一粒鳥鼠屎，拍損 一鼎糜

–  賴柏年 –

古早作囡仔的時陣，稻田無噴農藥的問題，定定會去田裏蹽水，抾（khioh, 拾）田螺。
阿i，（中部

人稱呼老母）一粒一粒洗清氣，擱用鉸刀（ka-to，剪刀）kā尾溜剪掉。然後用大量的九層塔、蒜頭、豆瓣漿等炒出一大盤芳貢貢（phang-kòng-kòng）的古早味：九層塔炒

田螺。

食法：先kā鹹鹹、甘甘的原汁舔（chiⁿ）一下，然後大力kā田螺肉吸出來。

佇多倫多中國超市的鮮魚部門，攏有一包一包浸佇活水的石螺。太太知影我愛食，罕罕（hán-hán，偶偶）會買一包轉來炒。因為無九層塔，無魚蝦嘛好。阮改用氣味相像的mints (薄荷)。炒出來的石螺，雖然炒法kap材料攏有照起工， 但是就是無九層塔的特殊氣味，食袂爽啦！

舊年轉去台灣，受邀參觀同學興璘兄kap 淑英姊座落佇苗栗縣南庄鄉的別莊農場。佇遐淑英姊送阮一寡九層塔的菜籽。

今年春天，太太就kā全部的菜籽用大大細細的花盆發出來。幾禮拜了後，阮已經有一盆一盆發kah旺旺的九層塔。趕緊通知感謝淑英姊的恩賜， 阮已經有家己的九層塔啦！。

以後，無論食啥，我攏會挽幾葉仔來配。我就是佮意彼款故鄉的氣味。

頂禮拜，去台灣人開的超市，看著石螺，我建議太太買一包轉來試作一道台灣九層塔炒石螺

買轉來阮驚無夠清氣，先浸擱浸，洗擱洗，甚至用齒抿仔（khí-bín-á, 牙刷）, 一粒一粒洗。因為無特別工具通kā尾溜剪掉。另外阮嘛袂曉分別好的抑是死的，想講應該無問題，所以無半粒拍算 。

因為九層塔是家己生產的，我挽（bán, 撿）一大把交予太太。伊早就看過食譜，知影欲按怎炒，所以我就安心曲腳輾嘴鬚（khiau-kha lián chhùi-chhiu），準備享受九層塔炒田螺配冰涼的bì-lu̍h。

原來阮太太是台中街路人， 毋捌（m̄-bat, 未曾）食過田螺，所以伊包煮，我包食。伊甚至無愛試。

炒出來的一大盤燒燒的石螺，氣味有夠。準無10分親像古早味， 上無嘛有7分像（sêng）。有夠我食三頓。

我聊聊仔（liâu-liâu-á, 慢慢的）舐 (chīⁿ)一下, 然後用齒戳（khí-thok，牙籤）kā肉挖出來，擱配一葉九層塔。啊…，確實袂䆀（bē-bái，不錯），雖然無故鄉阿母的味，但是馬馬虎虎啦！飲一嘴bì-luh，有讚！

食咧，食咧，忽然間，吸著臭味，非常恐怖。趕緊吐吐出來，洗嘴，漉喙（lo̍k-chhùi）, 規晡久，照常感覺有臭味，原來食著死去的。毋甘擲掉，先kā冰起來。

過轉日，擱再試看覓，心內猶是膽膽，希望無問題，毋敢食傷濟粒，擱冰起來。

第三次， 好死毋死，無兩下，擱食著歹去的。太太才開嘴講：毋通擱再試啦！

就按呢規大盤的，會當食三頓的九層塔炒石螺，全部 擲 (tàn)入去糞埽桶。

所以講：一粒老鼠屎，拍損一鼎糜。