細囝啊，恁有物通食無？

– 陳柏壽 牧師 –

路加24：36-48

金句：「學生歡喜到毋敢相信，而且希奇。耶穌就講：『恁chia有甚物通食的無？』因就互伊一塊燒魚。伊就接過來，佇因的面前食了。（路加福音24：41-42）

牧師娘teh看日本的連續劇，我攏tòe咧看。每日鏡頭結束的時就有一群幼稚園gín-á喝講：“hara heta！”，老師, 玩肚腹枵（iau）啦。幼稚園的gín-á大聲喝： “老師，玩肚腹枵！”實在真好聽，親像teh唱歌。

Gín-á teh食飯的時，及大人仝款，大嘴細嘴，一直扒落去，面形真歡喜，真滿足，親像天使的面。人teh食飯，就是天使來世間，所以咱台灣人講：食飯神皇帝大！

台灣人有時講話真絕：人為著“食”走天下，為著肚腹拚生死。拄著人toh問：「你 “食”飽袂？」, 「你“食”甚物頭路？」，「彼個人閣“食”無外久啦！」，社會生活攏是“食”做中心，每日每時就是關心頷仔頸（ām-á-kún）以下的代誌。這是teh講一部分的道理，一個人枵kah走無路的時，liān壁頂toh欲爬起lih。

今仔日的經節是講主耶穌hông釘十字架，後來閣活，學生驚到phih-phi-chhoa，規群bih佇房間內，門鎖到ân-ân-ân。無想到耶穌煞對壁nì穿入來。學生大家閣較大驚，想講伊是鬼仔。

咱台灣人及希臘人仝款，相信冤枉死的人，伊的靈魂會留佇同所在，叫做陰魂不散，佇烏烏暗暗teh行的時，會對後壁出來，叫你的名。

但是彼個出現的耶穌，teh叫學生的聲，聽起來確實是耶穌的聲。耶穌叫學生來身邊，講，我毋（m̄）是魂，我毋是鬼仔，恁看，我歸身軀人徛佇此，恁看，這是我猶teh流血的肚腹，這是我予人釘的手骨kah跤骨，毋免驚，我真正是恁的主，我歸身軀攏活轉來佇恁面前。

學生猶半信半疑的中間，主耶穌煞給因講：「細囝啊，恁有甚物物通食？」

耶穌親像一個肚腹枵的細囝，來討欲食飯。

加利利海出產吳郭魚，就是咱細漢食慣勢的南洋鯽仔（talipia），到今仔日嘛是只有這款魚仔。

學生緊提一塊烘好的鯽仔魚互伊。耶穌提來，脯脯（pó͘-pó͘） 咧，吞落去肚腹內。

耶穌閣活了後，無講甚物十字架抑是閣活的大道理，伊干單講，伊肚腹枵，欲食飯。

耶穌給學生，嘛給咱講，伊是人，是有血有目屎的真正的人，會疼，會艱苦，會悲傷，會予人欺負，會死的真正的人。毋是無魂無體的稻草人。

對上帝創世第一日用土做人，人就是土，人就是人，毋是神，毋是魔神仔。一直到最後的晚餐上帝聚集所有所疼的學生做伙，嘛是做伙來peh餅食飯，是teh提醒咱，咱著食飯，上帝及咱做伙食飯。歷史以來教會真（gâu）講道理，但是講較濟道理，若無講著「食飯」的代誌，道理是空腹（khang-pa̍k）的、汎管（phòng-kóng）的、無滋無味的。耶穌的福音變做無血無目屎的福音。

以前我初信基督教的時，上帝永遠是佇藍色的天，永遠無掛無慮，信仰永遠是飛佇天頂。拄著人就是掠伊來講道理，人未講出問題，我toh搶欲講我的答案，表示我是牧師，天下代誌攏佇我頭殼內。我上愛教人講：人著愛重頭生，著將一切食飯及肚腹的代誌，khǹg去後壁，食飯親像m̄-sī人生的一部分。頷仔頸 （ām-á-kún）以下的代誌，攏毋免講。我一直認為經由頷仔頸以上的信仰才會得救，頷仔頸以下的，袂（bōe）得救。我嘛真愛講：“我放棄一切來tùi耶穌！”

現代人最大的問題就是靠這粒頭殼，大家攏患大頭病 — 萬項代誌攏去chhōe「谷歌」。Google包山包海，世間的智識攏佇遮，google 是這世界的頭殼，google是所有智識的綜合體。世間人最初是因為對google好奇，後來尊重、配合，後來變完全依賴伊。Google是現代人的「智識唯物主義」的頭。

