南島王國「拉比塔」（Lapita）的原鄉  – 台灣

創世記 9：1
陳柏壽牧師
03/18/2020

阮全家攏愛看日本的animation，尤其是宮崎駿（Miyazaki Hayao）的作品。伊的作品「天空の城」（tenku no shiro）啟發我追求咱台灣人原始民族及文化的動機。Lapita是位佇南太平洋Micronisia群島及Melanesia群島中間分佈的眾島嶼，約4,500-6,000年前，新石器時代，台灣出來的原住民，有可能因為敵人的壓迫及驅趕，經過約2,500 miles的航海，所建立的王國。這個王國就是宮崎駿所講的世外桃園。這m̄-sī伊空思妄想的作品，是有歷史、考古、科學的根據。佇中國有「萬里長城」，咱台灣有「萬哩大海」的記錄。

今仔日咱回顧台灣先民的歷史，差不多在近幾百年來中國漢人入侵以後，才帶入台灣人新的文化宗教的根底 – 就是崇拜威權及長壽。一直到今，台灣人崇拜的對象就是城隍、萬歲、玉皇、保生、五妃、媽祖、關公、五府千歲、王爺公等等，完全是漢人的鬼神、泛靈文化，完全失去台灣人家己語言及祖靈信仰，強迫接受漢人的堂號族譜，強迫台灣人做漢人。

但是台灣人的先祖內面，有一組另外完全無仝的DNA，就是突破迷信束縛的DNA。台灣人的先祖，一萬年前就佇台灣，後來因干單駛一隻獨木舟，順著季節風，向千哩萬哩濛濛渺渺的南太平洋。因雖然目睭無看著的海洋的彼邊，但是因欲開拓新的世界。Chia-ê台灣人，有完全無仝款的精神及體質。

Chia-ê人，馬偕病院的林媽利教授叫因是台灣的「長子」，因是第一代的台灣人。後來進入台灣的人攏是「小弟」。遮的後來侵入的小弟，真濟是中國大陸來的，真歹，來到台灣搶、劫、偷、掠，講因家己是主人。但是咱台灣的先住民的「大囝」的名分佇歷史上、科學上是無人搶會去的。

咱台灣原住民先祖在萬年前就佇台灣。當冰河時期結束，海水上升。原來東亞大陸相連的台灣，出現台灣海峽，台灣變做海上孤島，留落來的住民，應對環境氣候變遷，為著求生的需要，開始突破海洋的封鎖，離開台灣島，進往南太平洋諸島。因將台灣的人種、文化分散去到南海。因的勇氣及智慧變做台灣人的驕傲及氣質。咱人就是在絕境、無位好去的時陣，靠季節風的力量，靠一箍柴箍船叫做「獨木舟」就出海（約主前2250-2200年）。這就是主耶穌所一再教示咱，著利用自然，「用力使力」的福音的精神。因為世間惡勢力真強，咱只有利用惡勢力來偃倒（ián-tó）惡，叫做「順風sa̍k倒樹」的道理。主耶穌叫咱著「順服」自然，同時嘛著「對付」自然。福音就是佇順服及對付中，交換運作。但是咱及自然無法度拆開。

Lapita是南太平洋的文化，包括Polynesia, Micronesia,Melanesia，的總稱。澳洲Auckland大學人類學博物館有收集拉比塔文化遺物真豐富，咱台灣人著去遐巡禮及尋根。約100年以來，拉比塔文化及台灣人移民史，已經有真濟學者做真清楚的研究及文獻報告，其中包括日本的笹川（Sasakawa 基金會）、P. Bellwood、Richard Jr Shulter、Jeffrey C Mark、Roger C Green以及其他真濟學者。因的研究包括台灣的植物，因將台灣的原種的芋仔、蕃薯、椰子、芎蕉，小米，竹仔、籐，攏pôaⁿ去南島。佇南島的船攏有刻齒形紋樣，及蘭嶼亞美族木船齒形紋同樣。所有南島Austronesian語系，及台灣原住民的語系，有真濟共通的所在，叫做Austronesian Language Family（1999年中研院報告），內面有講著船、帆、槳等有仝音的字眼，表示因的生活是靠海的環境。因的語彙內面揣無雪、冰、冰凍等字眼。這語源系統包括東到復活島（Easter Island）西到Madagascar ，北對台灣及Hawaii，南到紐西蘭的整個海洋圈。考古學家嘛發現彼個時代台灣人移去Tonga、New Caledoniaa、Vanuata等Lapita文化地區的時陣，嘛將台灣的豬「移民」過去。拉比塔人以農為主，文化特徵有黑曜岩（Obsidian）做的工具，貝殼的裝飾及紅色的陶器，這攏是台灣的原產地。

總講一句：咱台灣就是廣大南島海洋文化的發源地，佇學術界可以證明，南太平洋民族的DNA及台灣原住民有真大共通的所在，及中國來的漢民族的DNA有卡大差別，所以台灣人基本上是屬「非漢」民族的系統，及國民黨統治者所教育咱的子孫的觀念不同。進一步，台灣人的島國的民族性及思考方式，嘛及漢人無仝，所以台灣人今仔日猶佇世界逐所在咧開拓、探險、做生理。卡大的海洋、卡遠的內陸嘛攏毋驚。台灣是南太平洋海島民族及文化的起源地，所以有這種民族的特質。

台灣先祖遠航他鄉，表示過去台灣傳統不在屈服中國文化的「天下歸一統」思考行為。世界文明的進步不在「世界大同」，是在「世界大不同」。宇宙的進步在佇「分」。「分」才會保存物種的特性，才會安定、永恆。上帝創世的最大攝理，就是予人分散到全世界。台灣先住民就是按呢，勇敢向外出去開拓家己的天地，才會當維持台灣人物種的韌性，才袂去互中國人的「大一統」吞食，才免受中國文化及中國的獨裁者加互咱台灣的苦難。上帝給台灣子民講：「恁著出去，生湠濟濟，遍滿全地！」（創世記9：1），這句話豈毋是上帝交互咱台灣人最高的啟示及命令呢？