Phah Tâi-gí 作者自我紹介

1. 過去到taⁿ

你好，我叫Ngô͘  Ka-bêng（吳家銘），tī網路頂號做Ngô͘  Hê-bí。我1981年出世，是高雄人，mā差不多lóng tòa tī高雄。過去7、8冬主要teh做手機仔軟體開發ê khang-khòe，Android kap iOS lóng有經驗。一開始tī大公司上班，後–來mā參與過startup新創公司。Ka-tī mā有teh設計kap開發手機仔軟體，真chē bat tio̍h過獎，a̍h-sī hŏng報導過。Chit幾冬因為想法ta̍uh-ta̍uh-á改變，mā因為kap牽手開始過新ê生活，tio̍h無koh繼續食人ê頭路。Chit-má算是自由業，除了ka-tī做1 kóa軟體開發ê khang-khòe，mā兼tī學校教台語，kap阮牽手也有teh做伙做hûi-á ê創作kap台語文相關ê圖文創作。Sui-bóng thàn無幾kho͘ 銀thang生活，m̄-koh thàn tio̍h心內ê富足。

2. 學台語、台語文ê過程

厝–ni̍h chū我細漢tio̍h lóng講台語，m̄-koh台語ê程度kan-na一般生活使用niâ。Tùi台語文字ê了解過去sui-bóng sió-khóa-á有了解，mā無真正接觸過。2016年3–月，tú好1 ê機緣，招阮牽手tàu-tīn去鳳山社區大學，kin姚志龍老師o̍h台語kap台語羅馬字，才真正開始jīn-bat台語ê歷史、文字，kap書寫ê工具，ín-chhōa我開始寫台語文、投稿。Tio̍h án-ne，我到taⁿ ta̍k kang lóng teh寫台語文，寫作有刊出tī教會公報、台文通訊BONG報、臺江臺語文學、台文戰線。Tī 2016年11–月考過成功大學「全民台語認證考試」C1級（高級）。

Tī台語文ê世界，我koh算是幼齒–ê，m̄-koh運氣bē-bái，sio連sòa hō͘  chin chē有能力、koh有心奉獻、thn̂g-thòaⁿ台語ê老師牽教–過，有姚志龍老師、邱偉欣老師、陳金花老師、蔣日盈老師、蔣為文教授等等。Tī 2016年5–月ê時陣，我kap牽手去台南參加白話字文化節，kap陳金花老師kap蔣日盈老師se̍k-sāi、結緣。一直到隔冬，2017年春季，ùi tio̍h beh koh加強台語ê程度，mā siūⁿ-beh thn̂g-thòaⁿ台語kap台語文，tio̍h參與真chē in台灣羅馬字協會所khui ê課程，有「台語初階師資培訓」、「台語創意教材教法」、「台語師資教材教法」、「台語語言學」、「台語文寫作」等等ê課程，充實台語ê知識kap能力。Chit-má mā chiâⁿ做台灣羅馬字協會ê會員。平常時mā固定參加「虱目仔讀冊會」、「打狗台語開講社」讀冊會，訓練台語文ê讀寫能力。參加「第一屆全國奧林匹克台語白話字文史競賽」khe̍h tio̍h第3名。Tī 2017年7–月khe̍h tio̍h台語支援教師ê資格，ē-tàng去學校thn̂g-thòaⁿ咱ka-tī ê母語。

3. 開發Phah Tâi-gí輸入法ê緣由

因為chū開始學台語文字了後，tio̍h ta̍k-kang想beh用ka-tī母語ê字來寫ka-tī講ê話，隨時ē-tàng phah台語tio̍h變做1件足要緊ê代誌。因為現代人chit-má手機仔lóng chah tiâu-tiâu，ta̍k-kang lóng chiok ài用Facebook a̍h-sī LINE。若ē-tàng tī手機仔phah台語，是siōng好thang練習ê時機，mā是chhui-sak台語文siōng好ê所在。2016年ê後半冬，我開始用現有ê台語輸入法「TaigIME」，是法國人阿石做–ê。用無gōa久，伊tio̍h出新版「TaigIME 2」，我tī 2016年10–月邀請伊來高雄紹介chit套輸入法，sūn-sòa了解伊ê想法kap計劃。尾–ah因為我ta̍k-kang teh使用chit套輸入法，tio̍h發現beh phah正確ê台語字是有困難–ê，不管是羅馬字、漢字，lóng有chi̍t kóa問題，造成我ài koh用別ê輸入法去phah，甚至是ài去google kā copy & paste，實在chiok費氣。

