文化對話ê前提kap基礎

– 陳柏壽牧師 –

這個月beh tī Houston舉行ê台語文夏令營會使講是tī美國台灣人建國運動中，進入一個新ê層次ê里程碑。幾十年以來海外ê獨立運動幾乎全部精神攏灌注在政治層面ê獨立運動，用在文化方面ê獨立運動非常有限。經過這幾年ê社會環境ê變遷kap考驗，今á日chē-chē台灣人有志才開始認識政治舞台真正不過是這種「舞台」：演劇ê成份比獻心定根ê成份khah chē。這種舞台有伊ê局限、膚淺、無根ê一面。聯盟返台四年後ê今á日，經過台灣社會民心ê沖激，最少在美國本部部份，對咱再次出擊ê方法、進路kap目標，已經有新ê重估kap修正。蔡主席受大家ê愛載受膺選為本屆台語文夏令營ê主席。

聯盟最高不變ê目標，是建立台灣作一個自主獨立ê國家，是beh結合所有人民團体ê力量，結合海外kap島內知識階級ê智慧kap意志，來推翻中國人ê統治結構。面臨這種雄大ê不可抵抗ê建國目標，連國民黨ê主流派人士亦tio̍h投降。「獨立」已經形成歷史不可回頭ê巨流，無人會tàng抵擋。這是台獨聯盟已經建立ê最大ê貢獻。

但是聯盟是一個活ê機体，一個目標建立以後接落去就是另外一個目標ê出發。今á日ê聯盟已經m̄是kan-taⁿ喝政治獨立來生存ê團体，今á日ê聯盟有一個khah深khah艱難ê目標，就是結合人民大眾，爭取知識階級ê支持，來重新建立台灣文化ê主體性。文化是咱國家ê本質kap內涵，文化是咱民族ê人格kap驕傲，文化是咱存在tī今日世界唯一ê基礎。聯盟這個團体最大ê力量並m̄是在tī伊高超偉大ê目標作專利，是在tī伊不斷老老實實面對社會現實ê挑戰ê一種勇敢戰鬥ê力量。今日台灣社會對聯盟最大ê挑戰是文化ê戰場，聯盟tio̍h老老實實認清文化問題ê嚴重性，重整伊戰鬥ê雄風，活活領導台灣子民，不斷「運動」，應付挑戰，帶台灣人踏入一步新ê文化戰場ê勝利。

目前台灣文化在台灣ê現實世界內面，處在一種最大ê危機蜘網 (delimma) ê狀態。這個蜘網就是台灣人敢堅持台灣文化ê特色。台灣文化在混同中退縮、脫水(kiu-chúi)、失敗。面對文化kap意識型態ê混同，台灣最大ê族群放棄伊族群ê基文文化kap基本主張，來自己委曲、矮化、自滿。

台灣人上驚人講伊是「河洛沙文主義者」，主要問題在tī伊無清楚啥物叫作沙文主義。沙文主義bē-tàng kap文化ê自然運作相提並論。沙文主義是一種意識型態，利用高壓ê政治運作kap手段，來達成支配、操縱、橫霸其他族群kap文化。用另外一句話就是「帝國主義心態」。

台灣文化語言受摧殘一世紀到今á日，己經淪落作一種無地位ê奴隸，面臨著受淘汰ê嚴重危機，怎樣有可能講台灣文化有沙文主義？怎樣在這種嚴重危機ê時代，台灣人無尊重自己最大多數族群ê文化地位，來附和混同意識無清、道理無明ê政治口號呢? 台灣人應該了解beh「尊重」、「包容」、「認同」以前，代先tio̍h尊重自己、看重自己。認明自己ê文化定點kap特色並m̄是「沙文主義」，顛倒是一種拍破「沙文主義」最好亦是唯一ê一條路；因為若無認同自已ê文化定點kap特質，就是容忍外來ê文化利用政治ê運作，來壓迫、破壞、消滅咱自已ê文化，實質上是teh促成沙文主義ê擴張。

提倡台灣語文運動實在講起來是一種文化ê再生、包容kap 康復ê運動。不但台語文需要再生康復，客語文kap原住民ê文字mā需要再生康復。「嘴講台語，手寫台語文」mā應該唸作「嘴講客語，手寫客家文」，或是「嘴講阿美族語，手寫阿美族文」等等才tio̍h。台灣文字過去m̄-bat hō͘統治者尊重作一個多數族群ê地位，並m̄是講台灣文就會tàng用多數族群ê勢力去壓迫小數族群ê文字；小數族群ê文字過去hō͘歷史ê統治者破壞到m̄成(chiâⁿŽ)形ê今日，並m̄是講小數族群因為按呢就會使隨便冤枉台語文teh「沙文主義」，或是有理由hō͘伊繼續維護統治者ê政治迫害ê語文。

維持一個多文化多族群社會ê秩序ê一個基本原則是「尊重多數、尊重少數」。這個原則會thang用亦bē？會！尊重少數是多數族群ê義務；但是尊重多數不但是多數族群ê權利，亦是少數族群ê義務。尊重少數並m̄是講少數族群會使運用政治手段來橫霸多數族群ê文化遺產。尊重少數ê一項最基本ê意義，在確認少數族群文化ê生存空間kap生長ê權利，進一步鼓勵少數族群自力更新、自我更定、自求多福。少數族群自己堅守伊家己ê文化地位、定點kap特質，堅守tī台灣社會ê生存空間ê時，台灣文化生態就會自然排除沙文主義。

多文化多語言絕對m̄是互相對立互相抵消力量ê因素；顛倒péng，多文化多語言是起造一個偉大結實ê民族ê基礎要因。多文化多語言ê互相尊重基礎雖然是「尊重多數、尊重少數」，但是「尊重多數」猶是最大ê前提，che亦是民主精神最大ê理想kap原則。互相尊重就是肯定各民族文化語言ê地位kap尊貴；只有各族群努力khiā在伊自有ê文化定點，才有可能作文化交流kap對話 (dialogue)。無自我定點ê對話，只有陷落沙文主義ê陷阱，若是陷入去河洛沙文主義、客家沙文主義、原住民沙文主義，亦無就是陷入去大漢沙文主義ê陷阱。Che攏是社會動亂ê源頭，無法度互相「對話」。各族群對自已ê文化忠實，雖然帶有「原旨主義者」(fundamentalist) ê氣昧 (che是最近一kóa中國人teh批評「台文通訊」所用ê字眼) ，che mā m̄是外bái，人人本來就應該忠誠伊ê文化母体ê定點。問題是這個人無認識到「台文通訊」是一群真有理性、有良心、無出名ê在美國ê台灣知識人ê產品，tī伊ê良知內面完全無沙文主義ê成份，無教條主義ê傾向，亦無政治權勢虛華名聲地位ê誘因。

台獨聯盟過去tī戰鬥中生存，今á日、明á再mā會繼續tī戰鬥中生存，因為台獨聯盟ê志士無論河洛客家原住民，甚至包括認同台灣ê中國新移民，伊攏知影台灣各族群文化語言ê定點kap價值，各族群beh認真維護各有ê文化語言，che是建立台灣國族群共生繁榮ê最大基礎。文化是母根(essence)，政治不過是浮tī頂面ê現像(phenomenon)，有好koh健康ê母根kap本質，才會有好koh健康ê外面ê現象，各族群需要認真拍拚來建立一個正確ê對話基礎。

(本文刊載tī台灣公論報社論，7-1-95)