慶祝十年人性ê光輝

– 陳柏壽牧師 –

關懷台灣基金會beh出版紀念集，要求多年來受恁支持ê「台文通訊–聰美姊紀念基金會」寫幾句á紀念性ê話，小弟認為非常有意義。「台文通訊」自出版以來，受著chē-chē海外ê台灣人ê鼓勵kap鞭撻，hō͘阮全體同仁無論遇著啥物大ê困難kap阻擋，攏繼續辦落去。今年已經經過四年，阮有這個成績，最大ê功勞者，完全就是親像chē-chē關懷基金ê兄弟姊妹，tī阮後面暗中ê支持、期待、鼓勵、指導ê結果。「台文通訊」會繼續活落去，就是關懷基金ê每一人台灣心bē死ê證明。

這幾年來聰美姊紀念基金會所發行ê二種雜誌：「台文通訊」kap「台灣百合論壇」，阮所遵守ê原則kap精神，實在就是關懷基金會ê精神。關懷基金ê眾兄姊真少人出名出姓，無人計較付出外chē會得著外chē回報。人人只有暗暗teh獻心、獻錢、獻時、獻生命，只有為著一個看bē著ê遙遠ê理想—台灣人出頭天、台灣文化出頭天、台灣國家出頭天。世間ê名聲、地位、權勢，對關懷基金ê兄姊來講，攏無比這項至高ê理想koh khah重要。

古早三十外冬前，聰美姊kap咱仝款流浪他鄉tī天涯kap海角teh生活，日日除了工作作醫生，義務看顧貧赤ê病人，照顧養飼六位子女。Tī這個代誌以外，伊內心上深ê所在上大ê負擔，就是m̄甘願看著家己故鄉ê親人朋友，日日生活tī兇惡橫霸ê戒嚴令白色恐怖內面，日日生活tī真無平安ê世界內面。聰美姊ê人生kap咱每一位關懷基金ê兄姊仝款，為著現實生活拍拚、顧三頓、扶養教育子女等人情世事ê代誌真chē，但是伊kap咱上仝款ê所在，就是ài hō͘理想ê火tī咱ê生命內面to̍h落去，m̄甘願屈服tī現實世界，m̄甘願hō͘宿命kap絕望贏過，m̄甘願作中國人ê政治kap文化ê奴隸，心m̄甘願死。

咱大家今生有幸或不幸攏來離鄉背井，越千山過萬水來異鄉討食生活生根，咱每人ê心懷攏背（phāiⁿ）著咱台灣民族ê歷史、人種、文化ê重擔來生活tī美國，另外亦背負著咱ê民族ê信心、自負kap無限ê潛能，來展望一個新ê競爭、融合、希望、多彩ê未來世界。這種特殊ê心境ê背景差不多是tòa tī故鄉島內ê父老鄉親所無法度体驗著ê所在。

咱bē-tàng否認世界上每一個民族，攏會認定家己是最優秀最好最富潛能ê民族。尤其tī美國這種多民族共存ê社會，「自民族中心思想」(ethnic-centrism)自然是民族間調和折衝ê基本出發點，che是真健康ê現象。對家己民族ê文化ê自負kap信心，不但m̄是造成互相對立衝突ê因素，反轉就因為按呢，這社會各民族才有法度充分發揮各民族上súi上高ê文化特點，互相尊重，來貢獻hō͘這社會，形成千千萬萬súi ê花蕾，發揮出一個國家上蓋大ê潛能kap人力ê資源。台灣人半世紀受「我們都是中國人」ê教育，漸漸喪失對家己民族ê信念。

Tī北美洲生活ê台灣人差不多真容易瞭解這點真簡單又清楚ê社會現實，深深瞭解一位真正堅持家己民族kap文化語言ê風格ê人，tī美國ê社會愈受人尊重；愈會曉講台語ê台灣子弟，m̄-taⁿŽ英文ê運用愈會通達，伊四圍ê男朋友女朋友，比hia ê只有beh學作美國人，只會曉講美國話ê人，加khah chē，加khah 有人氣。

中國人tī台灣統治半世紀，造成上大ê失敗kap傷害，就是教台灣子弟hō͘ bē記得伊是台灣人，教台灣人mài注重家己súi ê文化、語言kap文字，希望台灣人失去作一位台灣人ê信心kap驕傲。Che就是今á日台灣社會混亂不安ê主兇：因為tī台灣人ê心靈中，無民族ê母胎照顧，無文化ê皮膚保護，無自傲ê民族意識作前導，人人hō͘中國主體ê文化ê壓迫欺侮，人人hō͘中國文化剝皮，人人ê心靈流血流滴，生活tī一種無依無žóa ê孤單悽慘ê境界；所以日常生活「銷可」 就會受氣，人人ê心靈脆弱自私，生活tī一種慘白無情ê人生，造成一個無色彩、無特色、無風格、無骨氣ê社會、變作世界無人尊重、無人承認ê孤兒狀態。

經過西洋自由主義洗禮過ê台灣人，已經體驗著台灣人建國上大ê危機kap瓶頸，是在tī文化語言ê恢復kap民族意識ê重建。咱現代台灣人唯一亦是最高ê使命，就是tī這個所在。咱m̄-niā tio̍h-ài tī海外訓練發揚創造更新咱ê文化，同時tio̍h將咱ê作品kap成果傳播轉去島內。以色列亡國二千五百冬才開始tùi廢壞ê古典中拾轉in ê文字，創造in ê文化；咱台灣人比起以色列人條件好真chē，咱比以色列人khah容易成功，咱亦一定會成功。

「關懷」是代表物質、肉體、精神、文化ê綜合。關懷絕對m̄是kan-taⁿ物質金錢ê「救濟」或是「援助」。關懷是用人性同胞ê立場、kap受苦ê人同受苦，用仝一個心肝，用正義戰贏社會無義，用平等ê心胸kap草根階層所有受苦ê大眾，作伙來beh起造台灣人獨立建國ê信心。

「關懷」ê兄姊比「台文通訊」ê同仁早出世六年久。Tī這個十年久長ê歲月中，恁持守努力台灣最高ê人性光輝，所以恁親像大兄teh牽小弟，繼續beh向著台灣人無限ê未來，手牽手，行出一條出頭天ê大路。

(本文刊載tī New Jersey ê關懷台灣基金會ê紀念冊)