Só͘-pái我ùi 2016年年尾，tio̍h開始研究án-ná開發1套Android ê輸入法，mā開始chhōe台語ê語詞資料。2017年4–月，「Phah Tâi-gí輸入法」ê第一版tio̍h khǹg tī「Play商店」hō͘  se̍k-sāi ê朋友下載使用，mā kā程式ê原始碼lóng公開，ta̍uh-ta̍uh-á thn̂g-thòaⁿ hō͘  ta̍k-ê chai-iáⁿ、使用。我因為語詞ê資料lóng是ùi辭典來–ê，mā開發1套ē-tàng離線使用ê辭典app，sūn-sòa jīn-bat bē-hiáu ê語詞。公開了後，ta̍k-ê lóng感覺bē-bái用。我khiā tī軟體開發者、使用者、kap chhui-sak者ê立場來做chit件代誌，chiah有法度做了較圓滿–sió-khóa。Mā真感謝1路行–來有chiâⁿ chē人kā我tàu-saⁿ-kāng、tàu chhui-sak。

4. iOS版Phah Tâi-gí輸入法kap辭典app ê 贊助計劃

Chū開發Android版ê「Phah Tâi-gí輸入法」了後，真chē人lóng問我siáⁿ-mi̍h時陣有蘋果手機仔thang用–ê。iOS版sui-bóng已經有人有開發–ah，m̄-koh chiok chē人lóng講無好用，字pháiⁿ phah，反應koh chiok慢。我ka-tī試–過mā感覺真chē設計無kái理想，chiâⁿ無chhái。

Sui-bóng我有意願，m̄-koh實在是做chia ê khang-khòe chiok khai時間kap精神。因為我收入無固定，mā無thàn gōa-chē，總–是，ài先顧腹肚kap厝–ni̍h ê開銷。Android版ê「Phah Tâi-gí輸入法」mā有設hō͘ 人贊助ê法度，m̄-koh無啥效果。

聽tio̍h張復聚醫生tùi iOS版有想法，請我寫1 ê計劃來估算，我是感覺真好。張醫生看了我ê計劃，kā我提供建議，我mā修改幾nā pái，hō͘  計劃較齊備。尾手，koh用伊ê名義替我背書、chhōe人捐款，願意用實際ê行動來支持1 ê無啥人se̍k-sāi ê gín-á，hō͘ 我感覺chiâⁿ感動。Mā lú有氣力kap使命感beh來kā chit件有意義ê代誌完成。

5. Chit-má teh做–ê台語相關ê khang-khòe

• Chhui-sak台語書寫民主化，ta̍k-ê人lóng有才調、mā願意寫ka-tī ê母語。有編1套簡單ê教材tī線頂hō͘ 想beh o̍h ê人看。Ta̍k kang寫台文，增加台文hŏng看tio̍h ê機會。
• 開發維護Phah Tâi-gí輸入法、台語辭典app，hō͘ 書寫變做簡單ê代誌，透過好ê ke-si來學習mā khah利便。
• Tī「打狗台語開講社」tàu-saⁿ-kāng做副社長，協助辦理台語ê講座、讀冊會、gín-á古計劃等等。
• 參與台灣羅馬字協會辦理ê「台語gín-á古」計劃，實際去講台語ê故事hō͘  gín-á聽。
• Tī bô-kâng ê場合chhui-sak使用全台語kap全台語文：Tī 2017年10–月ê MOPCON（台灣siōng大ê行動科技研討會），用全台語kap全台語文ê投影片來演講Android手機仔ê開發技巧。
• Tī高雄ê 3間國中教台語課（社團）。
• 協助台灣羅馬字協會相關ê khang-khòe。