(出埃及記3：21；4：10；6：30）伊是一位真謙卑的人。

希伯來人一直到摩西chhōa因出埃及，總共做人的奴隸400年。摩西chhōa差不多60萬男女老幼，流浪佇西奈沙漠40年久，每日食天頂落來的嗎哪為生。

台灣人對黑水溝過台灣，受著外來的黑官貪官殖民官的壓迫、欺負、剝削，就是kap佇埃及的希伯來人仝款，做台灣的農奴，差不多嘛做400冬久。台灣人受台灣的「法老」的壓迫久長的歷史中間，當然有偌濟人無顧家己生命，勇敢衝出去反抗的人，但是遮的人的名攏埋佇土底，咱無法度知影因的名字。主因是咱到今猶毋捌出一個台灣的摩西來chhōa咱出頭天。

希伯來人經過平靜的奴隸生活，本來想講按呢做奴隸嘛袂䆀（bē-bái），日子一日一日過，日日唱奴隸的歌，食奴隸的飯，嘛是袂䆀。一直到目睭前出現著紅海，後面閣有法老的追兵的時，才忽然覺悟著生命的現實，進無路，退無步。才知影唯一的一條出路，就是向前衝，拚落去lah！真濟台灣人到今仔日可能嘛是想：住在佇這塊土地，繼續做奴隸，mài ting-tāng，「不動不如一靜」豈毋是卡好呢？

摩西互上帝對河中giú出來，上帝一定嘛欲佇大風大湧中，giú出一位台灣人的摩西。佇大風大水中上帝叫摩西將拐仔chha̍k（鑿）入去土腳，海水就分開，新的希望kah生命的水泉就會湧出來。

世界人看咱台灣親像孤兒，給咱設真濟陷阱kap障礙。但是台灣人毋是孤兒，是世界主人，咱毋通恬恬坐teh等，咱著行出去，行到全世界，出紅海，進入新天地。彭明敏先生的近作「對『自救』到『自覺』」就是講咱拄著大燒山大洪水時陣，著發揮台灣人剛毅豪邁的精神繼續拍拚。世界猶有3/4的國家比咱台灣較小，咱著愛有自信、自愛、自重、自尊堅持落去，對頭開始來建設咱的國家。