第三以賽亞時代ê台灣人kap約翰ê啟示錄

– 陳柏壽牧師 –

近代台灣人ê獨立運動史會tàng比phēng以賽亞書形成ê三個階段。以賽亞是一本延連二百五十年才完成ê以賽亞學派ê作品；第一以賽亞(第1到39章)寫成ê年代，可能是西元前740-700年中間，猶大猶未亡國，大衛王朝猶管理耶路撒冷ê聖殿；第二以賽亞(第40到55章)完成可能是tī西元前第六世紀 (546-538B.C.)，以色列人受掠去巴比倫，聖殿已經受毀，波斯帝國tú beh興起；第三以賽亞(第56到66章)是波斯王容允以色列人回鄉重建聖殿以後 (538-520B.C.)所寫出來ê冊。

第一以賽亞描寫ê是嚴格ê指責、警戒kap控訴。猶大國因為無忠實tī家己ê信仰，政治腐敗，所以先知喝出「災禍就在眼前」ê預言，以色列beh「親像山頂風前ê米糠，親像旋風前ê土粉」，國家ê力量beh「親像橄欖樹ê枝尾，只剩二、三粒果子」，無tap無sap ê國家。Che是一本充滿悲哀ê詩歌。

六十年代到八十年代ê台灣是充滿白色恐怖ê時代，海內外有台灣心ê人對國家ê前途是一片悲哀，尤其是海外ê台灣人因為有自由ê環境，就從事啟蒙教育、警誡、反抗ê工作。Che是一段真久長ê歲月，kap第一以賽亞仝款，in相信國家tī這種獨裁、暴力、混亂、威脅ê狀態之下、一定會導向滅亡。

第二以賽亞是一本充滿著美麗、幸福、感謝、樂觀ê詩篇。因為波斯ê開放，政治鎖鍊ê解除，猶太對家己ê故鄉有新ê期待，對未來世界有新ê展望，你tio̍h「報好消息hō͘耶路撒冷，tio̍h登高山報好消息。」，航海ê kap海島上ê居民，攏tio̍h唱新歌」，上帝beh tī「曠野開道路，tī沙漠開江河」，波斯ê古列王是「救世主」，是上帝聖旨設立ê「牧人」，上帝「hō͘雨雪對天降臨，滋潤地上」。

八十年代到九十年代ê台灣，亦親像第二以賽亞ê時期。黨禁、報禁、戒嚴令廢除，萬年國代ê退位，大地充滿新希望，海外ê台獨運動者開始U-turn回鄉，準備開拓新天地，重建聖地。

但是，進入第三以賽亞ê時代，情形大大改變。回鄉ê猶太人受著在地ê巴勒斯坦猶太人ê輕視kap欺負，起造聖殿ê工作bē順利。最嚴重ê打擊，就是看著故鄉家己ê父老兄弟，一個一個bē記家己ê根，喪失猶太人原來ê信仰理念以及純全ê文化。日暝思念ê故鄉，竟然是一片失望ê土地。這群回鄉ê猶太人，tī失望中發現in流浪tī外邦巴比倫竟然是上帝ê好旨意，重新對移民生涯ê運命有新ê認識kap定位。In發現in才是上帝真正ê百姓。Tī失志ê中間，詩人ê靈眼(clairvoyance)看著一個「新ê天kap新ê地」，tī hia「不再聽見啼哭ê聲音 」，tī hia「豹狼羊羔同食，獅á食草親像牛，蛇只有食土粉」。

進入九十年代以來，海外ê chē-chē台灣人突然發現in所日日思念ê故鄉，竟然是一個「面目全非」ê世界，是一個母語文化喪失，環境生態破壞，人間性真少，動物性真chē ê所在。台灣是tī一種「惡性共生」ê狀態，人人teh搶錢、騙錢、食錢ê所在。台灣人開始teh深深反省「台灣獨立」ê khah深khah koân ê意義，開始探討對海外台灣人保持台灣心、台灣文化、台灣語文運動ê價值，開始對移民人ê運命kap人生觀，有新ê肯定、認同kap安慰。

第三以賽亞時代ê靈眼所看ê新ê天地，實在是看見最原始創世初期ê，巴別塔以前ê世界。Tī hit個世界ê內面，人ê心靈會tàng直接kap上帝交通，交通免用語言，是用心靈。Tī hit個「良性共生」ê世界內面，無啥物善惡之分，蛇、獅、豹、狼本身攏是善ê共存。人間最初ê世界kap最後ê未來世界、攏是一種「樂園」ê景況。

今á日有chē-chē台灣人用看「新ê天地」ê眼光來看台灣，認為中國人所留落來，所教育ê文化，就是台灣文化，認同中國人所留落來ê統治機器kap政府是一種「不可避免」ê惡，「國統綱領」是基本大法，中台必須混同，甚至比phēng李登輝做波斯ê古列，奉伊做上帝抹油ê彌賽亞，是救世主。所有中國政治kap中國文化ê惡質，攏會tàng當做良性ê共生，會tàng用樂園世界ê眼光去款待。Che是一種真深、真嚴重ê誤導。

人ê生存所注定ê運命m̄是活tī單單看著新天地ê最原始或是最終末ê樂園，最偉大ê終末論ê作者約翰，用伊ê「靈眼」所「看」著ê另外一面，就是樂園世界beh來以前，代先咱tio̍h接受「火」ê洗禮，新天地來臨以前，所有ê「海島眾山攏逃避不見」，「海beh交出其中ê死人，死亡kap陰間亦交出其中ê死人」，「地上四方列國攏beh聚集爭戰，人數多如海沙」。Tī約翰ê心目中，kap第三以賽亞無仝款ê所在，就是上帝beh「擦去所有世間人ê目屎」以前，「城門m̄免關門」，亦無烏暗來臨以前，人kap上帝需要作伙kap惡爭戰。爭戰是人間不可逃閃ê命運。以賽亞看著最原始kap最後尾ê絕對和平ê世界，但是約翰是看著明á再kap今á日ê真實ê爭戰ê世界–善kap惡對立ê世界。

生活tī第三以賽亞時代ê台灣人，tio̍h-ài繼續第一以賽亞ê精神，更加tio̍h深深體會到約翰所「看」著ê種種世界一定會面臨ê運行規則 –「爭戰」–ê真正意義。第三以賽亞，無m̄-tio̍h，是一個真súi ê世界，亦真合久長受中國文化侵蝕ê台灣人ê心境，但是海島ê台灣仔應該猶有純全ê心靈，清楚ê靈眼，知影「爭戰」是咱ê運命，「對立」雖然歹行，卻是咱tio̍h行ê路。理想世界是一種「期待」，「台灣人出頭天」ê新天地m̄是tī「期待」中會tàng看見ê，一切攏決定在戰鬥。咱只有tī爭戰ê中間，才一定會發現著一個新ê天kap新ê地。