「風中的眠夢」

– 陳柏壽 牧師 –

馬可福音4：26-29; 約翰福音3：8

我的朋友李牧師bat來阮New York協和神學院讀碩士一年，後來受派去東京Ogikubo台灣教會牧會真濟年。頂個月一個禮拜日，伊講道了，會友攏轉去了了，牧師娘出去買菜。伊一個人恬恬（tiām-tiām） 坐佇椅仔歇睏。但是牧師娘轉來的時，才發現李牧師已經全身冷支支，可能幾點鐘前，上帝已經召伊轉去啦。

咱人真無愛講死，講死就厭氣。但是毋講也好，無講也好，死總是tòe佇咱的身邊，時時刻刻，無一時離開咱。蔣醫師古早的講道中有講著一位有名的皇帝，叫伊的奴僕徛一個牌仔，佇伊的皇位的後壁，寫講：“Memento Mori!” 意思是講：“王啊，你有一日會死！” 每日攏按呢提醒！所以伊是一位真有智慧的王。

羅馬教會Capuchi Crypt的墓地大門寫講：「阮遮的骨頭佇遮，teh等你轉來！」

咱的人生，咱的時間，親像teh飛。教會的時鐘，每一點鐘講一聲，每一聲攏是講：「咱離開墓仔，閣近一點鐘啦！」時間親像開的花瓣，就是一瓣一瓣，按呢落！詩人講：sakura上媠的時，毋是當咧開，是sakura花teh落的時，上媠。人生的無常，互武士每早起起來，就是想著死。想著死雖然是真厭氣，雖然真困難，但是一日過一日，每日攏著按呢想。

人生最好的描寫就是親像主耶穌teh講掖籽（iā-chí）的故事。伊講天國就是親像人出去掖種，掖了，天暗啦，就轉去厝ni睏，閣做眠夢，一直到日頭出來，伊看著伊掖的種煞發芽啦，大欉啦，伊頭殼jiàu-jiàu–leh，毋知究竟是按怎會按呢。

世間會按呢循環。種子teh發芽,大欉的時，是人teh睏的時，是佇暗瞑的時，是人毋知人的時teh大叢。人teh睏的時，樹木草花teh生長。咱bat種菜的人一定會知，日時彼叢菠菱仔佇日頭下，lńg-kō-lō-sô ，但是早起時，葉仔長長真有力，頂面閣有露水。伊是佇暗時teh大欉。

咱的人生毋是佇日頭赤炎炎的時大漢，是佇咧睏的時大漢，咱的人生毋是佇咱的意識內面teh大漢。紅嬰仔teh睏的時大真緊。咱過這個人生，較濟是佇暗時，無意識的時陣經過。等到咱醒起來的時已經袂赴啦，已經欲收割啦，已經欲轉去啦，已經攏毋是咱會當決定的時陣啦。雖然是按呢，規暗，世間猶佇hia teh振動，世間按怎佇遐振動，樹花按怎teh大欉，咱毋知。

等到日頭出來的時陣，就是咱開始有意識，開始欲看著現實人生的時陣，咱就是欲結束人生的時陣，欲轉去的時啦！人活teh，上帝互咱有意識，有感覺，有思想，有意志的時陣，講起來實在是一項真短真膚淺的代誌。咱人活teh，有意識的生涯，實在是真有限。人生卡濟是佇咱毋知人的時陣經過。

這個譬如就是講，彼個人目睭醒起來的時，看著頭前一片森林，有大欉, 細叢,有開花，有的結子，吊佇樹仔尾溜，有的欲枯焦。表示咱一生對掖籽的瞬間，對發芽出世，對童年、iam-ko̍k-ke、灌杜猴，進入青年期、讀冊、結婚、生囝、食頭路、失業、交朋友、愛情、失戀、互人出賣, 一生拄著的艱苦、悲傷, 以及歡喜快樂，一直到破病，一日到暗看醫生。一生親像一面真大的銀幕，展現佇你面前。每人佇醒起來的瞬間，攏會看著這幕，看著咱家己過去的一切。

日時咱經過世間的代誌，體驗世間所有事務，將世間所有經驗，khǹg入去咱「意識」內面的倉庫，khǹg入去咱的「靈魂」內面。一世人所累積一切人情世事，攏變做「淺意識」，漸漸變做「無意識」。攏存佇「魂」的內面，咱家己毋知，但是遮的「魂」不時不刻，tòe咱行咱的人生。

有時人忽然間拄著危險，一時欲發聲，喝救人，毋是用平時講話的英文發聲，是用紅嬰仔細漢的時老母教伊的母語發聲：「阿母，來救我！」重要的時，淺意識及無意識的物件，親像母語，會閣對倉庫走出來，對人靈魂上深的所在走出來。

