世說新語談無公道的道理

– 陳柏壽 牧師 –

主耶穌講的道理有真濟初看真無公道，需要咱進一步去深入。下面三例互咱做伙思考。

第一個例是記載佇馬太25：14-30

「有一人欲去外國，就召伊家己的奴僕，將伊所有的交代因；一個互伊五千，一個互伊二千，一個互伊一千，各照因的才調，就去外國。領五千的隨時去做生理，閣趁五千。領二千的也是按呢閣趁二千。獨獨彼個領一千的，就去掘地，來囥密（khǹg-ba̍t）伊主人的銀。過久久，奴僕的主人到，及因算數（sǹg-siàu）。領五千的來，閣趁五千，講『主啊，你交代我五千。你看，我有閣趁五千。』主人給伊講：『好啊，好閣盡忠的奴僕，你佇少的已經盡忠，我欲設立你來管濟的；通入你的主人的快樂。』領二千的也來，講：『主啊，你交代我二千。你看，我有閣趁二千。』主人給伊講：『好啊，好閣盡忠的奴僕，你佇少的已經盡忠，我欲設立你來管濟的；通入你的主人的快樂。』領一千的也來，講：『主啊，我知你是嚴轄（giâm-hat）的人，未撒（iā）的所在就欲收割，未分散的所在就欲拾（khioh）做堆，所以我驚，就將你一千銀去埋佇地裡。今你的原物還你。』主人就應伊講：『歹閣貧惰（pîn-tōaⁿ）的奴僕啊，你既然知我無撒的所在就欲收割，未分散的所在就欲拾做堆，就著將我的銀下佇（hé-tī）錢店，我來的時，通得著我的本銀及利息。所以著對伊提彼一千來，互彼個有十千的。因為見若有的，欲互伊，互伊有剩；無的，連伊所有的也欲提伊。給彼個無利益的奴僕趕伊佇外面烏暗的所在；佇遐（tī-hia）欲有啼哭咬牙切齒。』」

第二例是記載佇馬太20：1-16

「天國親像家主透早出去倩工（chhiàⁿ-kang）入伊的葡萄園，及做工的人約一日一錢銀，就差因入伊的園。九點的時出去，閣看見有閒閒徛佇（khiā-tī）街市的，就給因講：『恁也去葡萄園，我欲照公道互恁。』因就去。十二點及三點的時閣出去，也按呢做。五點的時閣出去，閣拄著有人徛teh，就給因講：『恁啥事通日閒閒徛佇遮啊？』因給伊講：『因為無人倩阮。』伊給因講：『恁也去葡萄園。』到日暗，園主給伊的管家講：『叫做工的，互因工錢，對路尾來的起，到代先來的為止。hiah-ê五點所倩的到，逐個領一錢銀。代先倩的到，因拍算欲領較濟，毋過因也逐個領一錢銀。領了，就給家主nga̍uh-nga̍uh-liām講：『阮通日拖磨受熱，hia-ê路尾倩的，做工一點鐘久，竟然互因及阮平濟？』伊就對因一人應講：『朋友啊，我毋是無公道款待你，你豈毋是及我約一錢銀嘛？你的做你提去！我欲互這個路尾的及你平濟。用我的物件做我所愛的，豈袂使得？抑是因為我做好，你就目孔赤嘛？』親像按呢，路尾的，欲做代先；代先的，欲路尾。」

