盤過戶碇

陳柏壽牧師

本成欲來美國讀冊的時陣，及牧師娘約束好，這擺盤過戶碇，去到太平洋的彼邊，等咱讀冊了後，著閣轉來故鄉。在紐約15冬讀冊時陣，尤其是春天柑仔花檸檬花開花時，鼻著花芳，就會想欲轉去 – 轉去彼個心靈的母胎，彼個熟悉的土地、空氣、語言、人情的所在。

結果冊讀了，囝嘛生4個，因攏佇遮讀冊、結婚、食頭路、生囝，阮2個佇遮嘛牧會三、四十冬，有時忽然間會想著故鄉的柑仔的檸檬花的清香，想欲盤過戶碇，閣轉去彼個親切予人懷念的所在。山hiah-nī高，海hiah-nī闊，豈有hiah簡單？

古早以來阮老爸toh講我是一個愛chhia-pòa-péng的人，一日到暗咈咈跳（phut-phut-thiàu），腳倉位坐袂燒toh 欲換位，所以注定我這個流浪的一生：跳過水溝，泅過水圳，浮過魚池仔、遼過溪水、盤過大海，飛過大洋，一個戶碇盤過另外一個戶碇，一個世界換過另外一個世界，每日攏咧行新的街仔路。

Chím-má連盤過街路頭殼嘛會起眩（hîn），何況盤過太平洋！尤其最近得著腦充血以後，行路toh hàiⁿ-kòng-hàiⁿ，故鄉的情景，只有會當佇夢中輪迴。

雖然是按呢，心內嘛真愛繼續盤落去，盤過去。真毋甘願！

但是我對主耶穌的生涯發現著伊嘛不管時咧盤過戶碇，不管時攏咧行新路，行去對面另外彼邊。我想這可能是上帝對咱基督徒人生真大的挑戰。

上帝要求咱盤過戶碇的信心，真正毋是天大地大的代誌。伊講咱只有親像一粒細細的芥菜子的信心，出去外口掖落去土腳，伊會發做大叢樹，連鳥仔嘛會飛來歇。伊講咱若敢hōaⁿ過戶碇出去，彼邊有較媠的世界，佇遐，咱若叫這粒山對遮盤去海中，伊嘛會去（太17：20）。

有一擺耶穌行過猶太人及撒瑪利亞人的交界，佇城外的水井邊去給一個婦人人分水飲。婦人人講阮撒瑪利亞人及恁猶太人無往來，阮祖先攏佇這粒山（基利心山）敬拜上帝（申27：12），恁講敬拜上帝著佇耶路撒冷，恁及阮無交涉。但是耶穌給伊講，著盤過這個戶碇，拜上帝毋是佇遮，嘛毋是佇遐。拜上帝是佇家己心內去拜（約4：23）。

1873年5月初10壯年的Damien神父一個人盤山越嶺進入去Hawaii Molokai島的Kalaupapa，遐就是一百外年來專門收留全島及美國本土所有痲瘋病人的所在。南邊是尖山，三面圍海，外口人袂當入，內底人袂當出的人間的監獄。我佇遐做牧師的時 ，bat坐一隻親像田嬰的propeller飛機，去看彼個chím-má猶感覺陰險烏暗的所在。

Damien神父講主耶穌的命令叫伊著盤過戶碇，去彼個世間人毋敢去的所在，去為著遐ê互親人朋友兄弟姊妹放撒的人服務。伊佇hia為因洗身軀、煮飯、起禮拜堂、教唱聖詩，閣為著死去的人刻墓牌、做葬式。結果佇1884年12月，就是伊進入痲瘋病園的第11冬，伊嘛著痲瘋病。1889年4月15日伊佇眾痲瘋病人圍纍中間，埋佇伊家己起的彼間教會的門口。49歲。

伊佇Hawaii服務的時的天主教會一直叫伊緊轉來，毋通閣留佇遐。但是及伊的老師Francisco Xavier仝款，完全無變心，有出門toh無欲閣轉來。盤過戶碇去新世界，有時是一個冒險，但是有時抑是一個安歇。Hawaii 結果是Damien神父永遠安歇的所在。人為伊在州政府頭前chhāi一個伊的銅像，做一個永遠的懷念。

最近真濟中南美的人欲爭來入美國，有一張相片是一個老爸及伊的囝為著欲泅過彼條墨西哥及美國交界彼條河，父仔囝攏淹死佇遐。父仔囝為著生活，為著自由，冒險過河，及2千年前耶穌的爸母為著生命逃難去埃及，坐佇驢仔頂，全生命交互上帝的彼幅圖，完全仝款。

這世間攏是上帝的賞賜，各所在攏是咱的徛家（khiā-ke），自從挪亞以來，上帝就命令咱著出去，去到世界逐所在，生湠濟濟，遍滿全地（創9：1）。全世界去到甚麼所在，攏是咱的家，咱攏著去，攏通去。人因為自私，設立真濟關卡及障礙，予人袂當遷徙tíng-tāng，尤其是真濟代先入來美國的移民，顛倒排斥新來的移民，非常自私無情。美國的政客口口聲聲喝講：一切為著「強閣有錢的美國」，所以真濟人攏親像佇巴別塔內面的狗蟻（創11：4），一切為家己，無lia̍h上帝做主。真濟tòa佇美國的台灣人嘛是按呢加入狗蟻軍團。

這世間的不平及受苦，就是因為人佇這世間建造真濟戶碇及障礙，予人袂當盤過。遮的人造的戶碇及障礙，就是世間所有不幸的原因。二千年前上帝突破天頂的戶碇，降生來這世間，就是欲教示咱：這世間無應該有戶碇。

上帝盤過戶碇來世間做人這項代誌，表示上帝叫咱著知「天人合一」「生死合一」本來就是上帝的好意。不但按呢上帝嘛愛咱知這世間攏有真濟講袂了的代誌，咱攏著盤過：肉體精神，世俗神聖，天頂地下，各種人種、男女、好額散。世間所有障礙咱攏著盤過，這才是咱信主的人信仰的立意及遠景。人人出世攏是上帝的囝，人人應該平等。咱著信靠上帝，來達到彼個美麗的世界。