新天新地的美麗世界

陳柏壽牧師

07/11/2019

這個月聯合國出現一位16歲瑞典來的查某學生Greta Thunberg，佇全世界193位的代表面前發表演講，伊講：「恁chiah-ē大人，實在真敢死！How dare are you!口口聲聲就是欲趁錢，欲發展經濟，恁豈無看著這個世界的環境漸漸惡化，海洋陸地攏是污染及廢物，地球溫度不斷升高，人人攏咧受苦，人人攏咧行向死亡的路，但是恁kan-nā咧講、kan-nā知影經濟發展經濟發展！」世界百幾個代表，以及全世界各地億萬人收看電視現場轉播，大家攏耳仔kha̍p-kha̍p，tiām-tiām-tiām，咧聽這個細漢查某囡仔給大人的責備及講道。伊親像一個現代的女先知，目睭真利，kàng佇每人的目睭，予人毋敢講話。

全世界有錢人攏將錢存佇美國、Bamuda、Virgin Island、Cayman Islands、巴拿馬、新加坡、瑞士各地。世界好額人的錢攏會流去hia，因為毋免納稅，閣無人會知。所以美國喝講欲將中國、蘇聯、土耳其政客的存佇美國的錢凍結的時，所有的紛爭自然消失，因為因的錢攏屬美國銀行控制。聽講中國人儉佇這所在的錢，濟少有二兆美金。這真正是「有錢會互鬼推磨」的世界，世界真正是主耶穌講的：「你的錢佇hia，心就佇hia」。有錢的所在就是人的天國。

面對順息萬變的烏暗世界，予人對未來世界毋敢存希望。最近嘛有39位越南人(註：起先傳說講是中國人)互人蛇集團sa̍k入去冷凍貨櫃箱，死佇倫敦附近。因逃走的目的是為著生活及自由。

但是世間的烏暗，袂當遮蓋咱對將來的期待及希望。世間親像老母欲生囝前的陣痛，是未來世界出現前必然的現象。

一般台灣人的信仰中存在有真大對未來世界的十八層地獄的森羅萬象、陰險、恐怖、刑罰的驚惶及不安。因為對未來世界的驚惶來產生在生的道德規範,尤其錢財方面的道德，逼人毋通做歹。

基督教咧講錢叫做「瑪門」（太6：24），錢是魔鬼管轄的所在，瑪門國及上帝國無仝國。基督教內面無親像民間描述地獄遐爾詳細及悽慘。保羅書信幾乎無提起地獄的詳情。馬太25章只有講一句：無憐憫人的人欲往「永刑」去，義人欲往「永生」去（太25：46）。耶穌毋捌講地獄有閻羅王主宰的世界控制，只講歹人佇遐，會親像乾的稻稿草，用火來燒。伊嘛講遐的袂赴婚姻的慢來參加宴席的在室女，去互人關佇門外面，袂當入去，表示因彼屬佇一個外面的世界，彼個世界詳細按怎，伊無講，只講一句人人「咬牙切齒」，並無講到遐爾悽慘（太25：30）。啟示錄內面有小可提起地獄的代誌。

但是我佇教冊的教科書「用人智學的觀點解釋啟示錄」內面，努力欲解說的方向是講：未來世界毋是「地獄」，是一個「新天新地」。

啟示錄內面，上帝對人真有信心。世間的最後就是人及上帝的結合，上帝及人世中間的布簾已經除去，上帝對刺死伊的敵人，嘛是用包容及平安來款待因。人毋免閣生活佇無望的風湧及受苦的境界。彼個世界是一個真清淨透明閣美麗的清氣、和平、調和的「玻璃海」的新世界（啟4：6）。佇彼所在所有宗教的手寫的教條及經典，包括基督教的聖經，攏欲廢無。只有上帝的話叫做「永遠的福音」欲傳互各國、各族、各方、各民的人。（啟14：6）

佛家所講：寧可家己入地獄拯救眾生，毋願世間有一人沉淪，意思及基督教所講仝款：毋願一人沉淪，乃願人人得救（太18：14）。基督教的提剛，不在「審判」世間，是在「拯救」世間（約12：47）。咱所信的只有是一位永生救人的上帝（提前4：10）。

對未來世界的遠景，保羅是按呢想：「彼時所有世間掌權的、執政的、有能的，攏會毀滅，世間一切攏欲交互上帝，上帝會毀滅所有仇敵，包括「死」。上帝佇未來世界，互萬物攏服佇伊腳下。上帝在萬物之上，是萬物之王。」（哥前15：24f）咱著用上帝賞賜的「靈眼」（弗1：18），來看透未來世界的奧秘。咱看著Greta Thunberg對世界的呼叫，應該認定he就是未來世界向前行的希望，是世間的光及世間的鹽。咱的世界就是有這種先知的聲音，一步一步，向著美麗的將來進前。世間一定會變到愈來愈好。

未來世界是一個新的天及新的地的世界（啟21：1），是一個超越現實世界的再生，是超越五官，超越肉體的新世界的再生，是人間提昇向上及上帝合一的再生。是上帝的子及人的子的合一的再生。佇遐，有新的天城耶路撒冷, 「耶路撒冷黃金城，有乳有蜜齊備：我心欣慕愛到，享受城內福氣。可愛快樂的土地，上帝百姓故鄉；福氣滿滿袂測度，言語難得形容。」（長老教會聖詩352首）未來世界是『地球再生』的現象，是地球『道成肉體』的現象，是咱靈魂世界擴展變做世間的全部，是世間所有人種、空間、族群、文化的綜合體。未來世界毋是欲「毀滅」，是欲「更新」, 「看啊，我將一切攏換新啦！」（啟21：5）「新的天及新的地」是人對上帝賞賜的智慧及能力所建立的新的世界，佇hia有上帝做主，上帝做人間共同的天父，佇hia上帝欲擦去人間所有的目屎，佇hia無閣有死亡、悲傷、哀哭，因為一切的代誌攏已經過去啦。

世間一定會變到愈來愈好。咱台灣徛起這世界的一角，台灣人嘛仝款會當出聲，看著一個更高、更闊、更遠、更媠的未來世界。咱攏來去hia相會。咱欲轉去的彼個世界，就是親像夕陽欲落山的時看著淺淺的藍色天空內面有美麗的白雲咧飛，予人真歡喜閣真意愛，新天新地的美麗世界。