拄著一個人，看著伊的面就想著，古早某某人，面真相像。聽著一個人講話，就想著及某某人的聲，真相像。聽著一個婦人人teh哀叫，就佇咱家己淺意識內面，聽著仝款古早bat聽著的彼個婦人人悲哀的叫聲。看著囡仔 teh歡喜迌，就想著，古早做孩童時陣的歡喜。聽著一首歌，想著古早聽著彼個melody。彼個初戀的愛人仔的面，會閣出現。彼個20年共我講一句歹話，忽然間閣想起來，起毛一直bái起來。這就是淺意識的出現。

人眠夢著欲去互水淹死，袂喘氣的時，才忽然間醒起來。因為想著古早bat泅水，去浞（cha̍k）著水的時陣。人眠夢欲去互火車chông著的瞬間，才忽然間醒起來，就是佇淺意識內面，bat看著人去互火車chông著的瞬間。眠夢去互蛇咬著的時，忽然間醒起來。遮的代誌，攏會存入去人的「淺意識」，變做咱生命的一部分，閣是真韌的一部分，咱袂放走。是咱家己的「魂」的一部分。真正的人是活佇「魂」的內面，看袂著，想袂著，藏佇真深的「淺意識」內面。這種淺意識時時夢中出現。這個淺意識，或是無意識的靈魂，毋是物質、肉體會當了解。「魂」tòe著咱這世人，嘛會tòe著咱閣落去的後世。這款代誌，毋是咱家己會當做主，毋是咱家己欲或毋。這款代誌，是上帝teh做主。

有人「魂」的目睭卡利，小可看著一屑仔彼個無意識的世界，但是大部份的人卡袂感覺著。所以講有的人卡有靈性，有的人卡無。有人卡會曉經過肉體的目睭，看著彼個物質世界的後面所藏的彼個精神世界。咱平素著慢慢來培養這種看會透世間的目睭。這叫做第三芯的目睭及第三芯的耳孔。人人攏有第三芯的目睭及耳孔，有人目睭卡大蕊（靈眼），有人耳孔卡利（靈耳）。靈性有高有低、有深有淺。所以人著致意來培養咱家己的靈性。因為人是及其他動物無仝款的動物，人是有靈性的動物。教育的目的就是欲教囡仔：咱就是靈性的動物，這是所有教育的根本。教育若毋是欲教人、啟發人這點「靈性的存在」，就失去所有教育的意義，就失去做人的意義，失去人生的意義。

咱的淺意識就是那親像咱用iphone teh hip相，存入去google的 pictures內面，無論hip偌濟張，幾萬張，伊攏有法度存佇hia，khǹg佇空中，khǹg佇看袂著的所在。對淺意識、無意識的中間，咱忽然間，煞會當看著現實的物質肉體世界的情況，比咱用肉體目睭看，看閣較明。thâu-tú-á咱講的就是這點。用「魂」的目睭toh 轉去，轉去看咱活咧的世間。

眠夢、睏的時，就是「死」的兄弟，無意識的世界，完全交互上帝的世界。古早上帝創世的時陣，伊講伊創造一粒大球，叫日頭，管日時；創造一粒細粒的，叫月娘，管暗時。日頭欲落山的時，月娘就出現；月娘落山的時，日頭就出來。黃昏的時就是意識及無意識的交界。

猶太人真驚大海，舊約聖經描寫大海攏是妖魔鬼怪的所在，大海是靈魂的深淵。所以來到海邊，陸地及大海交界所在，嘛會使講是今世及靈界交界所在。這邊看會著，彼邊看袂著的交叉點。

墓仔埔嘛是代表今世及奈何橋的分界的所在。去到墓仔埔toh知因是佇另外彼邊的世界。墓仔埔的十字架就是代表一旁戳落去土腳，一旁向著天頂。

Thâu-tú-á咱講咱的靈魂，雖然死，咱一生的經驗攏猶藏佇遐，袂無去。按呢表示咱這個世界，及另外彼個世界，猶有teh交通，常常有咧往來。佇咱的感情及意識中，及遐的過往的人，有咧往來。所以紀念日，阮阿媽、阿母就會款（khoán）牲醴，帶來墓仔頭拜拜，佇感情及意識中間，因嘛感覺因會肚腹枵，著準備互因食。giâ香佇墓仔前給伊拜拜，表示咱teh及因交通，咱teh及因講話。咱佇墓仔頭前唸經祈禱，是欲念互過往的親人聽，咱欲及伊講話。咱佇教會念聖經祈禱，嘛是完全仝款，是欲及咱過往的親人講話。咱佇教會做聖餐，嘛是代表完全仝款的意思。主耶穌講提去食、提去飲，代表主耶穌，咱的父，伊會煩惱咱chia–ê細囝會肚腹猶，這是我的肉、我的血，恁按呢食，按呢飲，就是teh記念我。咱thoân牲醴及咱做聖餐，完全仝款意思。基督教的聖禮典，及咱台灣人傳統的信仰，差無偌濟。

