羅馬拼音 新南向政策

張復聚

報紙有teh講蔡英文按算kā「新南向政策」列做未來外交重點工作，未來beh成立「新南向政策辦公室」與國家級「東協與南亞研究智庫」…。

2002年台灣南社幹部鄭正煜、蔣為文、張復聚去越南訪問，當地台商就有反應tī台灣只有學著ㄅㄆㄇ，袂曉羅馬拼音，beh學越南話真困難，只好倩會曉越南話ê中國幹部（中國採用漢語拼音abc，就是羅馬拼音，真方便學習世界語言）來管理。當時阮就感覺這款安排早慢會出問題！後來南社mā有建議政府應該趕緊設立東南亞語文學系，培養人才…。

這馬，新政府beh執行「新南向政策」，阮閣建議：請加強國中小羅馬拼音教育與設立東南亞語文學系！

其實咱早就已經有ê「母語拼音符號」，就是教育部公布本土語言採用ê台羅拼音、客語拼音、原住民族語言書寫系統。這3項攏總是abc，攏是羅馬拼音。只是無確實執行！若是會曉羅馬拼音，英文能力mā會變強，新加坡佮馬來西亞英文能力普遍攏真好，就是會曉好好仔利用拼音系統來學習母語佮英語。台灣囡仔後擺須要去全世界走chông（奔走），佮人盤nóa（套交情），做生理、拚經濟；這ê時陣，上要緊ê代誌就是會曉使用對方ê語言。若是細漢就學會曉好好仔利用羅馬拼音，到時beh學別人語言，不管是日語、德語、西班牙語、非洲ê足濟無仝語言等等，攏親像桌頂ni柑，極其簡單。

講到遮，趕緊設立東南亞語文學系及東南亞歷史、經濟、政治等等「東南亞學」研究所，就攏是不言自明ê代誌矣！

（作者為台灣南社社長，本文用台語文書寫）

註：本文轉載自『自由時報』《自由廣場》, 2016-04-15