巴別塔的祝福

– 陳柏壽 牧師 –

最近去柏林參加歐洲台灣同鄉會，才知學德文真傷重，字是lò-lò–長，發音閣真困難，這是對咱這代的台灣人講的。對佇德國出世的台灣gín-á，德國話是lù-lù–叫，完全無問題。我想這是上帝佇巴別塔變亂世間腔口，留落來的傑作。咱台灣話的形成，嘛是彼時代上帝留落來的作品。

巴別塔表示人類有傾向集中、統一、集權的本能，親像蚼蟻攏圍佇蚼蟻巢，親像中共19屆全代會，人數真大，氣勢真強，使用同一語言，強調一致的旨意，向世界發佈「一統」的野望。親像習進平佇明清的紫禁城，用皇帝的寶座招待川普仝款，欲顯出伊封建皇帝的威風。中國愈強調有「中國」特色的社會主義制度，愈產生獨裁貪污的寡頭統治，小數特權者掌握資本及生產工具，造成世界第一貧富不均的國家，社會愈無民主，地方的文化及語言愈消滅，中國愈變做封建獨裁的所在。

巴別塔事件一般的解說是上帝刑罰人類，變換各人腔口，互人類四散去世間逐角落，離開聚集中心的基地，離開一貫統一的思想、意識形態、政治的權勢。人類親像蚼蟻離開蚼蟻巢，四散出去，各人行各人的路。

上帝創世以來一直到創世記11章為止，一直容允人類的自由發展，一直到11章人類因為共同語言、共同意識、共同知識，家己決定欲起造一個透到天頂的建築。歸服在統一的命令、統一的管理、統一的行動，工作真緊，非常順利。最後迫使上帝採取行動。

創世記10章有挪亞子孫lò-lò–長的名簿，巴別塔事件以後第10節以後嘛是「閃」的後代子孫，lò-lò–長的名簿（閃的原意就是「名」）。只是在巴別塔事件中，無半個人的名字出現。

集體行動、集體管理的制度之下，「個人」完全無重要，重要的只有是工程的目標及進度。個人溶佇集體體制之中。個人的人權、生命及犧牲完全無重要，重要的只有一粒粒磚仔、一粒粒石頭；所有人的生命攏親像圍纍佇蚼蟻巢四圍的蚼蟻，lo̍k-lo̍k-se̍h，眾人忘記佇其他一切：目的只有一項，就是欲建造一個世界的中心，欲透到天頂；同時佇塔頂，可以管理監視全社會的思想及動靜。這就是集體主義的目標及理想。

其實「一貫統一」的意識，毋是上帝創世的原意，上帝佇巴別變亂人類的語言，迫人類分散全地，這個原意是上帝創世以來一貫的心意。當初上帝創造亞當夏娃的嘛是叫因著「生湠濟濟、遍滿全地」（創1：28）。挪亞大水以後，上帝祝福挪亞嘛是用仝款話：「著生養濟濟，遍滿全地」（創9：1）。叫世間人出去遍滿全地，叫人類毋通固守佇一個中心。我想這是上帝治理世間的原則。我想上帝佇巴別塔毋是欲「刑罰」人類，是欲「祝福」人類。

巴別塔造城本身毋是甚麼毋好，人類心內最大的問題在佇人類心內「驚」上帝。人類互相講：咱著緊來造城，「來傳揚咱的名，免得咱分散去全地」（11：4）。人類心內上驚的代誌 – 分散，抵好是上帝第一希望的代誌。人愈驚分散，上帝愈愛人類四散。人類的集體意識， 一統一致的要求，實在就是teh反抗上帝、侮辱上帝。上帝用「擾亂」（巴別）的方法來「強迫」人類四散。

我想這是基督教最基本的福音精神，也是基督教自由主義、個人主義的來源。當初上帝造人是用伊家己的面形做人。所以尊重人的個人及獨立，就是人對上帝的敬畏及尊重。上帝佇巴別的行動表示上帝對所有集團主義、專制體制、一統行動的否定及不讚同；以及上帝對人類社會自由發展出來的文化、語言及生活方式的讚同及肯定。咱台灣人著對聖經發現咱徛佇真理及上帝這邊，咱應該對家己更加有信心。