「我毋知！」

約翰9：18-41

陳柏壽牧師

03/11/2020

耶穌佇約翰福音內面，醫好彼個生來就青瞑人的故事。約翰記載三擺講：「我毋知！」第一擺法利賽人問青瞑閣好起來的人，彼個叫做耶穌的人，伊chím-má佇toah？伊講：「我毋知！」第二擺法利賽人問伊爸母「恁囝是按怎目睭會khoàiⁿ？是甚物人開伊的目睭？」爸母講：「阮囝怎樣目睭會khoàiⁿ，阮毋知！是甚物人開伊的目睭，阮嘛毋知！阮干單知阮囝生出出來就青瞑！」第三擺法利賽人給彼個人講，「給你醫好目睭彼個人一定是一個罪人！」。這個人應法利賽人講：「伊是毋是罪人，我毋知。干單一項事我知影，就是以前我目睭青瞑，chím-má我有khoàiⁿ啦！」

猶太法利賽人想盡一切，愛這個目睭閣khoàiⁿ的人及伊的爸母，來講出法利賽人心內已經準備好好種種陷害耶穌的藉口，欲迫因的口徑，欲掠因的話尾，欲陷害耶穌。因無講：我『真正』毋知，嘛無講：『實在給恁講，我毋知！」。因的心肝，親像白色的雲，飛佇藍色的天空。因只有淡淡啊應講：「我毋知影 ！」清清氣氣，清清白白，無一點掩崁。

最後為著欲迫因講出耶穌的歹話，為著欲keng因口徑，因創造真濟理由講甚麼：耶穌佇安歇日做工，違反律法，所以耶穌是罪人，是騙仔，是鬼仔，是糞埽，所有歹話攏講了了。但是這個人及伊的爸母，攏無其他的話通應，只有講：「我毋知影！」爾爾。

我佇東京三井工作的時，有一個猶太人為著欲陷害伊的同事，叫我去伊tòa的hotel的房間，講是欲討論生理，其實是欲來欲透我的口徑，欲掠我的話來欲陷害伊的同事。我毋知伊有leh共我錄音。感謝主，我老老實實講出一切，無講一句伊的同事的歹話。最後我收著法庭的錄音的筆錄，才真正驚一著。Chím-má才想著法利賽人欲keng人口徑的步數及陰險。商場親像戰場。及法利賽人teh keng青瞑人的對答真仝款。這是我佇東京，做猶太人的代表，及猶太人做生理的切身經驗。

世間人真驚予人問–著代誌，特別是問–著家己毋捌的代誌。講毋知，感覺歹勢；欲講知，閣毋知。尤其是做牧師，世間的代誌較濟是毋知假知，聽的人想講牧師攏知，做講牧師逐項應該攏知。其實我chím-má給想倒轉去，過去我的講道生涯，實在真濟毋知。愈毋知，愈愛講；愈毋知，講愈大聲，講愈長。這是一般牧師人一生的通病，叫做因職業性的悲哀。所以世間訓練出真濟真平凡及圓滑的宗教人。我是其中之一。

我teh想，佇這個世間人攏愛講伊真知、真本頂、真gâu、真巧的時陣，若是有人真自然講：伊毋知、毋捌。彼款人實在無濟。但是我想，彼款人實在是真幸福的人。咱生活佇生存競爭的世界，靠一枝嘴，靠一塊舌，靠一個彎蹺的頭殼，teh食飯。但是咱若是想倒轉，用單純的心肝，講「我毋知！」的生涯，一生的結果可能嘛是仝款，嘛是會當過真平安、圓滿、幸福的人生。二款人的歸宿及路尾，攏到仝一個終點。

國民學校4年的時，我佇學校福利社bat偷提一枝鉛筆。讀初中的時我考試bat偷看，抄字條仔。來美國以後有一擺佇gym（健身所），因為浴巾由在人提，出來才phiaⁿ入籠內。我感覺彼條長浴巾真好用，出來的時，問顧門小姐講：這條浴巾，我通給你買無無？我著付偌濟錢？伊用真奇怪的目睭看我，thài有這款怪人，欲愛買這款無值錢的浴巾。經過幾秒鐘，才給我回答，講：「Take it! No big deal! 」我就按呢給浴巾囥入包仔內轉來。

