「大自然互咱的啟示」

陳柏壽 牧師

頂禮拜給彼個上細漢的嫁出去，chím-má心情加真輕鬆。Chím-má開始想欲chhōa牧師娘去chhit-thô，欲給錢khai hō͘了！ 結婚典禮的時，刁工叫老母江太太牽伊的kiáⁿ，叫牧師娘牽伊的查某kiáⁿ入場，互老爸tòe佇後壁。我想這是一個改革。囡仔對紅嬰仔開始，老母顧kiáⁿ比老爸用卡濟心神，所以著互老母行頭前。

我想欲今仔日小可改變講道的做法。代先欲講道前，先留一屑仔時間，互咱佇這禮拜中間，上帝佇你身上或是親人朋友中間所做的代誌，甚物感想或是感謝，提出來互大家分享。叫做God’s stories。另外佇講道完，mā有一屑仔時間，互大家提出感想kap comment。

過舊曆年「春節」以後雖然天氣猶冷，但是土腳的草花已經發出頭，我給舊年收成的gô-bó種子kap kale攏掖落去。前年接的烏lingo椏嘛已經soan新枝，soan真長。大自然的樹木草花真有信用，照時間伊就發，自自然然，恬恬；無親像人的世界，未做代誌就大聲細聲，驚人毋知。

彼日去病院看過身的茂森兄kap伊講著彼時伊kap我kap蔡san 做伙去Oceanshore釣魚仔的代誌。講著釣魚，伊的目睭規个金起來，緊lū伊的身軀去窗仔門邊，講：「看lah！hia有魚仔，咱緊來去釣！」伊第一懷念的代誌就是伊釣的彼尾，差不多有chiah長！

蔡san欲轉去的前2禮拜去阮厝，拜托我將伊的骨頭灰給伊掖佇Oceanshore的海岸，就是伊tiàⁿ kap阮做伙釣魚的所在。伊講這就是20幾年以來，tóa互伊的人生第一幸福的所在。伊講：佇hia每早起日頭一下出，伊toh看著日頭；黃昏以後，伊嘛看著月娘，給伊送別，給伊講，咱miⁿ-á-chài咱閣見面！

這2人的心肝，我真會了解。我知影因心內，一生互因最大的安慰，就是大自然。大自然的大海、大自然的海風、大自然的森林、果子、樹木、菜花，攏tòa佇因心內，攏活佇因靈魂的內面。

這次轉去日本kap牧師娘去chhōe 40外年前阮對台灣搬去日本的舊厝。已經40外冬lah！舊厝猶久好勢好勢。尤其是舊厝頭前彼條溪水叫做Megurogawa(目黑川)，沿著河邊攏是櫻花。40幾年前是遮大欉，chit-má變做chia—大箍。

就是這禮拜，日本人人人大漢細漢老人gín-á，攏mo̍͘h 毯仔坐佇櫻花樹下唱歌跳舞。開花的季節到，就是日本人心肝最單純的時陣。日本人是kap季節共生的民族。看著櫻花就想著咱的人生，非常短暫，欲到的時，做伙到，但是1禮拜後就欲轉去，欲轉去的時，一陣春天的大風來（春嵐）（haruarashi），攏做伙轉去。

講起來日本人的生活無真幸福：土地小，人口齊，一個東京，人口有咱全台灣全國hia多。水道水無像咱Seattle清氣，攏有一屑仔消毒水味；坐火車chiⁿ來chiⁿ去。日本社會的生存競爭真厲害，我bat佇hia tòa真久，知影生活佇日本社會，kap生活佇台灣中國仝款，無遐簡單：為著欲顧三頓，拚生命，會使講是「人食人」。

是按怎因逐家人攏會當恬恬仔、順順仔過日？我tiāⁿ佇火車頭公共場所，看中國人lio-lio-a to-bé大聲冤家，日本人較無。是按怎佇仝款生存競爭的社會，佇真冷酷的現實世界，日本人怎樣給伊「內化」入去家己內心的理想世界，給伊理想化，超越化，互人kap人的中間，變做平和、溫暖、客氣、清爽，互相接納，互這二種現實的矛盾會當調和？我想這kap咱主耶穌教示咱的心靈世界有關係。

