舊約人物的信仰模式：反抗

陳柏壽牧師

04/29/2020

對創世記開始人類的先祖夫婦就先反抗上帝，叫因這叢果子袂使食，因偏偏阿去挽來食。有人講對上帝的信仰會沖破人的理性及科學，宗教信仰及人的理性不可並存，上帝的啟示及人的本性本來就不可一致。聖經不准人獨立思考及懷疑。

但是猶太人獨立的思考及行動，處處可見：阿伯拉罕、以撒、雅各、約瑟的兄弟、摩西、亞倫、基甸、撒母耳、以及各先知親像以利阿、以利沙，以及流浪時期的但以理、莫底改、以斯帖。希伯來人的先知書內面，幾乎所有先知攏有及上帝khau-chháu及爭辯的記錄，包掛以賽亞、耶利米、以西結、哈巴谷、約拿、約伯。咱會使講會及上帝爭辯的，才是先知。遮的先知面對權威的時，違背命令及律法，做因的代誌，講因的話。

遮的人的反抗行為，完全毋是對頂面落來的指示，完全是出佇因家己的自由意志及決定。埃及的法老及因的使女看著尼羅河中希伯來人放的嬰孩浮佇河中，違反法老王的命令將嬰孩救起來，才留摩西的活命，摩西後來引chhōa以色列人出埃及。上帝呼召摩西去chhōa以色列人出埃及的時，摩西應上帝講的第一句話是講：上帝啊，我是甚麼腳數，你竟然叫我？（出3：11）摩西無處罰百姓做金牛拜金牛，應該是背逆上帝的命令，上帝猶繼續支持摩西。亞倫無照命令去執行燒祭的禮典，上帝嘛是繼續支持這種違反命令的行為。上帝吩咐約拿往東，伊chhoàn-chhoàn往西，結果去互大鯨魚吞入肚腹內，走入去墓仔埔。

阿伯拉罕佇上帝欲毀滅所多瑪城的時，向上帝求，求上帝回心轉意。大衛對上帝處死伊的人心真不平。仝款的代誌佇以賽阿、耶利米、以西結、哈巴谷、約拿、約伯攏講：chiah-ē人第一個反應上帝的話的時，就是反抗。該隱照上帝的話去外面打獵，阿伯無照上帝的話去園做田，但是上帝竟然愛彼個毋聽話的阿伯。約伯受真濟苦難，最後猶及上帝辯論，叫上帝離開伊，放伊一人孤單留生就好（約伯42：5,6原文）。

雅各及上帝的使者sio-ián（相偃），竟然互上帝呵咾講：對今以後你無叫做雅各，你著叫做「以色列」，因為你 “有法度及上帝相偃，閣偃贏”。上帝的愛及對人的憐憫就是佇遮顯明。我佇協和神學院讀冊的時時常著去隔壁的猶太神學院選修學分，互我印象上深的一句學校的Proverb（銘言）就是：「咱及人及上帝相偃，攏欲贏！」。這可能這就是猶太神學的特點及精神。

前現代的思想及神學，包括希伯來及希臘哲學最大的特點，就是在佇因的思想基礎是建立在「人」做中心：因不斷追求人本身的問題，不斷勇敢產生疑問，不斷勇敢欲尋求答案。中國人的傳統思想雖然有這種人本傾向，但是無親像希伯來思想的明顯及闡明。

有記者問蔡英文總統，伊回答講：「古早國民黨時代咱豈毋是攏選擇服從！？」伊的意思是講「服從」是一種常態，「反抗」是一種「反態」。這豈毋是世間所有執政的人一貫對人民的期待及苛求呢？咱現代台灣人的理性及良心是毋是著順從這款有權者的要求呢？