講遮的代誌是講，彼支鉛筆，彼個考試的紙條仔，彼條浴巾，猶閣留佇我靈魂深深所在，póe嘛póe袂開，不管時伊toh會閣走出來。我teh做hia-ê代誌的時，並毋是I don’t know，實在是I know，但是我彼時感覺真自然，彼時感覺Not a big deal，小可代誌，別人嘛按呢做。若是真正是No big deal，今仔日我就袂hiah艱苦，食到這個年紀日頭欲落山的時陣，猶閣提起來講。

照我tuh–a講過去我的歷史，彼時陣的I don’t know及I know，精差親像一張紙hiah薄。差佇良心及良知的內面，有一個小小的聲，繼續teh給我講話，講：「你按呢做毋著！」雖然我嘛已經寄真濟紀念品，寄付我的國民學校；雖然彼時陣以後考試已經毋捌偷看；雖然彼條浴巾已經給伊付錢。但是遮的代誌，毋是因為我做牧師就變做無代誌，顛倒因為我做一個牧師，上帝佇我靈魂內面，閣較嚴格teh責罰。我若準想講：彼時我是「假毋知」按呢做毋著，別人嘛無人知我做的代誌，一切攏會船過水無痕，一切攏會恬恬仔去，無人會過問。但是上帝tiàⁿ leh給我講話，這項代誌上帝無簡單欲放我去。

彼人及伊爸母，真正毋知耶穌是甚物人，耶穌是按怎醫伊的目睭，耶穌是毋是先知，耶穌是毋是有罪。因確實毋知。這位過去青瞑的人及伊爸母的回答，完全無心理及良心的負擔，因的毋知及我tuh–a講的我的假毋知無仝。我的假毋知，需要繼續面對我的良心的後果。台灣真濟中國人及台灣人政客，包掛現任的總統，講話攏亂講，無老實。台灣受中國文化的影響，講白賊變做平常。別人講白賊，因嘛講白賊，完全無心靈及良心的責備的問題。

基督教對我講有一項最嚴格的要求，就是上帝愛我正面面對靈魂的問題。這個要求是上帝及我的關係，及別人攏無關係。幾十年以來我真關心台灣的獨立及社會公平正義的問題，幾乎人生真大部份的時間金錢，攏囥入去這項人講是「外口的社會問題」。但是做遮爾濟年做一個宗教人，我開始發現我著對付我家己心內的問題，靈魂的問題。因為我發現基督教是二面的利刀，一旁著殺別人，一旁嘛著殺家己。

我若是袂曉先殺家己，將來轉去上帝遐，耶穌給我考人生戰場的考試，我一定袂通過，一定落第。每次唸主禱文：求你赦免阮的辜負，親像阮會當赦免別人按呢。對社會，對敵人，我常常會去赦免，但是chím-má來到人生的尾溜，我猶袂曉赦免我家己。上帝要求我的，就是要求我嘛著對付我家己。

咱內心的欠缺，毋是外口的律法會當解決的問題，毋是掠去關、罰錢會解決的問題。遮的良心的問題，常常著提轉去上帝的所在，去直接及上帝解決。我想這是基督教上深的所在。

咱去到上帝的所在，毋是講咱做偌濟犧牲，做偌濟功德，二枝手怎樣做到無力，怎樣用盡財產時間生命，為社會奉獻。但是生命問題豈只有按呢？靈魂問題欲按怎得著完全解決？我想咱為眾人做的代誌，上帝攏有teh看，上帝一定會呵咾。但是干單注重社會正義，我想毋是我得救的完全條件？我著佇心靈中間去揣上帝。

最後猶是倚靠上帝的恩典來解決咱得救的願望，咱一切的希望就是：「上帝啊！請牽阮的手，予我佇「毋知」的時，你予我有勇氣講：「我毋知！」；當我真正「知」的時，會當予我勇敢講：「我知！」。請你予我會當：『是，就講「是！」，毋是，就講「毋是！」』上帝啊，願你堅強阮的生命及信心。願你chhōa阮揣著美麗及誠實的世界，親像佇藍色的天內面有白色的雲真輕鬆咧飛。