我teh看主耶穌的心靈世界有幾項特點：

第一點：主耶穌的世界kap大自然真接近，就是「安靜」，「秩序」，「安心」。C. S.Lewis 講：「無出聲的祈禱，是最好的祈禱。」詩篇131章有講：「恁著用單純的心來祈禱，上帝卡會聽。」德國神學家Dietrich Bonhoeffer，是我New York Union神學院的前輩，伊講這個時代無必要「宗教性」的基督教。這個時代叫做The World come of Age，這是真「成熟」的時代，真濟代誌毋免傷過頭講，人嘛知。過時的台仔頂的講道，或是電視台的傳道，照伊看，是teh「做戲」，抑無就是宗教人「食飯」的手段。

認識主耶穌是一種感性，一種kap上帝的心靈的交通，親像天氣若是漸漸燒熱，花草佇土腳就一定會出土，毋免你去叫、去giú、去chhoa̍h。心靈的感動，只有chāi-tī上帝的做工，不在人的嘴。所以我主張咱的禮拜，愈安靜愈好，大家自由來受來講，毋通一個人佔teh講。上帝的身軀、上帝的教會，攏著咱做伙來起造。人的聲愈大，就pôaⁿ過上帝的聲，教會就愈無上帝。

第二：大自然代表「孤單」。有時tiàⁿ看著一隻孤鳥，佇天空流浪，真苦憐。真濟無國家無政府支持的難民，攏親像孤鳥欲藏人群。我以前的頭家tiàⁿ教阮講：「去到佗位，世間的水，攏是冷的！」

馬可福音第一章就寫，主耶穌傳道生涯中，常常一人去外口無人的所在祈禱。主耶穌透早、天猶未光的時就起來，一個人去外口曠野祈禱。主耶穌「一個人」的時，就是家己「充電」的時。咱的生命kap靈魂需要充電，充電的方法只有一項，就是家己恬恬仔出去，去外口kap上帝講話。孤單的時表示你將一切生活的重擔，一切人情世事，攏給伊khǹg佇後面，互上帝給咱的心洗清氣。孤單的時，咱才會發現甚物才是重要，甚物無重要，毋通佇hia kap世間事膏膏纏。人生的最後的一切，需要家己一個人去決定。

人講彼隻年老的獅王，家己知影生命最後的時間已經到，就會家己bih入去深山林內，無人去過的所知，tiām-tiām–ah仔家己轉去。你是獅王，是過去的代誌。咱人嘛著向動物學這種智慧。

第三：大自然代表「醫治」。聽見德國人有話講：「一隻受傷的鹿仔，若是走入去樹林內，家己就會醫好出來。以前阮tòa-tī山內，破病時，攏照庄腳人的指示，去路邊、山頭khau草藥仔來食，嘛是會好。人鬱卒艱苦的時，最好的辦法就是出去外口，吸空氣，看樹仔草花。大自然的攝理，就是互人的心得著安慰。莫怪主耶穌講：所羅門極行伍的時，伊所穿的衫，嘛無值得一芯花，意思就是安妮。我真愛駛車的時，看路邊的樹仔尾溜，佇風內面teh唱歌。

第四．傳主耶穌的福音，毋免講kah hiah-nī大聲，hiah-nī強勢。最近美國的新總統口口聲聲，講欲“Make America Great Again”，伊嘛講“Make America Christian First”。

欲互美國變做一個偉大的國家，欲互美國變做基督教國家，代先著了解基督教的上帝究竟是啥物款的上帝。基督教的上帝就是孤兒寡婦弱者的上帝，是世間無倚無靠的人的上帝。真濟入美國藉的人，提著美國passport、greencard 以後，就看新來的移民，看無簽證的人無起，這是真毋著的代誌。

咱看電視，看hia-ê全家chiⁿ佇海邊樹乳船（gum boat）頂，對著濛濛的大海，欲漂流去對岸的難民。海湧遐大，一切攏交待上帝。拄好kap四百年前，咱的祖先坐舢板欲渡過烏水溝的心情，完全仝款。最近人造衛星的相片咱真正會看著彼個台灣海峽的烏水溝，閣深、閣烏。難民心內只有一個向望：就是欲離開彼個無情的心碎的故鄉，所以piàⁿ生命，to̍h-sī欲去chhōe會當飼母囝、會當生活的新天地。

