淺談男女的「性體」及「神體」

– 陳柏壽 牧師 –

一般講人類需要偶像才會生存。偶像就是人崇拜的對象，是會當將家己全精神及生命奉獻的對象。所以看著戀愛的男女，因為愛情受阻擋，常常做伙去死的情形。人一生互相倚靠的老伴，忽然轉去他界的時，伊自按呢失去伊心內的偶像，生命開始衰微，漸漸進入死亡，因為久長生活的夫妻，對方就是伊的偶像。現時代的做神運動的蔣介石，日本懊母真理教教主麻原，攏是真濟人心目中標準的「偶像」。

你袂使（bōe-sái）踏入我的偶像的聖域，我心內的偶像是我一切的一切，是我生命的紅線。男女關係的性行為就是阮的紅線，不准任何第三者入侵。人深信咱的偶像會互咱的生命閣較完全，對方就是我活落去唯一的意義及目的。佇西雅圖我一位真和諧古意的台灣人朋友，無想到伊的囝去刣死伊同性戀的同伴，閣食伊的肉，理由伊講是因為「伊真痛伊！」。無論同性戀或是異性戀，「性」有時會變做一項可怕的物件。人結婚了後，肉體上毋是（m̄-sī）欲霸佔對方的肉體，是互相包容，互相體貼，不可強求對方（哥林多前書7：4）。

男女性行為心理出發點，是欲佔有對方。一切攏為著家己，為著滿足家己的慾望，為著生存，為著傳種，這是一種人生本能。這種動物本能，若是引發出來，會親像森林的野火，一發不可收拾，（to̍h）到家己及對方完全消滅為止。所以人類有「色狼」的現象就是按呢，家己無法度控制家己。這種禁袂牢（kìm-bē-tiâu）的性心理，聖經講是一種「火燒山（pyrousthai) 的心理，有欲閣再有，一直燒互伊死為止，大家攏總死的心理。這就是保羅佇哥林多前書7：9所講，是一般人動物性的一部分。

差不多所有人的性衝動有火燒山現象，燒了以後，心內猶剩火尾、剩餘燼（chhun-ê hóe-chīn），猶teh，紅紅的慾火，佇心內。當人看著「性」的對象，就會擾動心內的火燼，進行不適當的衝動的行為，因為人有雜交的動物傾向。一切的失敗攏是對淫亂開始。大衛王朝的毀敗，也是對淫亂開始（撒母耳記下11-13章）。天主教允准單身神職人員單獨進行手淫，理由是真合理。

人攏認為「性」是一種心內滿足及完成的過程。對人生較有經驗的人會知，「性」袂當達到生命的滿足：愈chhōe性，愈濟性，愈空虛，愈袂滿足心靈的需要。童話故事「白雪公子」自從破解魔咒，脫出後母的控制，二人結做伙團圓以後，in的一生「從此永遠過著幸福快樂的日子嗎？」。若是回想咱家己的過去，情況可能毋是按呢。

咱若認真回想，男女親密結連，尤其是肉體的結連，無一定是人生幸福及圓滿的條件。主耶穌絕對無愛將相愛的男女分散拆開，主耶穌絕對袂認為肉體的結合是一種罪。但是咱若將肉體的結合變做一種偶像崇拜，我想絕對毋是耶穌福音的原意。

咱著將「偶像」及咱的「性體」轉換，轉換做上帝的型像，上帝的「神體」，應該是較好。「偶像」是不動、永住；上帝的「神體」」是振動的，親像日頭按呢，圍著咱se̍h，互咱溫暖，是一個活動及變動的主體。基督教是teh教導咱有一位時時包圍咱，引（chhōa）咱進前的上帝。上帝無愛咱進入固定不變的，崇拜「偶像」的世界。咱的身軀代表上帝的「神體」，是上帝的殿，（哥林多前書3：16）。

保羅認為耶穌就是上帝的「神體」，也是人類新的「亞當」。耶穌是代表人類的典型，所以親像耶穌保持單身，無結婚；保羅一生嘛保持單身，無結婚。in二人也是代表一種人類生命的典型。所以保羅認為有結婚或無結婚，攏是上帝的恩賜。耶穌甚至認為hia-ê做閹人、宦官，嘛是彼種人的恩賜。各人有各人無仝款恩賜，有結婚無結婚，攏袂當分好歹。（哥林多前書7：7 ；馬太19：12）

保羅認為結婚及單身，毋是好歹的問題。問題是在佇人的性行為，對社會影響的好䆀 （bái）。因為性行為毋是人生最高的目標，人生最高的目標在佇貢獻互伊的社會，貢獻互伊的「大我」。欲按怎維持、利用性的衝動，來做利益別人及社會的代誌，做利益大我的行動，是人生最重要的課題。

所以所有性行為攏著受規範及控制，保羅認為：「若是會當，無結婚或無翁某的人，最好來學伊，做單身人；若是有火燒山的性慾，控制袂牢（bē-tiâu）的時，才去結婚。」（哥林多前書7：8-9）。保羅的教導毋是叫人壓制性慾，是勸人著經由「性」的衝動，來做利益眾人及社會的動力。

保羅認為若是會當保持單身當然真好；但是對結婚的人來講，「性」嘛毋是結婚最後的目的，所以咱著訓練家己，著設出一段時間「無」做性行為，專務進入「祈禱」 ，來保持基督徒高超的精神境界（哥林多前書7：5）。「祈禱」是訓練咱「付出」及犧牲家己，毋是欲「佔有」。祈禱會添補性的「空虛」，祈禱會互咱看著人生真正的目標及進路。

「性」是現代人的「聖域」，但是主耶穌的主張，是講「性」袂當滿足人生。因為主耶穌的福音，超越人類「性」的境界，超越男女「偶像」的性的世界。咱有一日轉去上帝hia，佇上帝國人無娶抑無嫁，人人攏及天使一樣，一切攏平等。佇hia攏無死人，人人攏是活人，人人攏是上帝的「神體」，已經無閣分男女、夫婦、單身、結婚、LGBT、單性、雙性、變性、種族、膚色、地位、破相的、半遂的、隱痀的、啞口的、青瞑的…人。大家佇上帝國攏是上帝的kiáⁿ-jî（子女），一切攏平等。佇hia咱欲用上帝賞賜咱的「神體」，當頭對面朝見創造的上帝。（馬太22：30；路加20：34-38）