講著彼個「靈」的世界，就是月娘的世界。聖經中時常用「日頭」比並主耶穌，主耶穌是生命的動力，主耶穌是咱日時思考及意識的中心。但是日頭落山以後，就是月娘的世界，主耶穌嘛是代表月娘，代表感情及智慧的世界。西方語言「智慧」Sophia，是女性的名詞。咱去海邊，看著海湧，湧來湧去，就知影這就是咱的地球及月娘teh互動喘氣。日時及暗時的輪替，就是月娘及日頭teh輪替，就是親像韓國的國旗，「陰」及「陽」的結合。男性及女性的合一。這是上帝創世的攝理。

箴言八章講著這個女性的月娘智慧 (Sophia) 的本源講：在耶和華造化的起頭，在太初創造萬物的以前，就有智慧。眾細囝啊 ! 現在著聽我的話，著聽我的教訓，就是得著智慧。因為揣著智慧的就是得著生命。得罪我的就是害著伊的生命。恨智慧的人，就是愛死亡。這個智慧就是人生命內面，藏佇靈魂內面，看袂著，聽袂著的所在。

猶太人尼哥底母是一位真有學問的先生，是貴族院的議員，閣真好額。及保羅仝款，伊是加瑪列學派的學生。加瑪列學派受猶太人智識階級非常尊重。這派的哲學注重安靜及理性，無愛吵吵鬧鬧。群眾欲掠彼得去拍死的時，這個法利賽人加瑪列出面，勸講：「因chiah-ē人所做，若毋是出佇上帝，因自然會消滅，若是出佇上帝，因一定會留落來」。結果猶太人放彼得去。加瑪列訓練變心以前的掃羅接受希臘哲學，訓練保羅有心進入小亞細亞希臘，做非猶太人的使者，伊的智識基礎就是對遮開始。

尼哥底母真有良心，知影耶穌真正是一個先知，但是毋敢日時眾人有看見的時去見耶穌，伊揀一個暗暝soaⁿ-niau（ 山貓）的時，去給耶穌挵門，請教伊人生最重要的代誌。

伊對暗暝入耶穌的厝，受耶穌的教導及啟發以後，已經不再三心兩意，煞變做耶穌的門徒。猶太的官長欲判耶穌有罪的時，伊勇敢起來抗議，講「無叫耶穌來互伊家己辯解就判罪，是無合法無合理的。」耶穌予人釘死以後，伊提100斤的乳香香藥，用麻布去包耶穌的身軀，去埋入去伊家己的新墓。

這個智慧的尼哥底母對暗暝入去見耶穌以後，一步一步伊行向光明的路。根據天主教傳說，尼哥底母後來受彼得及約翰洗禮。猶太人元老院剝奪伊的地位，給伊趕出耶路撒冷。伊受加瑪列派的人收留，最後及史提反、加瑪列埋做伙。

咱無驚烏暗，烏暗抑就是生命，經過烏暗才有光明，無烏暗欲按怎知光明呢？烏暗是咱的上帝的一部分，詩篇139講：「我若上天，你佇hia；我若睏佇陰間，你嘛佇hia！」。咱的上帝是今世及來世的上帝，是日頭及月娘的上帝，是天頂及地上的上帝，是烏暗及光明的上帝，是天堂及地獄的上帝。

保羅佇歌羅西3章講：「咱攏已經死啦，咱的生命及基督做伙藏佇上帝內面」。所以咱欲看待咱今世的態度，就是來想主耶穌及尼哥底母談論的彼句話：「你看，風隨著伊的意思teh吹，你雖然有聽見風teh吹的聲，卻毋知伊是對佗位來，毋知伊是欲對佗位去！」（約3：8）。主耶穌就是teh講咱的人生著親像彼陣風。每日風吹方向攏無仝，「男はつらいよ」內面的Tora san早起欲出門，門開開，看今仔日風是吹佗位一旁，伊就行彼邊，過一個真平安、順天的人生。

有一日上帝若是叫咱的名，親像老爸牽咱的手，叫咱轉來，叫咱給這個世間講「再見！」的時陣，有人講he是生命中最幸福的開始。佇遐攏無閣有煩惱，無閣有傷悲，袂閣胃痛，嘛無高血壓、糖尿病，嘛毋免煩惱揣無頭路，毋免驚人看無起，頭殼嘛袂眩，咱的耳仔，咱的目睭，四面八方攏有看著、聽著，連咱地面的親人teh流目屎，攏看到清清楚楚。因的目睭，看袂著咱，咱佇天頂看會著因。因為佇hia，咱會活著真幸福。

咱的一生就是親像聖經所描寫的，就是「風內面的眠夢」，一夢瞬久，醒起來，就欲飛去。咱著信賴上帝。

金句：「人佇眠床頂深眠的時陣，上帝就用眠夢，及暗暝的異象，開通伊的耳孔，將欲互因的啟示，印佇因的心中。」（約伯記33：15,16）