Trump講伊講禁止回教徒入內美國。伊真正是主耶穌講的：「目睭金金講青盲話！」。1月14佇阮Bellevue有一間回教的教會去互人放火燒，隨時阮Bellevue的市政府佇這個文件宣告：”We stand UNITED with our Muslim Neighbors！”這表示咱佇美國西北區Seattle的文明。

最近這本Christian Century發布一張西點軍校出身的軍官，佇軍中穿軍服，但是頭殼是包錫克教的包巾，留長喙鬚，標示美國連軍中嘛尊重人種kap宗教的自由。Donald Trump，你豈毋知回教徒嘛是上帝的子嘛？

過去以來美國的偉大，就是因為美國的寬容、開放、友情、通融，佇美國無人講甚物種族卡gâu、卡聰明。美國的制度、法律，規定袂使看輕任何族群。過去以來美國有上帝的恩典kap憐憫，容允逐種的民族、文化、宗教，思想，才成做美國。咱逐家攏是移民的後代，咱攏是外口人，包括Donald Trump你本身。美國就是按呢，才是偉大，才得著全人類的向望kap支持。今仔日咱來tòa美國嘛是因為這個原因。

第五，茂森兄轉去的所知叫做天堂，照我佇伊欲過身前一擺，我欲離開為伊祈禱，伊猶徛thêng-thêng，徛直直直，我祈禱了後，伊彼句大聲的“阿們！”互我驚一著。照我的了解，伊chím-má就是佇天堂。這個天堂就是咱的大自然，大自然就是咱的故鄉，叫做「永遠的故鄉」。咱的身軀埋佇遮，因為遮是咱的故鄉。全世界咱台灣人去到佗位，hia就是咱的故鄉，因為天父上帝活佇chia。咱活佇chia，嘛死佇chia，就是死佇這個永遠的故鄉 。咱對chia出來、拍拚、食飯，嘛欲tì-chiá歇睏，轉去。來來去去，代代無息，chia就是故鄉，chia就是咱永遠tòa的所在，chia就是咱的天國。

詩篇的作者佇46篇講：「佇創造天地的上帝面前，人啊，你著tiām-tiām！」佇創造天地的上帝面前，嘛會使講，佇偉大神秘的大自然的面前，上帝叫咱恬恬。「人啊！」是講所有的人，無論烏人、白人、黃人，無論美國人、台灣人、日本人、中國人，攏著tiām-tiām，毋通大聲細聲，枵飽吵！不但民族國家攏著恬恬，對你家己的四周圍的人，親人朋友，對教會會友，嘛攏著按呢，毋通kheng-hun怨妒別人卡gâu，人卡好額，人卡緣投，人卡gâu讀冊，人卡gâu講話，人卡有學問。意思是講咱佇上帝面前，人人攏著學習謙卑。保羅講：「咱著看別人比咱家己卡gâu、卡好」（腓立比2：3）。今仔日的美國是全世界最強的國家。美國人欲做世間的領袖、模樣，無應該喝講”America First!”，Trump 應該給世間人講 “America Last ”才著，來表示美國人的深度kap風度。我想這就是基督教的教示。

最後我愛講的就是：大自然互咱肯定咱家己，肯定咱家己的生命，肯定咱的存在，肯定咱活的意義，肯定咱欲活落去的方向。咱活佇這世間是活佇咱家己的生命、家己的心臟、家己的血壓、家己的目屎、家己的笑聲、家己的悲哀、家己的歡喜、家己的食飯、家己的歇睏、家己的思想、家己的感情、家己的意志、家己的存在的一切一切。咱毋是活佇外口的歷史、教條、規矩、傳統、口號，這攏是身外之物。

上帝活佇咱的心內。咱給上帝祈禱，實在是上帝佇咱的內心替咱祈禱，上帝經過咱家己的內心替咱給伊祈禱。咱無論按怎bē-hiáu祈禱，咱的祈禱無論按怎破碎，無論按怎thi-thi-thu-thu、無聲勢，無lam無nē，無gâu講、無好聽，但是這是咱家己的祈禱，最重要的祈禱，因為咱的話就是teh講上帝的話，咱的話就是講咱生命的話。咱毋免經過hia-ê gâu講話的牧師、和尚、童乩（tâng-ki）、神棍來替咱講話。咱家己來給上帝講話，上帝欲聽咱家己心內的話，因為聖經有寫講：「佇咱家己心內的靈，比hia-ê佇外口世界所有的靈攏，卡大！」（約翰一書4：4）