第三例是記載佇路加16：1-9

「耶穌對學生講：『某個好額人有一個管家的，有人將伊破費主人的業對伊的主人告伊。主人叫伊來，給伊講：『我所聽見你這個代誌是怎樣？今你管家的事著及我清楚，因為你袂當繼續做管家。』管家的心內想講：『主人辭我做管家的職，我欲怎樣啊？舉鋤頭？無氣力：做乞食？感覺見笑。今我知著按怎做才好：到人辭我管家的職的時陣，人會接納我入因的家。』伊就叫欠伊主人的債的，一個一個來，給頭一個講：『你欠我的主人偌濟？』應講：『油一百桶。』就給伊講：『提你的數（siàu），緊緊坐，寫五十。』閣給別個講：『你欠偌濟？』伊講：『麥一百石。』給伊講：『提你的數，寫八十。』主人就呵咾這個不義的管家，為著伊所做的代誌有智識：因為這『世間的人』，為著世情來圖謀，比『光明的人』卡有智識。我也給恁講，著用不義的錢財結交朋友，到錢財了去的時，因才欲接納恁入永遠的帳房。」

主耶穌講的以上三個現象，不但佇古早游牧民族的部落社會，或是東方的農業民族的田庄社會，尤其是現代的資本主義社會，每日發生的通常現象，你我每日攏會拄著的生活的一部分，你我攏袂當逃閃，咱人人攏有可能扮演管家及主人的角色，演管家及主人的行為；嘛有可能扮演僕人及受雇的角色，做仝款的行為。

雖然咱無法度逃閃，咱攏知遮的代誌是違反一般的；倫理道德的原則，但是咱嘛接納因，成做咱生活及思想的一部分。這種生活的現象並無阻擋整個社會向前進展的腳步。Chiah-ē平常的事件，不過是魚池頂面的小波浪，湧來湧去，消失閣再產生。台灣的「中華民國婦女反共抗俄聯合會」（現在叫做『婦聯會』）以及「中華民國青年反共救國團」（現名叫『救國團』）久長以來累積大量的不義財產，一定會爆發問題，這一定會解決。但是大局來看這不過是台灣社會經濟的小波浪。

經濟生活是人間社會必然的現象。有人所在就有經濟，有經濟就有波浪及風湧。經濟親像飛佇天空中的風，或是空中的「靈」（以弗所6：12）。咱日日及經濟爭鬥車拼，無法度脫身。經濟生活是整個社會生活的波浪，佇矛盾對立妥協中繼續進前。

人生活佇集團對頂面落來的規範及束縛，互人倚集團生存。但是社會運作，毋是一成不便，毋是風平浪靜，是有矛盾、對立、欺騙、橫霸，因為人生活佇經濟內面。經濟生活造成個人及社會的命運。

主耶穌講的第一例毋是伊teh支持階級社會的形成。人的階級性是自然形成的產物。伊講這實例，是欲啟發咱欲佇經濟社會中的生活的態度。伊主要的重點是伊愛咱佇經濟生活中，不可「維持現狀」。第一例及第三例是講咱著突破現狀，不但袂使將咱天賦的才情埋入土腳，著運用咱的能力，來為咱創造新的社會階級，創造新的個人運命。咱著親像彼位管家，突破階級的束縛，創造新的經濟行為以及新的運命、新的社會秩序。正常社會的經濟活動是不允准利益獨佔，因為利益獨佔及財富過度集中會互社會全體崩潰；社會全體崩潰的時，利益獨佔者也不可能生存。

講第一例的時咱就想著今仔日的美國總統，伊口口聲聲講欲互美國閣較強。咱攏知影今仔日美國是世界獨一強的國家，是按怎著閣較強呢？原因就是主耶穌講的：“有的著互伊閣較有，無的著連伊所有的，搶去互彼個有的”。按呢是甚物道理？莫怪hia-ê福音派及基要派的信徒攏講Trump是teh遵趁閣執行基督教的教理。莫怪「興旺及幸福的福音」今仔日非常時行。我真懷疑Trump的口號有法度當外久？當今的中國習進平嘛是仝款心態，有野夢欲食全世界。這是不可能的幻夢。

第二例是講著主人無照世間「照工報酬」的規矩。世間逐所在、逐文化攏有一貫的經濟道理，就是做偌濟工領偌濟錢，若無照這項道理，人類社會無法度進行。有人講這個主人真有良心，知影好額人及散赤人攏仝款著食飯，所以攏領平齊錢 。我想最後只有一項會當解說，就是這位做主人有「權柄」決定一切。主人雖然破壞世間公認的道理，互世間的公道顛倒反，主人做反叛世間的行為，但是伊的『權柄』決定一切。這是一種無公道的道理。