天使長米迦勒及彼隻紅龍相戰，給伊對天頂拍落去地面（啟示錄12：7-12）。這隻紅龍就是現代的“谷歌”，霸佔全地面。人人變做google的奴隸。

做基督徒50外年，尤其是做牧師40外年，愈來愈感覺我著修正我古早的信仰，我著重頭來看上帝的道理，我實在著重頭生。Chím-má才知影，70幾年以來，我對我這個身體，真對不起，我給我的身軀當作我「欲傳道理的工具」，我給這個腳講：行去遐（hia），伊toh共我行去遐；給這支手講：提起來食，伊就乖乖á提來喙（chhùi）邊，脯脯咧，乖乖á吞落去肚腹內，感覺我這個身軀，因為我欲傳道理的緣故，對我的服務是應當的代誌。這種對待家己的身軀的態度，是我真大的失敗。

遮爾濟（chiah-nī-chē）年以來，我對上帝創造我做一個人的道理，一直攏無了解，我所認捌（bat）的我，不過是片面的我。我毋知真正的我是包涵著“靈”的境界，就是佇咱頭殼頂以上，及上帝相接的所在；第二的部份叫做“魂”，這就是我古早所知影的我，伊包括我的「思想」、「感情」及「意志」；第三的部份是人的“體”，碳水化合物元素，這個“體”一直到死攏及「我」結連做伙，一刻攏無分離。這個“體”就是我過去最忽略、最看無起的部份。尤其是愈下面的體，愈予人感覺見笑的體，愈重要，愈著用心去保護及照顧。人的“意志”特別是對下面的肚腹出來的。

欲做一個完全的人，就是著全顧「靈、魂、體」的全部，人對頭殼到腳指頭仔，攏總是人，對靈開始一直到魂、體，貫徹人全身，遮的攏是做人完全的條件。現代人講的「頭殼」完全主義，講頭殼才是人，智識才是人，目的是欲建立google的唯物主義。

若是雞卵用真空包裝，一定無法度孵出雞仔囝，雞卵著有適當的溫度、氣壓、空氣、通風、氣氛，才會生雞仔囝。咱雖然有谷歌，但是無人的思想、感情及意志去調合，就是無適當的溫度、氣壓、空氣、氣氛及環境，無法度生出新生命。

咱看一粒種子，干單看外口，看袂出伊內面胚芽有外濟生命藏佇內面。這粒種子就是親像「谷歌」，袂當做甚物，袂當生出新生命。這粒種子需要日光、水分、土壤、營養，就是著配合外面環境的思想、感情及意志，遮的就是「谷歌」無法度提供的條件。咱是有無限生命的生命的種，包圍咱四周就是上帝的營養，遮的營養是咱活咧的必要條件，咱活咧不但有花、葉、莖，閣較需要有藏佇土下、目睭看袂著的根才會發芽生長。根才是完全條件。

Google會使講是人受機械控制的運命，及咱今仔日的信用卡（Credit Card）仝款，受魔鬼霸佔的世間。咱逐日攏及冷酷的google及credit card，及遮的陰險的魔鬼戰鬥，濟少已經有30年以上的歷史。因互人的思想及行為進入無思考、無感情、無氣質的境界。但是咱著知，google, credit card攏是人的生存領域中最低層的部份，因毋是人的生命通依賴的物件。遮的機械的陰險的google/credit card不過是人間物質生活的一部分，人需要的就是恢復人類正常的，上帝創造的高層次的靈、情、志的叡智，來達到做人的條件。

咱人想著「福音」較濟注重其中一部分，較濟講著泛泛的理想及理論，忽略著主耶穌真清楚的親身的見證，就是上帝嘛會肚腹枵，叫學生提一塊吳郭魚互伊食的故事。主耶穌是一位活跳跳的人，是一位有「全靈」、「全魂」、「全思想」、「全感情」、「全意志」、「全身體」的人。伊叫咱毋通用偏見、無知、恐怖、高慢的態度來對待咱這個的「全人」的全部。咱活佇這世間就是teh遵趁上帝創世以來創造咱做一位伊最完全、最美麗的作品。咱活teh就是teh遵趁宇宙運行的天理，咱活咧就是見證上帝真、善、美的存在。咱著每日活到「全人」的境界。