漫遊海賊王國

– 陳柏壽 牧師 –

這次kap牧師娘訪問Denmark、Norway及Sweden，這是通常人叫做海賊王國的所在。根據導遊的說明，海賊興旺的時代差不多是紀元第七世紀開始，彼時陣也是基督教開始傳入北歐的時代，基督教傳入北歐以後約有八百年攏是天主教傳教的勢力，後來接落去六、七百年，一直到現在，差不多完全變成新教的勢力，（絕大部分是路德宗）。

及咱台灣無仝款的所在，就是in佇紀元七世紀以前有千萬年的地方傳統宗教，佇基督教傳入以後，竟然完全消滅。現在只有流傳佇民間的神話故事、兒童小說、戲劇、地方的文化慶典，一切攏及宗教信仰無關係。

有一擺bus停佇一個小漁村的小教會，拄好看著教會為著一個少女舉行堅信禮，全莊腳的人攏出動，人人攏穿in家己上媠的傳統的服裝，查埔人攏戴帽仔，查某人頭毛攏插花，gín-á攏佇教會門口跳舞。In攏真歡迎阮這群「不速之客」來加入歡喜的慶典，互阮感覺著信仰的純情及溫暖。

講著「海賊」咱隨時想著彼個chhun一蕊黑目睭，手giâ大刀，去到佗位攏搶劫、刣人、放火的大歹人。但是照in的導遊的講法，最根本的是北歐的地理因素。北歐地頭kek寒，攏是山頭lo̍k-kok，無田通耕，只有向外發展；搶著的財物chah轉來故鄉建設。所以今仔日的Copenhagen, Oslo, Bergen, Stockholm存留真濟寶石貴器，攏是彼時代遺留的產物。總講就是：海賊的形成kap發展，就是為著in家己民族的生存。一直到基督教傳入，開始有道德規範，銳變做一個完全新的國家。

近年來佇波斯灣口的Somalia，時時有海賊發生。佇東京有一位真出名的sushi店的頭家，家己走去Somalia給海賊頭講：恁去附近阿拉伯海掠tuna魚，我保証全部收購。海賊頭用頭殼想想leh，感覺真有道理：做海賊真艱苦，嘛真危險；掠tuna真簡單，趁錢閣卡濟。所以決定逐日歡喜去掠漁，攏變做伊特約的漁民。這就是今年以來咱真少看著波斯灣發生海賊的原因。

文明kap野蠻的分野可以講是煞那的改變。古早真野蠻的北歐佇真短的時間變做真文明的所在。In kap咱最大的不同在佇 in的社會有經過一個劇烈的改變，民心kap社會有經過真強的衝擊，新的思想kap制度互in變做一個完全新的國家。咱台灣新的思想kap制度kap舊的社會的傳統，同時停留佇hia，濫濫摻摻，無法度更新。

北歐的新的人文思想，可以講是徛在世界的前端。人口真少，但是人心活跳，Norway只有差不多五百萬人，Denmark嘛是差不多五百萬人，Sweden差不多有九百萬，但是因攏佇全世界發展，各地攏有傑出的人才。佇街路kap因交談，攏真有風度。

有看著安徒生童話作家（Hans Christian Andersen)的古厝(近Copenhagen）真樸素。Grieg（格里格）音樂家的古厝是在Norwey的海邊的小庄腳，伊的培爾金特組曲（Peer Gynt Suites) 是我真喜愛的作品，佇伊的厝可以鼻著伊的單純的精神。另外參觀易卜生(Ibsen)的厝，互人感覺一個反骨作家的精神。

佇瑞典首都靠近旅館有魚市場，看著當地出產真濟細隻的小紅蝦（ama-ebi），價數閣俗，有一位對高雄來的台灣女青年嘛佇hia做工，招呼人客攏用台灣話，真親切。食穿用物件真貴，因為攏加25%的稅金。社會福利真好，人人醫療攏免費，去學校讀冊一直到大學攏免錢。

我想北歐人的人文思想kap進展真值得咱台灣人學習。