佇第三例所在，主耶穌講這位做反抗行為的不義的管家，實在是不但留互這位管家，嘛是留互咱每一個人一條通路。伊講咱人是「世間之子」，人不可能是完全。人欲成做「光明之子」是做人的最高目標，但是真難達成。最後耶穌呵咾這個管家，講伊做代誌有「智識」，是有智識的人。反對既成的倫理規矩，煞變做有智識的人。
近代資本主義是向「合理主義」發展。人雖然依賴集團teh生活，人的運命可以講大部份是取決於「集團」，但是「個人」的形成及獨立，是集團兌變及集團擴大的因素，個人的自我及集團漸漸一體化，「團體依存主義」及「個人運命」合一。最初人雖然活佇大的社會環境所鎖定的規則，但是猶有個人的反抗，破壞既成的集團環境。

咱來觀察第三例：因為管家的反抗行為，互集團的活動內部，產生協調，互集團內部人間關係有親和感，變做集團運作的一部分。個人及集團改變，管家及主人，變做「協同」及「妥協」的關係。這會使講是上帝的手伸入去人的社會生活，互社會人群及個人，佇共同的時間及共同的環境之下，外口看親像是對立，其實是社會質變的必然演變。伊互社會對立化解，互社會經濟及資本行為「合理化」。這是現代社會「傳統」及「現代」，「對立」及「妥協」的辯證關係。無反抗，就無妥協；有反抗，就有妥協，有妥協，社會會向前行。

頂次世界大戰時，日本軍要求2、30歲的少年士兵，去做「特攻敢死對」。有的少年人，佇飛機起飛的時送一個電信互伊的長官：「您chia-ê攏是 “Ba-kai-ya-lo！”（馬鹿野郎）」(鴻上尚史「不死身の特攻兵」），用按呢表現心底對命令伊駛飛機去自殺的人的最極度的反抗及嚎叫。是最後的抗議，也是用死做的最後抗議！

這及主耶穌佇聖殿前給生理人「扳（péng）桌」仝款。主耶穌是teh做一項最後的抗議。因為伊的這項行為，猶太宗教人開始準備欲謀害耶穌。耶穌知影伊這款行為並無法度改變猶太人的宗教習慣及現實：就是長久以來聖殿及生理攏結連做伙，宗教及經濟是共同體。咱著知：耶穌給人“扳桌”是一種叛變，一種全心全身的賭注，親像用雞卵掔（khian）石頭，chhûn-pān死的，伊知伊無法度改變罩佇世間真強的既成的宗教及政治勢力。耶穌的行為所代表的意義，只有是「反抗」，也因為用這項事件伊提醒世間人，聖殿的本質以及伊存在的意義。

頂面三個實例攏是代表咱對現實世界的反抗，chiah-ē行為的當事人，真有可能因為按呢受害犧牲。但是咱看另外有一面：可能就是因為按呢，咱人會當生存落去。安靜想起來，咱每一人攏是對這種困難環境，掙脫出來，生存落來。耶穌的教導，並無因為伊及這世間根本的社會制度及傳統思想的衝突，互咱無路通行，反轉咱佇人生的衝突及困境中，上帝給咱開路。雖然是無道理的道理，但是也是上帝留互咱世間人有不得已的選擇。

福音的和平不在無衝突，是在佇人不管時對現實世界的勢力，不斷產生不滿，對不公道的代誌不斷的反抗。我雖然無贊成使用暴力的反抗，但是我贊成一定著愛有心靈及思想的反抗。反抗是做人最基本的出發點及動力。法國哲學家Camus講：「反抗互人脫離孤單及孤立的狀態，奠定人類首要價值的共通點。我反抗，所以我存在。」